Këngëtari i njohur i muzikës popullore Shkëlzen Jetishi tregon për karrierën e tij. Këngëtari kosovar është po aq i dashur edhe në këngët e Shqipërisë së mesme. Ai pohon se është kultivuar me këto këngë. Lidhur me problemin më të madh që shqetëson këngëtarët e mirëfilltë të muzikës autentike shqipe Shkëlzen Jetishi shprehet se, “Bastardimi i muzikës shqipe është një problem që u takon këngëtarëve të cilët duan të afirmohen menjëherë dhe nuk zgjedhin rrugët e duhura për të arritur sukses dhe për të ngjitur shkallët e karrierës”.

-Shkëlzen Jetishi është cilësuar si bilbili i Kosovës. Këndoni po kaq bukur edhe këngët e Shqipërisë së mesme?
Është e vërtetë që këngët e Kosovës i kam pasur në shpirtin tim po ashtu edhe në repertorin tim. Gjithashtu në tabanin tim kam pasur edhe këngë të Shqipërisë së mesme. Në fakt në repertorin tim kam pasur edhe këngë të veriut si të Tropojës etj. Por këngët e Shqipërisë së mesme janë këngët që unë i këndoj të gjitha sepse ajo është më e dashur dhe më e pasur. Unë ndihem mjaft mirë me këto këngë sepse i kam kënduar shpesh këngë të Shqipërisë së mesme dhe jam kultivuar në një farë mënyre me to.

-Keni shumë vite në skenë. Ndieni kënaqësi apo lodhje në skenë?
Jo, natyrisht që është kënaqësia e para sepse ajo më mban pranë publikut dhe më inspiron që të këndoj vazhdimisht. Është e natyrshme që edhe lodhja ekziston por kur kënaqësia është e madhe atëherë ajo nuk ka vlerë.
-E vizitoni shpesh Shqipërinë dhe sa kishte ndryshuar Tirana nga hera e fundit që e keni parë? Në Shqipëri kam qenë para një viti në një koncert në Pallatin e Kongreseve, “Folk Universe”. Tani që erdha e pashë problemin e vërtetë të Shqipërisë dhe e gjeta po ashtu si e kisha parë të televizion, në lajme, me një dinamikë si në aspektin ekonomik ashtu edhe në atë politik e urbanistik.

Në jetën e përditshme e hasa këtë dinamikë dhe do të më pëlqente shumë që kjo dinamikë të ishte sa më pozitive dhe në aspektin kulturor.

-Sa i ndiqni edicionet informative lidhur me Shqipërinë? Megjithëse kam pasur një verë të ngjeshur dhe kam qenë shumë aktiv në dasma dhe gëzime familjare kur kthehesha në shtëpi gjithmonë do ndiqja një stacion televiziv shqiptar. Kështu që kam qenë gjithmonë afër me të gjitha ngjarjet që kanë ndodhur në Shqipëri. Kam ndjekur edhe emisione të ndryshme muzikore dhe ndihem keq dhe më brengos kjo muzikë e vjedhur dhe e transformuar, fakt ky që ekziston edhe në Kosovë. Do të doja që kjo fazë tranzicioni të kalonte sa më shpejtë, veçanërisht në aspektin kulturor.

-Në Shqipëri shumë këngëtarë të muzikës popullore i bëjnë albumet e tyre me muzikë të vjedhur dhe të përpunuar. Si është mendimi juaj lidhur me këtë fakt?
Bastardimi i muzikës shqipe është një problem që u takon këngëtarëve të cilët duan të afirmohen menjëherë dhe nuk zgjedhin rrugët e duhura për të arritur sukses dhe për të ngjitur shkallët e karrierës.

-Muzika në Kosovë nuk është po sa Shqipëria në tranzicion?
Unë mendoj se këtë tranzision e kemi filluar në vitin 1989 me hyrjen e televizionit të Kosovës. Vitet 1989-1990 janë vitet ku muzika është futur në tranzicion. Ashtu si në Kosovë ka lindur problemi edhe në Shqipëri. Për këtë problem nuk mund t’ia lemë fajin vetëm Maqedonisë e cila ka ndikuar në këtë transformim. Ato vite kanë qenë një fazë tranzicioni si në aspektin kulturor ashtu edhe ekonomik. Për sa i përket ndryshimit midis këngëtarëve kosovar dhe atyre shqiptar është se, këngëtarët kosovar janë më të kujdesshëm. Mendoj se problemi në Kosovë dhe në Shqipëri është në një masë. Unë si individ fajin më të madh do ia lija kompozitorëve shqiptar sepse Shqipëria ka qenë një shtet më vetë dhe ai duhet të bënte më shumë për këtë problem.

-Shkëlzen Jetishi ka publikuar një numër rekord albumesh dhe këngët e tij kanë mbetur në kujtesën e publikut. Kolazhi që keni bërë me të madhen Merita Halili është më i njohuri...
Po, ai kolazh është bërë për koncertin “Kënga Magjike” që u mbajt në Kosovë. Ka qenë një ide e kantautorit Ardit Gjebrea. Ai donte të konceptohej një dasmë me nusen nga Shqipëria dhe dhëndri nga Kosova. I mblodhëm të gjitha këngët shqiptare të dasmave dhe bëmë një kolazh të tillë i cili doli mjaft i realizuar. Ky kolazh u prit mjaft mirë në publik dhe për këtë ka një meritë të madhe edhe këngëtarja e njohur e muzikës popullore Merita Halili.
-Ju këtë verë keni qenë pjesë e mjaft koncerteve. Si është ndier Shkëlzen Jetishi?
Po, kam qenë pjesë e shumë koncerteve këtë verë dhe ka qenë disi e lodhshme. Kam kënduar në çdo koncert “live”, por mbi të gjitha ekziston kënaqësia që i kam dhënë publikut dhe ajo kënaqësi që kam ndjerë edhe unë. Kënaqësia e madhe që kam ndjerë ma ka lehtësuar atë pagjumësi dhe atë lodhje të madhe.

-Ku i ka kaluar pushimet Shkëlzen Jetishi këtë vit?
Pushimet i kam bërë në Ulqin. Këto ditë pasi mbarova angazhimet e mëdha që kam pasur shkova disa ditë në Strugë. Kam ardhur edhe në Tiranë por këtë herë përsëri për angazhime dhe punë të mia. Vitin e kaluar nuk munda të rri gjatë në Shqipëri sepse isha i ftuar në festivalin “Folk Univers” në të cilin mora çmimin e Medias. Ka qenë një nder për mua ky çmim. Tani do të shkoj përsëri në Strugë për pushime sepse atje kam familjen time. Do të pushoj dy-tre ditë dhe do të kthehem përsëri në Kosovë.

-Kush është projekti juaj menjëherë pas kthimit në Kosovë?
Kam biseduar me kompozitorin Edmond Zhulali për krijimin e një kënge të re e cila do të realizohet pas një muaji.
-Kjo këngë do të jetë krijimtari e re?
Po, është një këngë e re si teksti ashtu edhe në muzika. Për tekstin do të bisedojmë me Jorgo Papingjin.
-Meqenëse jeni shumë i mirëpritur në Shqipëri premtoni se do të vini së afërmi me një koncert recital në Tiranë? Kemi biseduar edhe dy vitet e shkuara për një koncert recital në Shqipëri por megjithëse jam i mirëpritur dhe për respekt të publikut shqiptar kam dashur që të vij me një koncert “live” në mënyrë që të shpalos mundësitë e mia dhe vlerat e mia të vërteta.

__________________
The heaven's sound is composed inside your heart, listen to its beat to syncronize your life onto the angel's steps.