Deri tani janë regjistruar 600 të rinj, kryesisht nga Durrësi, Kavaja, Kruja dhe Peqini. Vlerësime nga intelektualët për çeljen e universitetit. Godina e universitetit “Aleksandër Moisiu” është vetëm dykatëshe. Më pak regjistrime, shkolla e lartë jouniversitare.

Ballë përballë me detin. Universiteti i ri “Aleksandër Moisiu”, ndodhet vetëm disa metra larg bregut të detit Adriatik. Afërsia me detin e cilëson më së miri një universitet në një qytet bregdetar, në Dyrrahun e dikurshëm. Një godinë dykatëshe, e ngjashme me shkollat nëntëvjeçare, do shërbejë si universitet, ku të rinjtë do të mësojnë, do të fitojnë përvojë e, mbi të gjitha, do të dinë të njohin më mirë veten. Të habit kontrasti i madh mes idesë se sa gjigant mund të jetë një universitet dhe asaj që shohim, një godinë “e vockël”. Godina e verdhë, gërshetuar edhe me ngjyrën kafe, sapo është përfunduar. Është e rrethuar nga hekurat e gjelbër, në të gjitha anët. Dera, e kyçur, edhe me ndihmën e një zinxhiri, nuk na krijoi mundësinë që të hynim brenda. Nuk ishte e nevojshme. Nga sa mësuam më pas, asnjë nuk kishte hyrë, përveç punëtorëve që e kishin ndërtuar. Edhe punonjësit universitarë, të emëruar së fundmi, kishin punuar në të tjera ambiente. Madje edhe vetë të rinjtë që synojnë të nisin studimet janë regjistruar gjetkë, në Drejtorinë Arsimore Rajonale të Durrësit.

Regjistrimet e deritanishme
Banorët e Durrësit duket se e fituan “betejën” për të pasur një universitet në qytetin e tyre. Ndryshe nga banorët e Beratit apo Fierit, që nuk e patën këtë mundësi, tashmë ata do të kenë një universitet me tre fakultete. 20 do të jetë numri i pedagogëve që do të punojnë në Universitetin “Aleksandër Moisiu”, ku të pranishëm do të jenë edhe pedagogë të huaj.

Përpos dëshirës së madhe për të pasur një universitet, qëndron edhe numri i kërkesave për studim i të rinjve. Plot 600 të rinj janë regjistruar. Shifra këto të dy ditëve më parë dhe që kanë prirje për t’u shtuar më tepër. Vasillaq Papai, drejtor i Drejtorisë Arsimore Rajonale të Durrësit, thotë se dega më e kërkuar është menaxhim-turizmi. “Në degën e menaxhim-turizmit janë regjistruar 290, në degën e ciklit të ulët janë regjistruar 170, në degën e gjuhës angleze janë regjistruar 70, kurse në shkencat e administrimit 50”, -thotë Papai. Treguar nga ai, ka më pak regjistrime në shkollën e lartë jouniversitare 2-vjeçare. “Studentët vijnë kryesisht nga Durrësi dhe rrethinat e tij, Kavaja, Kruja, Peqini dhe Lushnja”, - thekson drejtori Papai.

Vlerësimet
Shumë arsye e kanë penguar hapjen e një universiteti në Durrës, ndër to edhe afërsia me kryeqytetin, Tiranën. Një pjesë e madhe e të rinjve nga Durrësi vazhdojnë studimet në universitetet e kryeqytetit. Ndërsa të rinjtë e tjerë nuk do të “lodhen” duke provuar fugonët, autobusët apo edhe trenin për të mbërritur në kryeqytet. Universiteti duket se kompleton qytetin. Durrësit, me portin më të madh në vend, thënë nga intelektualët e tij, i kishte munguar vetëm një universitet. Agim Bajramaj thotë se qytetarët e kanë kërkuar dhe pritur hapjen e një universiteti. “Durrësi e ka merituar me kohë një universitet”, -shprehet poeti Bajramaj. Ai thotë se jo më pak të drejtë ka pasur Durrësi kur ka kërkuar këtë universitet se sa Shkodra, Korça apo Elbasani. Kurse Vasillaq Papai, drejtor i Drejtorisë Arsimore Rajonale, e cilëson si një ngjarje historike hapjen e universitetit. “Jam i bindur se ky universitet do të luajë një rol shumë të rëndësishëm edhe në zhvillimin ekonomik të qytetit”, -thekson Papai.

Hapja e universitetit duket se ka “pleksur” edhe pushtetet. Ai vendor, përfaqësuar nga socialistët, dhe ai qendror, përfaqësuar nga demokratët, quket se kanë qenë të një mendjeje për të pasur një universitet të ri. Tashmë mbetet për të parë cilësinë e studimeve tek “Aleksandër Mosiu”.

Degët
Universiteti, me tre fakultete
Tre fakultete janë përcaktuar fillimisht për universitetin. Rektori i universitetit, Agim Kukeli, shprehet se universitetin nuk e bëjnë strukturat, por pedagogët dhe studentët, megjithatë shton se këto struktura do të ruhen. ”Do të shohim se si do të ecet me degët e caktuara dhe më pas do të shohim edhe mundësinë e shtimit të degëve dhe pedagogëve”, - thekson rektori Kukeli. Anglisht, cikël i ulët, kualifikime pasuniversitare, shkenca të administrimit, menaxhim turizëm. Këto janë degët e universitetit të ri. Në këtë universitet do të jetë edhe një shkollë profesionale, shkolla e lartë jouniversitare dyvjeçare, e cila do të përgatisë asistentë. Të rinjtë që do të studiojnë në degën e ciklit të ulët, duket se do të privilegjuar, pasi nuk është përcaktuar asnjë kuotë për këtë degë. Pyetur për kurrikulat, programin mësimor që do të përdoret për degët, rektori Agim Kukeli thotë se ende nuk janë përcaktuar përfundimisht. Tarifa për të gjitha degët e universitetit “Aleksandër Moisiu” do të jetë e njëjtë, 15 mijë lekë të reja.

30 prill është dita e fundit e regjistrimeve për në universitetin “Aleksandër Mosiu”

15 mijë lekë është të tarifa shkollore e regjistrimit për të gjitha degët e universitetit.

3 janë fakultetet që do të ketë Universiteti i Durrësit ”Aleksandër Moisiu”

Muri përforcues
Papai: Një mur për sigurinë e godinës
Për godinën nevojitet edhe një mur përforcues. Kodra që ndodhet pas godinës krijon probleme, pasi ka rrëshqitje dherash. “Është e nevojshme që të ndërtohet një mur për sigurinë e godinës”, -thotë drejtori i Drejtorisë Arsimore, Vasillaq Papai. Sipas tij, fondi është gati nga Ministria e Arsimit dhe Shkencës, por ditët me shi kanë penguar ndërtimin e këtij muri. “Këto ditë ndoshta do të mbarohet edhe ndërtimi i murit nga firma që e ka marrë përsipër”, -nënvizon Papai. Përpos kësaj, sipas tij, godina mund të ketë nevojën e ndonjë rregullimi të brendshëm. “Gjithçka është gati dhe rektori së shpejti do të marrë çelësat e godinës”, - siguron Papai, duke shtuar se në tetor të rinjtë do të fillojnë studimet pa pasur punime në sallat ku do të studiojnë.

__________________
The heaven's sound is composed inside your heart, listen to its beat to syncronize your life onto the angel's steps.