Kanë kalur plot 55 vjet që nga koha kur Ibrahim Madhi “Artist i Popullit” mori në duar violinën, pa e ditur që ajo do të bëhej pjesa më e rëndësishme e jetës së tij, e cila do ta shoqëronte për gjatë këtyre 55 viteve duke e bërë Ibrahimin “sinonim” të saj. Personaliteti i Ibrahim Madhit si violinist përbën një nga nivelet më kualitative të interpretimit muzikor, e në rastin e tij të artit violinistik mbarëkombëtar. Që në fillimet e tij, ai nga pedagogët e kohës si: L.Naraci, S.Paparisto, Y.Skenderi e veçanërisht G.Bogdo që do ta kishte në perkujdesjen e tij profesionale për shume vite, do të vlerësohej si një violinist me të ardhme të madhe. Koha, vërtetoi katërcipërisht parashikimin e pedagogëve të nderuar për të cilët Ibrahimi shpreh shpesh vlerësimet më të larta. Kultura muzikore shqiptare është relativisht e re, krahasuar me kulturat Europiane, por mbas viteve ’60 të shek.XX-të, ajo merr zhvillime të mëdha duke arritur që në ditët e sotme, të zhvillohet e të ecë në rrjedhat e muzikës bashkëkohore. Tregues i rëndësishëm në zhvillimet muzikore të mbas viteve 60-të, është dhe formimi i shumë personaliteteve të kulturës tonë muzikore, që tashmë janë bërë simbol i arritjeve të kulturës muzikore mbarëkombëtare.

Arti i një jete
Një ndër personalitetet më të spikatura në artin e interpretimit, është padyshim, mjeshtri Ibrahim Madhi “Artist i Popullit”, që para pak ditësh, promovoi CD-në e parë me disa nga interpretimet më të spikatura solistike që i përkasin periudhës 1962-1988.
CD-ja e Ibrahim Madhit është pasqyrë e qartë jo vetëm e personalitetit të tij krijues, por ajo mund të themi se përcjell një ndër pjesët më kualitative të biografisë së tij artistike. Ajo përmban 12 vepra violistike, nga më përfaqësueset e artit violinistik botëror nga autorët Bach, Vivaldi, Shubert, Mendelson, Beethoven, Brahms, Ëieniaëski, si dhe vepra të shquara të kompozitorëve shqiptarë si Thoma Gaqi, Limoz Dizdari, Pjetër Gaci, Prenkë Jakova e Gjon Simoni. Mjeshtri Madhi në këto vepra shoqërohet nga orkestra simfonike e RTSH-së e drejtuar nga Mustafa Krantja, Ferdinad Deda e Eno Koço, nga orkestra e harqeve e ILA-së drejtuar nga vetë violinisti, si dhe nga pianisti austriak Valter Nauman.

Duke dëgjuar këtë CD, një dëgjues i specializuar konstaton njëherazi se ka të bëjë me një “virtuoz”, i cili shpalos “virtuozitetin” e tij në shumë plane emocionale, në shumë stile e epoka, duke i sjellë veprat muzikore me veçoritë e tyre stilistike plot jetë edhe në ditët e sotme. Një profesionalizëm më se i plotë, i cili paraqet standarte elitare të artit violinistik të Madhit ndër vite. Cilësia e “virtuozitetit” të “virtuozit” Ibrahim Madhi, konsiston në tingëllimin e njëtrajtshëm të instrumentit në të gjithë shtrirjen e tij, si dhe në të gjithë pozicionet. Gjithashtu në këtë CD konstaton se mjeshtri Ibrahim Madhi, realizon në lojën e tij të gjitha aplikaturat, nga më e thjeshta deri te më e komplikuara, ndihet rëndom përdorimi mjeshtëror i harkut, intesiteti me të cilin ai vepron mbi kordat e violinës, duke krijuar një tingëllim solid të instrumentit. Mënyrat e lojës në violinë ndihen të impostuara mëse cilësisht. Vibratua e tij është shumë dimensionale, në përshtatje me cilësitë emocionale të veprës muzikore. Ai di të përcjellë më së miri mesazhin e lëndës muzikore të veprës, duke bërë dallime të sakta të stileve, epokave, e gjuhës muzikore të autorëve.

Ibrahim Madhi di të administrojë mjaft mirë dukuritë e temperamentit të tij në lojën në violinë. Uniteti i ndërsjelltë që ka solisti Madhi me partnerët që e shoqërojnë (orkestër, dirigjent, koncertmaestër) është atribut i njohjes deri në detaj të përbërësve të veprës nga ana e tij. Kjo, një dukuri e rëndësishme jo vetëm e “Virtuozitetit” të tij, por dhe pasqyrë që rrezaton formimin e gjerë kulturor e professional të Ibrahim Madhit.

Në krijimtarinë kombëtare
Pjesë e rëndësishme e personalitetit krijues të Ibrahim Madhit është padyshim edhe vëmendja e përkushtimi që ai ka trashëguar ndër vite për krijimtarinë violinistike kombëtare, duke interpretuar një pjesë të madhe të saj. Shërbimi që i bën I.Madhi krijimtarisë muzikore shqiptare ka mundësuar rritjen me tej të vleres krijuese në keto vepra, duke arritur të evidentoj deri në detaj tingëllimën kombëtare. Në interpretimin e veprave kombëtare, spikat ekspresiviteti plot “nerv”, pathosi interpretativ, këndueshmëria pasionante, e që të gjitha këto vlera të Madhit, kanë mundur të përçojnë krijimtarinë kombëtare të dëgjuesit, duke e bërë atë pjesë të formimit të tyre.

Interpretimi në violinë i Ibrahim Madhit, për cilësinë e lartë të tij, ka mundur të rrezatojë jo vetëm në Shqipëri, por dhe në shumë skena muzikore të Europës e Azisë. Krahas bashkëpunimeve me orkestrën simfonike të RTSH-së dhe orkestrën e harqeve të ILA-së, ai ka pasur dhe bashkëpunime të ngushta për një periudhë të gjatë me instrumentistët e shquar. Margarita Kristidhi, Anita Tartari, Muharrem Denisi, Gëzim Laro etj, si dhe me orkestrën e Ansamblit Kombëtar të Këngëve dhe Valleve Popullore.
CD-ja violinistike e mjeshtrit Ibrahim Madhi është një pjesë e vogël e kontributit të tij të gjithanshëm muzikor krahasuar me interpretimet e rreth 100 veprave muzikore. Kontributet muzikore të Ibrahim Madhit janë pjesë e rëndësishme e zhvillimeve muzikore “elitare” mbarëkombëtare. Kontributi i tij ka rrezatuar në shumë breza artistësh duke u bërë simbol i cilësisë së lartë artistike.

Gjithashtu kontributi i Ibrahim Madhit, është shumë dimensional, përveç aktivitetit solistik gati 50 vjeçar, roli i tij ka qenë determinant në shumë kolektiva muzikore, e veçanërisht në ngritjen e drejtimin e Orkestrës së Harqeve të ILA-së, një ndër formacionet më kualitative në historinë e zhvillimeve muzikore mbarëkombëtare të mbas viteve ‘60 të shek.XX. Ai gjithashtu është një ndër pionierët e zhvillimit të arsimit muzikor shqiptar e vecanërisht të arsimit të lartë, duke formuar breza të tërë violinistësh, që tashmë koncertojnë në shumë vende të botës që nga Europa në USA, e që kanë shpalosur jo vetëm individualitetin e tyre artistik, por kanë mundur të bëjnë të njohur cilësinë e shkollës violinistike shqiptare, ku krahas të tjerëve spikat edhe puna pedagogjike e Prof. Madhit. Realizimi i CD-së me interpretime të Ibrahim Madhit, përvec pasqyrimit të vlerave të tij si solist, shërben edhe si pikë referimi për violinistët që janë në procesin e formimit të tyre muzikor.

Së fundi nuk mund të lemë pa përmendur realizuesit e kësaj CD-je, koordinatorin dhe konsulentin artistik, violinistin - pedagog të Akademise së Arteve - Lorenc Radovani; kompozitorin e mjeshtrin e masterizimit Edmond Zhulali si dhe grafistin elegant Ilir Kaso të cilët të mbështetur nga programi Zvicerian për kulturën “Pro - Helvetia” së bashku bënë të mundur realizimin e kësaj inicitive të admirueshme. Ky realizim merr vlerë të veçantë, mbasi ka mundur të hapë një rrugë të rëndësishme e cila do mundësojë që artin e vërtetë - “Artin Elitar”, ta bëjë pjesë të formimit të mbarë shqiptarëve kudo që janë. Realizimi i CD-së me interpretime ndër vite të Ibrahim Madhit mund ta konsiderojmë si shpalosje të “virtuozitetit” të një “virtuozi”.

Ka ardhur koha që figura të shquara të zhvillimeve muzikore shqiptare të jenë objekt i studimeve të thelluara e i hartimit të monografive për to, për tu bërë pjesë e historisë së shkruar të zhvillimeve muzikore mbarëkombëtare.

Udhëtim në karrierën e një violinisti
Lindi në Elbasan me 25 nëntor të vitit 1945. Kur ishte fëmijë, Ibrahim Madhi, mbase se dinte se jeta e tij do të ishte përfundimisht e lidhur ngushtë pas një instrumenti muzikor. Violina, do të ishte shoqëruesja e përjetshme e tij.

Pas disa viteve shkollim muzikor, kjo lidhje me instrumentin e violinës u forcua dhe më tej. Tashmë rruga drejt një kariere premtuese ishte e sigurt. Në vitin 1968 Ibrahim Madhi diplomohet në Konservatorin e Tiranës, për violinë. Zyrtarisht këtu nis rrugëtimi artistik i këtij instrumentisti, që shumë shpejt do të kthehej në një prej virtuozëve më të mëdhenj të violinës në Shqipëri. Ishte një lloj parashikimi që mësuesit e tij e kishin bërë që në vite te shkollimit të Madhit. Ishte thuajse e sigurt se rasti i Ibrahim Madhit kishte vetëm një të ardhme. Një virtuoz i lindur, që do të kultivonte më vonë shumëçka në të dhënat e tij prej muzikanti. Pas diplomimit nisi veprimtarinë artistike, e cila shënon qindra stacione të rëndësishme, dhjetra koncerte të sukseshme, e turne të paharrueshëm. Njihen dhjetra bashkëpunime të tij, si solist fillimisht pranë orkestrës së Radio-Tiranës, e më pas në Teatrin e Operas dhe Baletit dhe në Ansamblin Shtetëror të Këngëve dhe Valleve Popullore. Veprimtaria e tij e mëvonshme u lidh kryesisht me Institutin e Lartë të Arteve.

Në këtë institucion, prej vitesh Madhi ka dhënë kontributin e tij, ku krahas punës pedagogjike ushtroi funksione të ndryshme drejtuese si Shef i Katedrës së Harqeve, Drejtor i Institutit të Lartë të Arteve dhe Dekan i Fakultetit të Muzikës. Në veprimtarinë e tij solistike u dallua për temperamentin, disiplinën dhe mendimin e qartë, cilësi që i manifestoi edhe në Orkestrën e Harqeve të Institutit të Lartë të Arteve të krijuar dhe të drejtuar nga ai vetë. Aktiviteti i tij artistik përmban një numër të madh koncertesh solistike, turnesh kombëtare e ndërkombëtare duke nisur nga Franca, Italia, Gjermania, Austria, etj.), por edhe shumë regjistrime në Rario Televizionin Shqiptar.

Në cilësinë e solistit, por dhe në përbërje të formacioneve të muzikës së dhomës, violinisti Ibrahim Madhi ka ekzekutuar për të parën herë disa vepra të rëndësishme të repertorit koncertal dhe instrumental shqiptar. Në rradhët e këtyre veprave përmenden “Koncerti për Violinë, Violonçel dhe Orkestër” i kompozitorit Thoma Gaqi, “Trio Nr. 1 dhe 2 për violinë, violonçel e piano” të kompozitorit Limoz Dizdarit, e shumë vepra të tjera të këtij repertori. Tashmë 62 vjeç, ditët e violinistit virtuoz Ibrahim Madhi thujse rrjedhin njejtë. Janë orët ku ai vazhdon të ushtrohet në violinë, pjesa e kohës e zënë gjithmonë me angazhimet pedagogjike, ku Ibrahim Madhi prej vitesh jep një kontribut të çmuar, dhe pjesa tjetër që i takon koncerteve dhe evenimenteve ku ai nuk mungon kurrë.
Kthimi i vëmnedjes me CD-në ku janë përmbledhur perlat e interpretimit të Ibrahim Madhit është një moment tjetër shkëlqimi nga karriera e violinistit.

Ibrahim Madhi është vlerësuar disa herë me çmime të rëndësishme kombëtare. Më 1999 fitoi titullin Profesor si edhe mban titullin “Artist i Popullit”.

__________________
The heaven's sound is composed inside your heart, listen to its beat to syncronize your life onto the angel's steps.