Njeriu është ai ç`ka ha ose më saktë më thuaj çfarë ha të të them si duhet të jesh me shëndet. Këto përbënin filozofinë bazë të kohës së Hipokratit, në periudhën e Greqisë së lashtë. Qysh në kohën e Indianëve, 12-15 mijë vjet më parë është zbuluar se ekzistonte një lidhje e fortë midis ushqimeve dhe organeve të trupit. Le të themi se, ushqime të caktuara ndikojnë fuqishëm në rendimentin e trurit dhe në funksionet fizike të trupit, si në kujtesën e njeriut, gjumin, dhimbjet, depresionet deri në aftësinë e të mësuarit dhe të përshtaturit ndaj nevojave të jetës. P.sh ushqimet e pasura me lecitin, që ndodhet në familjen e bishtajorëve, rrisin fuqinë mendore, ndërsa ato të pasura me karbohidrate e të varfra me proteina, në mënyrën më të sigurtë të tyre e bëjnë njeriun të përgjumur, të ngathët e të vrazhdë.

Kërkimet, si në atë kohë dhe në kohët moderne sot kanë vërtetuar që, ushqimi ose ushqyerja e saktë e kombinuar me “mjekun” lëvizja, mund të kurojë, sigurisht për një kohë më të gjatë se ilaçet, por më të sigurtë se ato, shumicën dërmuese të sëmundjeve, për të mos të thënë të gjitha. P.sh. çregullimet nervore, çregullimet në organet e tretjes, hemorroidet, henrie discalis etj, mund të qetësohen nga medikamentet mjekësore, por kurrë s`mund të shërohen prej tyre. Përkundrazi, ato mund të shërohen totalisht vetëm nga mënyra e ushqyerjes. Atëherë, ku qëndron forca magjike e shërimit prej dietës korrekte të ushqyerjes. Me dietë, shpjegojmë dhe kuptojmë mekanizmin natyral të të ushqyerit tek njerëzit, jo sforcimin për të mbajtur dietë rraskapitëse, ç`mobilizuese deri në sëmundje-ndjellëse.

Sikundër në kohët shumë të lashta (Indianët e vjetër) edhe Anshtajni e preku më se njëherë idenë se universi përbëhet nga vibrime, të quajtura ndryshe vibrime të energisë. Pra, materia, në çfarë do lloj lënde qoftë, e ngurtë, e lëngët apo e gaztë thith dhe emeton valë me frekuenca të ndryshme, si ato alfa, beta dhe gama. Veç të tjerave, ekziston një lidhje e ngushtë apo koherencë e përsosur midis organizimit të universit dhe organizimit trupor. Sikundër universi, me mori yjesh, mikrokozmosi njeri përbëhet nga qeliza të panumërta, që rriten e zhvillohen, në sajë të dritës, ujit, ajrit dhe ushqimit që hamë. Natyra e ushqimeve dhe pijeve që përdorim kanë efektet e tyre në trupin tonë, për pasojë dhe në mendjen tonë. Pra, të gjitha ushqimet përshkohen prej vibrimeve të sipërmendura, të padukshme e të fshehura, tipikisht të përcaktuara qartë e me frekuenca të ndryshme, të cilat ndikojnë në trupin dhe mendjen e personit që i ha ato. Sipas tipit të vibracionit dhe forcës së energjisë, që mbizotëron në çdo objekt apo krijesë, bëhet e mundur që këta të fundit të marrin cilësinë e këtyreve forcave. Këto forca klasifikohen sipas një kuptimi “gros”, në forca të ndjeshme, të pandjeshme dhe statike. Në varësi të mbizotërimit të këtyreve forcave klasifikohen dhe ushqimet, si: ushqimet e ndjeshme, (sensitive), që garantojnë tek dukuria njeri ndjenjën e haresë, gëzimit, të vetëdijes, të dashurisë, paqes, të respektit, të moralit shpirtëror e të tjera si këto, ushqimet e pandjeshme, (mutative), që stimolojnë tek njeriu forcë, lëvizje, dëshirë për ndryshim e të tjera si këto dhe ushqimet statike, (static ose dull), që i japin njeriut ndjenjën e plogështisë, të përkeqësimit deri në atë të kallurit për së gjalli.

Le t`i marrim me rradhë. Kur njeriu përdor ushqimet e ndjeshme, që më poshtë do t`i themi se cilat janë, vëren se mendja e tij rrjedh lehtësisht drejt niveleve më të larta të ndërgjegjësimit, rrjedh qetë dhe qartë. Këto ushqime janë baza e jetës, sepse përcjellin energji tek shëndeti mendor dhe fizik i njeriut, për rrjedhojë dhe paqe në psiqikën dhe shpirtin e tij. Në këtë grup ushqimesh përfshihen frutat, shumica e perimeve dhe zarzavateve, bulmetet dhe produktet e tyre, familja e kokrizave si gruri, orizi, misri, shumica e barërave dhe erëzave. Këto ushqime, duke qenë se marrin energji diellore dhe kalojnë nën procesin e fotosintezës, sigurojnë për njeriun, një varietet të gjerë ushqyesash me vitamina, mikroelement, etj., duke e furnizuar atë me proteina, karbohidrate, yndyrna dhe vitamina e minerale kryesore. Kur njeriu përdor ushqimet e pandjeshme vëren se, mendja e tij bëhet më e agjituar, më nervoze dhe e pa aftë për t`u qetësuar dhe/ose relaksuar. Në fakt, këto i japin njeriut forcë për të lëvizur, për të ndryshuar, duke e stimiluar si mendjen dhe trupin e tij, porse duhen marrë në mënyrë shumë të moderuar, në sasi mesatare, sepse përndryshe prishin ekuilibrin mendor dhe atë trupor. Në këto ushqime përfshihen pijet me kafeina, çokollatat, ushqimet e fermentuara, disa loj ilaçesh etj. Dhe kur njeriu përdor ushqimet statike vëren se, ai fillon e ndjehet si i përgjumur, i ngathët, pa energji, pa inisiativë, veçanërisht kur ai (njeriu) zbeh ose pakëson dy llojet e ushqimeve të sipërmendura. Në këto ushqime përfshihen mishi, peshku, alkoli, cigaret, ilaçet, ushqimet e fermentuara në vazo, në kartone, vezët, kërpudhat, qepët, hudhrat etj., me anë të të cilave, njeriu bëhet më nervoz dhe i pa aftë për t`u qetësuar dhe/ose relaksuar. Po në këtë kategori klasifikohet dhe ushqimi i marrë nga OMGJ-të. Këto kategori ushqimesh nuk mund të përbëjnë bazën e ushqyerjes së njeriut, sepse kanë aciditet të lartë dhe i mundojnë organet e trupit për t`i tretur e për t`i përthithur ato.

Mbi aciditeti në trupin e njeriut është shkaku kryesor për fillimin e sëmundjeve të tij dhe përpos të tjerave, ato krijojnë shumë nxehtësi për trupin, duke krijuar shqetësime për mendjen e trurin. Kjo është arsyeja, që këto llojë ushqimesh përdoren në kushte të veçanta klimaterike, si në brezat e ftohtë dhe aspak në ato tropikale e ekuatoriale. Madje, mendohet që, ashtu si lëngu i qepës ngacmon sytë tanë, duke i bërë të qajnë, po ky stërmundim do thonim se krijohet edhe për proceset në tru e në mendje. Po kështu dhe veza e mishi, të cilat përmbajnë kolesterol të lartë deri në 20 mlg, bëjnë të mundur nxitjen e një sërë sëmundjeve të gjakut e të zemrës.

Kësisoj duket qartë lidhja e produkteve ushqimore të dala nga toka, por që gjenerohen dhe nga vibrimet e lëshuara nga kozmosi që na rrethon. Kjo lloj ndërhyrje ka bërë atë, që ushqimet tona të kenë gjenetikën, veçoritë, shijet dhe vlerat e sotme, duke pranuar këtë lloj bashkëpunimi me natyrën, që kurrësesi s`mund të jetë vetëm toka, që gjithësesi mund të jetë vetëm universi. Në këtë kuptim, ai (ushqimi) nuk mundet dhe nuk ka mundësi të pranojë ndërhyrje të tjera, në gjenetikën e saj nga duart e pasardhësit shumë të vonë njeri, duke i trajtuar ato, si kavie për të kënaqur tamaqarllëkun e këtij të fundit. Eshtë llogaritur se, toka mund të ushqejë 40-50 miliard njerëz normal, por jo 4-5 miliard “grykësa”, edhe sikur të rrisë sasinë e tyre me OMGJ. Vëreni sa po ngjajnë produktet e ushqimeve të OMGJ me produktin njeri. Pra, arësyet e mos përdorimit, as në sasi mesatare të kësaj kategorie ushqimi, nuk lidhet me ndjenja sentimentale e paragjykime apo bindje fetare, as me vlerësime emocionale, por me arësye e fakte shkencore nga vetë jeta njerëzore dhe sidomos e jetës para saj.

__________________
The heaven's sound is composed inside your heart, listen to its beat to syncronize your life onto the angel's steps.