Është një balerinë fare e re në moshë, por njeh tashmë eksperiencën gati 9-vjeçare në skenën e baletit. Edhe pse pak e njohin publikisht, balerina Erisa Gina do të ngjitet në skenë në datat 8 dhe 9 qershor në rolin protagonist të Vitës, në baletin “Lumi i vdekur” (Adili dhe vita). Është tejet e thjeshtë dhe e qetë, ka punuar shumë për këtë rol dhe pret me emocion premierën në skenën e madhe të TKOB. Erisa dallohet për një siluetë elegante dhe mjaft të spikatur në skenë. Ka plastikë lëvizjeje dhe ëmbëlsinë e një vajze të brishtë sikurse roli i saj, Vita, e cila për dashurinë e saj sakrifikon gjithçka, përtej dallimeve dhe paragjykimeve.E takojmë në prova, në ambientet e Teatrit të Operës dhe Baletit dhe i marrim intervistën e mëposhtme...

Si e pritët rolin protagonist?
Më erdhi papritur ky rol, por më pëlqeu. Me Ezdalinin kam punuar edhe herë të tjera dhe njihemi si partnerë. Është punë e lodhshme, por do t’i japë frytet e veta.

Diçka për rolin e Vitës, si e përjetoni ju?
Ndjej që më përshtatet. Është natyrë e brishtë. Unë sjell rolin e një vajze 16-vjeçare dhe domosdo do të jetë e brishtë. Do të transmetoj ndjenjat e para të saj për një djalë kosovar, edhe pse ata janë të ndryshëm: ai është kosovar dhe mysliman, ndërsa ajo është myzeqare dhe e krishterë. Por këto dallime nuk e pengojnë dashurinë mes tyre. Ajo është aq e madhe, saqë nuk i vë re këto gjëra.

Besoni se dashuria është po kaq e fortë si në vitet ’30 edhe sot?
Dashuria është gjithmonë e njëjtë, nuk ndryshon. Ajo është e fortë si në kohët e atëhershme, edhe tani. Nuk ka dallim kohe.

Çfarë ju ka tërhequr në aspektin koreografik në tërësinë e veprës?
Çdo gjë më ka pëlqyer. Personazhi më tërheq, baleti është i arrirë.

E keni parë baletin e vënë në skenë për herë të parë?
Jo, kam qenë shumë e vogël atëherë.

Cilat janë disa nga eksperiencat tuaja të mëparshme si balerinë?
Unë e kam nisur shkollën e baletit që në ‘90-ën dhe kam rreth 9 vjet eksperiencë punë. Kam qenë edhe në Amerikë për studime dhe jam rikthyer. U bë tashmë 5 vjet dhe gjatë gjithë kësaj kohë kam punuar në TOB. Kam kërcyer “Bajaderën”, “Sheherezaden”, pjesë solistike në shfaqje dhe koncerte të ndryshme. Kam kërcyer edhe baletin “Zhizel” në Danimarkë. Pak a shumë këto janë rolet e mia.

Si kanë ecur provat, puna me trupën gjatë rivënies së “Lumit të vdekur”?... Diçka nga prapaskena?
Gjithçka ka rrjedhur normalisht. Gjërat erdhën natyrshëm. Në fillim u punua me ne, pastaj me trupën. Tashmë jemi ende duke punuar.

Jemi dy ditë para premierës. Cilat janë emocionet më të mëdha?
Emocionet i kam 10 minuta para shfaqjes, pastaj hyj në botën e
Vitës dhe përjetoj emocione të tjera. Në ato momente, nuk i flas askujt.

Po në skenë, cilën pjesë të emocionit tuaj nxirrni më në pah?
Atë të Vitës, të personazhit.

Si prisni ta marrë publiku rolin tuaj?
Thjesht të shohë Vitën, një vajzë 16-vjeçare, me ndjenja të mëdha për Adilin, djalin kosovar.

Keni plane të afërta?
Nuk kam plane dhe nuk e di çfarë do të më ofrojë teatri më vonë.

Cili është roli që keni ëndërr të luani?
Në çdo balet që vihet dua thjesht të jem pjesë e tij, të luaj aty.

Një përshëndetje për publikun që do ju shohë si protagoniste në këtë balet?
Thjesht i ftoj të vijnë dhe të shohin një balet të bukur, që jam e bindur që do tu pëlqejë dhe të marrin emocionet e rolit tim, Vitës, në këtë rivënie të “Lumit të vdekur”.

__________________
Be aware of what u do in the past, because of the future consequences!