Votimi për shkarkimin e Spartak
Ngjelës do të bëhet nesër i hapur dhe me procedurë të përshpejtuar. Partia Demokratike ka zgjedhur një mënyrë mjaft lehtësuese për të “hequr qafe”, një prej rebeluesve kryesor të saj. Burime nga Kuvendi thanë për “Gazeta Shqiptare”, se për shkarkimin e Ngjelës, PD-ja ka menduar të përdorë mënyrën e zëvendësimit. Pra votimi do të bëhet vetëm për zëvendësimin e tij në postin e kryetarit të komisionit parlamentar të ligjeve nga Fatos Beja, që u propozua dy ditë më parë në kryesinë e Partisë Demokratike. Me këtë procedurë, maxhoranca e ka shumë të thjesht të bëjë një votim të hapur dhe pa shumë probleme, duke u mbrojtur me nenin 21 të rregullores së Kuvendit. Në këtë nen përcaktohet që zëvendësimi i anëtarëve të një komisioni bëhet me votim të hapur. Propozimi për zëvendësim bëhet nga kryetari i Kuvendit, pas këshillimit me kryetarët e grupeve parlamentare. Por situata në Kuvend për shkarkimin e kryetarit të komisionit, Ngjela, nuk do të jetë aq e qetë, duke qenë se një pjesë e aleatëve të maxhorancës, janë kundër largimit të tij, ndërkohë që edhe opozita duket se e mbështet dhe do të vijojë protestat e saj për votën e fshehtë.

Procedura
Si të mos mjaftonte debati që do të zhvillohet të hënën për ndryshimin ose jo të rregullores së Kuvendit, në rend të ditës do të jetë edhe shkarkimi i kryetarit të komisionit, Spartak Ngjela. Burime nga Kuvendi konfirmuan dje në mbrëmje, se shkresa e zëvendësimit të avokati nga nënkryetari i Kuvendit Fatos Beja është bërë gati dhe do t’i komunikohet seancës së të hënës nga kryetarja Jozefina Topalli. Mënyra që kanë zgjedhur demokratët që votimi për Ngjelën do të jetë i hapur me elektronikë, nuk i lejon asnjë nga deputetëve demokratë që të devijojnë nga qëndrimi politik, në rast se nuk duan ta pësojnë si Ngjela. Nga diskutimet e bëra dje në mbrëmje, deputetët do të votojnë për zëvendësimin e avokatit, jo direkt për shkarkimin e tij. Kërkesa zyrtare e maxhorancës e cila ka të drejta të plota në bazë të rregullores që të zëvendësojë kryetarin e komisionit që i takon asaj, është e thjeshtë; “zëvendësim të kryetarit”. Ndërkohë që i gjithë debati politik i zhvilluar mes Kryeministrit Sali Berisha edhe Ngjelës dihet. Për numrin një të qeverisë, Ngjela ka dalë nga vija politike e duhet ndëshkuar.

Debati
Kërkesa për zëvendësimin e Spratak Ngjelës nga komisioni i ligjeve, do të sjellë turbullira të reja në Kuvend. Nga njëra anë Partia Socialiste, ashtu siç ka deklaruar edhe më parë, do të kërkojë kthimin e votës së fshehtë duke përmendur bojkotin nëse nuk arrihet konsensusi. Nga ana tjetër PD do të kërkojë të kalojë me ngulm kërkesën e saj për zëvendësimin e Ngjelës, si dhe do të përballet me aleatët e saj, PDR-PBDNJ-PDK që do të votojnë kundër zëvendësimit të avokatit. Për Nard Ndokën, Nikollë Lesin edhe Spiro Peçin, zëvendësimi i Ngjelës është një hap i gabuar që po ndjek Kryeministri Sali Berisha, duke e quajtur një profesionist në fushën e tij. Ashtu si Ndoka edhe Peçi, thuajse kanë qenë të një mendimi me avokatin kur ai kundërshtonte si antikushtetuese projektet e qeverisë, si ai për ndalimin e skafeve, pjesëmarrjen e publikut në luftën kundër korrupsionit apo legalizimin e zonave informale. Aleatët ashtu si Ngjela, i kanë quajtur antikushtetues, madje nuk kanë marrë pjesë në votimin e këtyre projekteve, duke kërkuar ndryshime nga qeveria. Kjo përputhje do të reflektohet në votimin e ditës së hënë, që kërkohet të bëhet me shpejtësi nga PD-ja për zëvendësimin e Ngjelës.


Zëvendësimi
Fatos Beja është i përzgjedhuri i Partisë Demokratike për të zëvendësuar në postin e kryetarit të komisionit parlamentar të ligjeve, Spartak Ngjelën që u shkarkua me vendim të kryesisë së PD-së dy ditë më parë.

Përcjellja
Kërkesa për zëvendësimin e Ngjelës e firmosur nga kryetari i grupit parlamentar demokrat Bamir Topi, i kalon kryetares së Kuvendit, Jozefina Topalli. Kjo e fundit do ta prezantojë Bejën si pasardhës në seancën e nesërme plenare.

Votimi
Për zëvendësimin e Spartak Ngjelës, votimi do të bëhet ditën e hënë. Sipas rregullores së Kuvendit, ai do të jetë i hapur me elektronikë dhe mjafton shumica e thjeshtë për ta realizuar.

Kundërshtimet
Aleatët e Partisë Demokratike, PDR-ja, PDK-ja dhe PBDNJ-ja deklarojnë votën kundër shkarkimit të Ngjelës. Për ta avokati është profesionist dhe kundërshtimet e bëra në disa raste për projektligjet e qeverisë, janë me vend.

Historia
Ngjela, hapat drejt çarjes së madhe?
Dorëheqjen e Spartak Ngjelës nga posti i kryetarit të komisionit parlamentar të ligjeve, e kërkoi disa ditë më parë në një mbledhje të kryesisë, Kryeministri Sali Berisha. Kreu i qeverisë akuzoi avokatin se po kthehet në një nga pengesat kryesore të maxhorancës, duke kritikuar e kthyer projekte të rëndësishme të qeverisë, si antikushtetuese. “Je i shkarkuar. Nuk ke zbatuar vendimet e grupit, je kthyer në një pengesë”, - tha Berisha në mbledhjen e cila u transkriptua e plotë nga media. Jo të pakta ishin akuzat e Ngjelës. “Ti je një komunist, majtist, enverist, që nuk më njeh mirë. Nuk jam vetëm”, - tha Ngjela, duke theksuar se ligjet e bëra nga qeveria, janë paçavure dhe antikushtetuese.
Ngjela e akuzoi Berishën për një qeveri me përbërje komuniste. “Ja po të them, që nuk ka rast në histori që kundërshtarin ta mbash në qeveri dhe liderin politik ta mbash jashtë. Vetëm ti e ke bërë këtë, ti e marrë kundërshtarin tonë më të madh, majtist, komunist, enverist jeni tre komunistë në qeveri, ndërkohë që gjithë bota thotë rishikoni komunistët. Ehu, ne të kemi toleruar shumë madje, je shumë i toleruar dhe unë kam faj që të kam toleruar”, - ka thënë ai. Reagimi dhe publikimi i bisedës që u zhvillua me dyer të mbyllura, bëri që kryesia e PD-së të zhveshë Ngjelën nga çdo funksion në parti.

__________________
Try not to become a man of success but rather to become a man of value - Einstein Albert.