TRI SHTYRJET, E KATËRTA NË HORIZONT?

Mbajtja e Albin Kurtit në burg në këtë periudhë, nuk ka si të shpjegohet ndryshe vetëm si kontribut i dhënë për "ta ruajtur qetësinë" nga e cila është duke përfituar komploti serbo-rus kundër pavarësisë së Kosovës. Në rrethanat kur vrasësit e protestuesve të 10 shkurti 2007 janë larg dorës së drejtësisë, është edhe e turpshme për të gjithë që të mbahet në burg Albin Kurti.

Dr. Milazim KRASNIQI

Tri shtyrjet e deritashme që i janë bërë vendimit ndërkombëtar për statusin final të Kosovës, tashmë kanë krijuar pasoja serioze për të ardhmen e këtij vendi. Shtyrja e parë është bërë duke e shkelur dokumentin e Rambuje-Parisit dhe rezolutën 1244, sipas të cilave periudha kalimtare e administrimit ndërkombëtar mbi Kosovën, do të zgjaste tre vjet. Pas asaj periudhe parashihej të mbahej një konferencë ndërkombëtare dhe madje të mirrej edhe një deklarim i popullit të Kosovës për të ardhmen e vendit të tyre. Por, gjatë përpjekjeve për gjetjen e justifikimeve për shtyrje, ndodhën trazirat e dhunshme të marsit 2004, të cilat u përdorën si pretekst për një shtyrje të paafatizuar.

Shtyrja e dytë u bë për hatër të Serbisë, përkatësisht për t'i krijuar hapësirën e favorizimit të ashtuquajturit "bllok demokratik" në Serbi. Zgjedhjet parlamentare serbe të janarit 2007, prodhuan probleme të reja, deri në atë pikë sa radikali Tomisllav Nikoliq arriti të ulej në karrigen e kryetarit të Kuvendit të Serbisë. Edhe pse atij iu hoq karrigia me presion ndërkombëtar dhe po instalohet me zor i ashtuquajturi "bllok demokratik", kjo vonesë për Kosovën prodhoi vetëm keqësim të situatës.

Shtyrja e tretë u bë për hatër të Rusisë, e cila i solli ambasadorët e Këshillit të Sigurimit në një ekskursion qesharak në Kosovë, vetëm për ta komplikuar edhe më shumë vendimin për statusin e Kosovës. Kjo vonesë tash po shoqërohet edhe me rritjen e kërcënimeve ruse për të vu veto në Këshillin e Sigurimit ndaj një rezolute që do t'i hapte rrugë pavarësisë së Kosovës, sado që ajo do të ishte një pavarësi e mbikëqyrur.

Institucionet e përkohshme të vetëqeverisjes, ndaj këtyre zhvillimeve negative më të fundit, kanë reaguar me disa veprime të çuditshme. E para, ato kanë inkurajuar mbajtjen në burg të Albin Kurtit. Mbajtja e Albin Kurtit në burg në këtë periudhë, nuk ka si të shpjegohet ndryshe vetëm si kontribut i dhënë për "ta ruajtur qetësinë", nga e cila është duke përfituar komploti serbo-rus kundër pavarësisë së Kosovës. Në rrethanat kur vrasësit e protestuesve të 10 shkurti 2007 janë larg dorës së drejtësisë, është edhe e
turpshme për të gjithë që të mbahet në burg Albin Kurti. Është edhe e dëmshme, gjë që do të shihet kur të mbyllet kapitulli i statusit dhe kur Kosova të fitojë një status të gjymtuar. Atëherë nuk do të bëjnë punë reagimet qytetare.

E dyta, është duke u harxhuar energji e edhe para në punë të kota, gjoja të lobimit për pavarësinë në shtete që askush nuk i pyet për asgjë. Në vend se tashmë të ishin të gatshme Kushtetuta, simbolet shtetërore, himni i Kosovës dhe projekti i buxhetit për vitin e ardhshëm kalendarik, kur Kosova pritet të jetë një shtet më vete, opinioni bombardohet me deklarata qesharake të zyrtarëve të Kosovës, të cilët flasin si me qenë zëdhënës të administratës amerikane.

E treta, Kuvendi i Kosovës në këtë kohë do të duhej të ishte në seanca të pandërprera, për të ushtruar një presion të vendosur mbi nevojën që pavarësia të njihet pa vonesa të tjera. Por, Kuvendi i Kosovës po e vazhdon gjumin dimëror, si të mos kish çelë pranvera fare në këtë vend dhe si të mos kishte asgjë të bënte me vendin tonë gjithë kjo hallakamë ndërkombëtare.Për shkak të kërcënimeve ruse me veto, tash kanë filluar të dëgjohen zëra se vendimi për statusin e Kosovës mund të shtyhet për në vjeshtë. Kjo është në pajtim me kërkesën e Beogradit, i cili po kërkon "vazhdimin e bisedimeve". Por, nëse kjo ndodh, atëherë kjo do të ishte shtyrja më e rrezikshme, sepse durimi i qytetarëve të këtij vendi do të vihej në sprovë serioze.


Paraqet:Sabri Selmani
Kiel-Gjermani