“E shkuara nuk kthehet. Mbetet që ne të përmirësojmë të tashmen aq sa mundemi duke mësuar nga e kaluara".

Një periudhë disavjeçare në harresë dhe një rikthim i bujshëm në këngën e Shqipërisë së Mesme e gjen këngëtaren Valbona Halili në kulmin e suksesit të saj profesional, ku nuk mbetet pas lumturia e jetës private. Në këngën promovuese të albumit të tretë, hedhur në treg verën e kaluar, Valbona e veshur me fustanin e nusërisë shfaqet pranë “princit të kaltër” duke realizuar amanetin e gjyshes, nuse me pajton. Kjo fabul e një prej këngëve popullore më të mirëpritura në publik, duket se do të bëhet realitet për këngëtaren që ka vendosur të kurorëzojë me martesë lidhjen e saj nëntë vjeçare. Albumi i fundit ishte një ogur i mbarë drejt një fillimi të ri, një ëndërr në sirtarin e çdo vajze, tashmë të rritur dhe më objektiva të qarta. Kujtimet e së kaluarës i mbeten në mendje, suksesi i së tashmes e ledhaton çdo moment dhe e ardhmja i zgjat dorën drejt një jete të re. Nuk ishte e lehtë ta njihje këngëtaren teksa afrohet pranë tavolinës së një prej bareve të Tiranës. Një kostum sportiv, kapele të po këtij lloji dhe atletet blu, jo rastësisht ishin veshja e së dielës pasdite për Valbonën, e apasionuar pas palestrës dhe aktiviteteve sportive. Çiltërsia dhe batutat e humorit bëjnë që koha të kaloi pa u ndjerë. Ata që e njohin nga afër Valbonën, e dinë mirë se pas “nuses me pajton” fshihet një vajzë e këndshme dhe komunikuese

I keni munguar publikut për një kohë të gjatë.
Mendoj se kisha nevojë për t`i përkushtuar pak më tepër kohë familjes time. Humbja e motrës në një moshë fare të re ishte shumë e dhimbshme dhe më është dashur një kohë e gjatë ta marr veten pas kësaj fatkeqësie. Unë vazhdova të jem pranë publikut, por vetëm në koncerte jashtë vendit. Më tej, prita momentin e përshtatshëm për të qenë pranë publikut me një album të ri. Tashmë i gjithë aktiviteti im është i përqendruar këtu në Shqipëri, pa përjashtuar koncertet jashtë vendit. Unë nuk përshtatem me idenë e publikimeve të njëpasnjëshme. Një punë e mirë,duhet të jetë e ngadaltë dhe e sigurt. Në këtë aspekt them se ja kam arritur qëllimit. Albumi është pritur shumë mirë dhe kam marrë vlerësime të shumta.

Bashkëpunuat me kompozitorin Edi Balili. Mos është kjo arsyeja e suksesit që arriti ky album?
Unë e kam shprehur edhe më parë që një pjesë e mirë e këtij suksesi i dedikohet kompozitorit të talentuar Edi Balili, me të cilin kam edhe lidhje familjare. Bashkëpunimi me Edin lindi krejt natyrshëm edhe pse unë kisha kontakte të vazhdueshme me të. Them se ky bashkëpunim do të vazhdojë edhe më tej.

Ju preferoni tingujt e muzikës së Shqipërisë së mesme, por origjina juaj është Vlora. C`bëhet me këngën labe?
Pasioni dhe dëshira ime e madhe është muzika e Shqipërisë së mesme edhe pse nuk e mohoj që këngët labe janë të mrekullueshme dhe unë i këndoj me shumë dashuri. Në fund të fundit, gjithkush ndjek një linjë dhe unë kam preferencën time në këtë drejtim. Ndihem më e plotësuar në folkun e Shqipërisë së mesme.

Fabula e këngës “Hall me burrë, hall pa burrë” u përshtatet mjaft mirë realitetit shqiptar. Për Valbonën, më mirë me burrë apo pa burrë?
Sikurse dhe ti e di, unë kam vendosur që lidhjen time 9-vjeçare ta kurorëzoj me martesë që do të thotë, më mirë me burrë. (qesh)

Në njërën prej këngëve të tua i kërkon dhëndrrit të të marrë me pajton. Do ta kesh në derë pajtonin ditën e dasmës?
(Qesh) Është një ide interesante dhe pse jo, mund të ndodhë edhe kështu por unë e provova atë ndjesi gjatë xhirimeve të klipit dhe njerëzit menduan se unë po martohesha në të vërtetë. Ndoshta do të ishte më mirë të provoja diçka të re. Le të shohim.

A ke frikë se ky hap i madh mund të të kufizojë jetën tënde artistike?
Jo, përkundrazi. Partneri im është një pjesë e rëndësishme e karrierës time pasi edhe ai i përket të njëjtës fushë; nuk këndon, por është instrumentist dhe kjo na ndihmon të dy që të jemi edhe më të lidhur dhe e kuptojmë mjaft mirë punën e njeri-tjetrit.

Në Shqipëri, dita ditës shfaqen këngëtarë të rinj të muzikës popullore. Sa ju shqetëson ky fakt?
Në një treg të lirë, secili ka të drejtën e tij të provojë. Personalisht mendoj se një pjesë e mirë e kësaj prurje në muzikën shqiptare do të zhduket me kalimin e kohës. Do të vijë një moment, kur në treg do të mbeten vetëm emra të afirmuar dhe profesionistë. Publiku është ai që do ta bëjë këtë seleksion, ndaj nuk më tremb aspak kjo mbingarkesë e tregut muzikor.

Nëse kthehemi prapa në kohë, çfarë do të doje të ndryshoje?
E shkuara nuk kthehet. Mbetet që ne të përmirësojmë të tashmen aq sa mundemi duke mësuar nga e kaluara. Them se ka gjithmonë vend për të korrigjuar, në dobi të së ardhmes.

Prej vitesh nuk këndon për shqiptarët e Anglisë. Kur mendon se mund të ndodhë kjo?
Po, kam qenë në Londër vetëm një herë të vetme dhe kam mbetur e befasuar nga pritja e shqiptarëve atje. Ishte një publik që dhuronte duartrokitje dhe ngrohtësi gjatë gjithë koncertit. Me shumë kënaqësi do të isha sërish pranë tyre, momentin e parë që do të më ftonin. U uroj të gjithë shqiptarëve një jetë sa më të lumtur dhe i falënderoj për gjithë mbështetjen e tyre. Ju përshëndes nga Tirana. Valbona Halili.

__________________
The heaven's sound is composed inside your heart, listen to its beat to syncronize your life onto the angel's steps.