Këngëtari i njohur Voltan Prodani tregon për karrierën e tij artistike. Megjithëse nuk ka qenë gjithmonë i pranishëm në skenat shqiptare këngëtari nuk ka reshtur së bëri muzikë. Voltan Prodani pohon se pas daljes së albumit ai do të bëj një promovim të këngëve të cilat megjithëse janë të dëgjuara dhe të pëlqyera nga publiku e kanë humbur identitetin.

-Voltan Prodani është paraqitur gjithmonë si kantautor në publik...
Po, e vërtetë është që jo çdo kush mund të prezantohet në këtë lloj mënyre edhe pse kjo të kufizon pak nga një aspekt tjetër, sepse duke qenë një kantautor duhet t’i besosh gjithçkaje që ti krijon.

Atë që krijon e bën më shumë për interpretimin tënd dhe për zërin tënd. Nga ana tjetër unë them se e rëndësishme është edhe të jesh kompozitor i një kënge të cilën e interpretojnë të tjerë, gjë që unë e kam bërë herë pas here. Unë kam bashkëpunuar edhe me emra të njohur të muzikës shqiptare si, Jonida Maliqi, Rovena Stefa, apo edhe me këngëtare të reja në eksperiencë në festivalin “Këngët e Stinës”. Kjo tregon se ka funksionuar mirë.

-Ju ka ndodhur ndonjëherë të keni kompozuar këngë më të bukura për të tjerët se për veten tuaj? Po. Është e vërtetë. Mund të sjell një shembull i cili është plotësisht i vërtetë. Në një nga festivalet e kaluara ka qenë një këngë e cila interpretohej nga Jonida Maliqi dhe ishte një nga këngët që më është vlerësuar më shumë nga elita e profesionistëve të muzikës. Kjo tregon se jo të gjitha kompozimet mund t’ia besoj vetes time. Një kompozim mund të jetë më i madh se ty apo ajo që mund të bësh për vete.

-Kënga juaj me titull “Vetëm ty të dua”, një këngë mjaft e bukur. Ku është prezantuar për herë të parë? Kjo këngë është prezantuar në edicionin e fundit të “TopFest”. Ka qenë një prezantim i mirë megjithëse unë nuk e shoh shumë veten në “TopFest”. Kur realizova këtë këngë mendova se ishte një material që mund të shkonte fare mirë në këtë festival. Them se ishte një paraqitje e mirë dhe i ngelej publikut të bënte vlerësimin. Detyra ime tani është që të bëj një promovim meqenëse është duke dalë albumi duhet të bëj edhe një promovim të këngëve të mia të cilat dëgjohen në disa radio por nuk e kanë identitetin e vërtetë.

-Voltan Prodani ka jetuar disa vite në Itali. Cili ka qenë aktiviteti juaj atje?
Shkëputja ime e parë ka qenë në vitet 1992-1994, kur kisha mbaruar vitin e dytë në Institutin e Arteve për kompozicion. Marrë pjesë në një konkurs në Bolognia të Italisë në një Universitet shumë të vjetër. Aty pata fatin të fitoj mes shumë pjesëmarrësve dhe kështu që vazhdova Konservatorin e Bolognias për katër vite. Gjatë atyre viteve vija herë pas here në Shqipëri por jo me qëllime shumë të menduara mirë në atë periudhë. Mendoja që të rrija edhe në Itali por edhe në Shqipëri. Herë pas here mund të isha prezent në festivale, por nuk e ndjeja të nevojshme që të isha gjithmonë i pranishëm.

-Ju keni një studio tuajën. Në çfarë përmasash është ajo dhe a keni bashkëpunuar me këngëtarë të tjerë?
Po, jam lodhur shumë që ta bëj sa më të denjë dhe sa më moderne, qoftë në teknologji apo edhe dhe në çdo gjë tjetër. Më është futur në edukatë kjo puna e studios, që nga ana teknike e njohurive të inxhinierisë të mirëfilltë audio që në Shqipëri nuk janë të mirëfillta, sepse mungojnë disa shkolla të tilla që i duhen një muzikanti apo një kompozitori për të qenë edhe producent, dhe të jetë një teknik i mirë regjistrimesh. Më ka ndihmuar shumë edhe pjesëmarrja ime në disa seminare, kam pasur disa kurse individuale në një akademi moderne që është për muzikën Pop-Rock, që është në Bolognia. Aty kam marrë shumë leksione për mënyrat e miksimit, masterizimit, si duhet të punohet në një studio regjistrimesh.

Të gjitha lëndët i bënim edhe në praktikë edhe në teori. Kjo më ka ndihmuar që të kem një studio dinjitoze dhe profesionale. Gjatë gjithë këtij viti, që studioja ime është bërë e gatshme për punë kam patur oferta nga njerëz, për të bërë regjistrimet e tyre. Këtë muaj i jam futur më shumë menaxhimit të studios, jam më i lidhur me këngëtarët dhe nuk doja që të isha i hapur me çdo lloj këngëtarësh dhe çdo lloj rryme. Nuk e mendoj studion vetëm si biznes, por më shumë si studio personale por edhe private në të njëjtën kohë, për të patur marrëdhënie që do të më shërbejnë edhe mua. Nuk dua që të shndërrohet në një studio si shumë të zakonshme, ku këngëtarët paguajnë thjesht për të regjistruar. Kur bëhet një investim, për më tepër profesional, e rëndësishme është që të eci sa më shumë dhe të ketë sa më shumë punë, për të tjerët kryesisht sepse nuk hapet asnjëherë një studio vetëm për këngët e tua.

-Kënga juaj ‘’Heshtje’’ ka një tekst shumë të bukur. Kush është autori i këtij teksti?
Fjalët e kësaj kënge ashtu si edhe shumë këngë të tjera janë bërë nga Jorgo Papingji. Mendoj se teksti është një element i rëndësishëm në këngë por jo më shumë se muzika, interpretimi dhe orkestrimi. Një nga gjërat, e cila stonon në një këngë është pikërisht teksi, sepse kam këngë të cilat e kanë tekstin më të dobët se muzika. Kështu që kjo është një nga punët kryesore në të cilat unë duhet të mbështetem aktualisht. Duhet që tekstet të jetë sa më të kuptueshëm nga publiku dhe të mos jenë tekste me përmbajtje filozofike. Është pak problem me shqipen që të gjejmë fjalë interesante dhe të tingëllueshme.
-Ju keni qenë pjesëmarrës në disa festivale. Çfarë mendimi keni për organizimin e tyre?
Festivalet janë shumë kohët e fundit. Dëshirat e këngëtarëve janë rritur, sepse ata marrin pjesë në çdo festival. Por unë mendoj se duhet të bëhet edhe një përzgjedhje në llojin e muzikës që unë krijoj dhe prezantoj. ‘’Kënga Magjike’’ është një festival ku unë e gjej më shumë veten.

__________________
Try not to become a man of success but rather to become a man of value - Einstein Albert.