Leonora Poloska

Një dozë të vogël seksi

Tashmë po prezantohet në MTV Adria. Thotë se nuk është e dashuruar, ndërkaq dëshiron që seksi t’i duket vetëm burrit të saj

ARDIAN JASIQI

Ishte e re kur e nisi karrierën si kantautore në festivalin “Polifest 2000”, dhe fitoi çmimin e parë. Kjo i dha shtytje që të vazhdojë tutje, deri në paraqitjen në MTV Adria. Në një bisedë për “Lajm”, Leonora Poloska nuk e tregoi emrin e personit që ia ka bërë të mundur paraqitjen në këtë televizion. “Nuk do t’ia përmend emrin atij që po synon të më bëjë të famshme. Jo pse nuk dua unë, por ai nuk dëshiron të bëhet i njohur për publikun”.
Leonora thotë se nuk e ka ndryshuar shumë stilin e saj të muzikës. “Edhe albumi i dytë ka këngë me elemente të ndryshme orientale, por shumica janë të stilit R&B, që unë e adhuroj më së shumti”.
Thotë se ka pasur mundësi ta përfaqësojë Maqedoninë në “Eurovision”, por nuk ka dashur ta bëjë këtë. Po ashtu, nuk ka dashur të paraqitet as në Festivalin e Këngës në RTSH.
Nuk është e dashuruar dhe ende nuk e ka gjetur tipin që i përshtatet stilit të saj. Nuk e mohon që është seksi, por nuk ka dëshirë të krahasohet me këngëtare të tjera të estradës. “Vetë paraqitja ime dallon, ndonëse nuk është aq seksi sa thonë. Dëshira ime më e madhe është që t’i dukem seksi burrit tim. Kam një dozë të vogël të seksi-pamjes, por assesi s’dua të krahasohem me këngëtaret tjera”.
Nuk e ka në qejf shumë politikën, sepse nuk mund t’i durojë politikanët. Por, thotë se është shumë patriote, edhe pse këtë nuk e shpreh shumë me simbole, por e ruan në zemër. Konsideron se dhurata më e mirë që e ka bërë ndonjëherë është një këngë kushtuar Beksit, edhe pse nuk dëshiron të tregojë se kush është ky person.
“Unë do të jem një këngëtare që do të ec me kohën. Me kohën që ecë Amerika dhe civilizimi. Amerikën e përmend me shkas, pasi që të jep mundësi krijimi të të gjitha zhanreve muzikore dhe kjo më pëlqen”.
Leonora konsumon shumë peshkun dhe sallatat, ndërkaq nga pijet i pëlqen vetëm uji. Në raste speciale konsumon verën e kuqe.

__________________
Nobody is perfect ...