Këngëtarja e njohur e muzikës popullore, Vitore Rusha tregon për fillimin e karrierës së saj. Pas një mungese pesëmbëdhjet vjeçare këngëtarja e njohur rikthehet në Shqipëri me një album të ri për publikun shqiptar. Në bashkëpunim me emra të njohur të muzikës shqiptare Vitore Rusha sjell perla të vërteta të folklorit shqiptar.

-Albumi juaj mban titullin e këngës “Kuvendon Marta me gra”. Si lindi ideja e kësaj kënge?
Kjo këngë doli fare spontanisht, sepse duke ndenjur me Jorgo Papingjin kërkonim tekste për albumin tim të ri. Kështu që Jorgo Papingji Jep mendimin për tekstin e këngës “Kuvendon Marta me gra” dhe aty u ndala. Jorgo bëri tekstin i cili pothuajse është ndryshuar komplet, është bërë në stilin e humorit. Orkestrimi është nga Edmond Zhulali. -Vini me një album të ri për publikun shqiptar.

Çfarë sjell të re dhe ndryshe nga i pari ky album? Mendoj se albumi i dytë është më popullor, jam më Vitore në këtë album sesa tek i pari. Në albumin e parë meqënëse unë kisha vite që jetoja në Greqi nuk isha në dijeni se çfarë bëhej në Shqipëri dhe isha shumë konfuze dhe e shpërndarë. U përpoqa që të bëja shumë gjëra dhe artistikisht ky album është shumë i realizuar por nuk arrita të gjej repertorin e duhur që të isha vetvetja dhe të më përshtatëshin. Mendoj se në këtë album e kam gjetur disi më shumë vetveten. -Si është Vitore Rusha me shijet e kohës në këtë album? Për sa i përket anës artistike është Vitorja, por unë jam përpjekur dhe kam punuar në disa studio që në album të mos jetë çdo gjë e njëjtë. Në albumin e dytë jam përpjekur të ndërthur modernen me folkun.

-Albumi juaj ka krijime të reja apo edhe këngë të vjetra të përpunuara? Ka edhe krijime të reja por ka edhe dy apo tre këngë të përpunuara si, “Kuvendon Marta me gra”, “Mora drapërin” dhe “Putpuri dasmash”. -Këto këngë janë kënduar më parë nga ju apo edhe nga këngëtarë të tjerë? Këngët janë kënduar nga unë dhe nga këngëtarë të tjerë. -Sa vite karrier mban mbi supe Vitore Rusha dhe cili ka qenë momenti më i vështirë i kësaj karriere? Janë shumë vite. E kam nisur karrierën time në vitin 1978, në moshë fare të vogël. Më pas kam patur një pauzë prej dhjetë vjetësh sepse jam larguar me familjen time nga Shqipëria. Mamente të vështira natyrisht që ka patur. Këto tre vitet e fundit mund të them se ka patur, sepse e mendoja ndryshe muzikën në Shqipëri dhe e kam gjetur ndryshe. Nuk e gjeta ashtu si e mendoja unë. Ka pësuar ndryshime ku unë vërtetë jam gjendur në momente shumë të vështira. Janë shumë këngëtarë të rinj sot që nuk dinë të respektojnë.

Ata nuk njohin veten e tyre dhe nuk pretendoj që të më njohin mua apo edhe këngëtarë të tjerë të brezit tim. -Vërtetë mëndoni se nuk ju njohin brezat e rinj? Mendoj se brezi nga mosha 35 vjeç dhe më të mëdhenj se aq më njohin por brezi i ri jam e sigurtë që nuk më njeh. -Kënga “Mos më nga” është një krijim i ri? Po, është një krijim i Fatmir Lelës me tekst dhe muzikë dhe është punuar në studion e Ilir Ballës. -Riktheheni pas një shkëputjeje të gjatë prej dhjetë vitesh dhe riktheheni në skenën shqiptare. Cila ka qenë arsyeja e kësaj shkëputjeje dhe e rikthimit njëkohësisht? Shkëputja ka qenë nga largimi im në Greqi. Unë jam larguar në vitin 1991 dhe një nga arsyet ishte edhe ana ekonomike. -Vitore Rusha është nga Puka. Gjirokastra është një nga vendet që ju e përmendni shpesh. Cila është lidhja juaj me këtë qytet? Unë me bashkëshortin jemi martuar në Gjirokastër. Jemi njohur në një kurs të muzikës në Tiranë.

Im shoq ka qenë instrumentist, ndërsa unë isha këngëtare. Pasi u martuam shkuam të jetonim në Gjirokastër. -Ka qenë i vështirë fillimi i një jete të re në Greqi? Sigurisht që ka qenë e vështirë, madje shumë e vështirë. Një nga arsyet ishin dhe grekët të cilët janë shumë racist. Na është dashur një punë e madhe që grekët të na shikonin me dashamirësi dhe të fitonim respekt. Besoj se tani gëzoj një respekt nga të gjithë por me shumë vështirësi. -Na tregoni pak për jetën tuaj artistike në Pukë në periudhën kur jetonit atje? Kam shumë nostalgji për atë periudhë. Ka qenë një jetë shumë e bukur, nuk ka pasur xhelozi në punë, flas me shumë nostalgji për atë kohë. Në Pukë ka qenë një ansambël amator sepse në këtë qutet nuk ka pasur një estradë profesioniste. Ka qenë një ansambël i mrekullueshëm, nën drejtimin e artistit të popullit Ndue Shyti.

-Vitore Rusha është larguar përgjithmonë apo përkohësisht nga Shqipëria? Fillimisht kur shkuam në Greqi mendonim se do të rrinim vetëm një vit, kaluan dy vjet dhe kështu edhe pesëmbëdhjet. Faktikisht këtë vit mendova që për dy tre vjet të kthehem në Shqipëri, madje bleva edhe një shtëpi këtu, por më duket se do të vonohem përsëri. -Cila është arsyeja që ju pengon të ktheheni në atdhe? Janë shumë gjëra. Mendoj se jetën e bëjnë njerëzit dhe kryesisht këtu njerëzit nuk janë në rregull. Nuk flas vetëm për qeveritar, por edhe për njerëz të thjeshtë që takon në rrugë.

-Çfarë ju ofron Athina për jetën tuaj artistike? Në Athinë kam marrë pjesë në shumicën e aktiviteteve të zhvilluara atje. -Si është pjesëmarrja e publikut në këto aktivitete në Athinë? E mrekullueshme, sepse edhe njerëzit janë të mrekullueshëm atje. Ndihem shumë mirë për këtë. -Si është pritur Vitore Rusha nga publiku shqiptar pas rikthimit në Shqipëri? Të them të drejtën, tani ka një ndryshim shumë të madh në krahasim me kthimin tim para dy-tre vitesh. Albumi i fundit ka bërë që të njihem më shumë dhe që njerëzit të më përshëndesin me dashamirësi. Ndihem shumë mirë.

-Cilët janë bashkëpunëtorët tuaj për albumin e fundit? Një nga bashkëpunëtorët e mi është i madhi Edmond Zhulali, Kol Susa, i madhi Gjok Beci, Ilir Balla, Burim Krasniqi, poetin e madh Jorgo Papingji etj. -E ndjen Vitore Rusha konkurencën në treg? Sigurisht që e ndjej sepse këtu ka këngëtarë që kanë 15 vjet që publikojnë albume dhe që natyrisht kanë një pjesë të publikut për vete. Kjo është një fatkeqësi e madhe, sepse publiku nuk gjykon se sa mirë këndon një këngëtar por sa albume ka publikuar ai. Nuk dua të përmend emra, të cilët unë nuk guxoj t’i përmend dhe t’i quaj këngëtar. Ka qenë koha në favor të kësaj kategorie këngëtarësh dhe jo ata në favor të kohës.

-Si e shihni ju ecurinë e muzikës shqiptare gjatë këtyre viteve? Unë do t’ju sjell një shembull, në Greqi zhvillohej një aktivitet ekuivalent me spektaklin “Ethet e së premtes”. Pas debutimit të një vajze të re, juria dha vlerësimin duke u shprehur, “Nga fyti e poshtë ke kënduar shumë bukur”, dhe ky është fenomeni që ndodh edhe në Shqipëri. -Mendoni se në Shqipëri ka treg vlerash? Sigurisht që ka, dhe besoj se do të vij një ditë që këngëtari i mirë do të mbetet këngëtar i mirë.

Në Shqipëri do të vij një ditë ku do të këndohet bukur, pastër, sepse sot është shndërruar gjithçka në treg dhe në biznes. -Vitore Rusha vjen nga vendi i çiftelisë. Ju i bini çiftelisë? Jo, nuk i bie. Mund të them shumë pak, por që të shoqëroj diçka nuk mundem. Megjithëse në albumet e mia çiftelia nuk mungon asnjëherë. Dhe albumi i fundit ka disa këngë të cilat janë të shoqëruara me çifteli sepse është një instrument shumë i bukur. -Cili është Pengu më i madh i jetës suaj? Pengu më i madh i jetës simë është që nuk u bëra aktore. Kam luajtur dy role dhe jam pëlqyer. -

Cila mendoni se ishte pengesa që u larguat nga aktrimi? Pengesë ishte kënga. Unë vendosa të vazhdoj rrugën e këngës. -Nëse do të kishit mundësi të zgjidhnit sot, do të bëheshit këngëtare apo aktore? Natyrisht që këngëtare. Sot të gjithë kërkojnë të bëhen këngëtar, sepse është mënyra më e thjeshtë për të fituar para. Mjafton të marrësh një mikrofon në dorë dhe je mund të bëhesh këngëtar.

-Mendoni se këngëtarët janë të pasur, apo të këndosh bëhesh i pasur? Kjo është relative, sepse nëse unë jam e ftuar në një koncert nuk mund të paguhem po aq sa paguhet Adelina Ismaili apo dikush tjetër. -Mendoni se ka këngëtarë në Shqipëri që paguhen më shumë se Vitore Rusha? Po, natyrisht që po. Edhe Çiljeta paguhet më shumë se unë. Dhe kjo ndodh sepse Çiljeta është një vajzë e re dhe vishet ekstravagante, ndërsa Vitore Rusha nuk mund t’i bëj këto gjëra.

-Ç’është dashuria për Vitore Rushën? Dashuria është një gjë e shtrenjtë për atë që e kupton. Të dashurosh dhe të jesh i dashuruar është gjeja më madhështore që mund t’i ndodhi një njeriu.

__________________
The heaven's sound is composed inside your heart, listen to its beat to syncronize your life onto the angel's steps.