Bashkëhartuesi i Kushtetutës mbron datën e dekretuar nga Moisiu, por kërkon konsensus brenda politikës.

"Situata politike është mjaft e rëndë, por jo pa zgjidhje". Ky ka qenë komenti që ka bërë një nga politikanët më me përvojë në vend dhe njëkohësisht edhe një nga hartuesit e Kushtetutës, Sabri Godo. Duke komentuar për herë të parë, krizën që ka pushtuar politikën shqiptare për datën e zgjedhjeve lokale, Godo ka theksuar se zgjedhjet e rregullta s‘mund të jenë pa opozitën dhe se për këtë ai ka kërkuar një konsensus midis dy forcave më të mëdha politike në vend. Sipas tij, nëse ky konsensus do të mungojë, atëherë situata do të përkeqësohet. Duke mbrojtur datën e dekretuar nga Presidenti si zgjidhje ligjore, Godo është shprehur se ekziston mundësia e plotë për të vendosur dialog gjatë ditës së hënë, që zgjedhjet të mbahen më 20 janar. "Zgjedhjet e rregullta, sigurisht që nuk mund të jenë pa opozitën. Mjafton që palët të lëvizin nga pozicionet e ngurta dhe gjithë afatet rregullohen", tha Godo.

Republikani Godo, i mëshon fortë mendimit se dita e hënë duhet të jetë kufiri i fundit kohor për të rënë në një ide të përbashkët për zgjedhjet lokale. "Nëse nuk ka kompromis, kjo do të thotë një rrugë ogurzezë dhe pa krye për vendin", tha ai. Sipas Godos, zgjidhja duhet të jetë politike dhe lëvizje e të dy kampeve nga pozicionet e tyre të ngurta. "Që zgjedhjet të mbahen në datën e dekretuar nga Presidenti, 20 janar, duhet që palët të lëvizin nga pozicionet e tyre", u shpreh republikani Godo. Sipas tij, në rast se do të lëmë rrethana të tjera, atëherë duhet të veprojmë në mënyra të tjera. Republikani Godo ishte i pranishëm dje në një takim të përbashkët me simpatizantët e Partisë Republikane për të mbështetur kandidatin e mazhorancës në kryeqytet për zgjedhjet lokale, Sokol Olldashi. Duke dhënë mbështetjen e tij për kandidatin për kryetar bashkie, Godo nuk ka lënë pa përmendur edhe krizën që ka pushtuar politikën shqiptare në lidhje me datën e zgjedhjeve.

__________________
The heaven's sound is composed inside your heart, listen to its beat to syncronize your life onto the angel's steps.