Këngëtarja e njohur korçare Ermira Kola tregon për fillimet e karrierës së saj artistike. Megjithëse ka kaluar një periudhë nëntë vjeçare nga albumi i saj të fundit, Ermira Kola kujtohet ende në publik si këngëtaja e serenatave korçare. Në albumin e saj më të ri, Ermira Kola sjell muzikën labe të përpunuar shumë bukur nga kompozitori i njohur Adi Hila. Ermira Kola tregon gjithashtu edhe projektet e saj për të ardhmen.

-Si ka nisur karriera e Ermira Kolës?
Unë kam filluar të këndoj që në moshë fare të vogël, vetëm pesë vjeç. Kam mbaruar një shkollë muzike, kam hyrë për piano në klasën e parë. Më pas fillova të këndoja, kanë qenë festivalet ato ku unë kam kënduar gjithmonë me pionerët në fëmijërinë time. Çmimet dhe duartrokitjet e publikut kanë qenë ato që mua më kanë inkurajuar të vazhdoj më tej. Një nxitje më shumë ka qenë edhe dëshira e familjes sime për t’u bërë një këngëtare me emër.
-Ju keni studiuar për muzikë...
Po, kam studiuar në Liceun Artistik për kanto dhe më pas vazhdova për Ckël të Ulët, sepse nuk fitova dot shkollën e lartë për kanto. Kështu që studimet e mia morën tjetër drejtim.
-Ju kanë ndihmuar studimet në shkollën fillore për piano dhe Liceu Artistik në formimin tuaj si këngëtare?
Po. Kam njohuri nga fusha e muzikës dhe nuk jam thjesht një këngëtare pa njohuri artistike, vetëm me vesh. Unë kam studiuar për muzikë dhe e kam mbaruar Liceun Artistik me nota shumë të mira.

-Cila mendoni se ishte arsyeja që nuk fituat shkollën për kanto?
Në fakt kishte shumë konkurrues atë vit. Fati nuk më ndihmoj. Fakti që unë nuk mora guximin vitin tjetër të konkurroja përsëri është gabimi im sepse unë shikoja që kishte edhe mosha më të mëdha se unë që vazhdonin të studionin.
-Është një peng kjo për ju?
Patjetër që është një peng sepse nëse do të kisha studiuar në Akademinë e Arteve, ndoshta do të ishte gjithçka ndryshe dhe nuk do të isha këtu sot, ndoshta do të ishte shumë herë më mirë.

-Karriera juaj ka nisur me serenata korçare apo me këngë popullore?
Me serenata korçare dhe këngë të muzikës së lehtë e kam nisur karrierën time. Dhe në këto gjini jam vlerësuar me çmime. Më pas kam marrë pjesë edhe në festivalin e muzikës popullore, kam kënduar.
-Korça organizon çdo vit një festival të serenatave korçare. Sa është pjesëmarrëse Ermira Kola në këtë festival?
Po. Kam qenë çdo vit pjesëmarrëse në këtë festival. Vetëm këtë vit unë nuk kam marrë pjesë në të sepse nuk kisha mundësinë që të shkoja në Korçë. Nuk ma lejonin angazhimet që kam që të largohesha nga këtu.

-Do t’i këndonit serenatat nëse nuk do të kishit lindur në Korçë?
Natyrisht që do t’i këndoja. Sepse serenata është një muzikë shumë melodioze dhe e njeh e gjithë Shqipëria. Kudo që kemi kënduar serenata korçare njerëzit i pëshpërisnin ato, i dijnë shumë mirë këngët korçare.
-Ju i keni kushtuar një këngë qytetit tuaj të Korçës. Cilët kanë qenë bashkëpunëtorët tuaj në këtë këngë?
Kjo është një këngë e kompozitorit Mond Akajno dhe tekst të Alqi Boshnjaku. janë bërë disa xhirime, një videoklip, një nga videoklipet e para që realizonte TvKlan. Mendoj se ishin shumë të bukura. Kur jam kthyer në Tiranë njerëzit më njihnin si vajza që këndonte këngët e Korçës. Kënga e Korrcës ngeli si himn në atë periudhë. Më pas këtë këngë e ka kënduar edhe Kastriot Tusha.

-Ermira Kola vjen pas nëntë vjetësh në tregun muzikore një album. Çfarë të reja sjell ky album?
Për fat të keq muzika është në një situatë të vështirë në Shqipëri. Duhet të këndosh atë që kap publiku më shpejt dhe të shesësh albumin. Edhe unë disi u përshtata, përderisa jetojmë në Shqipëri. Në këtë album unë kam sjellë disa këngë popullore vlonjate të përpunuara shumë bukur nga kompozitori i njohur Adrian Hila. Disa materiale janë këngë të reja të kompozitorit Adrian Hila dhe me tekst të Gjergj Jorgaqit.
-Mendoni se duke iu përshtatur tregut keni dalë nga natyra juaj e të kënduarit?
Po, mendoj se po. Jam krejt ndryshe nga albumi i parë, i cili ishte vetëm me serenata korçare. Ishin këngë të reja të kompozitorit Mond Akajno, por ishin këngë posaçërisht të kompozuara për mua, i kam kënduar unë për herë të parë. Këngët e albumit tim të ri janë totalisht tjetër gjë. Janë këngë vlonjate të cilat unë nuk i kam kënduar ndonjëherë. Megjithatë mendoj se jam përshtatur. Jam përpjekur të jap maksimumin tim.

-Nëse do të krahasohej albumi tuaj para nëntë viteve me albumin tuaj të ri, cili është i realizuar më mirë nga ana profesionale, dhe ndoshta edhe për shijet e publikut?
Për shijet e publikut, mendoj se albumi i parë ishte për Jugun dhe për njerëzit në emigracion, të cilët kanë mall për Korçën, ndërsa këtu kam prekur nga pak tek të gjitha. Mendoj se ky album shitet në të gjithë Shqipërinë dhe jo vetëm në Korçë. Nga ana profesionale nuk diskutohet që albumi i ri është shumë herë më mirë sepse gjërat evoluojnë, si në zërin tim që piqet ashtu edhe në metodat e incizimit dhe të orkestrimit janë krejt ndryshe nga ato para nëntë viteve.

-Një nga këngët hite të këtij albumi është kënga “Hajde moj cim cim ca”. Kjo këngë është realizuar edhevideoklip...
Po. Kjo këngë jo se është më e bukura por menduam që të bënim videoklip diçka të veçantë për të tërhequr publikun. Është e vërtetë, është një këngë e bukur, por ka edhe këngë më të bukura, që ndoshta me kalimin e kohësh mund të bëj edhe një videoklip tjetër, sepse nuk është shumë i kushtueshëm. Shpresoj që të arrij të bëj edhe një këngë tjetër videoklip.
-E ndjen Ermira Kola konkurencën e këngëtarëve të tjerë të muzikës Shqiptare?
E çfarë konkurrence mund të ndjejë unë? Unë përpiqem të jap maksimumin tim dhe gjtihçka ka të bëj me shijet. Publiku është ai që tregon se kush i pëlqen dhe kush jo. Ata i shprehin hapur shijet e tyre.

-Ermira Kola ka bashkëpunuar me shtëpinë diskografike Eurostar. Mendoni se është më prestigjioze dhe më e fuqishme nga të gjitha që ekzistojnë në Tiraën?
Ndoshta është edhe një nga shtëpitë diskografike më të fuqishme, por e zgjodha këtë sepse edhe albumi im i parë është realizuar në Eurostar. Ata u treguan të gatshëm që albumi im të realizohej aty dhe ramë dakord për çdo gjë që përmban kontrata e punës.
-Përveç këngëve shqiptare dhe serenatave korçare Ermira Kola këndon mjaft bukur edhe këngët greke. Mendoni të realizoni edhe një album me këngë korçare?
Jo. Nuk mendoj. Nuk e kam menduar ndonjëherë. Është më mirë kur i këndojnë grekët ato këngë. Megjithëse më pëlqejnë nuk kam menduar ndonjëherë që të realizoj një album të tillë.

-Ermira Kola ka marrë pjesë në Festivalin e Këngës në RTSH në bashkëpunim me këngëtarin e madh Kozma Dushin. Ishte një eksperiencë e re për ju kjo dhe mendoni të merrni pjesë në jubilenë në edicionin e 45-të të këtij festivali?
Po, ishte një bashkëpunim i bukur. Ishte ideja e Kozma Dushit, i cili më bëri ftesën për të kënduar bashkë. Natyrisht që nuk e refuzova sepse është një këngëtar shumë i mirë. Kënga u prit mjaft mirë megjithëse nuk u futëm në natën e tretë finale. Dihet që është një fatkeqësi që shumë këngëtarë të mirë, madje më të mirë nga ata që fitojnë, dalin të zhgënjyer nga festivalet. Nuk mendoj se do të marr pjesë sot në festivale, nuk më pëlqejnë. Më duket humbje kohe sepse është më mirë që të realizosh një videoklip të mire apo që publiku dhe admiruesit të vijnë dhe të të ndjekin atje ku këndon ti. Jam pesimiste lidhur me këtë. Pastaj edhe puna që unë kam më lodh mjaft, sepse punoj në një lokal me muzikë “live”.

__________________
The heaven's sound is composed inside your heart, listen to its beat to syncronize your life onto the angel's steps.