Kristi Popa: Konflikti me Sabjanin dhe hakmarrja e Kristit. Për të, huazimi i këngëve të të tjerëve nuk ka të ardhme.

Të gjithë e mbajnë mend djaloshin energjik, dikur me një stil ndryshe në Shqipëri, me veshje që ngjasonin me ato të burrave skocezë dhe me syzet e errëta që nuk i hiqte në asnjë moment, si në skenë ashtu edhe në jetën e përditshme. Me flokët e lyera në të verdhë e here të qethura zero, ai do të krijonte një personalitet të veçantë në morinë e këngëtareve të atyre viteve. Rryma e flokut alternativ ishte më e përshtatshmja për të, si për të treguar edhe temperamentin e tij plot ritëm e gjallëri. I pëlqente të krijonte muzikë dhe të eksperimentonte në gjithçka që sillte për publikun dhe këngët e tij do të bëheshin kolona zanore në dokumentare e programe të shumta. Tashmë vitet kaluan dhe Kristi ka ndryshuar, po ashtu edhe rryma muzikore me të cilën po punon. Takimi i fundit me skenën ishte në Festivalin e Këngës të vitit të kaluar, në një bashkëpunimin me Mariza Ikonomin për këngën, “Ku është dashuria”.

Ajo këngë zuri vendin e tretë, që për Kristin do të thotë shumë por edhe pak. Shpresonte që ai rikthim të vlerësohej më tepër për vetë motivet e asaj balade dashurie, por ambiciet e tij vijojnë dhe një ndër surprizat e fundit do të jetë albumi i ri në treg, në fillim të muajit qershor. Nga folku alternativ, albumi do të shndërrohet në ritme melankolike, të preferuarat e Kristit. Informacionet për albumin i mban të rezervuara ,veçanërisht në këto momente ku e gjithë vëmendja e gazetarëve të kronikave rozë është e përqendruar në një debat të lindur mes Kristit dhe ish- bashkëpunëtorit të tij Sabjanit. Nuk dëshiron ta përmend në asnjë mënyrë emrin e tij, por as nuk i shmanget pyetjeve që kanë të bëjnë pikërisht me çështjen në fjalë. Ishte vetë Kristi ai që e bëri publike një histori të tillë, sepse donte që gjithkush ta mësonte të vërtetën e hidhur që ndodh në vendin tonë, ku këngët vidhen pa kriter edhe nga personat e tu më të besueshëm. Por çfarë ndodhi në të vërtetë mes tij dhe Sabjanit?

Një mungesë e gjatë në publik. Përse?
Është e vërtetë që kam munguar për një kohë të gjatë, ndoshta sepse nuk kam atë ndjenjën e protagonizmit të përhershëm, por do të shfaqen vetëm atëherë kur kam diçka për të ndarë me publikun përsa i përket artit tim.

Kjo do të shpjegohet më shprehjen “Më mirë pak dhe saktë” ?
Po dhe pak do të thotë të jesh i vërtetë dhe i saktë dhe jo për protagonizëm vetëm për të konsumuar kohën e tepërt në ekran.

Dua të të rikthej disa vite prapa në kohën kur muzika që prezantoje, folku alternativ mbizotëronte kudo.
Ne jemi njohur vite më parë bashkë dhe e mbajmë mend të dy atë epokë dhe atë sukses që për mua ka qenë një kapitull më vete, sepse gjatë atyre viteve pata mundësinë që me shumë guxim,vendosmëri dhe bindje të bëja muzikë ashtu siç unë e ndjeja.

Ishte një stil ndryshe në atë kohë, Kristi me fantazitë e tija dhe pa limite të të krijuarit.
Po, kështu ka qenë sepse unë kam qenë i vërtetë dhe kam qenë i bindur sesi çdo artist edhe unë kam patur njerëz që nuk më kanë pranuar por edhe të tjerë që më kanë mbështetur dhe dëshiroj t`i falënderoj të gjithë ata që më kanë duartrokitur.

Çfarë e bën Kristin “të vërtetë” në ekran?
Të jesh i vërtetë do të thotë të jesh edhe i hidhur. Shpeshherë mund të jem i atillë. E vërteta jo gjithmonë është e ëmbël dhe ta reklamosh artin tënd pa censura duke menduar; çfarë do të thonë të tjerët?!

Çfarë të ka mbetur pa realizuar??
Nuk jam penduar për çfarë kam kaluar dhe them se kam realizuar aq sa kam kërkuar dhe tani po akumuloj një pjesë tjetër të këngëve të mia, që do ti hedh së shpejti në treg. Kam fatin që jetoj në një vend si Shqipëria ku mund të jesh edhe eksperimental dhe je i mirëpritur dhe ky është një hap pozitiv pasi publiku është i durueshëm dhe të dëgjon e të duartroket.

Dalja juaj e fundit në skenë ishte në festivalin e RTSH-së, në bashkëpunim me Mariza Ikonomin.
Kënga është pritur shumë mirë dhe si unë ashtu edhe Mariza mendonim se ishte një këngë cilësore por nuk i pritnim aq shumë duartrokitje sa arritëm. Megjithatë vlerësimi me çmim të tretë më nervozoi shumë, pasi të paktën prisja që para këngës time të ishte një këngë më cilësore dhe jo ajo që u shpall fituese e vendit të dytë. (I referohet këngës së Rosela Gjylbegut)

Pse vendose që ta këndonte Mariza atë këngë dhe jo vetëm ti?
Mariza është një këngëtare me diapazon dhe finesë. Nuk kam qenë kurrë i mendimit që duhet ti këndoj vetëm unë këngët që realizoj. Kam menduar të jem racional dhe marr përsipër të këndoj diçka për të cilën jam i sigurt që e interpretoj ashtu si duhet dhe ndonjëherë mund të jem në plan sekondar dhe kam kënaqësi që ndodhem në skenë me emra të afirmuar të skenës.

Mbi çfarë kriteresh bazohet përzgjedhja e bashkëpunëtorëve të tu?
Një kompozitor që ka në dorë këngën e tij duhet të ketë aftësinë e të nuhaturit se cili këngëtar mund ta këndonte më mirë atë këngë pasi ndodh shpesh diskordanca kur një këngë e mirë fle në zërin e një këngëtari jo të duhur ndaj duhet të dish ta zgjedhësh interpretuesin e asaj kënge.

Pritet të dalë në treg albumi juaj i fundit. Çfarë përbën risi në albumin tuaj të ri?
Në fakt dëshiroj të mbetet surprizë por me pak fjalë po ju them se ky album do të përmbajë 10 këngë. Do të jetë një album me balada, kjo do të jetë edhe risia e këtij albumi dhe mendoj se do të jenë këngë me një cilësi dhe veçanërisht tekstet do të godasin më tepër. Mund të sjell edhe një “bonus track” për të kujtuar me nostalgji vitet e rrymës së flokut alternativ. Shpresoj që albumi të hidhet në treg në muajin qershor.

Së fundmi po përfliteni në media për debatin që ndodhi mes jush dhe Sabjanit.
Po ishte një veprim shumë i ulët nga ana e një personi, emrin e të cilit nuk do të kisha dëshirë ta përmendja. Unë realizova një këngë që e kisha shumë përzemërt dhe krejt papritur shikoj një album në treg ku mes të tjerash gjej edhe këngën time për të cilën kam punuar shumë. Ajo këngë u vodh në një mënyrë shumë të pahijshme nga ai dhe kam mbetur tepër i befasuar pasi vetëm pas pak kohësh do të prezantoja edhe videoklipin e asaj kënge. Unë e kam ftuar në debat televiziv atë person i cili nguron të shfaqet sepse e di se nuk ka asgjë për të thënë. Më duket shumë e pështirë kur e shoh në ekran atë këngë.

Nuk firmose një kontratë për t`u bërë ballë veprimeve të tilla?
Ky ishte gabimi im më i madh dhe tani po filloj të frikësohem por duhet të ndodhë diçka për të mësuar ndaj dhe jeta do më përballë me shumë të papritura dhe është e vështirë t`i njohësh njerëzit.

Pse vendose ta bësh publike këtë histori ?
Sepse unë jam tip i hapur dhe mundohem t`i ndihmoj të tjerët dhe këtë nuk e bëj në mënyrë naive, por thjesht për të krijuar marrëdhënie të mira me këdo. Në këtë moment, jam i ndërgjegjshëm për ndihmën që jap. Unë kam shumë miq të cilëve u jap e u marr mirëbesim dhe nuk mendoj se kam nevojë të firmos kontrata. Unë nuk mund të toleroj një njeri që e kam ndihmuar jo vetëm profesionalisht por edhe në aspektet sociale dhe kur bën diçka të tillë nuk kisha mënyrë tjetër reagimi. Sikurse e di, unë isha gati për të hedhur në treg atë këngë dhe Sabjani u tregua shumë dinak duke e vjedhur dhe për më tepër duke hequr tërësisht autorësinë e këngës. Ishte shumë e rëndë për mua të shikoja punën time të katandisur në atë mënyrë. Më vjen keq me veten sepse duhet të isha treguar zemërgur e të mos toleroja një veprim të atillë.

E njëjta këngë do të prezantohet në ekranet televizive, tashmë e kënduar nga ti. Përse e more këtë vendim?
Ajo ishte kënga ime dhe siç dihet unë isha bërë gati për ta lançuar dhe nuk kam pse të mos e prezantoj, sepse në fund të fundit është kënga ime dhe atij duhet ti vijë turp e jo mua. Nuk do ta ndryshoj atë këngë sepse ashtu ishte dhe nuk më intereson fare të luftoj atë person. Më intereson që publiku të dëgjojë versionin e vërtetë dhe është publiku ai që zgjedh se cila është më e mira nga këto dy versione të një kënge.

Sipas mendimit tënd, pse ndodhin fenomenet e huazimit të muzikës ballkanike dhe jo kompozime të mirëfillta?
Është pjesë e shpejtësisë me të cilin krijohen, konsumohen dhe them se me kalimin e kohës do të zhduken praktika të tilla. Unë nga natyra jam krijues dhe jo adaptues ndaj nuk do ta praktikoja këtë stil. Sot, shumë artistë kanë gjetur mënyrën më të thjeshtë për të qenë në ekran, por jo atë të duhurën. Shpresoj që ky fenomen të zhduket sa më parë dhe ti krijojë mundësinë kompozitorëve të prodhojnë muzikë dhe jot a huazojnë atë.

Një mesazh për të gjithë ata që po lexojnë intervistën tënde?
U jam shumë mirënjohës të gjithë atyre që më kanë dëgjuar dhe vlerësuar. Faleminderit! Nga Kristi.

__________________
The heaven's sound is composed inside your heart, listen to its beat to syncronize your life onto the angel's steps.