Prokuroria po heton implikimin e makinës me targa Tr 6888 E, pronë e Kuvendit në disa krime të bujshme

Makina e Kuvendit, e përdorur në krime

Automjeti në dispozicion të deputetit të PS dyshohet se është përdorur nga anëtarët e bandës së Lushnjes

Lindita Çela

TIRANË- Një makinë e Kuvendit të Shqipërisë dyshohet të jetë përdorur në disa ngjarje të bujshme kriminale, të ndodhura në vendin tonë. Hetimet e muajve të fundit për disa nga organizatat më famëkeqe në vend kanë nxjerrë në dritë faktin se një makinë e Kuvendit në dispozicion të një deputeti të Partisë Socialiste të legjislaturës së kaluar, ka shërbyer për kryerjen e disa krimeve. Sipas burimeve të prokurorisë, kjo makinë tip “Volksvagen” me targa TR 6888 E dyshohet se është përdorur nga anëtarët e bandës së Aldo Bares, për një periudhë 5- vjeçare. Prokuroria e Krimeve të Rënda është duke hetuar faktin sesi makina, pronë e Kuvendit, është bërë pjesë e disa prej ngjarjeve më të bujshme, të ndodhura në vendin tonë si dhe implikimin e personave që e kanë pasur atë në dorëzim në këto krime.
Makina
Automjeti tip “Volksvagen” me targa TR 6888 E, prej muajsh qëndron e mbyllur në garazhin e parkut të delegacioneve në Tiranën e Re. Ajo ka ardhur në Shqipëri në vitin 2001 dhe nuk ishte përdorur asnjë ditë më parë, aktualisht është krejt e shkatërruar dhe jashtë përdorimit. Sipas punonjësve të drejtorisë së transportit në Kuvend, makina është krejtësisht e shkatërruar dhe zor se mund të vihet më në shërbim me gjithë serviset që mund t’i bëhen. Shoferët e Kuvendit thonë se makina është keqpërdorur sikur të kishte 20 vite punë dhe jo vetëm 6 vjet që ka hyrë në Shqipëri. Madje, makinës i mungojnë edhe targat e deri më tani askush nuk e di se ku kanë përfunduar, megjithë hetimet e kryera. Drejtori i drejtorisë së Transportit në Kuvend thotë se ekziston një denoncim në komisariatin e qytetit të Kavajës, ku shoferi i deputetit të PS, Sali Qerazi, ka denoncuar humbjen e targës së makinë pa dhënë motivacione të sakta. Ky denoncim është bërë në gusht të vitit të kaluar. Ndërkohë që vetëm në tetor të vitit 2006, drejtoria e transportit ka marrë në dorëzim makinën dhe për shkak të gjendjes së saj të mjerueshme e ka vendosur në garazhet e parkut të delegacioneve, aty ku edhe qëndrojnë të parkuara makinat që nuk përdor Kuvendi.
Hetimi
Përveç burimeve nga organi i akuzës, faktin se kjo makinë dyshohet të jetë përdorur nga anëtarë të bandës së Aldo Bares pohohet edhe nga drejtori i transportit, Ilia Leskaj. Për “Shekullin” ai thotë se ka dëgjuar të flitet për makinën në fjalë, porse nuk ka informacion të saktë sesi është përdorur kjo makinë. Sipas tij, deputeti që merr në dorëzim makinën ka kompetenca të plota mbi mjetin dhe nuk jep qoftë dhe informacionin më minimal për lëvizjet që mund të kryejë brenda Shqipërisë. Ndërkohë që organi i akuzës është krejt i bindur se makina jo vetëm që është përdorur nga banda e Aldo Bares, por mendohet se duke përdorur këtë makinë të deputetit, eksponentë kriminalë kanë kryer akte të rënda në vend. Pikërisht zbardhja e ngjarjeve me të cilat është përdorur mjeti në fjalë është një nga pistat më të reja të hetimeve mbi të cilën po punohet për të përpiluar dosjen voluminoze të organit të akuzës. Ndërkaq, prokuroria është duke sqaruar tashmë pozicionin e personave që e kishin në dorëzim këtë makinë, të deputetit të Partisë Socialiste dhe shoferit të tij, Sali Qerazi.

MAKINA

Automjeti i blerë nga Kuvendi i Shqipërisë me kilometrazh zero ka ardhur në Shqipëri në vitin 2001. Ai dispononte targat TR 6888E, targa këto që janë denoncuar si të humbura nga shoferi i deputetit që përdorte makinën

DEPUTETI

Makina e mësipërme është marrë në dorëzim, sapo ka ardhur nga jashtë nga një deputet i Partisë Socialiste për Kavajën. Ky i fundit ka punësuar si shofer Sali Qerazin, i cili është edhe personi që ka drejtuar makinën

DYSHIMI

Makina që i përket Kuvendit të Shqipërisë dyshohet se është përdorur për realizimin e disa krimeve në vend. Madje, prokuroria dyshon se ajo është përdorur edhe nga anëtarë të bandës së Aldo Bares, gjatë pesë viteve

__________________
Nevoja për te folur, hutimi dhe frika qe nuk ke asgjë për te thënë, dhe lakmia qe të tregohesh hokatar, janë tre gjërat qe arrijnë ta bëjnë qesharak edhe njeriun me të madh. (Voltaire)