Sopranoja e njohur lirike, Loreta Kosho tregon për fillimet e karrierës së saj. Këngëtarja e njohur ka filluar të këndoj shumë bukur këngën popullore kolonjare që në moshën pesë vjeçare. Megjithëse Loreta Kosho mban mbi shpinë shumë vite karrierë ajo vazhdon të jetë një këngëtare e madhe lirike dhe e këngës qytetare popullore.
-Si ka nisur karriera e Loreta Koshos me muzikën?
Unë jam nga Kolonja dhe kam kënduar në moshë fare të vogël këngën kolonjare. Në familjen timë është kënduar shumë kënga kolonjare, babai im ka kënduar shumë dhe më ka ndjekur hap pas hapi me këngën.
Nëna ime më mësonte të këndoja dhe unë ndihesha shumë mirë me zërin e impostuar që ma kishte dhuruar nëna. Gjithmonë kam kënduar këngën kolonjare të impostuar dhe për këtë ndihesha shumë mirë.

-Të këndosh këngën popullore me njëzë të impostuar në moshën pesë vjeçare, moshë kur keni filluar ju të këndoni është e diçka e rrallë...
Deri kur kam ardhur me inçizim nëpër rrethe sepse Kolonja kishte një aktivitet të jashtëzakonshëm, me një Estradë me këngëtarë dhe profesionistë shumë të mirë ndihej zëri im i impostuar, vokali im shumë i bukur, që në vitet e para të karrierës sime. Për këtë arsye unë vendosa të këndoja gjatë gjithë viteve, ndërsa vazhdoja të rritesha, derisa vendosa që të bëhesha një këngëtare lirike, sepse më pëlqente shumë, por mbi të gjitha kam kënduar shumë edhe këngën popullore dhe e adhuroj.

-Çfarë kujton Loreta Kosho nga vitet kur studionte në Akademinë e Arteve?
Studimet në Akademinë e Arteve kanë qenë vitet më të bukura të jetës sime. Jam shumë krenare të përmend këtu profesorin tim Ramiz Kovaçin, i cili me një përkushtim dhe pasion të jashtëzakonshëm punonte me ne studentët, me një teknikë, një ndjeshmëri dhe çdo gjë të bukur që kishte muzika lirike ai na i transmetonte ne studentëve. Unë i jam shumë mirënjohëse për këtë dhe ndihem shumë krenare që kam qenë studentja e tij. Mbi të gjitha ato vite kanë qenë vite të arta të muzikës popullore, të muzikës klasike, të atij brezi të artë që kemi qenë neve, që shumë rrallë mund të vijnë në Akademinë e Arteve.

Unë si studente kujtoj nga ato vite një koncert i Tefta Tashkos, një konkurs në Korçë dhe unë vlerësohem si një nga studentet më të mira të Akademisë së Arteve, të këndoja në Korçë me këngëtaret e Teatrit të Operas dhe Baletit. Ky ishte një vlerësim i madh për mua dhe në këtë konkurs unë fitoj një çmim të tretë me një serenatë dhe një këngë popullore që ka kënduar këngëtarja e madhe e Tefta Tashkos.
-Loreta Kosho ka punuar disa vite mësuese në qytetin e Beratit...
Pasi mbarova Akademinë e Arteve unë u martova në Berat dhe u bëra mësuese e kantos në Shkollën e Muzikës atje. Kam punuar shumë me studentet e mia për dymbëdhjet vjet dhe jam krenare për to.
-Jeni aktivizuar përveçse në Shkollën e Muzikës dhe me Estradën e Beratit?
Në atë periudhë edhe Berati ishte një qytet me traditë dhe me kulturë të jashtëzakonshme, një qytet me vlera 2400 vjeçare. Në Berat ndihej kënga, ndihej dashuria, ndihej respekti, ndiheshin vlerat e këngës qytetare popullore beratase. Unë mendoj se në atë vend ku i është kënduar dashurisë ka qytetërim.

Jam e mendimit se kënga qytetare popullore beratase kishte vlera të jashtëzakonshme dhe unë ndihesha mirë me atë grup të muzikës popullore qytetare beratase, ndihesha mirë edhe recitalet që kam dhënë, kam dhënë dy recitale dhe të gjitha pjesët që kam kënduar kanë qenë një mrekulli, kanë qenë edhe turistë të ftuar në ato vite në Berat dhe u ndjenë shumë mirë. Berati është një qytet me vlera, me kulturë, me njerëz të kulturuar që të kuptonin të vlerësonin, ndërsa tani ndjej shumë boshllëqë jo vetëm në Berat por edhe në vende të tjera.
-Loreta Kosho tashmë punon në Teatrin e Operas dhe Baletit. Prej sa vjetësh jeni pjesë e këtij institucioni?
Kam shumë vite, ndihem mirë dhe jam e kënaqur përpara trupës së Teatrit të Operas dhe Baletit. Përpara tre muajsh dhashë një koncert recital me vepra me të vërtetë shumë të mira, kaloj shumë mire dhe u prit mjaft mirë në publik. Këndova pjesë nga Pu[ini, Preng Jakova, këngë popullore etj. Them se këtë koncert, meqënëse u vlerësua shumë do ta përsëris në Akademinë e Arteve. Dëshira ime më e madhe do të ishte që të organizoja një kuartet me një violinë, violinçel, piano dhe një violë dhe të këndoja këngë të të madhes Tefta Tashko që unë e kam shumë përzemër. Këto këngë nuk janë shumë të lëvruara.

-Keni ndërmend që të realizoni një album me këngët e Tefta Tashkos?
Si fillim kam dëshirë të realizoj një koncert dhe natyrisht që edhe albumin më vonë, sepse këto këngë nuk i kanë prekur shumë këngëtare. Të paktën nuk kanë shpalosur ato vlera që kanë patur këngët e Tefta Tashkos, unë mendoj se diçka do të arrij. Përveç se është këngëtarja ime e preferuar zëri im përshtatet shumë me këngët popullore të Tefta Tashkos sepse unë jam një soprano lirike dhe me të vërtetë ato këngë i përshtaten shumë vokalit tim.
-Ka pasur Loreta Kosho këngëtarë të ftuar në recitalin e saj?
Unë kam pasur të ftuar gjithë shoqërinë time, kam pasur të ftuar nga Berati shokët e mi. Kam pasur të ftuar edhe artistë të Teatrit të Operas dhe Baletit, profesor Zhani Cikon, Edit Mihalin që me të vërtetë publiku u mrekullua.
-Ju keni një vajzë 20 vjeç. E ndjek ajo rrugën e muzikës?
Vajza ime ka studiuar për piano në Liceun Artistik, por unë vendosa që meqënëse ajo kishte një dhunti për lëndët shoqërore të studionte në Angli për Jurisprudencë. Tani ajo është studente e vitit të parë në Oxford.

-E ndjeni mungesën e vajzës?
Jashtëzakonisht shumë. Unë jam lidhur shumë me vajzën dhe më mungon shumë, por kur mendoj se ajo duhet të ketë një të ardhme të mirë dhe të punoj shumë ashtu si do edhe vetë ajo them se do të bëj mirë dhe largësia e vajzës për mua.
-Keni pasur në repertorin tuaj gjatë kërrierës në vazhdim këngë kolonjare?
Unë në vitin e parë në shkollën e mesme kam qenë e ftuar këtu në Tiranë, në Ansamblin e Këngëve dhe Valleve, kam kënduar një këngë të Bajram Lapit, me Fiqirete Kapon. Kam kënduar një këngë të Pavllo Shollës dhe kam fituar edheaty çmim të dytë dhe të tretë. Më pas në Festivalin e Gjirokastrës unë kam marrë një Medalje Ari, kam kënduar dhe kërcyer një valle. Ishte një valle kolonjare, të cilën ma kishte mësuar gjyshja ime. Jam pritur mjaft mirë dhe në moshën shtatëmbëdhjet vjeçe me Ansamblin e Këngëve dhe Valleve kam shkuar në një turne në Greqi. Unë jam prezantuar vetëm me këtë valle të kënduar.

__________________
Try not to become a man of success but rather to become a man of value - Einstein Albert.