Çeku merr votëbesimin e parlamentit të Kosovës për qeverinë dhe formalizon anëtarësimin e tij në partinë që e propozoi për kryeministër: AAK. Shumë pak ndryshime në emrat e ministrave. Ikën përfundimisht Nexhat Daci dhe në krye të parlamentit, vjen Kolë Berisha e Sabri Hamiti.

Pas një debati të gjatë, Kuvendi i Kosovës miratoi me shumicë votash, qeverinë e re të Kosovës, e cila do të drejtohet nga Agim Çeku. Qeveria mori kësisoj votëbesimin me 65 vota pro, 33 kundër dhe 5 abstenime. Pas votimit, kryeministri Çeku premtoi në shqip, serbisht dhe anglisht, angazhim për qeverisje efektive dhe realizim të aspiratës së popullit të Kosovës, për shtet të pavarur e demokratik. Ai u shpreh se, do të vazhdojë me intensitet të shtuar përmbushjen e standardeve, gjë që sipas tij, do të ndihmonte për zgjidhjen e statusit. Ndërkohë që opozita kosovare e ka kundërshtuar votimin për qeverinë e re dhe e ka akuzuar koalicionin qeverisës, për ndryshime jo të plota në qeverinë e Kosovës.

Gjeneral Agim Çeku, pas një ceremonie formale të mbajtur në AAK, larg syve të mediave, është bërë edhe anëtari më i ri i Aleancës për Ardhmërinë e Kosovës. Kryeministri dhe anëtari më i ri i Partisë së Ardhmërisë së Kosovës, do të trashëgojë megjithatë, pothuajse të gjithë kabinetin e ministrave të qeverisë së vjetër. Ndryshimi i vetëm është posti i zëvendëskryeministrit, të cilin e merr ministri i pushtetit lokal, Lutfi Haziri. Kështu kanë vendosur dy partitë në koalicion qeverisës; LDK dhe AAK të cilat kanë arritur që të hartojnë listën përfundimtare, me emrat e ministrave që do ta përbëjnë qeverinë e Kosovës.

Sipas kësaj liste, të gjithë ministrat e qeverisë së kaluar do të mbajnë sërish postet e tyre, ndërsa i vetmi që është shkarkuar nga detyra, është zv.kryeministri i Kosovës, Adem Salihaj, i zëvendësuar me ministrin e pushtetit lokal, Lutfi Haziri. Por qeveria e gjeneralit Çeku do të ketë edhe dy ministri të tjera, të krijuara rishtas. Bëhet fjalë për Ministrinë e Rendit dhe Ministrinë e Drejtësisë. Kësisoj, ministër Rendi do të jetë Fatmir Rexhepi nga LDK-ja dhe ministër i Drejtësisë nga AAK-ja, do të jetë Jonuz Salihaj. Gjenerali Çeku, pati deklaruar më parë se dëshironte të bënte ndryshime të mëdha në qeveri, mirëpo sipas tij, kjo varet krejtësisht nga partnerët e koalicionit, të cilët nuk ishin të gatshëm të bënin ndryshime të mëdha. “Tjetër është dëshira e mundësia është diçka tjetër”, - është shprehur kryeministri i ri, pasi mori listën me emrat e ministrave të propozuar nga Lidhja Demokratike dhe Aleanca për Ardhmërinë e Kosovës.

Parlamenti i Kosovës votoi edhe zëvendësimin e kreut të Kuvendit, Nexhat Daci me deputetin Kolë Berisha. Pas një votimi formal, me vetëm dy vota kundër, Kolë Berisha, deputet nga radhët e LDK-së, u zgjodh kryetar i Kuvendit të Kosovës, duke zëvendësuar në këtë post Nexhat Dacin. Gjithashtu, deputeti i LDK-së Sabri Hamiti, u zgjodh anëtar i Kryesisë së Kuvendit, në vend të Fatmir Sejdiut, i cili tani është President i Kosovës. Vendimi për zëvendësim të zoti Daci, u mor pas një mbledhjeje afro katër orëshe, të grupit parlamentar të partisë më të madhe në Kosovë, të enjten.

Pak ndryshime
Në postet e dy ministrive të sapokrijuara në Prishtinë, janë emëruar Fatmir Rexhepi ministër i Punëve të Brendshme (LDK) dhe Jonuz Salihaj (AAK), ministër i Drejtësisë
I vetmi që është shkarkuar nga detyra, është zv.kryeministri i Kosovës, Adem Salihaj, i zëvendësuar me ministrin e Pushtetit Lokal, Lutfi Haziri

Kush është kryeparlamentari i ri i Kosovës?
Kolë Berisha, ka lindur 26 tetor të vitit 1947, në fshatin Dobërdol të Komunës së Klinës. Ka kryer Fakultetin Juridik në Prishtinë. Më 28 mars të vitit 1989, arrestohet dhe dërgohet në burgjet serbe në Leskoc, Beograd dhe në Pejë. Pas tre muajve, lirohet, por përjashtohet nga puna. Me themelimin e Lidhjes Demokratike të Kosovës, anëtarësohet në të dhe për dy mandate me radhë, ishte anëtar i Kryesisë së Degës së LDK-së në Klinë dhe kryetar i Komisionit për Pajtimin e familjeve në gjakmarrje. Nga 15 marsi i vitit 1998, është nënkryetar i Lidhjes Demokratike të Kosovës. Ishte anëtar i Këshillit Tranzitor të Kosovës së pasluftës; anëtar i Forumit Politik të Kosovës të formuar nga z. Petersen. Tani është anëtar i Grupit Politik Strategjik për zgjidhjen e statusit përfundimtar të Kosovës. Ky është mandati i tij i dytë, si deputet i Kuvendit të Kosovës.

__________________
The heaven's sound is composed inside your heart, listen to its beat to syncronize your life onto the angel's steps.