Ajo që njohim prej tij janë këngët e mrekullueshme, me të cilat ka fituar fansa në të dyja anët e detit. Karriera e tij e ndërtuar prej 17 vitesh në vendin fqinj, (Itali) pulson fortë në skenën shqiptare. Në fakt, Joe Artid Fejzo ka arritur të krijojë adhuruesit e tij në Shqipëri, të cilët nuk i krahason me asnjë publik tjetër. E ndërsa është shfaqur shpesh në festivale të ndryshme apo edhe evenimente të ndryshme kulturore, ku ka qenë i ftuar, për herë të parë vjen me një rrëfim krejt personal, duke na zbuluar dashuritë e tij të vërteta

Jeni një nga konkurrentët e fortë në “Netët e Klipit Shqiptar”. Keni sjellë një fabul ndryshe me këngën “Me ty”. Keni dashur që të “godisni” me të, apo si?
Do të doja të ndaloja pak në këtë pyetje. Jetoj prej 17 vitesh në Itali dhe për motive pune kam shëtitur rrugëve të Evropës shpesh. Dhe shpesh jam ndeshur me plagën e rëndë të prostitucionit. Fatkeqësisht, shpesh rruga kalon në ato që ne i quajmë “vajza të rrugës” apo “vajza pa emër”, sepse asnjëherë nuk prezantohen me emrin e tyre. Shpesh kam ndaluar për të folur me to dhe po tregoj një fakt. Kthehesha nga një provincë e Ascolit, rrugës së Bonifikës. E shquar për vajzat në çdo 300–400 metra të saj. Ishte rreth 01.30 e natës. Pas një kthese shoh një vajzë të rrëzuar. Ndalova makinën, edhe pse pas një hezitimi. Ishte një vajzë e re, ndoshta 16– 17 vjeçe. Kur më pa, u tremb. Pasi më vështroi gjatë, foli më ëmbëlsi: “Joe, ik në qoftë se e do jetën”. U befasova. Fliste shqip. U largova me mendjen pas për vajzën që u bë njësh me errësirën e natës, me errësirën e fatit të saj. Ky ishte njëri nga faktet që më shtynë për të realizuar një klip kundër kësaj plage shekullore, për më tepër që sivjet, në vitin 2007, kremtohet botërisht “Viti i abolicionit kundër çdo lloj skllavërie”

Në edicionin e kaluar të festivalit të lartpërmendur, keni marrë çmimin special për këngën “Zhurma e heshtjes”. Këtë vit keni ambicie për çmimin e madh?
“Çmimi Special” që mu dha nga juria me “Zhurmën e Heshtjes” vitin e shkuar, 2006, ngacmoi shpirtin artistik për të eksploruar rrugë të reja në realizimin e klipeve, e ashtu siç flet vetë “Me Ty”, realizimi, fabula dhe kënga kanë të njëjtën gjuhë, duke lënë pas realizimin si qëllim në vetvete të klipit me efekte fizike (pjesë të trupit femëror, shtrate, kolltukë...). Apo edhe efekte të jashtme skenike dhe vizive që s’kanë të bëjnë me këngën, apo shpeshherë bien viktimë e vulgaritetit të përsëritur tashmë në shumë klipe komerciale. Them se realizimi së bashku me pjesëtarët e tjerë, dhe kryesisht me Z. Adriatik Berdaku, që jeton prej vitesh në Ancona, ja arriti qëllimit që në më pak se 5 minuta të sjellë një temë aq të ashpër dhe mizore, si dhuna, prostitucioni, deri në asgjësimin e plotë të figurës femërore.

Njihesh si një kantautor mjaft i talentuar, por kush është Artidi jashtë skenës. Cilat janë dashuritë, pasionet e tua?
Artidi kur ishte vetëm 5 vjeç njohu një vajzë, që erdhi vitin e fundit në kopshtin nr 6 në Tiranë, afër Medresesë. Ajo vajza ngjante me Rafaela Karran (eh, në ato kohë shihej “Canzonissima”). U dashurua me të. I tha që atëherë që do të martohej. Ajo qeshi. E qesh akoma sot, që vërtet është bashkëshortja ime, Lola, balerinë soliste në TOB për më se 7 vjet. Në vitin 1990 u larguam së bashku me Alinën (vajzën tonë në bark) drejt një vendi aq të njohur në ëndrra, por aq të panjohur në realitetin e një çifti që shiti edhe dhomën e gjumit për të prerë rrëmbimthi dy bileta avioni.

Përveç krijimtarisë si kantautor, cilat janë impenjimet tuaja?
Sot zhvilloj edhe veprimtarinë e sipërmarrësit artistik pranë Akademisë “Giselle Danza e Musica” dhe drejtues artistik dhe ideator së bashku me Lolën, i një eventi të madh kulturor për zonën e markëve, siç është “Porto San Giorgio in Danza”, stazhe ndërkombëtarë baleti – “Fermo Dance Festival” dhe konkursin ndërkombëtar të baletit, “Crystal Of Dance – Firmum Award”, që do të mbahet në datat nga 8 deri në 15 korrik 2007. Alina, vajza jonë, po ndjek rrugën e artit, ku studion balet, kanto dhe kitarë klasike, është edhe aktore. Jeta ime është e mbushur me shumë ndodhi. Prandaj këtë album e kam quajtur “Piano.. Forte..”, si jeta ime me notat e pianos... bardhë e zi, si simfoni me shumë ngjyra e melodi, ku vorbulla e dirigjentit (jeta) më ka drejtuar me ëmbëlsi. Kam dashuruar shumë në jetë, vazhdoj të dashuroj... e mund të them pa frikë, që jam i dashuruar me DASHURINE... nga ku rrjedh dhe e gjithë krijimtaria.

Cili publik ka më shumë efekt mbi ju, ai shqiptar apo italian?
Eh... mund ta them pa frikë fare, publiku shqiptar. E nuk flas vetëm për skenën e madhe, flas edhe për piano baret, lokalet e vogla, ku në intimitet me pak miq nuk ka kurrë të krahasuar me asnjë lloj tjetër publiku në asnjë vend tjetër të botës, sado luksoz apo marramendës qoftë vendi, shteti apo njerëzit. Keni marrë pjesë në shumë festivale shqiptare. A mendoni se keni qenë i vlerësuar sa duhet nga juritë e tyre?
Jam mësuar të flas direkt shpesh, e për këtë edhe e kam pësuar.

Por unë jam gatuar me këtë brumë e s’mund të ndryshoj dot. Them që këngët e sjella në festivale, spektakle e TV janë pëlqyer nga publiku. Fatkeqësisht, këtë nuk e kam ndeshur në lëmin profesional apo të themi, kontaktet me juritë e festivaleve. Jashtë, pasi i dëgjonin këngët, më jepnin urimet; “kënga është e veçantë”, “orkestrim i bukur”, “këngë e ndjerë”.

Por më pas u bënë disa vjet që këngët, me gjithë keqardhjen e fansave, nuk kalojnë në natën e tretë. Megjithatë, unë kur shkruaj, nuk e bëj për qëllim fitoreje apo që me çdo kusht të hyj në natën finale. Këngët i shkruaj sepse e ndjej, sjell dashuri dhe romantizëm, në një botë të lodhur nga komercialiteti dhe të jetuarit për momentin.

Me çfarë po merreni aktualisht?
Sapo kam mbaruar punën me albumin që do t’i paraqes publikut shqiptar, me titull “Piano.. Forte..” 2007 dhe përmban 13 këngë në tre gjuhë, shqip, italisht dhe anglisht. 3 këngë janë riinterpretime me orkestrime krejt origjinale dhe ndryshe nga ç’ishin konceptuar nga krijuesit e saj. Në to bën pjesë edhe interpretimi me gjigandin e muzikës napolitane, Mario Merola me këngën “MalaFemmena”, direkt nga “La Canzone del Secolo”, programi i suksesshëm i Pippo Baudos në pranverën e 1999. Këngët e tjera janë të gjitha krijime të miat të mirëfillta. Shpresoj që publiku të gjejë në to melodinë dhe frymëzimin që i ka dedikuar.

Imazhe te Ngjitura

Joe-Artid-Fejzo.jpg (62.9 KB, 1 vezhgime)

__________________
Be aware of what u do in the past, because of the future consequences!