Debat në parlament për ministrin e Jashtëm


Lulëzim Basha, ministër i Jashtëm

Zoti Basha dyshohet se është përfshirë në afera korruptive.
Parlamenti shqiptar është përfshirë nga debatet rreth ekzistecës së një kërkese të Prokurorisë së Përgjithshme për heqjen e imunitetit të deputetit Lulzim Basha, aktualisht ministër i jashtëm.

Zoti Basha dyshohet se është përfshirë në afera korruptive gjatë kohës kur ka qenë ministër i Punëve Publike, Transportit dhe Telekomunikacionit lidhur me ndërtimin e rrugës Durrës, Kukës, Morinë e cila ka filluar të ndërtohet vitin e kaluar.

Përfaqësues të opozitës këmbëngulën se kërkesa është dorëzuar në parlament, por nënkryetari i parlamentit, Fatos Beja, që drejtoi seancën e mohoi një gjë të tillë.

Tensioni në sallë u ngrit pas fjalës së deputetit demokrat, Spartak Ngjela.

Ai e quajti të patolerueshme situatën ndërsa aludoi se parlamenti është vënë në shërbim të kryeministrit të vendit.

Ju jap fjalën e nderit së kësaj çështjeje do t'i shkojë deri në fund

Lulëzim Basha

Ndërkohë, ishte vetë deputeti Lulëzim Basha, i cili me ndërhyrjen e tij ndryshoi atmosferën.

Zoti Basha u shpreh i gatshëm të hetohet: “Ju jap fjalën e nderit se kësaj çështjeje do t'i shkojë deri në fund,”- tha ai.

Çështja Sollaku

Debati i maxhorancës dhe opozitës ishte ndezur më parë pasi deputetë të grupit parlamentar të PD-së kishin kërkuar zyrtarisht fillimin e procedurave për shkarkimin e prokurorit të përgjithshëm, Theodhori Sollaku.

Duke kërkuar ngritjen e një grupi të ri hetimor parlamentar maxhoranca thotë se kryeprokurori ka bërë shkelje të rënda ligjore.

Por nga ana e saj opozita e cilëson këtë kërkesë presion ndaj Prokurorisë pikërisht kur ajo po heton një aferë të madhe korruptive.

Kërkesa e grupit parlamentar demokrat për fillimin e procedurave për shkarkimin e prokurorit të përgjithshëm është e dyta që kur PD-ja erdhi në pushtet në korrik të vitit 2005.

Më parë ajo e kish akuzuar zotin Sollaku për implikim në të paktën 80 afera kriminale dhe korruptive, të cilat ai i kishte hedhur poshtë si të pavërteta.

Edhe kërkesa e grupit parlamentar demokrat për shkarkim u hodh poshtë nga presidenti i atëhershëm, Alfred Moisiu.

Më vonë, Gjykata Kushtetuese e quajti të jashtëligjshëm objektin e komisionit hetimor parlamentar.

Në vendimin e saj thuhet se Kuvendi i Shqipërisë nuk ka kompetencë të kontrollojë dhe të vlerësojë vendimet e prokurorëve në çështjet konkrete.

Por si duhet vlerësuar kërkesa e re e maxhorancës për shkarkimin e zotit Sollaku?

Ish-kreu i Gjykatës së Lartë, Rustem Gjata, i tha BBC-së se ligji nuk i ndalon parlamentit ngritjen e më shumë se një komision për këtë çështje, por duhet që të paraqiten prova të reja.

Më tej do të jetë presidenti që do të vendosë. Por kur presidenti i ri, Bamir Topi është nga krahu i maxhorancës se djathtë, largimi i zotit Sollaku nga detyra duket tashmë i sigurtë.

__________________
Vetem me ndihmen e Zotit arrihet qellimi.