Këngëtarja e muzikës qytetare vlonjate Mariola tregon për karrierën e saj artistike. Ajo tregon se është një përfaqësuese e denjë e këngës labe dhe se do të japi gjithçka që ka për të qenë akoma më e denjë për të përfaqësuar vendlindjen e vet. Lidhur me pyetjen se cila ka qenë shtysa për realizimin e këtij albumi Mariola shprehet se, “Muzika në përgjithësi ka qenë një ëndërr e imja. Gjithmonë kam ëndërruar të këndoja, apo edhe të bëja një album me Adi Hilën. Që në kohën kur Aurrela Gaçe ka kënduar këtë lloj rryme mua më ka pëlqyer të bëja një album të tillë.Shtysa kryesore ka qenë dëshira e madhe që kam patur dhe vullneti për të arritur diçka”.

-Albumi juaj i ri është mjaft i suksesshëm. E prisnit këtë?
Ky album është mirëpritur nga dëgjuesit e këngës folk në jug. Unë jam përpjekur që të sjell diçka të re, muzikën folk të përpunuar, të larmishme, mendoj se është pëlqyer. Gjithashtu do të thosha së në këtë album të parin timin kanë kontribuar emra të njohur të muzikës shqiptare si, Adrian Hila, studio Elrodi Music dhe shumë persona të cilët më kanë ndihmuar në përzgjedhjen e këngëve.

-Kur ka filluar karriera juaj?
Fillimisht edhe unë jam aktivizuar në aktivitetet e fëmijëve dhe më vonë edhe me Ansamblin e Shtetit në të cilin unë merrja pjesë. Po me këtë ansambël unë kam shkuar në Elbasan, në Gjirokastër ku atje kam përfaqësuar Vlorën, ku jam vlerësuar me çmime. Kam marrë pjesë edhe në një eveniment në Francë ku kam përfaqësuar Shqipërinë. Në Spanjë kemi dhënë një sërë koncertesh dhe jemi pritur shumë mire atje. Kam qenë pjesë e shumë aktiviteteve përpara se të nxirrja albumin, por ishte ai që më bëri të njohur.
-Keni kënduar ndonjëherë këngë polifonike?
Pjesa më e madhe e këngëve të mia në këtë album janë këngë polifonike megjithëse janë sjellë në një formë më moderne dhe më qytetare. Unë kam kënduar edhe këngë Labe por kam praktikuar më shumë këngë qytetare Vlonjate.

-Kënga “Ca në Vlorë ca në Tiranë” është një këngë e përpunuar apo një krijim i ri?
Kjo këngë është shumë e vjetër dhe flet për djemtë e asaj periudhe të cilët largoheshin nga fshati për të vajtur në qytet. Kjo këngë u përket atyre djemve, të asaj periudhe.
-Po tani ndodh ky fenomen?
Edhe ndodh por edhe jo. Megjithëse largim nga fshati është një fenomen i cili tashmë është i përgjithshëm dhe tepër i zakonshëm. Besoj se i përket asaj kohe.
-Kënga “Dridhe moj shaminë jeshile” është një këngë e vjetër?
Po, është një këngë e vjetër dhe e përpunuar.
-Këngët e albumit tuaj janë të gjitha këngë të vjetra të Vlorës apo ka edhe të krahinave të tjera? Për të qenë e saktë do të thosha se janë të trevës së jugut. Janë këngë edhe vlonjate edhe të qyteteve të tjera të jugut. Janë këngë polifonike të jugut të sjella në kohën e sotme.

-Kush ka qenë shtysa për realizimin e albumit tuaj të parë?
Muzika në përgjithësi ka qenë një ëndërr e imja. Gjithmonë kam ëndërruar të këndoja, apo edhe të bëja një album me Adi Hilën. Që në kohën kur Aurrela Gaçe ka kënduar këtë lloj rryme mua më ka pëlqyer të bëja një album të tillë. Shtysa kryesore ka qenë dëshira e madhe që kam patur dhe vullneti për të arritur diçka.
-Këngët tuaja janë të pëlqyera në të gjitha trevat shqiptare. Si keni mundur ta arrini një gjë të tillë?
Po, është e vërtetë. Kam qenë pjesë e koncerteve edhe jashtë jugut dhe jam pritur mjaft mirë. Publiku më ka duartrokitur dhe më ka mbështetur shumë. Kam qenë e ftuar në një koncert në Greqi dhe publiku nuk ka qenë vetëm nga jugu por edhe nga qytete të veriut si, Shkodra, Dibra etj. Kjo është një kënaqësi tepër e madhe për mua.

-Ju keni qenë në koncerte edhe në Greqi edhe në Shqipëri. Ku qëndron ndryshimi i publikut shqiptar dhe emigrantëve?
Në vende të huaja shqiptarët ndodhen larg familjes dhe larg të dashurve, larg vendit të tyre dhe pikërisht ne këngëtarët apo aktorët, apo kushdo qoftë që përfaqëson artin ju sjell një kënaqësi, apo më saktë ju largon disi nostalgjinë që kanë për vendin e tyre dhe për të dashurit.
-Përveç këngës “Ca në Vlorë ca në Tiranë” cila është kënga më e dëgjuar dhe më e preferuara juaja, pjesë e këtij albumi?
Për mua janë të gjitha të preferuara por do të veçoja këngën “Gërshetat”. Këngët e këtij albumi janë sjellë në një stil që kërcehen edhe në Disko edhe në Pab, dhe pëlqehen nga të rinjtë. Nga fëmijët janë tepër të pëlqyera këngët “Patat”, “Qeni”, “Topi”. Kam vënë re se edhe kënga “Mysafirja” është tepër e pëlqyer këtu në Tiranë. Më mirë do të thosha se secila këngë është preference e dikujt.

-Si ndihet Mariola kur dëgjon këngën e saj në Disko?
Mendoj se ndihem tepër e kënaqur dhe mjaft mirë.
-Mendoni se muzika popullore është më shumë e pëlqyer nga mosha e madhe dhe më pak nga të rinjtë?
Falë mjeshtërisë së Adi Hilës i cili ka bërë të mundur një mrekulli të vërtetë këto këngë kanë ardhur në një formë më moderne dhe më të pëlqyera nga të rinjtë.
-Mendoni se suksesi ka qenë i dyfishtë, i juaji edhe i Adi Hilës?
Po, natyrisht. Suksesi i Adit Hilës është i pari sepse falë tij unë jam kjo që jam.
-Ju keni sjellë edhe një këngë baladë në albumin tuaj…
Që kjo këngë të ishte pjesë e albumit tim ka qenë një dëshirë personale. Megjithëse në këtë album kam dashur që të sillja vetëm këngë alegro dhe të gëzueshme duke seleksionuar këngët e mia kjo këngë më ngeli në mendje. Ia propozova edhe Adi Hilës dhe i tregova që kjo këngë është impresionuese ai mendoi se duhet ta vendosnim edhe këtë këngë, për më tepër që kjo këngë ka një fabul të vërtetë.

-Cila është historia e kësaj kënge?
Një djalë i cili ka shkuar emigrant në kushte të vështira është gjetur i vdekur nga një bari pas dy-tre muajsh. Ishte i mbuluar me dëborë dhe kur shkriu dëbora ai u gjet. Kjo është një tragjedi e vërtetë që ka ndodhur.
-Ka qenë e lehtë të përzgjidhni materialet dhe t’i gjeni ato?
Ka qenë tepër e vështirë sepse unë dëgjova një sër materialesh dhe pavarësisht se unë mendoja se ishin të gjitha të bukura përzgjodha këngët e këtij albumi. Përzgjedhja e materialeve është bërë bashkarish nga unë dhe nga Adi Hila. Janë përzgjedhur këngët autentike labe.

-Cili është idhulli juaj nga këngëtarët e brezit të vjetër të këngës labe?
Unë i kam idhull të gjithë këngëtarët e këngës së jugut si, Amelia Doda, Kleopatra Skërçi, Irini Qiriako, Aurrela Gaçe janë dhe do të jenë gjithmonë idhull për mua sepse e kanë përfaqësuar Vlorën me denjësi.
-Si i keni marrëdhëniet me këngëtaret e tjera të reja vlonjate të kësaj rryme si, Ponin apo Silva Gunbardhin?
Marrëdhëniet i kam shumë të mira me to. I kam shumë mike dhe doja t’i përgëzoja për albumet e tyre.
-Në jetën e përditshme jeni shumë shoqe. Po në tregun muzikor ndiheni konkurrente?
Për mua konkurrenca nuk vlen sepse çdo këngëtarë sjell veten dhe atë të veçantë të karakterit të tij si këngëtar.

__________________
The heaven's sound is composed inside your heart, listen to its beat to syncronize your life onto the angel's steps.