Rrezatuese dhe e thjeshtë, një bukuri me ngjyra natyrale, me tonalitete të ngrohta mesdhetare, herë paraqitet si karakter plot energji dhe jetë në performancat e saj, herë me nuanca klasike “retro”, një look i mbushur me variacion dhe stile të ndryshme. Në një mënyrë ose tjetrën, ajo paraqitet përpara publikut si një imazh që di të sjellë elementë të veçantë dhe interesantë, të mbushur me shije, dinamikë, por edhe feminilitet e klas.

Pamja e Perditshme

Veshja
Tashmë jam 25 vjeç dhe nuk mbaj më minifunde”, - thotë ajo. Jo sepse nuk mundet, pasi me trupin e saj në formë të përkryer mund t’ia lejojë vetes, por sepse mendon që gjithçka ka një moshë. Ashtu i ndodh dhe me ngjyrat që përdor më shumë, më përpara preferonte shumë ngjyrat e errëta, si të zezën, kafen e errët, etj. Tashmë i pëlqen më shumë të luajë me ngjyrat e ngrohta, natyrale, plot larmi dhe impakt. Pëlqen shumë kombinimet e ndërthurura, si fustane plot ngjyra dhe dizenjo të veshura me xhinse poshtë dhe nuk preferon të ekspozohet duke vendosur të gjitha pjesët në dukje, prandaj parapëlqen të zgjedhë alternime ndërmjet veshjes. Kështu që në rast se vesh xhinse të ngushta poshtë, zgjedh të mbaj mbi to një bluzë të lirshme dhe anasjelltas.

Aksesorët
Kohët e fundit është shumë e dhënë pas rripave dhe shalleve të kokës; janë aksesorë që i nxjerrin më në pah tiparet e fytyrës dhe me to i pëlqen të krijojë kontraste, mes natyrës së saj brune dhe ngjyrave si portokalli, e verdhë dhe blu. Aksesorët janë sportivë nëse veshja është e tillë, ndërsa preferon që në rast se zgjedh ngjyra me “të ftohta” si grija dhe e zeza, t’i shoqërojë ato me aksesorë metalikë dhe me materiale si argjendi.

Flokët
Ndoshta flokët e zeza janë pjesa më e pandryshueshme e look-ut të saj. Kjo ndikohet dhe nga fakti që ka një lloj floku të egër dhe mesdhetar, jo shumë i përshtatshëm për ndryshime, të cilat dhe parukierët brenda dhe jashtë vendit nuk ia kanë këshilluar. Por nuk është se Soni e ka lënë me kaq, ka eksperimentuar dhe ka provuar të ndryshojë dikur, nga ngjyra e zezë në një nuancë kumbull, por fatkeqësisht ishte një tentativë pa rezultat, ashtu siç pohon dhe ajo vetë. Interesante është se njëherë ka provuar dhe ngjyrën e bardhë, një ekstrem tjetër që i shkonte shumë, por që ishte veçse një paruke, sepse nuk do të guxonte kurrë të shkonte aq larg me flokët e saj natyralë.

Truku
Gjatë jetës së përditshme është për një truk të thjeshtë, duke u përqendruar shumë te pjesa e syve. Parapëlqen të nxjerrë në pah forcën e shikimit të saj dhe për këtë, shoku i saj më i mirë është lapsi i zi. Rrëfen duke buzëqeshur se ka provuar shumë marka të ndryshme, por që gjithmonë lapsi i zi ka tendencën t’i “bjerë” dhe për këtë, zgjidhja e vetme ka qenë një markë disi modeste si ajo “Golden Rose”.

Pamja skenike
Për sa i përket performancave të saj me këngët ritmike që zënë rreth 80% të repertorit të saj, është gjithmonë shumë në formë, me një trup të tonifikuar dhe me muskuj, e arritur kjo në vite punë intensive në palestër. Duke dashur të vendosë në pah këtë anë dhe duke pohuar se një pjesë shumë të rëndësishme të kësaj performance përveç këngës e zë dhe kërcimi, zgjedh veshje që t’i krijojnë mundësinë të mund të jetë sa më e lirshme, por që janë dhe skenike në të njëjtën kohë. Kur shkon te stilistët, kërkon gjithmonë “veshje balerinash”, një zgjedhje e bërë sepse vetë natyra e qepjes dhe e modifikimit të këtyre kostumeve është specifike për të kërcyer. Pjesa që preferon të zbulojë më tepër është pikërisht ajo e barkut (adominalet), por gjithmonë tregon se është shumë e kujdesshme ndaj zhveshjeve të tepruara. Kështu që kur vendos të nxjerrë në pah vetëm një pjesë të trupit, ajo zgjidhet në mënyrë që pjesa e zbuluar të ketë mundësinë të evidentojë forcën dhe potencën e lëvizjes gjatë kërcimit. Eviton dekoltetë, sepse sipas saj mund të sjellin ndonjë surprizë të pakëndshme në skenë.

Për sa i takon anës klasike sidomos në balada, ajo preferon të zgjedhë stilin “retro” të viteve ’30, si në modelimin e flokëve ashtu dhe në veshje. Një zgjedhje plot feminilitet dhe sharm, që vë më në dukje natyrën e ngrohtë të këngës dhe të vetë këngëtares. Për trukun skenik preferon ta lërë veten në dorë të grimierëve, duke qenë se kanë një këndvështrim më të mirë, janë më profesionalë si dhe për të ndryshuar edhe “dorë”.

__________________
Be aware of what u do in the past, because of the future consequences!