Këngëtarja e njohur Hyrije Saraçi, tregon për karrierën e saj artistike. Këngëtarja e muzikës popullore qytetare, tregon për dashurinë e saj për këngën beratase. Sipas saj, “Këngët beratase janë të gjitha perla, mbi të gjitha ato i këndojnë dashurisë, së bukurës dhe nuk ke si të thuash ndryshe, veçse perla”.
-Si ka nisur karriera e Hyrije Saraçit?
Karriera ime ka nisur shumë herët, kam qenë vetëm shtatë vjeçe. Por në Estradën profesioniste kam qenë vetëm dhjetë vjeç.Në atë periudhëBerati kishte nevoj për një këngëtare të muzikës popullore, sepse këngëtarja shumë e njohur Vergjini Mile u largua nga Berati. Dhe kështu unë isha më e përshtatëshmja dhe më e pranueshmja për këngën popullore beratase. E kam kënduar gjithnji me pasion, i jam përkushtuar, dhe e kam kënduar gjithmonë origjinale, megjithëse me kalimin e viteve janë bërë disa ndërhyrje ato janë aq të vogla sa nuk vihen re.

-Ju keni qenë pjesë e Estradës së Beratit. Zhvilloheshin shpesh aktivitete?
Po, zhvilloheshin shumë shfaqje, dhe qyteti i Beratit shquhej për shfaqje shumë të bukura, në të gjithë rrethet e Shqipërisë.
-Albumi juaj ka vetëm këngë beratase apo edhe këngë të trevave të ndryshmë?
Pjesa më e madhe e këngëve janë beratase, pothuajse 90% e këngëve. Pak këngë në album janë tiranase. Unë duhej të bëja diçka nga Tirana, sepse jetoj këtu, megjithëse vazhdoj të kontribuoj për Beratin.

-Kur jeni larguar nga qyteti i Beratit?
Jam larguar në vitin 1971. Megjithëse jam larguar shumë herët, asnjëherë nuk jam shkëputur nga Berati. Kam qenë vazhdimisht në skenën e Beratit, kam marrë pjesë në festivalet që ka organizuar si në Gjirokastër ashtu edhe Festivalin e Këngës Popullore Qytetare në Elbasan.

-Ndërkohë që Hyrije Saraçin e shohim shumë rrallë në ekran?
Në skenë kam qenë vazhdimisht, por për sa i përketë ekranit, kjo është një fatkeqësi sepse më mungojnë albumet, dhe kjo gjithmonë pasojë e anës financiare. Megjithëse tani kam realizuar një album, ky album nuk ka një videoklip, sepse studioja ku unë punova albumin nuk u prononcua fare në albumin tim për të më bërë një videoklip. Dhe të them të drejtën nga kjo kam ngelur edhe e zhgënjyer. Sepse në treg unë mendoj se nuk është kënga, ajo që përfaqësohet denjësisht, muzika popullore qytetare, por thjesht janë disa rryma të cilat pëlqehen nga shumë pak individ. Kjo ndodh sepse albumet që ndodhen sot në tregun muzikor nuk sugjerohen nga specialistë apo kopetentë të cilët duhet të vendosin të dali apo jo një album. Muzika shqiptare është shndërruar në një tregëti, apo thjesht në një biznes i muzikës shqiptare.
-Mendoni se brezi i ri ju njeh si këngëtare? Nuk besoj, sepse si fillim mua më mungojnë videoklipet dhe mënyrën e të kënduarit origjinale që kemi ne brezi i ri nuk e pëlqen. Ai dëgjon dhe mjaftohet vetëm me një rrymë.

-Si është bërë përzgjedhja e këngëve të albumit tuaj?
Të them të drejtën ishte shumë e vështirë që të zgjidhje këngën beratase, sepse ato janë të gjitha perla, mbi të gjitha i këndohet dashurisë, të bukurës dhe nuk ke si të thuash ndryshe veçse perla.
-Është e vërtetë që shumë qytete të tjera si, Korça apo Elbasani ka marrë shumë këngë nga ato beratase dhe i quan të vetat?
Po, kjo është shumë e vërtetë. Elbasani është një nga qytetet që ka shumë këngë beratase, por nuk mendoja asnjëherë se edhe Shkodra do të këndonte këngë beratase. Kënga e parë e albumit tim është kënduar nga një shkodran dhe kjo më bëri përshtypje.

-Cilët janë bashkëpunëtorët tuaj për realizimin e këtij albumi?
Këngët janë të njohura, janë këngë popullore beratase. Ndërsa për albumin kam punuar me Ilirian Mihalin. Tre këngë i ka punuar Vladimir Kotani, ndërsa Fatbardh Dervishi më ka ndihmuar shumë që të marr këngë nga arkivi i Beratit. Do të më vinte mirë që ky album të paraqitej me një videoklip në mënyrë që edhe qyteti i Beratit të prezantohet në publik denjësisht.
-Do të realizoni së shpejti një videoklip?
Nuk e di, nuk mund të premtoj, por jam duke u përpjekur të gjej një sponsor nga Bashkia e Beratit apo nga ndonjë biznesmen atje. Premtime kam por nuk e di sa do të realizohen.

-Si ka ecur albumi juaj në treg?
Albumi im ka ecur shumë, jo vetëm në Berat por edhe në Fier, dhe në Lushnje. Nuk e vë në dyshim që edhe në Tiranë ky album është shitur mjaft.
-Kënga është një profesion apo pasion për Hyrije Saraçin?
Sigurisht që është edhe profesion por për mua primare është pasioni. Kënga është pasioni im më i madh, unë jetoj me këngën.
-Cila është e veçanta juaj në interpretim, ndryshe nga këngëtarët e tjerë?
Unë jam vetvetja. Jam shquar për një zë karakteristik. Përpiqem që të komunikoj shumë me publikun dhe mendoj se ia kam arritur këtij qëllimi. Kjo më bënë të veçantë.
-Mendoni se jeni në shijet e tregut aktual?
Unë mendoj se jam në shijet e tregut por jam e paprezantuar. Mendoj se atij që ka blerë albumin i ka ardhur keq që nuk kam një videoklip. Edhe pse publiku sot ka një ndjesi të dobët për këngën pupollore, dhe një rrymë që nuk përshtatet aspak me këngën popullore shqiptare.

-Jeni angazhuar këtë periudhë në koncerte?
Unë nuk jam shkëputur asnjëherë nga Berati, dhe jo më larg se Ditët e Verës ne ishim në Festivalin e Këngës Popullore Qytetare në Elbasan, ku u vlerësuam edhe me çmimin e dytë. Më parë kemi marrë pjesë në festivale të tjera, koncerte, konkurime, shfaqje dhe aktivitete të ndryshme të cilat janë bërë me grupin popullor karakteristik të Beratit, i cili u drejtua nga Pavllo Shkarpa. Më vjen mirë që ai i dha dritë qytetit të Beratit dhe i dha shpresë që ky qytet të jetë ai që ka qenë dikur. Megjithatë ishte fare e shkurtër jeta e këtij grupi, i cili u shkatërua me mospjesëmarrjen e Bashkisë së Beratit.
-Mendoni se këngëtarët e rinj janë më të fituar se ju?
Nga ana profesionale, jo. Ndërsa nga ana financiare e them me bindje të plotë që janë shumë më të fituar se ne.

-Mendoni se është më mirë të jesh më shumë i fituar nga ana profesionale apo financiare?
Natyrisht që nga ana profesionale, sepse do të vij një ditë që këngëtarët profesionist do të vlerësohen shumë. Fakti është që këngëtarët e rinj janë thjesht një vrull flake e cila shuhet shpejt.
-Cili është niveli i këngës popullore në Shqipëri dhe si mendoni se mund të ndalet ky konfuzion?
Nëse këtu nuk vendoset një komision i posaçëm që të bëj vlerësimin e albumeve përpara se të publikohen, nuk ka për të ndryshuar asgjë.

__________________
The heaven's sound is composed inside your heart, listen to its beat to syncronize your life onto the angel's steps.

Jam kurioz te di, se sa nga ju (apo me mire prinderit tuaj/tane) e mbajne mend Hyrije Saracin?

Dikur, ne emisionin sipas kerkesave tuaja, ka qene goxha e kerkuar dhe ne pergjithesi nga ushtare qe pershendesnin familjet, te fejuarat etj...