Qendra e Provimeve sjell edhe një herë në vëmendje të maturantëve rregullat të cilat do të evitojnë skualifikimin në provimin e parë, atë të Letërsisë. Penalizimet që mund të bien në kurriz të maturantëve u rrezikojnë atyre përjashtimin nga provimi i radhës, deri në heqjen e të drejtës së provimit për tre vitet e ardhshme. Celulari apo mjetet e tjera të komunikimit, kopjimi apo komunikimi me garuesit e tjerë, mund të kthehet në një situatë, e cila sjell automatikisht skualifikimin.

“Edhe pse këto janë rregulla të cilat të gjithë maturantët duhet t’i kenë parasysh gjatë provimit, ne kemi vendosur t’ua rikujtojmë atyre ato disa herë, madje edhe në certifikatën e regjistrimit, pasi një veprim jo i matur rrezikon t’u heqë maturantëve të drejtën e konkurrimit në shkollat e larta”, - theksoi Shpresa Petrela, drejtore e Qendrës Kombëtare Arsimore të Vlerësimit dhe Provimeve.

Skualifikimi
Sipas rregullores së Maturës Shtetërore, nëse një nxënës thyen rregullat e provimit, atëherë administratori i provimit njofton përgjegjësin e administrimit të provimit dhe merr këto masa disiplinore. Masat disiplinore konsistojnë automatikisht deri në përjashtimin e kandidatit nga provimi. Kështu, një nxënësi i hiqet e drejta e dhënies së provimit të Maturës për 3 vjet, në qoftë se përpiqet që japë provim për një nxënës tjetër. I njëjti penalizim ndiqet edhe në rastet kur dikush nga kandidatet kapet duke dhënë apo marrë kopje nga persona të tjerë brenda apo jashtë mjediseve ku zhvillohet provimi. “Penalizime do të ketë edhe për ata persona të cilët blejnë një kopje të testit ose përpiqen të marrin informacione nga persona të tjera mbi përmbajtjen e testit”, - thekson Shpresa Petrela, e cila sqaron gjithashtu se kandidatët duhet të jenë të kujdesshëm që të mos bëjnë komente mbi përmbajtjen e testit apo zgjidhjen e tij gjatë kohës së zhvillimit të provimit, pasi mund të nxirren automatikisht nga mjediset.

Rregullorja qartëson gjithashtu se ata maturantë që përdorin mjete shkrimi të ndryshme nga ato të specifikuara për këtë qëllim si stilolaps me ngjyrë të zezë ose blu dhe vizore, laps apo gomë për provimin e matematikës, edhe në këtë rast ka sërish penalizim. Përdorimi i celularëve apo mjeteve të tjera të komunikimit gjatë 150 minutave të provimit, i ndëshkon maturantët deri në përjashtimin e tyre nga provimet e maturës për tre vitet e ardhshme. Që në momentin e hyrjes në mjediset ku zhvillohet provimi, nxënësit nuk kanë të drejtë të ndryshojnë vendin e paracaktuar.

“Një tjetër penalizim i cili ka vlerë vetëm për provimin e radhës, është mungesa e dokumentit të identifikimit apo certifikatës së regjistrimit. Ky provim mund të jepet në sesionin e vjeshtës, por maturanti mund t’i nënshtrohet provimit të radhës, duke u skualifikuar kështu nga mundësia për të konkurruar në universitete”, - thekson drejtoresha e Qendrës Kombëtare të Provimeve. Gjatë 150 minutave të provimit, maturantëve u ndalohet largimi nga mjediset e brendshme, ngrënia apo kryeja e shënimeve të caktuara mbi fletën e testit, të cilat mund të klasifikohen si të dhënave komprometuese. Përjashtimi ose mosnjohja e rezultateve të provimit ditën e provimit, bëhet edhe në rastet kur nxënësi shkruan ose dëmton kodin e sekretimit (barkodin) të vendosur në test, që konsiderohet edhe elementi i sigurisë.

Penalizimet
Celulari
Ndalohet që nxënësit të mbajnë me vete në mjediset ku zhvillohet provimi i maturës, telefon celularë, radio ose çdo mjet tjetër komunikimi, i cili mund të shërbejë për të marrë informacione mbi përmbajtjen e testit nga jashtë.
Mjetet
Nxënësi nuk lejohet që gjatë provimit të marrë me vetë goma, vizore, makina llogaritëse apo mjete të tjera, me përjashtim të stilolapsit njëngjyrësh të përcaktuar, fletës së pranimit dhe certifikatës personale në tavolinën e punës.
Kopja
Nuk lejohet që gjatë 150 minutave në dispozicion për provimin e maturës, një nxënës të kopjojë, pra të japë ose marrë informacione mes kandidatëve të tjerë si dhe stafit të administratorëve të cilët ndodhen në mjediset ku kryhet provimi.
Pozicioni
Gjatë kohës së provimit kandidati zë një pozicion të caktuar prej nga mbikëqyret prej administratorëve dhe nuk lejohet të ndryshojë vendin për asnjë moment, në të kundërt ai skualifikohet automatikisht nga seanca e radhës.
Koha
Maturantët kanë në dispozicion të zgjidhjes së ushtrimeve të testit rreth 150 minuta kohë për provimin e detyruar si dhe 300 minuta për dy provimet me zgjedhje dhe duhet që të dorëzojnë fletën e testit brenda këtij minutazhi.

__________________
Try not to become a man of success but rather to become a man of value - Einstein Albert.