Ditë e shënuar në jetën e një bashkëpunimi

Fondacioni “Zgjidhja e Konflikteve dhe Pajtimi i Mosmarrëveshjeve” (FZKPM) u themelua në dhjetor të vitit 1995 nga një grup specialistësh të drejtësisë, sociologjisë dhe kulturës. Ky Fondacion është një organizatë joqeveritare dhe jofitimprurëse që jep ndihmesën e vet në demokratizimin e shoqërisë shqiptare nëpërmjet zgjidhjes me ndërmjetësim e pajtim të mosmarrëveshjeve që lindin ndërmjet individëve apo grupeve sociale, si dhe edukimit për paqe, mirëkuptim e tolerancë. Për kontributin e dhënë në zhvillimet e demokracisë dhe shoqërisë civile, në vitin 1998 Fondacioni është vlerësuar me çmimin ndërkombëtar, dhënë në bashkëpunim nga Shtetet e Bashkuara të Amerikës dhe Bashkimi Europian. Në periudhën 1995 – 2003, Fondacioni u mbështet në veprimtarinë e tij kryesisht nga qeveria daneze, ndërsa duke nisur nga viti 1999 e në vazhdim ai ka pasur mbështetjen e qeverisë norvegjeze. Në vitet e aktivitetit të vet FZKPM ka pasur edhe kontributin e çmuar të një numri të madh bashkëpunëtorësh shqiptarë e të huaj, puna e të cilëve për promovimin e vlerave të paqes, mirëkuptimit dhe tolerancës në Shqipëri ka ka qenë mbresëlënëse. Bashkëpunimi me Znj. Karen Kristin Paus, kriminologe, Këshilltare në Shërbimin Norvegjez të Ndërmjetësimit me qendër në Oslo të Norvegjisë, padyshim që zë një vend të veçantë në historikun e këtyre bashkëpunimeve.

Zonja Karen Kristin Paus ishte nismëtarja e vendosjes së bashkëpunimit midis Fondacionit “Zgjidhja e Konflikteve dhe Pajtimi i Mosmarrëveshjeve” dhe “Shërbimit Kombëtar Norvegjez të Ndërmjetësimit” në vitin 1996. Ajo është koordinatore e programit të përbashkët “Bashkëpunim ndërmjet ekspertësh dhe shkëmbim njohurish dhe përvojash në fushën e ndërmjetësimit për zgjidhjen e konflikteve”, i nisur në vitin 1999 e në vazhdim, financuar nga Ministria e Jashtme e Norvegjisë. Në sajë të mbështetjes së dhënë nga Qeveria Norvegjeze dhe ekspertizës së dhënë përmes programit të përbashkët për Qendrat e Ndërmjetësimit dhe rrjetin e ndërmjetësve, është mundësuar të trajtohen dhe të zgjidhen me ndërmjetësim nga viti 2000, mesatarisht 2100 deri në 2200 konflikte civile, familjare, e penale në vit.

Në kuadër të këtij programi të përbashkët, janë organizuar konferenca, ëorkshop-e dhe seminare të përbashkëta me pjesëmarrjen e ekspertëve dhe ndërmjetësve norvegjezë dhe atyre shqiptarë. Znj. Paus ka bërë të mundur që gjatë këtyre viteve, ekspertë të instancave më të larta të gjyqësorit norvegjez të trajnojnë me dhjetëra prokurorë, gjyqtarë dhe magjistratë shqiptarë në fushën e ndërmjetësimit.
Jam e gatshme për bashkëpunime të tjera me Shqipërinë në këtë fushë, dhe tani sigurisht më e frymëzuar pas kësaj dite të veçantë për mua me marrjen e kësaj medaljeje.

Intervistë me Karen Krsitin Paus , Koordinatore e projektit te përbashkët Norvegji –Shqipëri ne fushën e Ndërmjetësimit

Zonja Paus, duke ju uruar për dekoratën e akorduar nga Presidenti Shqiptar, shpresojmë të na tregoni sadopak nga emocionet e këtij momenti?
Marrja e Medaljes së Mirënjohjes nga ana e Presidentit të Republikës, Z.Alfred Moisiu, është një nder i madh për mua dhe jam shumë mirënjohëse për këtë. Kurrë nuk e kisha menduar diçka të tillë kur filluam projektin tonë të përbashkët me kolegët shqiptarë shumë vite më parë.

Kjo medalje është një frymëzim i madh për të vazhduar punën time në Shqipëri. Kam ndjerë shumë ngrohtësi dhe mikpritje gjatë këtyre viteve, kështu që për mua të punoja në Shqipëri ka qenë një përvojë shumë e këndshme. Ceremonia e organizuar në Presidencë, në të cilën u dekoruan 9 persona, ishte shumë mbresëlënëse dhe emocionuese për mua. Kjo ceremoni do ta mbajë gjallë kujtesën e kësaj dite.

A mund të na njihni shkurtimisht me bashkëpunimin e derisotëm shqiptaro – norvegjez në fushën e ndërmjetësimit?
Shërbimi Kombëtar Norvegjez i Ndërmjetësimit, të cilin përfaqësoj unë në Shqipëri dhe partneri ynë, Fondacioni “Zgjidhja e Konflikteve dhe Pajtimi i Mosmarrëveshjeve” (FZKPM) kanë bashkëpunuar që në vitin 999 për zbatimin e një projekti të përbashkët të mbështetur nga Ministria e Punëve të Jashtme e Norvegjisë. Por kontaktet tona për mbështetje profesionale kanë filluar që në 1996-ën. Përmes këtij bashkëpunimi ne kemi realizuar shumë aktivitete duke përfshirë ndërmjetës nga te dy vendet, Shqipëria dhe Norvegjia, si dhe ekspertë të ndryshëm nga fusha e drejtësisë.

Unë besoj se projekti ynë i ka frymëzuar profesionistët që punojnë në fushën e ndërmjetësimit në të dyja vendet. Për mua ka qenë një privilegj të punoj me Fondacionin për gjithë këto vite. Gjatë bashkëpunimit me stafin e Fonacionit dhe rrjetin e ndërmjetësve kam patur kënaqësinë të takoj dhe punoj me shumë profesionistë të mirë, të përkushtuar që dallohen me të vërtetë në shoqëri përmes punës së tyre.
Ne, norvegjezëve, na kanë bërë shumë përshtypje arritjet e ndërmjetësve të Fondacionit në punën e tyre për të trajtuar dhe zgjidhur konflikte shumë komplekse dhe të rënda – për shembull, ndërmjetësimi në rastet e gjakmarrjes, si dhe shumë llojeve të tjera të konflikteve që ndeshen në komunitet. Medalja që mora sot është gjithashtu një reflektim i punës së madhe të bërë nga partneri ynë, FZKPM-ja. Që prej vitit 2001 e në vazhdim FZKPM-ja zgjidh mesatarisht 2000-2500 raste konfliktesh civile dhe penale me ndërmjetësim dhe pajtim. Fondacioni është i përfshirë gjithashtu dhe në sërë projektesh për trajtimin dhe ndërmjetësimin e konflikteve.

Po të ardhmen e këtij bashkëpunimi si e shihni?
Ndërmjetësimi ka rrënjë të thella në traditën shqiptare dhe kjo i jep vendit tuaj një mundësi unike për të zhvilluar një sistem të qëndrueshëm për ndërmjetësimin. Unë besoj se ju mund të arrini rezultate domethënëse në fushën e ndërmjetimit që do të kontribuojnë në zhvillimin e një shoqërie paqësore dhe demokratike. Aftësitë për të ndërmjetësuarit janë njohuri të rëndësishme në jetë, kështu që është diçka shumë e mirë që Fondacioni është përfshirë në projekte me shkollat, ku fëmijët që në një moshë të vogël mësojnë se si mund të zgjidhen konfliktet në mënyrë paqësore dhe konstruktive. Konfliktet nuk janë vetëm negative; ato mund të jenë të dobishme dhe të çojnë në përmirësimin e marrëdhënieve midis palëve të përfshira në konflikt dhe në komunitet, nëse palët në konflikt janë të gatshme dhe u krijohet mundësia për të marrë pjesë në një proces ndërmjetësimi.

Në shumë vende evropiane ka një lëvizje në rritje për të reformuar sistemin e drejtësisë penale duke zbatuar drejtësinë restauruese. Dhe ne në Norvegji mendoj se jemi shumë para në këtë drejtim. Aktualisht ndërmjetësimi në vendin tim është një shërbim që financohet nga shteti dhe Ministria e Drejtësisë i kushton vëmendje të madhe kësaj fushe. Në trajtojmë rreth 8000 raste në vit dhe rreth 80% e rasteve transferohen nga policia dhe prokuroria. Shpresoj shumë që ne mund t’ju frymëzojmë dhe të kontribuojmë në zhvillime të mëtejshme në këtë fushë në Shqipëri. Me pak fjalë drejtësi restauruese do të thotë të lehtësosh reagimet alternative ndaj krimit të cilat e lejojnë kundërvajtësin të përpiqet të riparojë dëmin fizik dhe moral që i ka shkaktuar viktimës dhe i krijon mundësi viktimës të luajë një rol më aktiv në zgjidhjen e konfliktit.

Qëllimi është që, përmes procesit ndërmjetësues, ku mund të përfshihen shpesh dhe familjarë të palëve, shokë, etj të gjendet një zgjidhje që të krijojë paqe dhe të parandalojë incidente të tjera midis palëve. Drejtësia restauruese është relativisht një fushë e re dhe unë besoj se bashkëpunimi ndërkombëtar është shumë i rëndësishëm për të mbështetur njëri-tjetrin në zhvillimin e kësaj fushe. Prandaj unë jam e gatshme për bashkëpunime të tjera me Shqipërinë në këtë fushë, dhe tani sigurisht më e frymëzuar pas kësaj dite të veçantë për mua me marrjen e kësaj medaljeje.

__________________
The heaven's sound is composed inside your heart, listen to its beat to syncronize your life onto the angel's steps.