SOS, fëmijët në rrezik!

Fëmijët, pjesa më e brishtë dhe më e pastër e njeriut, ato që fundi i fundit përbëjnë gjithë kuptimin e egzistencës njerëzore, sot po cënohen jo vetëm nga sëmundjet, uria, por dhe nga kafshëria më e egër seksuale, pedofilia. Në kohët e sotme fëmijët nuk janë të sigurt askund, edhe pse pedofilia deri më sot në familjet shqiptare duket sikur nuk ka zënë vend. Jo se nuk egziston, fenomene të tilla ka patur dhe do ketë gjithnjë. Ndoshta traditat shqiptare duket sikur i kanë vënë parametra më të sigurta familjes, por fakti që shoqëria jonë nuk është akoma aq e civilizuar, dhe mbi të gjitha nuk është e mbrojtur deri në fund nga shteti dhe nga faktorët socialë, bëjnë që shumë fëmijë me abuzime të tilla të durojnë dhe të ulin kokën, sikur asgjë nuk ka ndodhur në jetën e tyre. Shumë mama të shtrënguara nga robëria mashkullore, ulin kokën dhe vazhdojnë të lajnë rrobat e të konstatojnë me dhimbje dhe përulshmëri këtë lloj dhune. Në fakt jeta e tyre ka marrë fund. Ajo dalëngadalë ka nisur të kalbet nga rrënjët dhe do jetë gjithnjë një dru i shtrembër që do rrëzohet në pragun e vesit.

Luli, mama 30 vjeçare.
“Kam dy fëmijë dhe jam e tmerruar nga lajmet që dëgjoj për pedofilinë. Është tmerr të rrisësh fëmijë në kohët e sotme. Përveç faktit që duhet t’i ruash nga rreziqet e aksidenteve, sot duhet t’i ruash dhe nga njerëzit. Çdo moment që fëmijët e mi lozin në oborr, e kam mendjen tek ta”.
Ariana
“Jam detyruar prej fëmijëve që të lë punën time. Edhe pse jam e diplomuar, më duhet që t’i shoqëroj fëmijët e mi nëpër shkolla dhe më pas t’i marr dhe të kujdesem dhe kur ato lozin nëpër parqe apo në oborrin e pallatit. Kanë ardhur pak kohë të këqija. Dhe unë e them me dhimbje që përsëri nuk jam e qetë, sepse po dëgjojmë që pedofilia ka nisur të evidentohet dhe nëpër shkolla”.
Ariani
“Është perversiteti më i madh njerëzor në ditët e sotme. Nëse do evidentoja një pedofil të ngacmonte fëmijën tim, do e mbysja me duart e mia, edhe pse do bëja një krim”.
Natasha
“Djali im është përdhunuar nga një pedofil para tre vjetësh. Unë jam e divorcuar nga im shoq, dhe fakti që jetonim vetëm ka ndikuar në abuzimin ndaj djalit tim. Tani djali është një fëmijë me probleme të mëdha, mbi të gjitha ka humbur besimin tek njerëzit dhe tek e ardhmja. E ndiej veten çdo ditë keq që më ndodhi mua, dhe fëmijës sim. Pedofili nuk është kapur, dhe ajo që vuan në këtë rast jam unë dhe zgjidhjet e mia. Pedofilët gjuajnë rastet e familjeve me probleme, dhe të fëmijëve që janë vetëm”.

Ç’është pedofilia?

Pedofilia është një sëmundje. Organizata Botërore e Shëndetit e ka futur në listën e sëmundjeve të sjelljeve seksuale. Është patologji psikiatrike që futet tek parafilitë, shqetësime që sjellin tërheqje për anomali, për objekte të animuara, që në këtë rast janë fëmijët. Patologjia e pedofilëve është me natyrë psikiatrike, por nuk ka lidhje me kromozomet, hormonet ose genet. Njerëzit që e bëjnë janë jo psikopatë dhe kështu që duhet të ndiqen penalisht. Përsa i përket kurave që mund t’i bëhen pedofilëve janë dy: tredhja kimike, duke korrigjuar profilin hormonal dhe shërimi i shqetësimit psikiatrik. Në rastin e parë reduktohet testosteroni. Në rastin e dytë nga ana psikiatrike pedofilia manifestohet si obsesion dhe si shqetësim i afeksionit.

Kush mund të quhet pedofil?

Një person që ka kaluar 16 vjeç, që është pesë vjet më i madh se viktima dhe që kryen marëdhënie seksuale me fëmijët para pubertetit, quhet pedofil. Në fakt pedofilia shprehet tek njerëzit që e kanë kaluar adoleshencën. Tërheqja ndaj vogëlusheve femra është më e shpeshtë dhe kryesisht ndaj vajzave në moshën 8-10 vjeç, ndërsa meshkujt janë pak më të mëdhenj. Subjektet me pedofili shprehin impulset e tyre me fëmijët duke i zhveshur fëmijët, duke i vështruar, duke i treguar organet e tyre, duke masturbuar. Ndërkohë që një pjesë tjetër kryejnë marëdhënie të vërteta seksuale duke e justifikuar që ato kanë vlera edukative për fëmijët ose që i sjellin dhe vetë fëmijëve kënaqësi të tilla. Këto janë argumente shumë të përdorshme tek pedofilët. Në raste të ndryshme në gjithë botën abuzimet kanë qenë me fëmijët e tyre, me fëmijët e birësuar apo me të huaj të tjerë. Pedofilët i frikësojnë fëmijët me forma nga më të ndryshmet. Shumë herë kanë ndodhur që pedofilët kanë adoptuar fëmijë nga vendet e botës së tretë, por shumë herë janë rrëmbyer dhe nga vendet e varfra, ose janë shitur nga njerëz të pandërgjegjshëm.

Si veprohet me fëmijët që kanë pësuar këtë lloj dhune

Rasti i fundit i vajzës nga Vlora, ngriti përpjetë opinionin publik shqiptar. Fëmijët që kanë pësuar dhunë nga personat pedofilë, sipas psikologes duhet të kalojnë menjëherë nën kujdesin e shoqatave dhe të personave të kualifikuar. Në këto raste prindërit nuk mund të bëjnë asgjë për të kthyer gjërat në normalitet. Duhet një kurë e vërtetë psikologjike, për të kthyer fëmijën në normalitet, në jetën e saj, ku nuk egzistojnë akoma abuzimet dhe kur dashuria ka ngjyrën e bukur dhe romantike të moshës. Vajza u trajtua me shumë kujdes nga personeli i shoqatës “Vatra”, ku trajtohen personat mbi të cilat është ushtruar dhunë. Por ajo që është më e rëndësishmja është hartimi i një ligji të veçantë për mbrojtjen e fëmijëve, sidomos në ambientet e shkollës. Është vendi ku ato përveç familjes mësojnë parimet më të rëndësishme të jetës, dhe vend ku parashtrohen ligjet e së ardhmes.


Hipokrizia mbarëbotërore mbi pedofilinë

Herë pas here kur ngjarjet ndodhin, duket sikur një ortek i kap të gjithë, politikanë, gazetarë, media në gjithë botën. Dhe akuzohet pa fund…pa fund. Por ajo që tingëllon e pastër fare në gjithë këto mori deklaratash është hipokrizia e madhe. Violenca mbi të miturit është një e keqe e përhapur jo vetëm në vendet ku fëmijët zhvirgjërohen nga padituria dhe injoranca, por dhe në vendet më moderne të planetit. Ajo që shihet nuk nevojë për koment. Sot komentin duhet ta bëjë ligji, dhe ai në kësi rastesh duhet të jetë me të vërtet i ashpër. Rastet shqiptare tregojnë që pedofilët shqiptarë janë futur pak muaj në burg për tu liruar, dhe më pas për tu rindaluar përsëri për të njëjtat akte. Nuk ka një ligj të saktë mbi pedofilinë, nuk ka kura imediate për shërimin e tyre, dhe në pjesën më të madhe pedofilët mbahen në burg njëlloj si të burgosurit e tjerë.

Ja një realitet shokant

“Kam menduar gjithnjë se nëse do gjendesha ballë për ballë një pedofili do ta mbysja me duart e mia. Tani po ju tregoj me lot në sy që gjendem një hap…larg pedofilisë. Më çmendin vajzat e vogla që këndojnë dhe kërcejnë në televizor. Ato vajza me bark jashtë me kërthiza provokante që i shohim nëpër stacionet televizive, të lyera, show girl të vërteta”.

Dhe është një fakt shokant. Vajza minorene të trukuara dhe të veshura në mënyrë eksituese që u jepen si ushqim konsumist të gjithëve. Më parë kur nuk egzistonte televizioni, një abuzuesi i përgjigjej një abuzues, por nuk bëhej fjalë për një psikopatologji sociale. Në 21 qershor komuniteti i pedofilisë internacionale celebron “Boyloveday”, ditën e e krenarisë pedofile. Dhe të gjitha televizionet e botës nuk do pasqyrojnë aspak ulërimën mbarënjerzore dhe alarmizmin ndaj kësaj dukurie të ndyrë njerëzore.

Pedofilia në rrjetet internacionale

Si të gjitha trafiqet, edhe pedofilia sot po ushtrohet me qëllime fitimi nga rrjetet kriminale internacionale. Sipas të dhënave të fundit dy milionë e gjysëm fëmijë në gjithë botën janë të detyruar çdo vit të prostituojnë në vende të ndryshme të botës dhe sot çmimi i prostitucionit pedofil kap vlerat mbi dy milionë. Në muajt e parë të 2003 janë zbuluar shtatë mijë site pornografike, njëri prej të cilëve i kapur nga policia italiane kish patur brenda një kohe të shkurtër 78 mijë kontaktime nga navigatorët e internetit.

Interneti, një rrezik i vazhdueshëm


Një pjesë e madhe fëmijësh bien pre e pedofilisë nga interneti. Rasti i vajzës nga Masaçusetsi, një15 vjeçare e cila duke naviguar në internet njeh dikë që i tregon se donte të ikte nga shtëpia. Perversi seksual e kontakton në internet duke e bindur se do ta ndihmonte për vendimin e saj. Kështu e mban në shtëpinë e tij, ku abuzon disa herë seksualisht, e keqtrajton fizikisht dhe bën mbi të një radhë aktesh çnjerëzore dhe poshtëruese. Rrëmbyesit e mbanin vajzën në një banesë në New Jork, ku pas disa ditësh ajo arriti të lajmërojë policinë dhe të marrë ndihmën e tyre. Anonimiteti në Internet u jep mundësinë shumë personave të paraqiten me emra të rremë. Fëmijët dhe adoleshentët krijojnë intimitet me persona të panjohur, dhe pa dyshim që bien pre e abuzimeve të tilla.
Nëse fëmijët tuaj do kenë kontakte të tilla në internet, është detyra e të gjithëve, mbi të gjitha e prindërve të lajmërojnë rrjetet internacionale si (Internet Relay chat), (Netmeeting chat web) duke i kaluar testet origjinale siç ju a kanë sjellë.

Box: Si mund t’i mësojmë fëmijët për të shpëtuar nga ky rrezik
-Duhet që fëmijët të na thonë se ku shkojnë dhe më kë.
-Duhet t’i shpjegoni që s’duhet të flasin më të huaj dhe nuk duhet të ndjekin persona që prindërit nuk i njohin
-Duhet që fëmijët të mos lejojnë të preken nga të tjerët, në mënyrën që atyre nuk i pëlqen
-Nëse ato preken duhet të bërtasin dhe të kërkojnë ndihmë.
-Duhet që fëmijët të konfidohen me prindërit
-T’i inkurajojmë fëmijët të mos kenë sekrete
-Fëmijët duhet të mësohen që prindërit i kanë për gjithçka.

Shoqëria njerëzore është duke kaluar drejt perversitetit. Por megjithatë jeta vazhdon. Njerëzit martohen, mbrojnë dashurinë e tyre e jetojnë dhe lindin vogëlushë të mrekullueshëm që do të jenë progresi ynë .
Pastërtia e tyre është e shenjtë…
Mbroni fëmijërinë e tyre!