Gratë janë më të rrezikuara se burrat për t’u prekur nga sëmundja alkoolike e mëlçisë. Por si shfaqet dhe cilët janë faktorët e tjerë të riskut për prekjen nga kjo sëmundje?
Ja se çfarë thotë mjekja gastro-hepatologe Edlira Ibra:

Çfarë është sëmundja alkoolike e mëlçisë?
Ashtu si dëmtimi i mëlçisë nga viruset e hepatitit, edhe përdorimi pa kriter i alkoolit është një sëmundje e shpeshtë dhe me pasoja serioze shëndetësore e këtij organi.
Sëmundja alkoolike e mëlçisë është pasojë e veprimit të drejtpërdrejtë të alkoolit mbi qelizën e mëlçisë. Kështu që alkooli konsiderohet një faktor i vërtetë rreziku për çdo konsumator të rregullt të tij.

Cilët janë faktorët e riskut për shfaqjen e kësaj sëmundjeje?
Siç e thamë dhe më lart, konsumimi pa kriter i alkoolit është një nga faktorët kryesorë të shfaqjes së kësaj sëmundjeje. Kështu, sasia e alkoolit të përdorur përllogaritet në përmbajtjen e etanolit në pijen që përdoret. Përdorimi i 20-40 gr etanol në ditë është sasi që konsiderohet e rrezikshme për mëlçinë. Kujtojmë që 1 teke raki përmban 18 gr metanol apo 1 gotë verë 12 % përmban 11.7 gr etanol. Faktor tjetër rreziku është kohëzgjatja e përdorimit të alkoolit. Konsumatorët sistematikë që kanë përdorur për 10 vjet radhazi 150 gr metanol në ditë janë më të rrezikuar nga cirroza e mëlçisë. Ndër faktorët e riskut konsiderohet edhe mosha. Sa më e vogël të jetë mosha e konsumatorit të alkoolit, aq më të rënda janë dëmtimet e mëlçisë. Por numërohen edhe seksi dhe predispozicioni gjenetik.

Kush preket më shpesh, femrat apo meshkujt?
Femrat dëmtohen nga alkooli shumë më shpejt dhe më rëndë se meshkujt. Ndoshta kjo lidhet me veçoritë hormonale të tyre.

Sa ndikon predispozicioni gjenetik në shfaqjen e sëmundjes?
Studime të shumta tregojnë se, ky faktor luan rol të rëndësishëm jo vetëm në shkallën e dëmtimit të mëlçisë, por edhe në fenomenin e vartësisë ndaj alkoolit. Dua të theksoj këtu se, gërshetimi i njëkohshëm i përdorimit të alkoolit me infektimin e mëlçisë nga viruset e hepatiteve shkakton dëmtime tepër të rënda në mëlçi.

Çfarë pasojash të tjera sjell në mëlçi përdorimi pa kriter i alkoolit?
Pasojë e përdorimit pa kriter të alkoolit është dhjamosja e mëlçisë si pasojë e depozitimit të yndyrave në qelizën e mëlçisë dhe cirroza alkoolike që përfaqëson një dëmtim terminal të mëlçisë. Steatoza e mëlçisë, ose dhjamosja e mëlçisë, përveç alkoolit, shkaktohet dhe nga faktorë të tjerë siç janë: dieta e pasur me yndyra, mbipesha, diabeti i sheqerit apo dhe përdorimi i estrogjenëve dhe i kortizonikëve.

Çfarë shenjash klinike ka sëmundja?
Në pjesën më të madhe të rasteve, sëmundja zhvillohet pa shenja klinike dhe zbulohet rastësisht nga një ekzaminim ekografik të bërë për arsye të ndryshme. Në disa raste të sëmurët ankohen për dobësi trupore, këputje gjunjësh, apo çrregullime të tretjes, të cilat shkaktohen si pasojë e dëmtimit të njëkohshëm të stomakut, duodenit, pankreasit nga përdorimi i alkoolit. Në rast se dëmtimi alkoolik gërshetohet edhe me dëmtimet e mëlçisë nga viruset e hepatitit, shenjat klinike janë shumë: turbullimet e tretjes, dhimbje barku në kuadratin e sipërm të djathtë, lodhje e shpejtë fizike e mendore, ulje oreksi rënie në peshë deri në temperaturë 37.5-37.8 gradë. Në ekzaminimin ekografik dhe në vizitën me dorë konstatohet zmadhimi i mëlçisë nga 3 cm deri në 6 cm poshtë harkut të brinjës së djathtë. Ndërsa në analizën e gjakut konstatohet rritje e transaminazave (transaminazat janë enzima të citoplazmës që çlirohen në gjak kur qelizat hepatike vdesin).

Si mund të mjekohet sëmundja?
Kushti vendimtar për të pasur një mjekim të efektshëm është ndërprerja kategorike e përdorimit të mëtejshëm të alkoolit. Eshtë kaq i rëndësishëm ky moment, aq sa dhe ndikimi pozitiv i barnave në ato raste kur i sëmuri vazhdon të konsumojë alkool, qoftë edhe në sasi të vogël, është i paefektshëm.

Dieta e shëndetshme për mëlçinë
Një dietë e ekuilibruar me të gjithë përbërësit fiziologjikë, duke mënjanuar rastet e tepërta të yndyrave dhe sheqernave, e pasur me vitamina dhe kripëra minerale, do të ishte ideale për të patuar një mëlçi të shëndetshme.

Dieta mesdhetare aleate kundër tumorit në gojë
Dieta mesdhetare që bazohet në fruta-perimet e freskëta, vaji i ullirit, vera dhe drithërat, është aleatja më e mirë e shëndetit të gojës së njeriut. Makaronat, frutat dhe perimet e freskëta, por dhe mishi i pjekur si duhet mbrojnë mishrat e dhëmbëve jo vetëm nga kariesi, por dhe nga “armiq” të tjerë, e mbi të gjitha nga kanceri në gojë. Të paktën ky është përfundimi i një studimi të kryer nga Francesco Riva, drejtor i klinikës kirurgjikale të odontostomatologjisë në Romë. Sipas studiuesit, aftësitë mbrojtëse të dietës mesdhetare i atribuohen antioksidantëve që pengojnë formimin e tumoreve. “Dieta mesdhetare është një balsam i vërtetë për të gjithë organizmin, duke nisur që nga goja, të cilën e mbron jashtëzakonisht shumë. Të rrezikshme për shëndetin e gojës duket të jenë ushqimet e gatshme, të skuqura, të cilat fatkeqësisht po konsumohen gjithmonë e më shumë”, thekson Riva.


Dua të di çfarë është otoskleroza
Përshëndetje! Jam një burrë 50 vjeç dhe doja të dija se çfarë është otoskleroza. Nga se shkaktohet dhe cili është mjekimi më i mirë.

Kesaj pyetje mjeku otorino-laringolog, doktor shkencash, Dilaver Bajrami, i pergjigjet:

“Dëgjimi rregullohet nga një mekanizëm i ndërlikuar veprimi, gjatë të cilit ngacmohet organi receptiv dhe ky ngacmim, pasi shndërrohet në impuls nervor, përcillet në koren e trurit, ku kryhet analiza dhe sinteza e tij që lidhet pastaj me veprimet e organizmit. Pra, kemi transmetim fizik të tingullit dhe receptimit të tij dhe dëmtimi i çdonjërit nga këta komponentë ka si pasojë pakësimin e dëgjimit në shkallë të ndryshme. Otoskleroza është një sëmundje e guaskës së veshit të brendshëm që ka si pasojë uljen e dëgjimit, pikërisht nga dëmtimi i transmetimit fizik të tingullit. Shkaqet e kësaj sëmundjeje janë akoma të panjohura, por është e njohur trashëgimia e saj. Dihet gjithashtu që prek më shumë femrat sesa meshkujt.

Sëmundja konstatohet në më të shumtën e rasteve në dekadën e dytë të jetës, në moshën 20-25 vjeç. Te gratë është vënë re se, dëgjimi rëndohet më shumë gjatë barrës ose fill pas saj. Shumë rrallë sëmundja shfaqet para pubertetit, ose pas moshës 50 vjeç. Otoskleroza është një sëmundje që karakterizohet nga pakësimi i dëgjimit dhe zhurmë në vesh. Pakësimi i dëgjimit shkon gjithnjë duke u shtuar dhe me kalimin e kohës mund të theksohet deri në atë shkallë sa të pengojë të sëmurin që të aktivizohet në jetën shoqërore. Për sa i përket mjekimit të saj, përderisa mungojnë njohuritë e saktë mbi shkakun e sëmundjes, nuk mund të flasim për mjekimin e saj me barna, përveç atij kirurgjikal. Përpjekjet për mjekimin kirurgjikal kanë filluar qysh para një shekulli, por vetëm këta dhjetëvjeçarët e fundit u gjet rruga drejt e zgjidhjes, me anë të operacioneve mikrokirurgjikale si rezultat i përparimit të fizikës optike, pasi manipulohet në një hapësirë të ngushtë dhe delikate siç është veshi i mesëm dhe ai i brendshëm.
Rezultatet e operacionit evidentohen që në tavolinën operatore, kur pacienti papritur fillon të dëgjojë menjëherë pas kaq kohësh shurdhësie dhe mungese komunikimi me njerëzit”.

__________________
The heaven's sound is composed inside your heart, listen to its beat to syncronize your life onto the angel's steps.