Shqipëria nënshkroi në Luksemburg Marrëveshjen e Stabilizim-Asociimit me Bashkimin Evropian, duke hedhur hapin e parë në rrugën e gjatë e të vështirë drejt etapave të tjera që do të na shpien në familjen evropiane. Marrëveshja konsiston në mbi 500 faqe, që përcaktojnë rregullat dhe detyrimet që Shqipëria do të duhet të përmbushë, për t’u anëtarësuar plotësisht në BE. MSA-ja është nënshkruar për palën shqiptare nga Kryeministri Sali Berisha, ndërsa për Presidencën e BE-së nga Presidentja e Këshillit të Ministrave të Jashtëm, Ministrja e Jashtme e Austrisë, Ursula Plassnik, për Komisionin Evropian nga Komisioneri për Zgjerimin, Olli Rehn dhe për BE-në nga Ministrat e Jashtëm të vendeve anëtare. Në këtë ceremoni ra në sy fakti që MSA-ja nuk u firmos nga Presidenti i Komisionit Evropian, Hoze Manuel Barroso, por nga Komisioneri për Zgjerimin, Olli Rehn. Në këtë ceremoni përveç shumë ministrave të kabinetit qeveritar, merrnin pjesë dhe përfaqësues të opozitës shqiptare si kryetari i grupit parlamentar të PS-së, Pandeli Majko, kryetari i komisionit parlamentar për integrimin, Ilir Meta si dhe ish-ministrat e Integrimit, Ermelinda Meksi dhe Sokol Nako. Firma mbi këtë dokument është vonuar për 14 vite, për shkak të pasigurisë politike, mungesës së stabilitetit dhe bllokimit të reformave politike dhe ekonomike në vend, nga ana e qeverive të djathta dhe të majta shqiptare.

Berisha
Marrëveshja e nënshkruar në Luksemburg, përcakton një kornizë të hollësishme të kërkesave politike dhe ekonomike që Shqipëria duhet të përmbushë për t’u anëtarësuar në bllokun tregtar evropian me 25 vende anëtare. Kryeministri Berisha në fjalën e tij u shpreh se Shqipëria do të bëjë çdo përpjekje, do të ndërmarrë çdo reformë në mënyrë që firmosja e MSA-së të shndërrohet në themel solid të demokracisë, duke siguruar se “krimi i organizuar shqiptar dhe sistemi i korrupsionit po çmontohen me shpejtësi dhe se Shqipëria do jetë ndër vendet me të sigurta në rajon”. Nënshkrimi i MSA-së nga qeveria shqiptare, sipas Kryeministrit, është kontrata më serioze që vendi ynë ka nënshkruar me BE-në. Berisha ka deklaruar për median pas nënshkrimit të MSA-së, se qeveria do të jetë e hapur për një bashkëpunim të plotë me të gjitha forcat politike, grupet e interesit etj, që përmes reformave të thella e të gjithanshme ta zbatojë me dinjitet MSA-në. Nga ana e saj, dhe opozita e ka vlerësuar me tone tepër pozitive nënshkrimin e MSA-së. Sipas saj, kjo është një fitore për të gjithë shqiptarët.

Brukseli
Pavarësisht faktit se kryeministri Berisha në fjalën e tij anashkaloi kontributet e qeverive të mëparshme sa i përket procesit të integrimit, duke ia faturuar këtë sukses thelbësisht qeverisjes së tij, zyrtarët më të lartë evropianë nuk ranë këtë “gabim”. Ministrja e Jashtme e Austrisë, Ursula Plassnik, u shpreh se “të gjitha palët në Shqipëri kanë bërë përpjekjet e tyre, për të finalizuar dhe mbërritur në këtë moment”. Mungesa e një dialogu normal politik në vend midis pozitës dhe opozitës, vijon të jetë një shqetësim për Brukselin. Plassnik u kërkoi të gjitha forcave politike në Shqipëri që të unifikojnë përpjekjet e tyre për përmbushjen e standardeve të vendosura nga BE-ja. Ndërsa Komisioneri për Zgjerimin, Olli Rehn, vlerësoi se “nënshkrimi i MSA-së është një gur themeli për Shqipërinë në rrugën e integrimit në BE”. Ai u shpreh se ky moment finalizon fundin e një procesi të vështirë. BE-ja i bëri thirrje Shqipërisë ta shfrytëzojë firmosjen e MSA-së për t’u dhënë shtytje reformave.

Deklaratat
Berisha
“Krimi i organizuar shqiptar dhe sistemi i korrupsionit po çmontohen me shpejtësi. Shqipëria do jetë ndër vendet më të sigurta ne rajon. Ballkani, me angazhimin e SHBA-së dhe vendeve të BE-së, është shndërruar nga rajon lufte, konfliktesh të egra që ishte pak vite më parë, në rajon bashkëpunimi, miqësor dhe integrimi rajonal dhe evropian”.
Plassnik
“Vlerësoj punën e madhe që është bërë nga Shqipëria për të përmbushur detyrimet që prej fillimit të negociatave në vitin 2003. Me nënshkrimin e MSA-së fillon sfida e madhe për Shqipërinë. Duhet të realizohen prioritetet e vendosura nga BE-ja për transformimin e shtetit shqiptar në një shtet modern. Të gjitha palët në Shqipëri kanë bërë përpjekjet e tyre, për të finalizuar dhe mbërritur në këtë moment”.
Majko
“E konsideroj nënshkrimin nga Shqipëria të Marrëveshjes së Stabilizim-Asociimit me BE-në, si një fitore që iu takon të gjithë shqiptarëve. Kjo ditë nuk ka nevojë për komente, pasi ajo është një ditë e shënuar për të gjithë shqiptarët. Unë jam këtu për të përfaqësuar opozitën, si dhe për gjithë ato që na bashkojnë. Akti i sotëm është një shenjë e maturisë së klasës politike shqiptare”.
Meta
“Ky moment duhet të na bëjë të gjithëve më të përgjegjshëm për të ecur më shpejt në zbatimin e saj dhe për ta përgatitur vendin për statusin e kandidatit për anëtarësim në Bashkimin Evropian. E vlerësoj nënshkrimin e MSA-së si një hap të rëndësishëm historik, që ka në themel aspiratën e të gjithë qytetarëve shqiptarë, ëndrrën evropiane”.
Topalli
Në emër të Kuvendit të Shqipërisë, të përshëndes nënshkrimin e Marrëveshjes së Stabilizim-Asociimit me Bashkimin Evropian, të përshëndes këtë ngjarje kyçe, këtë gur-themel në historinë e demokracisë shqiptare. Pas nënshkrimit të Marrëveshjes, Kuvendi i Shqipërisë do të këtë një punë intensive për përafrimin e legjislacionit e për këtë nevojitet mbi të gjitha vullnet politik.
Rehn
Në emër të Komisionit Evropian, e uroj përzemërsisht Shqipërinë për nënshkrimin e Marrëveshjes së Stabilizim-Asociimit (MSA) dhe Marrëveshjes së Përkohshme. Ne tani presim që Shqipëria të tregojë vendosmëri në përmbushjen e angazhimeve që ka ndërmarrë në kuadër të kësaj Marrëveshjeje.
Bufi
Nënshkrimi i MSA-së me Bashkimin Evropian kurorëzon përpjekjet shumëvjeçare të popullit shqiptar dhe shënon mbylljen e një faze të parë dhe fillimin e një rruge akoma më të gjatë dhe të vështirë. Sot është rasti të deklarojmë edhe njëherë publikisht, se si opozitë do të mbështesim plotësisht procesin e integrimit evropian. Këtu në Kuvend, më tepër se kudo, kërkohet fryma e konsensusit .
Petit
Ky është një moment i rëndësishëm edhe për BE-në. Nëpërmjet këtij hapi, ne po thellojmë marrëdhëniet tona me Shqipërinë. Nënshkrimi i MSA-së është rezultat i progresit të Shqipërisë në çuarjen përpara të reformave, duke treguar se mund t’i bëjë institucionet demokratike të funksionojnë. Zbatimi i MSA-së do të jetë një detyrë sfiduese për Shqipërinë

__________________
The heaven's sound is composed inside your heart, listen to its beat to syncronize your life onto the angel's steps.