Qeveria shqiptare ka pranuar dje në mënyrë publike se nuk do të marrë një ftesë për anëtarësim në NATO në Samitin e Rigës që do të zhvillohet në fund të muajit nëntor.

Lajmi është konfirmuar dje nga vetë kryeministri Sali Berisha i cili deklaroi se Shqipëria do të bëjë të gjitha përpjekjet për reformën dhe pret ftesën për anëtarësimin në NATO në vitin 2008, gjatë samitit të Uashingtonit. Kjo është hera e parë që zyrtarët e lartë të shtetit shqiptarë përmendin një tjetër datë për marrjen e ftesës ndryshe nga ajo e deklaruar për Samitin e Rigës së këtij viti, pra në nëntor 2007. Pavarësisht mbështetjes amerikane, shumë shtete evropiane të Aleancës së Atlantikut të Veriut kanë qenë shumë skeptikë lidhur me reformat e kryera nga vendet e Kartës së Adriatikut. “Shpreh bindjen dhe besimin se qeveritë e vendeve tuaja do të mbështesin përpjekjet tona ashtu si kanë bërë deri më sot, do të mbështesin përpjekjet e qeverisë shqiptare në tërësi që gjatë këtyre muajve që kanë mbetur nga Samiti i Washingtonit që do të zhvillohet në vitin 2008, Shqipëria të mund të marrë ftesën për anëtarësimin e plotë dhe shpreh bindjen se anëtarësimi i vendeve të Kartës së Adriatikut 3 sjell një kontribut të vyer në paqen dhe sigurinë rajonale” tha Berisha duke dhënë kështu në mënyrë të qartë edhe ndryshimin e datës se kur Shqipëria mund të marrë ftesën për anëtarësim në NATO.

Reforma
Sipas Berishës që të arrihen standardet e kërkuara nga NATO duhet detyrimisht që edhe reformat, që i përfshijnë si ato ekonomike, politike dhe ushtarake, të jenë në nivelin e atyre që kërkon organizata e Atlantikut Verior. “Reforma të thella po ndërmerren në Forcat tona të Armatosura. Kemi lënë mënjanë komponentin rezervist. Po ecim me shpejtësi drejt ushtrisë profesionale dhe shtimit të komponentit profesional. Në strategjinë e planifikimit të integruar, e cila ka synim planifikimin, koordinimin e të gjitha veprimtarive buxhetore të vendit u ndryshua edhe struktura e kësaj strategjie, e cila u cilësua si strategji e zhvillimit dhe integrimit. Komiteti i cili kryesohet nga kryeministri, në shqyrtimin që i bëri buxhetit afatmesëm, vendosi me unanimitet që buxheti për reformat në Forcat e Armatosura deri në vitin 2008 të kapë vlerën 2 për qind të prodhimit të brendshëm. Ne jemi të vendosur të paguajmë çdo çmim në mënyrë që të meritojmë ftesën për anëtarësim në NATO, në Samitin e ardhshëm” tha Berisha.

Kushti
Gjithmonë është thënë se Shqipëria do të çojë buxhetin për mbrojtjen në 2 përqind të prodhimit të brendshëm në mënyrë që të realizojë një ndër kushtet ekonomike të kërkuara nga NATO. Për vitin 2006 një gjë e tillë nuk u realizua dhe ndoshta, përderisa kryeministri deklaron se në Samitin e Uashingtonit do të marrë ftesën për anëtarësim, atëherë kjo gjë do të ndodhë në vitin 2008. Por janë edhe faktorë të tjerë politik të cilët kanë influencuar në këtë vendim për të mos pasur ftesë për anëtarësim që në Samitin e Rigës. Disa kohë më parë Gjermania nëpërmjet zërave diplomatikë e shprehu hapur se ishte për anëtarësimin e Kroacisë në NATO por jo të Maqedonisë dhe Shqipërisë, duke kufizuar paksa shpresat.

__________________
Try not to become a man of success but rather to become a man of value - Einstein Albert.