Këngëtarja e muzikës popullore Ledia Halili tregon për fillimet e karrierës së saj. Ajo është trashëgimtarja më e re, për interpretimin e muzikës popullore të Shqipërisë së Mesme, nga familja Halili. Ledia, lidhur me muzikën dhe këngën që sjell për publikun shqiptar shprehet se, “Unë përfaqësoj gjithmonë traditën e familjes sime dhe përpiqem ta sjellë atë sa më afër, ashtu si ka qenë dikur. Sot janë bërë shumë përpunime me këngët dhe muzika popullore është devijuar shumë dhe kështu që nuk e ndjej konkurrencën. Unë nxjerr muzikën e pastër popullore, gjë shumë e vështirë për t’u bërë nga këngëtarët e tjerë”.

-Si ka nisur karriera juaj muzikore?
Kam nisur të këndoj në shkollë, si çdo fëmijë. Më pas u realizua konkursi “13 për 3” për zërat e rinj në televizionin Klan, atje ishte fillimi im me muzikën. Në këtë konkurs mësova se dija të këndoja dhe shkova tek një orkestrues. Petrit Tërkuci ka qenë kompozitori i parë i këngëve të mia.
-Ledia ka filluar të këndoj këngë të lehta apo popullore?
Kam filluar me këngë popullore për fëmijë.
-Ndërkohë që ju jeni trashëgimtare e një familjeje me këngëtarë shumë të mirë të muzikës popullore. Ndiheni mirë për këtë?
Patjetër që ndihem mirë. I pari nga familja jonë ka kënduar babai im, Gëzim Halili, më pas halla ime, Merita Halili dhe më pas vëllai im, Ergys Halili që ka marrë pjesë në albumin tim dhe në fund unë.

-Ledia Halili ka nxjerrë një album në tregun muzikor. Cilët kanë qenë bashkëpunëtorët tuaj për realizimin e tij dhe si është bërë përzgjedhja e këngëve?
Babai im ka qenë për pesë vjet në Amerikë dhe kur është kthyer në Shqipëri unë kisha përzgjedhur shumë materiale. Në këto materiale babai im zgjodhi ato që i përshtateshin zërit tim. Për realizimin e këtij albumi janë zgjedhur këngët më të mira.
-Ka pasur këngë të cilat ju pëlqenin ndërsa babai juaj mendonte se nuk ju përshtateshin?
Jo. Unë me babin i kemi përzgjedhur bashkë materialet e albumit dhe jemi kuptuar shumë mirë. Kështu po veprojmë edhe për materialet e albumit të dytë.
-Sa këngë ka albumi juaj i parë dhe janë vetëm këngë popullore të Tiranës apo edhe të vendeve të tjera të Shqipërisë së Mesme?

Albumi ka 11 këngë. Janë këngë të Elbasanit, Tiranës, këngë që i ka kënduar Muharrem Gura, Isit Mizyri, dhe këngë që i ka kënduar vetëm Fitnete Rexha.
-Cilët janë bashkëpunëtorët për realizimin e albumit tuaj?
Një nga bashkëpunëtorët është babai im Gëzim Halili, orkestruesi i këngëve të mia ka qenë Olti Struga. Këngët e albumit janë regjistruar në studion e Dorian Gjonit. Ndërsa tekstet e këngëve janë të njohura, këngë të vjetra të Shqipërisë së Mesme.
-Ledia Halili është një nga interpretueset e këngës së mirëfilltë popullore të Shqipërisë së Mesme…
Po, unë që në fillim, kur nisa të këndoj kisha dëshirë që të këndoja këngën origjinale dhe të pastër popullore. Duke qenë se jam rritur me frymën e këngës së mirëfilltë popullore nuk kam dashur ta devijoj apo të marrë ornamente të huaja.

-Ka qenë një mbështetje për ju në muzikë, babai juaj Gëzim Halili, i cili është një klarinetist i njohur?
Nuk mund të them që ka qenë një mbështetje që në fillim sepse këngën e kam nisur vetë dhe e kam zbuluar vetë veten, por më ka ndihmuar shumë pikërisht atëherë kur duhej, kur nisa të përgatitesha për albumin dhe kur fillova të këndoja nëpër lokale.
-Mendoni se do t’ju mungonte ndihma e babait tuaj në muzikë?
Shumë. Nuk besoj se do të arrija deri këtu ku jam pa mbështetjen e babait tim.
-Nga cili person merr më tepër kritika Ledia Halili?
Kritikohem gjithmonë nga babai im. Kritikat e tij nuk janë vetëm në lidhje me muzikën por më mëson edhe “hilet e zanatit”. Ai është më mëson edhe se si duhet të jetë një njeri i përgatitur në jetën e përditshme.

-Ledia këndon edhe “live”. Si është më e lehtë për ju të këndoni “live” apo në “playback”?
Për mua është më mirë të këndoj “live”. Unë di shumë këngëtare, madje edhe të njohura të cilat vijnë në Diasporë dhe këndojnë në “playback” por unë ndihem shumë mirë kur këndoj “live” dhe këndoj gjithmonë “live”, ndoshta edhe tre-katër orë pa pushim.
-Ju ka ndodhur të ndiheni e lodhur duke kënduar dhe të mos mund të vazhdoni më?
Po, ka ndodhur të jem e lodhur, por duke parë reagimin e publikut, unë gjithmonë jam ndjerë e kënaqur dhe gjithmonë kam vazhduar të këndoj me një eufori të madhe.
-Cili ka qenë angazhimi juaj muzikor kohët e fundit?
Unë sapo kam ardhur nga Zvicra, kam vetëm një javë që jam kthyer. Kam qëndruar andej për katër muaj. Atje kam kënduar për bashkatdhetarët.

-Si ndiheni ju dhe si ju mirëpresin bashkatdhetarët në Diasporë?
Personalisht unë ndihem shumë mirë kur këndoj në Zvicër. Atje nuk këndoj vetëm unë, janë edhe shumë këngëtarë të tjerë të Shqipërisë, Maqedonisë dhe Kosovës. Është shumë mirë sepse, sa vjen edhe njeh më shumë këngëtarë dhe njerëz të rinj. Ndërsa njerëzit atje janë shumë mikpritës dhe për këtë ndihem shumë mirë.
-Në aktivitetet që zhvillohen në Diasporë Ledia Halili këndon vetëm këngë të Shqipërisë së Mesme apo edhe të trevave të tjera?
Në këto aktivitete unë këndoj këngë të Jugut, të Veriut, të Kosovës, këngë patriotike, melankolike, argëtuese, etj. Të gjitha llojet e këngëve unë i këndoj në Diasporë dhe në lokale.
-Çfarë rryme është më e pëlqyer në Diasporë?
Më e pëlqyera është një rrymë e re që quhet “Tallava”, kërkojnë këngë të Kosovës, të shqiptarëve të Maqedonisë, këndohen këngë që janë vërtetë me taban këngë popullore të Shqipërisë dhe unë e gjej veten shumë mirë aty.
-Ledia Halili, megjithëse këndon shumë bukur këngën popullore shqiptare është fare e re…
Po, në datën dy tetor unë mbusha 20 vjeç. E festova me familjen time dhe babi më ka bërë një dhuratë shumë të bukur, një makinë.

-Bëni prova me zërin tuaj gjatë ditës për ta mbajtur atë në formë?
Kur jam pushim dhe jam në shtëpi bëj prova gjatë gjithë ditës, vokalica, për të mbajtur zërin tim në formë. Bëj prova dhe mësoj ndonjë këngë të re sepse kur jam në aktivitet asnjëherë nuk mund të mësoj këngë të reja sepse lodhem dhe nuk e gjej kohën për të mësuar.
-E ndjen Ledia konkurrencën në tregun muzikor?
Është një pyetje e vështirë. Megjithatë po përpiqem të përgjigjem. Mendoj se unë meqenëse jam edhe brezi i ri nuk e ndjej shumë konkurrencën në tregun muzikor. Unë përfaqësoj gjithmonë traditën e familjes sime dhe përpiqem ta sjellë atë sa më afër, ashtu si ka qenë dikur. Sot janë bërë shumë përpunime me këngët dhe muzika popullore është devijuar shumë dhe kështu që nuk e ndjej konkurrencën. Unë nxjerr muzikën e pastër popullore, gjë shumë e vështirë për t’u bërë nga këngëtarët e tjerë.
-Çfarë mendimi ka Ledia Halili për nivelin aktual të muzikës popullore në Shqipëri?
Pasi u ktheva nga Zvicra vura re se pjesa më e madhe e këngëve ishin përkthime nga këngët bullgare apo rumune dhe këngëtarë të tjerë që e sjellin këngën popullore shqiptare të përpunuar dhe me ritme moderne. Kjo është diçka që mua nuk më pëlqen dhe u ndjeva keq për këtë.
-Mendoni se që të këndosh këngën popullore duhet një veshje serioze?
Normalisht, që veshja është një nga faktorët tregues. Unë kam një parim, kudo që shkoj kam një veshje serioze sepse edhe nëse këndoj një këngë të rrymave moderne, veshja të ngre shumë vlera, si me këngën ashtu edhe me personalitetin tënd.
-Sa vëmendje i kushtoni veshjes suaj?
Kur duhet të paraqitem në publik, në një koncert apo në lokal i kushtoj shumë vëmendje, është pak të thuash tre orë. Ndërsa gjatë ditës shumë pak.

__________________
Try not to become a man of success but rather to become a man of value - Einstein Albert.