Brenda tre javësh mbikalimi-skelet i Zogut të Zi do të transformohet në një rreth-rrotullim, i cili do t’i japë fund trafikut në këtë kryqëzim. Të paktën kështu pretendojnë specialistët e Ministrisë së Punëve Publike, të cilët konfirmojnë se projekti që do ta shndërrojë mbikalimin në rreth-rrotullim është i ndarë në dy faza dhe pret vetëm të zbatohet. Po sipas tyre, faza e parë do të zgjasë një javë, kohë gjatë së cilës do të prishen paretet anësore dhe do të transportohen inertet, ndërsa faza e dytë, e cila do të zgjasë dy javë, parashikon rehabilitimin e shesheve dhe stabilizimin e trafikut të automjeteve dhe të këmbësore si dhe gjelbërimin e zonës, duke e kthyer atë në gjendjen e mëparshme. Specialistët pohojnë se zgjidhja do të jetë provizore dhe se po punohet për të përcaktuar destinacionin përfundimtar të kësaj nyje, në harmoni me studimet urbanistike të infrastrukturës së kryeqytetit.

Projekti
Ministria e Punëve Publike ka thyer dje heshtjen për aksionin e nisur një ditë më parë për prishjen e mbikalimit të Zogut të Zi. Specialistët e kësaj ministrie kanë shpjeguar të gjitha detajet e projektit që do të zhdukë të gjithë betonarmenë që është hedhur për rreth një vit në këtë projekt gjigand të Bashkisë së Tiranës, duke e kthyer kështu në identitet portën hyrëse të metropolit shqiptar.

Ata kanë pohuar se do t’iu duhen vetëm tre javë kohë për të rikthyer Zogun e Zi në gjendjen e mëparshme, zgjidhje kjo që nuk do të jetë ajo përfundimtarja deri sa të gjendet një zgjidhje definitive që do të jetë “në përputhje me studimet urbanistike të infrastrukturës së Tiranës”, - është shprehur Marin Biçoku. Më tej ai ka deklaruar se projekti tashmë është gati dhe është i ndarë në dy faza.

Faza e parë
Në fakt punimet kanë nisur që dy ditë më parë, kur nisi edhe aksioni i fadromave të Ndërtimores për prishjen e mbikalimit-skelet të Zogut të Zi. Specialistët kanë shpjeguar se faza e parë e këtij projekti parashikon ndërhyrjen për prishjen e pareteve anësore dhe transportin e të gjithë materialeve inerte të krijuara, për të cilin Policisë Ndërtimore do t’i duhet vetëm një javë kohë. Faza e parë e aksionit është marrë përsipër nga 6 firma ndërtimi, të cilët pavarësisht kërcënimit të kryebashkiakut Rama, kanë nisur punën për çmontimin, prishjen dhe transportin e të gjitha materialeve inerte.

Faza e dytë
“Menjëherë pas mbarimit të çmontimit dhe pastrimit të zonës, do të fillojë puna për rehabilitimin e kryqëzimit të Zogut të Zi dhe kthimin e tij në gjendje normale”, -kështu është shprehur në një deklaratë për shtyp, drejtori i Politikave të Planifikimit Urban në MPPTT, Marin Biçoku. Më tej ai ka shpjeguar se faza e dytë që do të rehabilitojë plotësisht këtë kryqëzim, prej kohësh mjaft problematik për banorët e kryeqytetit, do të zgjasë vetëm dy javë.

“Kjo ndërhyrje normalizuese parashikon kthimin në një rreth-rrotullim së bashku me punimet për asfaltimin dhe gjelbërimin e kësaj nyje, deri në dhënien e një zgjidhjeje përfundimtare në përputhje me studimet të cilat do të ndërmerren për nyjën hyrëse të qytetit të Tiranës”. Më tej Biçoku u ka premtuar banorëve kryeqytetasve se shumë shpejt do të kenë një situatë normale mjedisore dhe trafiku në këtë kryqëzim do të marrë fund. Faza e dytë e projektit do të realizohet nga Drejtoria e Rrugëve në Ministrinë e Transportit.

Policia Ndërtimore
Aksionin për prishjen e mbikalimit të Zogut të Zi e kanë argumentuar me 3 vendimet e Gjykatës së Faktit, të cilat janë konfirmuar dy herë edhe nga Apeli. Në një deklaratë të shpërndarë për mediat nga Drejtoria e Policisë Ndërtimore, thuhet se të gjitha kërkesë-paditë e ngritura nga Bashkia e Tiranës janë rrëzuar, duke konfirmuar kështu ligjshmërinë e vendimit të KRRTRSH-së së 29 dhjetorit 2005, mbledhje gjatë së cilës u vendos që Mbikalimi i Zogut të Zi do të prishej. Gjithashtu, ata kanë shpjeguar se aksioni i dy ditëve më parë ka si qëllim të vetëm rehabilitimin e situatës në kryqëzimin e Zogut të Zi.

__________________
The heaven's sound is composed inside your heart, listen to its beat to syncronize your life onto the angel's steps.