Kryetari i Komisionit të Politikës së Jashtme të PE-së tha se marrëveshja e Asociimit do të ratifikohet në shtator.

Brok: Për të ardhmen është e rëndësishme marrëdhënia diplomatike dhe e hapur midis qeverisë dhe opozitës

Pavarësisht situatës politike në vend, Parlamenti Evropian do të ratifikojë marrëveshjen e Stabilizim-Asociimit të nënshkruar mes BE-së dhe Shqipërisë. Ratifikimi i marrëveshjes në muajin shtator u konfirmua dje pas takimit mes kryeministrit Sali Berisha dhe Kryetarit të Komisionit të Politikës së Jashtme të Sigurisë dhe Mbrojtjes të Parlamentit Evropian, Elmar Brok. “Gjatë shtatorit marrëveshja do të ratifikohet në Parlamentin Evropian dhe kjo shton detyrimin tonë të madh për ta zbatuar atë me seriozitet. E njoha dhe me zhvillime të tjera politike në vend.

Edhe njëherë dua ta falënderoj shumë përzemërsisht për këtë vizitë shumë të rëndësishme në prag të shqyrtimit në Parlamentin Evropian të marrëveshjes së Stabilizim- Asociimit për ratifikim dhe e sigurova se qeveria shqiptare do të bëjë çdo përpjekje për të arritur standardet dhe e konsideron procesin e integrimit si një proces të bazuar në performancën e qeverisë dhe shoqërisë në tërësi”, - tha dje Berisha gjatë një prononcimi për mediat, pas takimit të zhvilluar. Edhe kryetari i Komisionit të Politikës së Jashtme të Sigurisë dhe Mbrojtjes të Parlamentit Evropian, Elmar Brok, siguroi se marrëveshja do të nënshkruhet. “Do ta ratifikojmë marrëveshjen sepse jemi të bindur se qeveria aktuale na ka dhënë të gjitha garancitë për zbatimin e saj. Por e dimë që për të ardhmen është gjithashtu e rëndësishme marrëdhënia diplomatike dhe e hapur midis qeverisë dhe opozitës. Kjo do të thotë që edhe opozita duhet të marrë përsipër përgjegjësitë e saj për zhvillimin e ardhshëm të Shqipërisë”, - tha ai. Brok theksoi se Komisioni Evropian ka propozuar ratifikimin e Marrëveshjes së Stabilizimit dhe Asociimit dhe ajo do të ratifikohet, por gjithnjë duke parë rezultate në sistemin e drejtësisë dhe luftën kundër korrupsionit. “Për këtë duhet të shohim që kjo siguri që na jepet do të vazhdojë të garantojë zbatimin e marrëveshjes.

Të gjitha vendet kandidate për anëtarësim kanë probleme me sistemin e drejtësisë dhe korrupsionin. Nga takimi i sotëm dhe takimet e tjera të zhvilluara më z. Berisha ne kuptojmë që qeveria po punon me të gjithë forcën e duhur kundër korrupsionit, ç’ka përbën garanci për sukses në këtë drejtim. Ky është, në fakt, parakushti kryesor për zhvillimin ekonomik të vendit dhe për zbatimin e Marrëveshjes së Stablizim- Asociimit, sepse vetëm me një shtet ligjor krijohet siguria e nevojshme për investimet që garantojnë zhvillim ekonomik dhe anëtarësim në BE”, - tha Brok. Ai shprehu besimin se si reforma në sistemin e drejtësisë ashtu edhe përparimi ekonomik i vendit janë kushte të rëndësishme për stabilitetin e vendit, stabilitetin e rajonit dhe perspektivën evropiane të tij.

Brok shtoi gjithashtu se të gjitha sa më sipër janë kushte të mjaftueshme për vazhdimin e bashkëbisedimit dhe bashkëpunimit midis qeverisë dhe opozitës që garantojnë një shtet të së drejtës dhe një demokraci funksionale. “Edhe reforma në drejtësi është gjithashtu pjesë e kësaj që thashë. Për shumë reforma keni nevojë për një shumicë të cilësuar në parlament. Një gjë kam mësuar që kur kam qenë i ri në politikë, se tani kam më shumë eksperiencë: çdo opozitë duhet të kuptojë që një ditë do të jetë në qeveri dhe duhet të sillet pikërisht duke pasur parasysh këtë gjë. Edhe tek opozita duhet të kërkohen po ato standarde që i kërkohen qeverisë për t’i përmbushur”, - tha ai.

Zgjedhjet, PD-PS vijojnë negociatat

Vazhdojnë negociatat mes përfaqësuesve të dy forcave kryesore politike me përfaqësues të Bashkimit Evropian dhe OSBE-së. Ashtu si edhe dy ditë më parë, edhe dje paradite, përfaqësues të PD-së dhe PS-së kanë vijuar takimet për të diskutuar mbi mundësinë e gjetjes së një kompromisi mes palëve. Ndërkohë, asgjë nuk është konfirmuar zyrtarisht mbi atë që po diskutohet. Asnjë prej përfaqësuesve politikë pjesëmarrëse në diskutim nuk konfirmon asgjë mbi atë që po diskutohet, apo edhe mbi mundësinë e arritjes së ndonjë kompromisi. Të vetmit që konfirmojnë se diçka po arrihet janë ndërkombëtarët e konkretisht, ambasadori i OSBE-së, në Tiranë, Pavel Vacek, i cili pak ditë më parë u shpreh se me fillim e muajit shtator, ai besonte se do të gjendej një dialog politik mes forcave politike. Së fundmi, edhe presidenti i Republikës, Alfred Moisiu, i cili po ndjek me vëmendje negociatat që po zhvillohen, është shprehur dje gjatë takimit me drejtorin e Zyrës për Ballkanin Perëndimor në Ministrinë e Jashtme Britanike, Majkëll Tatham, se besonte se politika shqiptare do ta kapërcente këtë situatë, në emër të interesave madhore të vendit. Ndërkohë që asnjë prej zyrtarëve të partive politike nuk prononcohet zyrtarisht mbi atë çka po ndodh në selitë diplomatike të BE-së. E vetmja gjë që ndoshta mund te thuhet me rezerva është se në takime po diskutohet mbi tri kushtet e vendosura nga PS-ja, e cila është shprehur qartazi se nuk futet në dialog pa u diskutuar tri kërkesat ligjore të vëna nga ana e saj.

__________________
The heaven's sound is composed inside your heart, listen to its beat to syncronize your life onto the angel's steps.