Nuk e dimë nëse do t’i mbajë më aksesorit e rrotës varur në qafë, t-shirtet me jaka butaforike apo ngjyrat e feksura jeshile dhe të verdha si çdo mbrëmje në Fiks Fare. Megjithëse në këtë intervistë speciale premton se do të mbetet në emision edhe nëse bëhet deputet, duket e çuditshme të përfytyrosh një deputet që përveçse vishet në mënyrë groteske, është çdo ditë protagonist i një programi destinuar për një audiencë që mund të mos ketë asnjë lidhje me elektoratin e tij. Por Saimir Kodra, kandidati surprizë për deputet në zonën 86 në Pogradec, është i sigurtë që populli e do në të dyja versionet.

Nuk e dimë në fakt nëse batutat e Saimirit do të tingëllonin njëlloj në gojën e deputetit Kodra, por tani për tani kandidatit për një vend në Parlament i rri në gojë vetëm fjala “popull”. “Më do populli”, “Unë vij nga populli”, “Populli është zëri, mendja dhe fushata ime”. Në disa prononcime të ditëve të fundit është shprehur madje edhe “Për mua është nder që të kandidoj dhe të kërkoj votën e popullit për herë të parë si një bir i thjeshtë i vetë popullit”. Sado patetike të tingëllojnë, ai i deklaron si të vetmen kredo që dëshiron të bëjë publike në lidhje me vendimin për të kandiduar si deputet. “Por nëse doni të më shihni si parashutist, instruktor zhytje apo deputet fiks, jeni të lirë ta bëni”, - shprehet ai ndërsa lë të kuptojë që e ka patur prej kohësh ndërmend deputetllëkun dhe se ky kandidim, sado rastësor mund të duket edhe për shkak se vjen në një moment kur kandidohet për vendin e mbetur vakat nga vdekja aksidentale e deputetit Besnik Jacelli, dhe që sipas tij, “është vazhdimi i një rruge që e nisa për t’i shkuar deri në fund”.
Por po të kërkosh në të kaluarën e kandidatit për deputet, Saimir Kodra, vështirë është të gjesh back-ground politik. Vetëm nëse do të llogarisnim si të tilla batutat tek “Fiksi” që kishin filluar të ishin gjithnjë e më “serioze” kohët e fundit dhe disi më personale dhe të angazhuara se ç’pritej, duke marrë edhe “hisen” më të madhe të kohës në emision me “fjalimet” e tij. Gjithësesi Saimiri ka pohuar se nuk i ka munguar mbështetja e Partisë Socialiste, LSI-së, PSD-së, PBDNJ-së dhe madje ka pohuar se ka ftuar edhe Partinë Demokratike ta mbështesë.

Argumenti del prapë tek populli si mbështetësi kryesor për kandidimin e tij. Duket se rruga për të “shkuar” tek populli ka kaluar megjithatë nga shoqëria civile, ndërsa është shprehur për mediat se kandidimi i tij ishte një ide e Zyrës për Mbrojtjen e Kosumatorëve, shoqatës “Mjaft”, “Koalicionit Shqiptar Kundër Korrupsionit”, një kandidaturë e cila iu ofrua mandej opozitës dhe mori konfirmimin e saj. Saimiri vetë pohon se është angazhuar seriozisht në shoqërinë civile vitet e fundit dhe nuk ka mënuar të bëjë publike shpesh edhe ndjeshmëritë e tij qytetare nëpërmjet mesazhesh herë të drejtëpërdrejta herë të koduara në programin ku është bërë i njohur, “Fiks fare”. Ndoshta do të mund t’ia kthejë borxhin “Fiksit” po të zgjidhet deputet. Së paku programi investigues do të ketë akses më të lehtë në parlament ku mund të ketë të dërguarin e vet jo si korrespodent, por si deputet. Vetë Saimiri, zgjedh t´u përgjigjet pyetjeve në të njëjtën mënyrë, si në emisionin që e bëri të njohur dhe i hapi rrugën për të kandiduar për në Kuvendin e Shqipërisë.

Duket e pazakontë për një prezantues të natyrës së emisioneve që ju keni bërë, të përfshihet drejtpërdrejt në politikë dhe aq më tepër, pa hequr dorë nga ekrani. Si do t’i manaxhoni të dyja?
E kam dëgjuar ndoshta pak herë, por e kam dëgjuar faktin që ndoshta duket i pazakontë kandidimi im për deputet. Në atë pjesë të botës ku duam të shkojmë nuk janë të pakta rastet që njerëz nga shoqëria civile kanë hyrë në parlament si pjesë e saj, duke dhënë kontributin e tyre në këtë jetë që për fat të keq deri tani nuk ka qenë në nivelet që duam dhe për sa i përket manaxhimit të të dyjave, për mua është një ngritje e problemeve dhe halleve të popullit.

A mendoni se është “politikisht” korrekte lëvizja juaj?
Ndoshta nuk është politikisht e tillë, por ‘’civilisht’’.
Vihet re që shpesh gjatë emisionit shprehni opinione personale dhe mbani qëndrime të forta. Mos kanë qenë këto sinjalet e përfshirjes apo pozicionimit tuaj politik?
E vërtetë që gjatë punes time 5 vjeçare jam shprehur dhe kam mbajtur qëndrime, të forta mendoni ju, por për një përfaqësues të shoqërisë civile, për një person pjesë e kësaj shoqërie, kanë qenë mëse normale. Mund edhe t’i quajmë sinjale, por më tepër ishte një rrugë që nisa për t’i shkuar gjer në fund.
Kur e morët vendimin për t’u angazhuar mirëfilli në politikë?
Në momentin që miq të mi në Pogradec, pjesë e elektoratit të zonës ku do votohem, zona 86, që janë të shumtë, më propozuan për deputet dhe pasi gjeta një përkrahje të madhe nga shoqëria civile.

Kush ju mbështet në këtë nismë, në rrafsh personal, politik dhe financiar nëse jeni i hapur për të folur rreth këtyre...
Siç thashë me ka propozuar populli që më mbështet po aq fort sa dhe nevoja që kanë ata për një njeri që t’u rrijë pranë.
Ka ngjallur shumë komente në rrethe të ndryshme ky kandidim i juaji. Çfarë do t’u thoshit atyre që ju shohin me dyshim dhe që janë të gatshëm t’ju pranojnë qoftë edhe si parashutist, por jo si deputet. Në fakt, a jeni investuar ju sa duhet deri tani si profil shoqëror aktiv?
Eh! Thonë që pema me arra goditet... Nuk kam asgjë ndaj askujt që do të më shohë si deputet apo atij që do të më shohë si parashutist, instruktor zhytjeje apo si deputet Fiks.
Cili është back-ground juaj? Domethënë çfarë keni studjuar dhe çfarë eksperiencash ju kanë shënjuar më tepër?
Unë kam mbaruar fakultetin Histori- Filologji, dega Gjeografi.
A keni gjetur modele të ngjashme me angazhimin tuaj në vende të tjera?
Po t’i referoheni Italisë do gjeni raste ku njerëz të medias dhe shoqërisë civile kanë ndërmarrë angazhime politike.

Deri tani në Shqipëri kemi vetëm modelin e Filip Çakulit si profil afër tuajit që ka kandiduar gjithashtu si deputet. Ka ndikuar ndopak ai vetë në këtë mes apo rasti i tij për t’ua bërë t’ju duket më e lehtë që mund t’ia dilni mbanë në politikë?
Më vjen mirë që e përmendët Filipin. Ai ka kandiduar si i djathtë, por ishte pjesë e shoqërisë civile, gazetar. Mendon ndonjë që Filipi është i djathte dhe në Fiks-Fare? Ai kërkoi që në jetën politike të kontribonte me standartet e një gazetari, me standartet e një civili.
Ka nga ata që mendojnë se kandidimi juaj është provokim ose një lloj “loje” që synon ta satirizojë parlamentin shqiptar që duhet thënë edhe kështu siç është, ka shumë anë qesharake. Në fakt çfarë do të ndodhë nëse do të jeni në parlament? Do të jeni një deputet si gjithë të tjerët?

Ka nga ata që mendojnë ndryshe për kandidimin tim . Normale që do shohin një performim ndryshe në parlament. Nje performin jo qesharak alla parlament , por një ironi alla fiks. Më jepni pak ditë dhe do t’ua shuaj kureshtjen miqtë e mi.
Çfarë lidhjeje keni me zonën ku do të kandidoheni? Ju tashmë jetoni në Tiranë a nuk mendoni se në Pogradec do të kishin preferuar një banor të Pogradecit me “kohë të plotë”?
Unë jam djalë nga Pogradeci. Një pjesë e mirë e njerëzve të mi jetojnë akoma këtu, kontribuojnë çdo ditë për një Pogradec më të mirë. Unë u rrita me këtë ndjesi dhe në mënyrë shumë normale u bëra pjesë e këtij kontributi për qytetin e luleve.
Si do ta zhvilloni fushatën? Do të ketë ndonjë risi apo “ekstravagancë” ngase të tilla ndoshta priten.

Nuk e di si do ta quajnë apo çfarë kanë bërë të tjerët. Unë kam një fushatë totalisht timen dhe totalisht në popull, sepse ai është fushata ime, zëri, mendja. Çdokush nga ne ka një rrugë të tijën. Kundërshtari im ka atë të kandidimit sa herë në Pogradec hapen fushtata për zgjedhje. I ka qejf me sa duket... Punë e tij. Unë kam vite në rrugën e një altoparlanti për popullin. Ngrej zërin për hallet e tyre. Kjo do jetë përsëri rruga ime si deputet. Pra ata shohin te Saimiri një deputet që do të punojë më fort se ç’ka bërë këto 5 vjet.
Si e shihni veten pas 10 vjetësh?
Me plot miq deputetë nga shoqëria civile

Imazhe te Ngjitura

Saimir-Kodra.jpg (10.4 KB, 0 vezhgime)

__________________
The heaven's sound is composed inside your heart, listen to its beat to syncronize your life onto the angel's steps.