"Është legjendë e rrallë e të kënduarit të këngës burimore të Veriut. Nuk mund t'i këndonim kurrë si ai këngët e atyre viseve". Janë fjalët e Hysni Zelës në një bisedë të para katër viteve gjatë një koncerti të Ansamblit të Shtetit në Mirditë. Të tillë e kanë vlerësuar mjeshtra të muzikës shqiptare dhe studiues të folkut, Fran Vorfin, "primoja" i formacionit të njohur "Grupi i Burrave të Mirditës", i kthyer në emblemë të festivaleve folkorike për 40 vite. U nda nga jeta dje në moshën 65-vjeçare dhe la pas një pasuri që duket se është "arkivuar" në arkivat e mykura të RTSH-së, por pa bërë të mundur nxjerrjen e tyre prej aparaturave të vjetra incizuese.

Ka qenë fare i vogël kur u nis nga fshati i tij i lindjes në Gëziq të Mirditës për në konviktin "Tom Kola" në Shkodër. I ati nuk harroi t'i fuste në valixhe çiftelinë e vogël që e pati mësuar që 6 vjeç. Nën tingujt e asaj çiftelie dhe me një zë krushku, vogëlushi mirditor do të përshëndeste ardhjen e Hrushovit në Shkodër në përbërje të ansamblit të Shkodrës. Ndonëse i jepej këngës burimore dhe asaj të përpunuar, futet në konkurs për aktrim në një juri e kryesuar nga Kujtim Spahivogli dhe i nxitur nga aktorja Marie Logoreci, fiton konkursin. Por biografia nuk e lë të vijojë më tej.

Jepet shumë pas këngës dhe arrin të perfeksionohet si këngëtar, madje Ansambli i Shtetit e fton për solist, por i pëlqen krahina e tij dhe e vazhdon veprimtarinë artistike në vendlindje sa në një fshat në tjetrin. Këndon, por bën dhe humoristin e hokatarin e hollë, regjisorin, instrumentistin...

"S'ka pas gzim ma t'madh Mirdita" apo kënga e grupit të burrave "Shqipninë tonë me e ba kala" i këndoi në kalanë e Gjirokastrës në Festivalin Folklorik të vitit 1973. Por këngëtari epik zbriste natyrshëm tek lirikat e mrekullueshme, ndër të cilat shënohet "Oj mollë e kuqe", me këngëtaren e talentuar Gjyste Ceka.

Në 1978 ka një ngritje të grupit të Mirditës nën drejtimin e kantautorit të viteve '70 Dorian Nini, që e sollën të punonte në Rrëshen pas "shkarjes" në festivalin e 11-të të Këngës në RTSH. Ansambli vokal "Mirdita" përcaktohet si një nga grupet më unikalë në tërë festivalet kombëtare në Gjirokastër. "Kënga e Mic Sokolit" ishte bërë motiv i këtij festivali dhe grupi i Mirditës do të kërkohej gjithandej shesheve të Gjirokastrës.
"Padyshim, në mes këtyre zërave Fran Vorfi mbetet legjendë e këngës burimore të Mirditës dhe më tej", thonë shokët e tij këngëtarë "por asnjëherë i vlerësuar për shkak të biografisë, dhe i harruar këto vite, deri sa u shuajt." Por që qindra banorë të Mirditës i bënë dje homazhe në Pallatin e Kulturës për ta përcjellë për në banesën e fundit.

Poeti Gjokë Beci për "Grupin e Burrave të Mirditës":
"Kam pyetur veten: ku e gjen gjithë atë forcë epike Fran Vorfi që bashkon zërin e nëntë djemve e djemtë i bën burra dhe nëntë burrat me zërin e tyre jehojnë sa për nëntëqind!"

__________________
The heaven's sound is composed inside your heart, listen to its beat to syncronize your life onto the angel's steps.