Këngëtari i muzikës popullore Kujtim Shehu tregon për karrierën e tij. Profesori i matematikës Kujtim Shehu ka nxjerrë në tregun muzikor albumin e tij të ri me titull “Ka dalë qejfi ashiqare”. Megjithëse albumi i tij i fundit është mjaft i realizuar ai tregon se është kërkues ndaj vetes dhe se kërkon gjithmonë më të mirën. Lidhur me fillimet e karrierës së tij Kujtim Shehu shprehet se, “Fillimet e mia kanë qenë me muzikën e lehtë. Ajo ka qenë dëshira ime. Në fillim më ka pëlqyer vetëm muzika e lehtë dhe nuk kam dashur të këndoja këngë popullore. Kam filluar të këndoj në Pallatin e Kulturës Studenti me kompozitorin Kujtim Allia.Ai ka qenë shtysa kryesore që më ka detyruar që të këndoj këngë popullore pasi unë nuk kam patur asnjëherë dëshirë të këndoj këngë popullore”.

-Titulli i albumit tuaj është “Ka dalë qejfi ashiqare”. Pse keni zgjedhur këtë titull?
E zgjodha këtë këngë për titullin e albumit tim sepse mendova se ishte më interesantja. Kjo këngë trajton temën më të përshtatshme për kohën.
-Kush ishte ideatori i kësaj kënge?
Ideja për të realizuar një këngë të tillë ka qenë e imja, megjithëse teksti është i Jorgo Papingjit. Unë gjeta fabulën dhe Jorgo Papingji punoi tekstin.
-Albumi juaj ka tetë këngë. Sa ndryshojnë ato nga këngët tuaja në albumet e mëparshme?
Tek ky album unë shpresoja. Albumi i ri është një bashkëpunim me Adrian Hilën. Ai ka qenë kompozitori i gjashtë këngëve. Dy këngët e tjera janë të orkestruara nga Petrit Tërkuçi dhe Saimir Çili, i cili është kompozitori i duetit “Dashnia është gjë e madhe”. Kjo këngë është realizuar së bashku me këngëtaren Flora Shabani.

-Origjina juaj është nga Dibra, ndërkohë që ju këndoni këngë të Shqipërisë së mesme. Pse?
Në fakt është e vërtetë. pjesa më e madhe e publikut nuk e di që jam nga Dibra. Megjithëse në Dibër kam kaluar 20 vite të jetës time pjesa më e madhe e publikut kujton se jam nga Tirana. Nuk kam kënduar këngë të veriut sepse si këngëtar jam kultivuar në Tiranë.

-Në këtë album ju keni një këngë për Dibrën. Është kënga e parë që ia kushtoni qytetit tuaj?
Po, është kënga e parë që ia kushtoj qytetit tim dhe për këtë ndihem shumë mirë. Ajo është kompozuar nga Haxhi Maqellara ndërsa orkestrimi është bërë nga Adrian Hila.
-Ju keni realizuar tre albume. Kush është më profesional?
Albumi i fundit është më profesional dhe më kontemporan. Çdo njeri ka kërkesa të veçanta ndaj vetes. Kështu edhe unë kam kërkesat e mia dhe megjithëse ky është një album i realizuar nuk jam shumë i kënaqur sepse unë nuk kënaqem asnjëherë me veten time.

-Adi Hila është një kompozitor shumë i suksesshëm. Sa nga suksesi i këtij album ii takon atij?
Mund të them me bindje se suksesi është i Adi Hilës sepse nëse kënga nuk ka një orkestracion të mirë këngëtari nuk mund të bëj asgjë. Këngën e ngre edhe orkestracioni.
-Sa ka ndikuar Jorgo Papingji, autori i teksteve në këtë sukses?
Jorgo Papingji është autori i tekstit “Ka dalë qejfi ashiqare” dhe “Jeta është llotari”. Në këtë album këto dy këngë mbajnë firmën e Jorgo Papingjit.
-Muzika e këngës “Ka dalë qejfi ashiqare” është krijuar nga ju?
Ideja ka qenë e imja por përpunimi është bërë nga Adi Hila.

-Në albumin tuaj është edhe kënga me titull “Goc Tirone”, një këngë e kënduar edhe nga këngëtarë të tjerë…
Po. Kënga “Goc Tirone” është kënduar edhe nga këngëtarë të tjerë. Origjinali i kësaj kënge është “Goc Pejane” e kompozuar nga Xhevdet Gashi të cilit ne i kemi marrë të drejtën për ta realizuar edhe ne në Shqipëri këtë këngë.

-Ndërkohë në Shqipëri shumë rrallë këngëtarët blejnë të drejtën e autorit…
Po, është e vërtetë. Por ne për të qenë korrekt i morëm leje kompozitorit Xhevdet Gashi, madje na është dashur 30 minuta në telefon për ta bindur.
-Si ka filluar karriera juaj në muzikë?
Fillimet e mia kanë qenë me muzikën e lehtë. Ajo ka qenë dëshira ime. Në fillim më ka pëlqyer vetëm muzika e lehtë dhe nuk kam dashur të këndoja këngë popullore. Kam filluar të këndoj në Pallatin e Kulturës Studenti me kompozitorin Kujtim Allia. Ai ka qenë shtysa kryesore që më ka detyruar që të këndoj këngë popullore pasi unë nuk kam patur asnjëherë dëshirë të këndoj këngë popullore.

-Keni qenë pjesëmarrës në ndonjë aktivitet të muzikës së lehtë?
Po. Kam qenë pjesëmarrës tek Netët e Klipit Shqiptar në edicionin e tij të parë. Aty jam vlerësuar me çmimin e publikut. Kam konkurruar me këngën “Kënga e dashurisë”. Kjo këngë ka qenë një ndër videoklipet e para që ka bërë TVSH-ja. Kam marrë pjesë edhe tek Top Fest-i. Kam qenë pjesëmarrës edhe në Këngët e Stinës. Këngë të lehta unë këndoj edhe në Bar-e ku jam i ftuar, këngë italiane, greke etj.
-Ju jeni edhe profesor i matematikës. Çfarë lidhje kanë këto të dyja?
Në fakt kështu thonë të gjithë, që nuk ka lidhje por unë mendoj se ka lidhje muzika me matematikën. Profesionistët e Solfezhit tregojnë se muzika me matematikën kanë shumë lidhje me njëra-tjetrën.

-Si janë marrëdhëniet tuaja me nxënësit?
Unë jam mësues në një shkollë profesionale, tek “Asim Vokshi”. Profili që kanë këta nxënës nuk ka shumë lidhje me matematikën, megjithatë unë përpiqem që t’ua bëj të kënaqshme dhe të dashur matematikën.
-Merrni komplimente nga nxënësit për muzikën që ju bëni?
Po të them të drejtën marrë por jo në orën e mësimit sepse unë jam profesor dhe kam distancat e mia me nxënësit. Nxënësit kanë dëshirë të më urojnë dhe të më përshëndesin.

-Kënga juaj “Ka dalë qejfi ashiqare” është e realizuar edhe në videoklip. Ka qenë ide e juaja?
Klipi është realizuar në studiot e BBF televizion. Ky videoklip është bërë me regji sepse duhet që të trajtonim fabulën e kësaj kënge. Regjisori i kësaj kënge është Arian Çuliqi i cili e pëlqeu shumë përmbajtjen e kësaj kënge. Aktori i njohur Behar Mera ka qenë pjesë e këtij videoklipi.

-Shumë këngëtarë të tjerë tani i realizojnë videoklipet me aktorë. Pse ndodh kjo?
Aktorët në videoklip janë të domosdoshëm sepse kur kënga ka një fabul këngëtari nuk mund ta realizoj ashtu si duhet një videoklip. Këngëtari asnjëherë nuk mund ta luaj një rol ashtu si e bën një profesionist.

__________________
The heaven's sound is composed inside your heart, listen to its beat to syncronize your life onto the angel's steps.