Për një kohë të gjatë mjaft gazeta dhe revista kanë shkruar për jetën e saj private, për lidhjen e gjatë dhe bashkëjetesën me kreun e partisë socialiste Edi Rama e cila përfundoi pak muaj më parë. Duke lënë pas këtë kapitull të jetës së saj tashmë I është përkushtuar punës së saj të re.

Diku në rrugën ‘Myslym Shyri’ Rudina Magjistari ka krijuar një ‘mbretëri’ të vetën, qendrën estetike ‘Velur’, një vend mjaft modern që ka edhe vemendjen e botës VIP, ku gjithcka është realizuar me elegancë dhe finesë. Në të mund të gjendet gjithcka për trajtimin e trupit dhe të fytyrës me produkte 100% natyrale.

Shohim që ke krijuar një qendër estetike, një spa vërtetë të vecantë. Si të lindi ideja e realizimit të saj?
Gjithshka lindi pak më shumë se një vit më parë, dhe mendoj se në thelb ndikoi fakti që në Tiranë nuk ekzistonte një ambjent i tillë, ku të mund të merreshe vetëm me veten tënde, ta trajtoje “me kimet” kur thonë gjyshet, duke u shkëputur për pak orë nga lodhja, problemet dhe ngarkesa e ditës.

Për tu ndjerë më i gjallëruar, më i freskët, më i bukur e me humor shumë më të mirë. Dhe për të ristartuar menjëherë të nesërmen më fort. Projekti pastaj për ta konkretizuar Velurin, filloi fill pasi bashkë me miken dhe kolegen time Manjolën, kërkuam eksperiencë e krijuam idetë e qarta se si duhej të ishte, çfarë duhet të përfshinte e ç’duhet të përfaqësonte. Gjithçka e përshkuar nga koncepti spa.

A mendon se kjo qendër kaq e vecantë do të tërheqe vëmendjen dhe te shume VIP-ve. Cila klientelë mendon se do e frekuentojë më tepër?
Mendoj që secili duhet të jetë personi më i rëndësishëm për veten e tij. Dhe ata që e mendojnë njësoj si unë, me siguri do ta mësojnë shumë shpejt adresën e Velur-it. Do të gjejnë aty një ambjent shumë mikpritës, një cikël të kompletuar shërbimesh mjaft cilësore, me produkte plotësisht natyrale që vijnë nga Tajlanda si dhe linjën Depileve, një nga më të mirat, për shërbimet më intime femërore, dhe ajo që është më e rëndësishmja, meqë jemi, aspak më të kushtueshëm se shërbimet e ngjashme që mund të gjenden të shpërndara nëpër Tiranë.

Rudina menaxhere. Si do ta joshte dhe bindte një femër apo mashkull për t’u kujdesur më shumë për veten nga ana e trajtimit estetik. Në fakt, do ta kisha bërë me kënaqësi menaxheren e Velurit, por për arsye edhe të impenjimeve të tjera, më është e vështirë. Por menaxherja që drejton aty, për fat, bën një punë të shkëlqyer dhe na ndihmon shumë. Përsa i përket trajtimit estetik, por edhe atij shpirtëror e mendor, mund të them që para ndonjë darke ose feste, hidhem një vrap tek Veluri, për t’u ndjerë në formën më të mirë dhe humorin e duhur.

Sa kohe i dedikoni aktivitetit tuaj te ri?
Në fakt, për momentin i kushtoj pjesën më të madhe të vëmendjes sime, pasi është ende në fillimet e veta. Koha fizike nuk është ndonjë tregues i saktë për rëndësinë që i kushtoj.

Mediat kanë shkruar shumë dhe tashmë është e ditur për të gjithë ndarja juaj pas një lidhje të gjate me Edi Ramën. Eshtë tashmë dikush tjetër në zemrën e Rudinës?
Në fakt ka qenë një periudhë e vështirë, të cilën e kapërceva qetësisht duke iu dedikuar shumë punës. Puna vazhdon të mbetet obsesioni im kryesor. Përsa i përket të tjerave, ndjej të nevojshme një periudhë qetësie, refleksioni dhe njohje më të mirë të vetes.

E keni ruajtur miqësine me Edi Ramën?
Kur dalim në pyetje kaq direkte, çuditërisht bëhem shumë hermetike.

Pas një eksperience të gjatë nga e cila si cdo femër tjetër mund të keni mësuar dhe pësuar. Sot për sot, si mendohet të jetë princi i kaltër për ju?
Pësuar nuk do shprehesha, mësuar po. Sigurisht e pasuruar me një përvojë shumë komplekse, e cila më ka dhënë një ndihmë të madhe të kuptoj se bota e përrallave mbaron në momentin kur gjyshja e dashur shuhet përgjithmonë.

Ju kemi parë shpesh të shoqëruar nga vellai juaj Martini. C’rol zë familja tek ju?
Me Martinin kam pasur gjithmonë një raport shumë special. Sepse ai është special. Njeriu më i shtrenjtë për mua, pas nënës sime.

Familja ime më ka qenë një ndihmë e paçmuar në çdo hap që kam hedhur. Nuk di ç’do kisha mundur të bëja pa mbështetjen e tyre.

Prej disa kohësh i jeni larguar botës së spektaklit dhe aktiviteteve artistike. Cilat janë projketet në të ardhmen lidhur me ketë fushë?
Sezonin e ardhshëm televiziv kam planifikuar të dal në ekran me një program të ri, i cili do jetë ndryshe dhe shpresoj interesant për audiencën. Jam ende në fazën e përpunimit të ideve, ndaj e konsideroj ende herët për të deklaruar diçka konkrete. Besoj shumë shpejt, do të kem shumë më tepër për të thënë.

__________________
The heaven's sound is composed inside your heart, listen to its beat to syncronize your life onto the angel's steps.