Balerinin e njohur Ezdalin Gorani e gjejmë në baletin “Lumi i vdekur” në rolin e një djali kosovar, që përpiqet të luftojë dallimet fetare e krahinore në Shqipërinë e Jugut të shekullit të kaluar. Adili në rol, me veshjen figurative të rikonceptuar nga koreografia e re e cila sjell “Lumin e vdekur” në skenën e TOB me rastin e 80-vjetorit të lindjes së kompozitorit Çesk Zadeja, autori i muzikës së këtij baleti të mirënjohur. Ezdalini është solist i parë në Teatrin e Operës dhe Baletit dhe po ashtu edhe në Top Channel, ku vjen me kërcime dhe koreografi përkrah partneres në skenë dhe jetë, Olës.Flet me pasion për punën që bëjnë të dy, synon koreografinë dhe mendon se eksperienca në “Portokalli” është e papërsëritshme në këtë drejtim. Jo vetëm që mendon se i përshtatet më së miri roli i malësorit shqiptar, por duket se edhe në jetë është një Adil që rrënjët i ka në Kosovë, edhe pse jeton në zemër të Shqipërisë...

Së pari, si e keni konceptuar personazhin tuaj në këtë balet, djalin kosovar, Adilin?
Konceptimi sigurisht i takon koreografit, ndërsa unë jam thjesht solist, balerin që ekzekuton rolin. Porsa i përket konceptimit, dua sinqerisht të vlerësoj punën dhe këndvështrimin që ka dashur koreografi t’i japë veprës. Për mendimi tim, këtu kemi një gërshetim të karakterit kosovar me atë myzeqar, të klasikes me neoklasiken. Janë disa gjini të baletit që këtu i gjejmë të shkrira dhe kanë zënë vend shumë mirë dhe në bazë të finesës me të cilën i ka parë koreografi, ka dalë diçka shumë e bukur. Kjo është vënë 25 vjet më parë. Unë nuk e kam parë, por nuk më ka ngelur peng, sepse në atë kohë vepra ka qenë e censuruar dhe koreografët nuk kanë qenë të lirë të japin atë çka duan. Këtë herë, besoj se koreografi ka sjellë diçka të re. Gjithsesi, dua të theksoj se ajo është një vepër aktuale edhe në këtë kohë. Edhe tani mbetet peng zgjidhja e Kosovës, që ajo pret të marrë, liria e saj. Shpresojmë ta marrë me këtë balet, e cila jep një mesazh dhe përkon me gjendjen e marrjes së statusit të Kosovës. Unë jam vetë me origjinë kosovare. Rolet e baletit shqiptar unë i kam kërcyer kryesisht vetë, më kanë pëlqyer dhe kam qenë në ansambël. Karakteri i shqiptarit në kërcim më pëlqen shumë. Sigurisht, edhe të tjera.

Flasim pak për rolet e fundit që keni luajtur në skenën e TKOB?
Ndër rolet e fundit ka qenë ai i Simbad Detarit në baletin “Sheherezade”, si solist i parë që jam në teatër, me koreografinë e Skënder Selimit. Ndërsa roli i fundit, ka qenë në Baletin “Migjeniana”, po me koreografinë e Agron Aliaj. Edhe aty kisha sërish rolin e një malësori.

Diçka rreth punës me partneren tuaj në rol?
Jam i kënaqur. Erisa është një vajzë e re dhe kërkon mbështetjen time, që ia kam dhënë me gjithë shpirt, sepse e meriton. Nuk është hera e parë që kërcejmë bashkë dhe ajo është një balerinë që punon shumë. Mund të them me plot gojë se Teatri i Operës dhe Baletit fitoi një tjetër soliste të re.

Njerëzit ju identifikojnë si çifti i balerinëve Ezdalini dhe Ola. Edhe këtu jeni bashkë me Olën, si e përjetoni kur interpretoni të dy?
Në rol Ola është Nëna e Vitës dhe gjatë pjesës ka një moment kulminant të trajtuar edhe në muzikë, nga kompozitori Çesk Zadeja. Këtu nuk jemi bashkë në rol, edhe pse herë të tjera kemi qenë bashkë. Por kështu e konceptoi koreografi, që të ndahemi në role dhe ndodhi. Nuk është ndonjë gjë e jashtëzakonshme. Jemi bashkë çdo javë tek “Portokallia”!

Nga skena e Portokallisë tek skena e TKOB, cili është ndryshimi? Ku e ndjeni veten më të realizuar?
Duhet theksuar diçka: në Top Channel ne jemi edhe krijues, jemi koreografë dhe kjo bën që vëmendja ndaj nesh të jetë më e madhe. Por krahasuar me skenën e Teatrit, skena e teatrit është oqean! Është magji, është tjetër gjë. Edhe atje është shumë bukur. Vijnë shumë spektatorë që të shohin dhe nuk janë pak, por 400 vetë në javë. Por skena e teatrit është nder dhe përgjegjësi më e madhe të luash në të. Këtu edhe spektatori është më i zgjedhur, që e pëlqejnë baletin klasik. Gjithsesi, në Top Channel jemi shumë të kënaqur, sepse na ka bërë të kuptojmë atë që nuk e dinim, koreografinë. Shpresojmë ta vazhdojmë këtë rrugë dhe madje, kemi vënë edhe në skenën e TKOB dy shfaqje me koreografinë tonë: “Carmen” dhe “Traviata”. Shpresojmë të realizojmë bashkë me Olën një balet të përbashkët, modern dhe ta ngjisim së shpejti në skenë.

Kjo është ambicia e radhës apo ka edhe plane të tjera?
Planet tek ne ekzistojnë, pasi ne jemi në punë në Top Channel dhe ai vazhdon. Përveç kësaj, ka edhe programe të tjera. Në momentin që do të na krijohet një pauzë, do mundohemi të japim diçka edhe këtu, në skenën e TKOB, në gjuhën moderne të koreografisë.

Si është për një balerin rruga e karrierës dhe a duhet ai të shfrytëzojë mundësitë private për të ecur në skenën kombëtare?
Realisht, mund të themi që të gjithë shqiptarët punojnë në dy-tre punë, që t’i ofrojnë vetes më shumë mundësi dhe të ardhura. Unë jam solist i parë në TKOB dhe paguhem shumë mirë, atje po ashtu. Deri para një viti, mund të flisje për probleme, por me rritjen e rrogave të balerinëve kushtet janë shumë më të mira. Asgjë nuk të vjen me fat. Duhet të punosh shumë që gjatë rrugës të vijë fati. Edhe ne e kemi nisur më parë, para dy-tre vitesh në një spektakël të POetri Bozos kemi nisur të punojmë privatisht. Ola ishte tek Top Channel dhe mundëm të sigurojmë një punë aty. Mendoj se mundësi ka. Ka njerëz që nga paaftësia vetëm flasin dhe ka të tjerë që nuk flasin dhe bëjnë gjëra, realizojnë. Ne lodhemi shumë, që nga mëngjesi deri në darkë flasim vetëm për balet. Lodhja fizike është e madhe dhe kjo të bën të mos jesh i kthjellët edhe mendërisht, sidomos për ne që punojmë pasdite kur nuk kemi punë në teatër. Jemi të rinj, tani do të punojmë.

Tek roli i Adilit keni ngarkesë emocionale dhe fizike?
Ka ngarkesë aq shumë, saqë publiku kur ta shohë do t’i vijë keq. Në 1 ore e gjysmë jam në skenë gjithë kohës. Gjithsesi, ia vlen. Është një balet i bukur dhe koreografi e ka gjetur mirë konceptimin e ri. Ka krijuar personazhe mjaft interesante. Përgëzoj profesorin tim dhe i them urime në shfaqje të tjera.

Imazhe te Ngjitura

Ezdalin-Gorani-dhe-Manjola.jpg (11.0 KB, 0 vezhgime)

__________________
Be aware of what u do in the past, because of the future consequences!