Sipas ministrisë, universiteteve do t’u dërgohet një udhëzim që sqaron se si do të veprohet për llogaritjen e pikëve. MASH dhe QKAVP do të dërgojnë bazën e të dhënave dhe kreditet universitare të çdo maturanti.

Llogaritjet e pikëve për pranimet në shkollat e larta do t’i bëjnë vetë universitetet. Madje edhe renditjen e pikëve përfundimtare të kandidatëve, në bazë të këtyre llogaritjeve, do ta bëjnë po ato. Ministria e Arsimit dhe Shkencës ka deklaruar dje se gjithçka do të bëhet sipas një skeme që do të bëhet publike shumë shpejt, ndërsa formula e llogaritjes është po ajo që është sqaruar që në krye të maturës shtetërore. Pesë komponentët e mesatares, (4 provimet e maturës plus mesataren e viteve të shkollës) do të shumëzohen me koeficientët e vendosur nga vetë universitetet. Koeficientin për profilin e shkollës dhe për bllokun e lëndëve me zgjedhje që shkollat e larta kanë përcaktuar si të preferuar. Përkundër kërkesës së universiteteve për të qenë jashtë përllogaritjeve, udhëzimi që do t’u dërgohet së bashku me skemën, nuk lë më vend për debate.

Udhëzimi
Ministria e Arsimit në bashkëpunim me Qendrën Kombëtare Arsimore të Vlerësimit të Provimeve, do t’i paraqesë universiteteve kreditet universitare të çdo maturanti. “Këto kredite përbëjnë notën me dy shifra, pas presjes dhjetore, për secilin provim të maturës. Dëftesa e pjekurisë për çdo maturant të vitit 2006 përmban edhe mesataren e 4 viteve”, - thekson zyra e shtypit pranë ministrisë. Sipas saj, kjo dëftesë dorëzohet nga kandidati në degët e fakulteteve ku do të vijojë studimet i interesuara. Pra, aty ku ai është regjistruar. Për detajet dhe të gjithë të dhënat e tjera të këtij procesi final pranë ministrisë është ngritur grupi i punës që është drejt konkluzioneve përfundimtare të skemës së pranimit. Sipas zyrës së shtypit, pjesë e këtij grupi janë specialistë të vetë ministrisë, Qendrës Arsimore Kombëtare të Vlerësimit të Provimeve dhe universiteteve. “Ata janë afër përfundimeve, të cilat do t’i paraqiten ministrit për miratim”, - deklaron zyra e shtypit.

Hapat e llogaritjes
Është tashmë e qartë se të gjitha llogaritjet për pranimet në universitete do të bazohen në shumëzimin e koeficientëve të përcaktuar nga shkolla e lartë me mesataren e shkollës së mesme. Së pari, veprohet me mesataren dhe rezultatet e dy provimeve të detyruara. Për këto tri të dhëna, shkolla e lartë do të marrë parasysh llojin e shkollës së mesme që kandidati ka përfunduar. “Secili lloj i shkollës së mesme do të ketë koeficientin e tij. Koeficientet në dispozicion të shkollave të larta janë: 1 1,1 1,2 1,3 1,4”, - theksohet në formulën e llogaritjes, sipas të cilës, me të njëjtin koeficient shumëzohen që të tri të dhënat. Shkollat e larta e kanë përcaktuar tashmë koeficientin sipas secilës nga 9 llojet e shkollave të mesme. Pas kësaj hyjnë në llogaritje edhe rezultatet e dy provimeve me zgjedhje. “Për këto dy të dhëna nuk do të merret parasysh lloji i shkollës së mesme që kandidati ka përfunduar”, - theksohet më tej. Fakultetet, në bazë të degëve, e kanë përcaktuar edhe parapëlqimin e vet vetëm për njërin bllok; ose atë “natyror”, ose atë “shoqëror”, të shprehur përmes koeficientëve. “Koeficientet e parapëlqimit janë: 1 dhe 1,3. Me koeficientin 1,3 shumëzohet secili prej të dy rezultateve të dy provimeve me zgjedhje në bllokun e parapëlqyer, kurse me koeficientin 1 shumëzohet secili prej të dy rezultateve që i përket bllokut tjetër”, - thuhet në formulën e llogaritjes.

Njehsimi i pikëve
Nota mesatare e të gjitha lëndëve e të gjitha viteve njësohet me dy shifra pas presjes. Pikët e fituara në secilin nga të katër provimet (të detyruara, me zgjedhje) konvertohen në notë me dy shifra pas presjes, sipas një procedure të përcaktuar. “Shumëzohet secila nga këto pesë nota me koeficientin përkatës, sipas rregullave të sipërpërshkruara, duke dhënë pesë numra. Gjendet shuma e këtyre pesë numrave. Shuma e gjetur shumëzohet me 100. Këto janë pikët e një kandidati. Secila degë rendit kandidatët e vet sipas pikëve të kandidatëve”, - nënvizohet në formulën që do të bëjë llogaritjen e pikëve të pranimit.

Konferenca e Rektorëve
Llogaritjen ta bëjë Qendra e Vlerësimit
Jashtë procesit, për të mos u përfshirë as në llogaritje pikësh. Kohë më parë, Konferenca e Rektorëve, pas mendimit të të gjithë dekanëve kërkoi që llogaritjen e pikëve ta bëjë vetë Qendra Kombëtare Arsimore e Vlerësimit të Provimeve. Rektori i Universitetit të Tiranës ka deklaruar se kjo është mënyra më e mirë për të siguruar deri në fund një proces transparent. “Nuk duam të shtojmë hallkat në një proces në të cilin ne nuk morëm pjesë, sepse nuk duam të krijojmë apo lëmë vend për dyshime të ndryshme në këtë përllogaritje”, - ka thënë ai, duke pranuar se gjithsesi vendimi do t’i takojë ministrisë. Të njëjtin mendim kanë ndarë edhe rektorët e tjerë, sipas të cilëve, renditjen mund ta bëjë fare mirë qendra, pasi ajo ka të gjithë bazën e të dhënave dhe mund të bëjë edhe llogaritjen e mandej edhe rendin zbritës së fituesve. “Ne mund të vendosim vizën e fituesve në bazë të kuotave të përcaktuara”, - kanë thënë rektorët. Por kanë pranuar se gjithsesi do të zbatojnë vendimin që do të merret.

Koeficientët sipas fakulteteve
Gjuhët e Huaja
Blloku shoqëror 1,3
Ekonomik
Blloku shoqëror 1,3
Gjuhë-letërsi
Blloku shoqëror 1,3
Gjeografi
Blloku shoqëror 1,3
Gazetari
Blloku shoqëror 1,3
Histori
Blloku shoqëror 1,3
Informatikë
Blloku natyror 1,3
Fizikë
Blloku natyror 1,3
Matematikë
Blloku natyror 1,3
Biologji
Blloku natyror 1,3
Kimi
Blloku natyror 1,3

Shembull
Ja si llogariten pikët

Mira është regjistruar në Universitetin e Tiranës në degën e Farmacisë. Ka mbaruar shkollën e mesme të përgjithshme të profilizuar, profili natyror dhe ka një notë mesatare nga shkolla e mesme 8,34.
Ne dy provimet e detyruara ajo ka këto rezultate:
• Në letërsi 8,72
• Në matematikë 9,15
Ajo ka zgjedhur si provime me zgjedhje ato që përfshihen në bllokun natyror dhe ka si rezultate:
• Në fizikë 9,23
• Në biologji-kimi 9,52
Fakulteti i Mjekësisë ka shpallur se shkolla e mesme e përgjithshme e profilit natyror ka koeficientin 1,4
Po ashtu, Fakulteti i Mjekësisë ka shpallur se parapëlqen bllokun natyror, pra zbaton koeficientin 1,3 për këtë bllok.
Atëherë kryhen këto llogaritje:
Shumëzojmë:
• 8,34 (nota mesatare e shkollës së mesme) x 1,4 (koeficienti për llojin e shkollës) =
= 11,676
Shumëzojmë:
• 8,72 (nota në gjuhë-letërsi) x 1,4 (koeficienti për provimin e parë të detyruar) =
= 12,208
Shumëzojmë:
• 9,15 (nota në matematikë) x 1,4 (koeficienti për provimin e dytë të detyruar) =
=12,81
Shumëzojmë:
• 9,23 (nota në fizikë) x 1,3 (koeficienti për provimin e parë me zgjedhje)=
= 11,999
Shumëzojmë:
• 9,52 (nota në biologji-kimi) x 1,3 (koeficienti për provimin e dytë me zgjedhje) =
=12,376
Secili prej rezultateve shumëzohet me 100:
11,676 x 100 = 1 167,6
12,208 x 100 = 1 220,8
12,810 x 100 = 1 281,0
11,999 x 100 = 1 199,9
12,376 x 100 = 1 237,6
Rezultatet mblidhen
1 167,6 + 1 220,8 + 1 281,0 + 1 199,9 + 1 237,6 = 6 106,9
Ky është rezultati me të cilin Mira konkurron në degën e Farmacisë!

__________________
The heaven's sound is composed inside your heart, listen to its beat to syncronize your life onto the angel's steps.