Kantautori po na shfaqet krejt ndryshe këtë herë. Si një pedagog paksa i rreptë përballë studentëve të rinj. Një status ky që Pirro Cako do ta mbajë vetëm për aq kohë sa do të zgjasë “Star Academy”. Pastaj do t’i kthehet sërish rrjedhës së tij të zakonshme: krijimtarisë. Sepse mendon që të vijë së shpejti në treg me një album të ri
Rishfaqja juaj në një ekran televiziv ka ndodhur gjithmonë ose për ndonjë festival të muzikës ose për promovimin e ndonjë albumi tuaj të ri. Po këtë herë?

Këtë herë për diçka krejt ndryshe, por që ka të bëjë përsëri me muzikën. Kam ardhur përsëri në Tiranë gati dhjetë ditë më parë për “Star Academy”, ku pas ftesës që më bëri producentja Zana Çela, pranova të jem pedagogu i kantos për të rinjtë që janë pranuar në këtë akademi e që do të hyjnë në sfidë me njëri-tjetrin.

Një angazhim ky që ju kërkon të jeni i lidhur shumë ngushtë e për shumë orë të ditës me këtë akademi, apo jo?
Sigurisht që po. Në ditët e para e kisha pak të vështirë të ambientohesha me këtë lloj angazhimi kaq intensiv, por shpejt kuptova se thjesht më duhej të ndryshoja regjimin tim të zakonshëm të gjithë këtyre viteve e ta sistemoja ndryshe ditën time. Duhet ta mësoja veten me oraret fikse dhe kaq.

Sipas kësaj që thua, duket se nuk e pasur të vështirë të ndryshosh ritmin e ditës tënde të zakonshme? E lehtë nuk ishte aspak. Në fillim orari fiks po më lodhte. I mësuar prej shumë kohësh si një artisti i lirë në kohën time, si një njeri që ka komoditetin t’i përcaktojë vetë oraret e punës së një dite, e kisha të vështirë të disiplinohesha në oraret fikse e të mbyllesha me orë të tëra në klasat e Akademisë për të punuar me studentët e këngës.

Ndërsa tani, pas dhjetë ditësh, duket se ndjeheni mirë?
Tani po. Duke e parë nga një këndvështrim tjetër, them se “Star Academy” është një eksperiencë e mirë që duhej të prekej. Unë kam thënë gjithmonë se na mungojnë zëra të mirë dhe interesant. Dëshira ime ka qenë gjithmonë të zbuloj talente të rinj, gjë që po e bëj tashmë. Dhe ndjehem mirë sepse është vërtet bukur të shikosh se si zbulohet një talent.

Ka zbuluar shumë talente “Star Academy”?
Po, por do të na duhet të zgjedhim më të mirët për spektaklin e madh. Jemi duke punuar çdo ditë me studentët e pranuar, që në fund të zgjedhim prej tyre dhjetë më të mirët. Kaq mendohet të hyjnë në sfidë në natën e parë të spektaklit.
Ju pëlqen kjo marrëdhënie e re që keni krijuar me të rinjtë, të cilët ju i quani studentë?
Kjo është pjesa më e bukur e gjithë këtij angazhimi. Gjithmonë të tjerët më kanë njohur dhe më kanë quajtur kantautori Pirro çako, ndërsa për këta studentë unë jam profesori Pirro. Më pëlqen që mund t’u jap e mësoj këtyre të rinjve gjithçka unë di dhe gjithçka kam akumuluar në gjithë këto vite, që prej kohëve kur isha dhe vetë student.

Po ua jepni këtyre të rinjve gjiçka keni akumuluar, gjithçka që ju dini?
Absolutisht po.
Keni ndërtuar ndonjë strategji tuajën të mësimdhënies?
Po, e kam një strategji timen: t’u jap studentëve gjithçka kam në bagazhin tim. Unë ndoshta nuk jam pedagogu perfekt në metodikën e mësimdhënies, sepse kjo është ekspereinca ime e pare, por ama nuk po kursej asgjë nga vetja dhe nga gjërat që di.

Ndryshe nga çfarë pritej, studentët kanë filluar të thonë se ju jeni një pedagog pak i rreptë? (qesh) I rreptë nuk mund të them. Por ata mendojnë kështu, ndoshta sepse unë ua them vërejtjet që kam për ta shumë drejpërdrejtë, që ata të reflektojnë po kaq drejpërdrejtë.

Do të të pëlqente ta vazhdojë profesionin e pedagogut dhe pas “Star Academy”-së?
Jo. Më pëlqen të vazhdoj të jem kantautori Pirro Çako e jo profesori Pirro Çako e të kthehem në regjimin tim të zakonshëm.

“Star Academy” iu ndërpreu ndonjë punë tuajën në mes?
Sapo kisha filluar të punoja në Francë për albumin tim të ri kur Zana më ftoi për këtë projekt, punë të cilën duhej ta lija në mes që të vija këtu. Por nuk më vjen keq, sepse tani jam dhënë me mish e me shpirt pas këtyre të rinjve.

Të cilët duket se do të të mbajnë gjatë këtë herë në Tiranë?
Po. Do të më duhet të shkëputem vetëm për fare pak ditë, për të shkuar në Maqedoni, ku do të realizoj një klip të ri për këngën “Mos më krahaso”, të albumit të fundit. Pastaj e gjithë koha dhe energjitë e mia do të jenë për “Star Academy”.

__________________
The heaven's sound is composed inside your heart, listen to its beat to syncronize your life onto the angel's steps.