Ju jeni deputete për herë të parë në Kuvendin e Shqipërisë. Cila është çështja ose problemi, që ju do ta ndiqni më shumë?
Zgjedhjet e Përgjithshme 2005 shënuan një stad të ri drejt konsolidimit të demokracisë, arritjes së një zhvillimi të qëndrueshëm drejt integrimit evropian të vendit. Fillimi i punimeve të Kuvendit të ri, shënon një hap të rëndësishëm në jetën politike shqiptare. Zgjedhjen time në këtë Kuvend, unë e konsideroj së pari, si përgjegjësi që më vë përpara detyrave dhe sfidave të reja dhe një impenjimi serioz për t’i kapërcyer ato. Në këtë status të ri, si anëtare e institucionit më të lartë ligjvënës, nuk do të rresht së punuari në 2 drejtime kryesore, duke qenë e bindur, se këto janë pjesë e rëndësishme e procesit të integrimit evropian të vendit: Çështjet gjinore dhe ato të shëndetësisë dhe problemet sociale.Si përfaqësuese e PR-së, por edhe e lëvizjes së gruas, shpreh domosdoshmërinë e arritjes së balancimit të roleve dhe kontributeve të femrave dhe meshkujve në të gjitha fushat e nivelet.

Bindja ime është, se mazhoranca e re nuk do të kufizohet në arritjen historike të zgjedhjes për herë të parë të një gruaje në krye të legjislativit shqiptar, por do të ketë një angazhim serioz, që brenda qeverisjes sonë 4-vjeçare të arrihet: shfrytëzimi sa më i plotë i potencialit dhe kapaciteteve të grave në të gjitha fushat dhe nivelet, - mundësimi i zbatimit të të drejtave të tyre sipas legjislacionit në fuqi, -fuqizimi i vazhdueshëm ekonomik dhe politik i tyre. Bazuar dhe në eksperiencën time si mjeke dhe specialiste e politikave shëndetësore, dua të theksoj rëndësinë e problemeve shëndetësore dhe sociale, duke nënvizuar, se ne duhet të kujdesemi që reformat të mos agravojnë problemet sociale ekzistuese, por të zgjidhin përfundimisht gjendjen e varfërisë dhe mungesës së shanseve për çdo individ.

Ne duhet të ecim drejt një sistemi shëndetësor modern e efiçient dhe në shërbim të qytetarit, duke përmirësuar sektorin publik dhe, duke zhvilluar një sektor privat plotësues e të zhveshur nga të gjitha llojet e konflikteve të interesave. Kjo do të mund të realizohet nëpërmjet përmbushjes së 2 objektivave madhore: goditjes shkatërruese të klaneve korruptive, mafies së bluzave të bardha dhe të monopoleve farmaceutike, të instaluara tashmë, konsiderimit të pacientit “mbret”, duke e vendosur atë në qendër të vëmendjes dhe shërbimit shëndetësor. Edhe një herë do të theksoja, se ne nuk mund të sjellim zhvillimin e vendit dhe të arrijmë sukses në procesin e integrimit euroatlantik të tij, pa realizuar ndër të tjera, edhe këto 2 kushte bazë: rritjen e rolit të gruas për të kontribuar në mënyrë të barabartë në proceset e zhvillimit; sigurimin e kushteve për të patur qytetarë të shëndetshëm në fëmijëri, adoleshencë e rini, moshë të rritur dhe në moshën e tretë.

Partia Republikane ka në programin e saj si prioritare, ligjin e pronave. Mendoni se do të gjendet konsesus me PD-në për këtë çështje?
Mendoj se zgjidhja e problemit të pronave është një nga objekivat madhore të mazhorancës së re. Edhe midis dy aleatëve PD e PR është rënë në konsensus, që para zgjedhjeve për të zgjidhur përfundimisht këtë problem. Unë shpresoj dhe uroj që, edhe në praktikën tonë legjislative e qeverisëse, çështja e pronave do të gjejë impenjimin dhe vullnetin përkatës për t’u trajtuar me seriozitetin e duhur, jo vetëm nga aleanca drejtuese, por dhe nga forca të opozitës.
Si ju duket fillimi i këtij legjislacioni, i butë, apo paksa i egër, mendoni se ka ndyshuar diçka nga legjislacioni i kaluar?

Mendoj se është ende shpejt për t’i dhënë një përgjigje të saktë kësaj pyetjeje, pasi nuk ka filluar ende praktika e vërtetë parlamentare. Janë bërë hapat e para të domosdoshme, lidhur me procedurat e zgjedhjes së autoriteteve drejtuese të Kuvendit si dhe aprovimi i qeverisë së re. Kalimi në seancën e fundit të Komisioneve Parlamentare, shënon dhe një stad të rëndësishëm të fillimit të punës sipas fushave përkatëse. Unë uroj që ky parlament të shënojë një hap pozitiv drejt konsensusit politik dhe debatit konstruktiv në shërbim të zgjidhjes së problemeve dhe, jo anashkalimit apo agravimit të tyre. Mendoj se fakti që në këtë Kuvend ka 80 deputetë të rinj, nga të cilët rreth 74 janë të zgjedhur për herë të parë, është tashmë një arritje, pasi unë i qëndroj besnike konceptit, që lëvizja dhe ndryshimi janë bazë e zhvillimit. Le të shpresojmë se ky progres në aspektin e ndryshimit sasior, do të ecë paralel dhe me ndryshimin cilësor të përbërjes parlamentare.

Përfaqësimi i numrit të grave në parlament është i ulët. Mendoni se një numër më i madh do të ishte një zbutje e maskilizmit në politikë? Po zgjedhja e një gruaje në krye të Kuvendit?
Duket se në Shqipëri jeta politike është organizuar sipas normave dhe vlerave mashkullore dhe shpesh sipas mënyrës mashkullore të jetesës. Kështu, modeli politik është i bazuar më tepër në idenë e “të fituarve dhe të humburve”, kompeticionin dhe konfrontimin, sesa në respektin reciprok, ndërtimin e bashkëpunimit dhe konsensusit, që janë pjesë më shumë e mjedisit femëror, lidhur kjo si me natyrën dhe me eksperiencat e tyre. Një shoqëri moderne demokratike duhet të zhvillojë një kontratë të re sociale, në të cilën burrat dhe gratë të punojnë së bashku dhe në komplementaritet me njëri- tjetrin. Është tashmë i njohur fakti se, sidomos në proceset e fundit zgjedhore, u vu re shkalla më e lartë e diskriminimit të gruas në përfaqësimin e saj për garën politike, gjë që ka sjellë një nënpërfaqësim të thellë të gruas me një shifër simbolike në total me rreth 2.6 % (2003) në drejtimin e pushtetit lokal dhe në numër 10, apo përqindje 7,2 % në legjislativin e ri 2005 dhe ky realitet lë shumë për të dëshiruar.

Maskilizimi i politikës, mungesa e politikave të balancës gjinore, situata e vështirë e proceseve zgjedhore, pothuajse e kanë përjashtuar gruan nga procesi politik i vendit. Pa dyshim, është për t’u përshëndetur zgjedhja e një gruaje në krye të Kuvendit shqiptar, si një arritje historike, por siç u shpreha edhe më lart, nuk duhet të mjaftohemi me kaq, por duhet të vazhdojmë përpjekjet e përbashkëta drejt arritjes së një balance gjinore në të gjitha nivelet.

Besoni se qeverisja demokratike do t’i realizojë të gjitha premtimet e bëra në fushatë?
Sigurisht që dëshira është pozitive. Si përfaqësuese e mazhorancës, unë kam shprehur gatishmërinë time profesionale dhe politike për të mbështetur përmbushjen me sukses të programit tonë qeverisës, në bashkëpunim të ngushtë veçanërisht me Ministrinë e Shëndetësisë, atë të Punës dhe Shanseve të Barabarta dhe ministritë e tjera të linjës. Mund të them se programi i qeverisë “Berisha”, padyshim është një sfidë në tërësinë e tij. E veçanta e tij është, se kjo sfidë është programuar të fillojë me 100 ditët e para të qeverisjes, në luftë me situatën aktuale të mjerimit ekonomik dhe korrupsionit. Shpreh bindjen time, se qeveritarët tanë do të mbajnë përgjegjësinë e zotimeve e që në përfundim të 100 ditëve të para të punës, (që përkon dhe me festat e fundvitit) të mund t’u ofrojnë shqiptarëve efektivitetin dhe efiçiensën e kësaj qeverisjeje. Le të presim të flasin veprat më mire, sesa fjalët.

Do ta mbështesnit idenë e krijimit të një lobingu të grave deputete në parlament?
Padyshim që kjo është një çështje shumë e rëndësishme dhe ajo përbën një nga misionet e mia, si aktiviste e shoqërisë civile dhe e lëvizjes për barazi gjinore në vend. Lobingu është një nga mekanizmat më të rëndësishëm për arritjen e një objektivi, apo qëllimi të caktuar dhe unë personalisht kam një eksperiencë pozitive në këtë drejtim.

Nuk do të mungojë angazhimi im në këtë aspect, edhe në parlament, por mos harrojmë që për të realizuar këtë, nuk mjafton vetëm dëshira e mirë e njërës palë, por duhet edhe e të tjerave. Për më tepër, që eksperienca e deritanishme ka treguar, se jo gjithmonë gratë parlamentare kanë përfaqësuar interesat e vetë kontigjentit femër të popullatës, për të mos thënë, që kjo gjë ka ndodhur shumë rrallë. Shpresoj se me parlamentarët e sotëm, si të vjetrit dhe të rinjt, do të mund të arrihet një hap pozitiv në këtë drejtim. Mendoj se për këtë do të na ndihmojë, edhe drejtimi nga një grua i legjislativit shqiptar. Pra, dëshiroj të jem optimiste, lidhur me këtë çështje.

__________________
Try not to become a man of success but rather to become a man of value - Einstein Albert.