Kompozitori i njohur Edmond Zhulali tregon për detyrën e re si drejtor artistik i Festivalit të 45 të RadioTelevizionit. Kompozitori tregon për surprizat që do të sjelli dhe ndryshimet që do të bëj ai në organizimin e këtij festivali. “Tashmë do të kemi një festival me kritere dhe karakteristika europiane” shprehet ai.

-Edmond Zhulali është kompozitori i këngës së Anjeza Shahinit me të cilën konkurroi në Festivalin Europian...
Po është e vërtetë. Kjo këngë mua personalisht më ngjall shumë emocion.Përveç se ishte kënga e parë që përfaqësonte Shqipërinë në Festivalin Europian, edhe vlerësimi që morëm në këtë eveniment na jep kujtime të jashtëzakonshme.
-Ju keni qenë gjithmonë i pranishëm në Festivalin e Këngës me kompozime, ndërsa këtë vit ju do të sillni në këtë festival një surprizë tjetër. Ju jeni emëruar drejtori artistik i këtij Festivalit të 45-të të Këngës. Si e pritët këtë emërim dhe për ju është hera e parë që posedoni këtë post?

Para disa ditësh më është ofruar detyra e drejtorit artistik të festivalit. Është një detyrë shumë e rëndësishme dhe një pikë kyçe e Festivalit të Dhjetorit dhe kjo ftesë m’u bë nga drejtuesit e këtij institucioni, Artur Zheji dhe zotit Jariza të cilët i falënderoi për këtë ftesë dhe për këtë vlerësim. Ky festival këtë vit ka edicionin e tij të 45-të, është një jetë e tërë artistike, një jetë e tërë këngëtarësh dhe kompozitorësh e cila këtë edicion duhet të realizohet në mënyrë shumë profesionale dhe vlerësuese për të gjitha brezat që kanë kontribuar, dhe kjo është shumë e rëndësishme si në realizimin e Festivalit ashtu edhe për këtë vit i cili është jubile i 45 festivaleve. Mendoj se është një detyrë shumë e vështirë por unë vetë kam qenë pjesëmarrës në festivale, konkurrues, orkestrues, fitues, në shumë pozicione dhe duke njohur shumë mirë dhe duke pasur emocione të vazhdueshme nga festivali mendoj se do ta realizoj me sukses së bashku me stafin i cili do të jetë me emra shumë të njohur të artit shqiptar dhe njerëz të rinj me dëshira dhe me pikëpamje të ndryshme.

-Cilat janë kriteret e pranimit të këngëve për këtë festival, sepse në 28 tetor është afati i fundit i pranimit për këngët?
Po. Afati i fundit i pranimit të këngëve është data 28 tetor dhe deri në këtë datë këngëtarët dhe kompozitorët kanë të drejtë të sjellin këngët e tyre. Festivali i RTSH-së është i vetmi festival që ruan ende dimensionet e këngës kombëtare dhe të profesionalizmit e artit të vërtetë.
-Mendoni se skenës së festivalit do t’i kthehen emra të njohur të muzikës shqiptare që i kanë munguar më parë?
Deri tani është një klimë shumë e mirë dhe kam kontaktuar dhe u kemi bërë ftesë të gjithë artistëve që janë pjesë e këngës shqiptare dhe presim nga pjesa më e madhe e tyre që të marrin pjesë në këtë festival. Unë shpresoj dhe mendoj se do të ketë një përfaqësi të të gjitha brezave në këtë edicion të 45-të, brezi i ri që po shfaq talent të vërtetë në këtë fushe dhe brezi i këngëtarëve që po vazhdojnë të mbajnë gjallë ende muzikën shqiptare, këngëtarët me një karrierë të gjatë. Do të jetë një përfaqësi e të gjithë brezave.

-Sa prioritet do t’i jepni këngëtarëve të rinj në këtë eveniment?
Patjetër që do të kenë prioritet sepse këngëtarët e rinj do të jenë e ardhmja e muzikës shqiptare, por unë mendoj se këngëtarët e rinj duhet të paraqiten me një stad tjetër dhe një krijimtari që i përshtatet nivelit të festivalit.

Ata duhet të jenë të vetëdijshëm se që të marrësh pjesë në këtë festival duhet të jesh shumë i aftë nga ana profesionale. Kjo do të sillte që pjesëmarrja e tyre në këtë festival të jetë një eveniment dhe një ngjarje shumë e madhe në jetën e tyre artistike dhe jo thjesht një kalim i rastit apo i çastit.

-Çfarë ndryshimesh do të sjelli Edmond Zhulali në edicionin e 45-të të Festivalit të RTSH-së? Unë mendoj se pjesa kryesore e festivalit është krijimtaria. Krijimtaria dhe interpretuesit bëjnë që festivali të jetë i pranueshëm apo i papranueshëm nga publiku. Vëmendja kryesore do të jetë afrimi it ë gjithë këngëtarëve profesionist si nga Shqipëria, Kosova dhe Maqedonia dhe nga gjithë diaspora shqiptare. Ky është një festival mbarëkombëtar ku do të jenë të ftuar të gjithë artistët më të mirë të muzikës shqiptare. Ndryshimet që do të pësoj festivali do të jenë në infrastrukturë, në realizimin e tij dhe në disa pjesë të reja të cilat unë i kam menduar dhe i kam propozuar të cilat mendoj se do të miratohen që të zbatohen gjatë festivalit. Një nga këto unë kam menduar që festivali këtë vit të zhvillohet i gjithë “live” në të gjitha aspektet. Në këtë festival interpretuesit do të këndojnë “live”.

Në edicionet e tjera ka kënduar vetëm solisti, por unë kam shumë arsye që më bën ta kërkoj këtë gjë, dhe një ndër këto është që duhet të aplikojmë të njëjtat kërkesa që ka edhe Festivali Europian, meqenëse kënga fituese konkurron edhe në këtë eveniment. Disa nga kriteret që do të vendosen këtë vit në festival është performancë skenike e cila do të jetë prej gjashtë personash, interpretuesi, balerinët, instrumentistët etj. Gjithashtu edhe interpretimi vokal do të jetë i tëri “live”. Një nga kushtet më të rëndësishme të këtij festivali e cila do të ketë vëmendjen time absolute është edhe ana teknike të cilën unë do ta shoh hollësisht. Meqenëse këtë vit është 45-vjetori i festivalit unë kam menduar që përpara festivalit të organizohet një natë “Gala”, në një nga skenat më të mira të Tiranës, ndoshta në Akademinë e Arteve.

Në këtë natë “Gala” do të bëhen vlerësime për të gjithë artistët e të 45-viteve të festivalit. Në këtë natë e cila do të jetë e mrekullueshme do të shohim breza të tërë artistësh të cilët do të na vijnë me kujtimet e tyre nëpërmjet bisedave, të ftuarve dhe vlerësimet që do t’u bëj RadioTelevizioni këtyre artistëve të cilët i ka rritur dhe i ka bërë njerëz të mëdhenj.

-Mendoni se këtë edicion të Festivalit të 45 të Këngës pjesëmarrja e publikut do të jetë më e madhe sepse ky ka qenë një faktor shqetësues për festivalin?
Po, kjo është shumë e vërtetë. Por këtë vit ne kemi menduar që të bëjmë një fushatë sensibilizuese lidhur me këtë fakt. Duke u bërë një sensibilizim i tillë në të treja netët e festivalit mendoj se edhe publiku do të jetë shumë i interesuar megjithëse unë asnjëherë nuk kam menduar se publiku shqiptar nuk ka pasur interes për festivalin. Unë mendoj se ne do të edhe një postfestival i cili do të jetë i mbushur me artistë, kritikë të artit, me këngëtar dhe do të ketë diskutime të cilat do t’i vlejnë festivalit tjetër dhe natyrisht këngës shqiptare.

-Përveç pjesëmarrjes së artistëve nga Shqipëria në këtë festival do të marrin pjesë edhe këngëtarë nga Maqedonia, Mali i Zi dhe Diaspora… Unë kam hyrë në kontakt me shumë artistë nga Kosova, Maqedonia dhe u kam bërë ftesa për të marrë pjesë në këtë festival. Është zgjedhja e tyre për të marrë pjesë ose jo por gjithsesi ftesën e kanë pasur, madje këtë vit si asnjëherë tjetër.

-Përveç këngëtarëve të cilët do të konkurrojnë në këtë festival do të ketë të ftuar këngëtarë të cilët do të jenë pjesë e show-t artistik?
Natyrisht që do të ketë. Festivali nuk do të shihet vetëm si një garë por edhe si një eveniment artistik i cili do të jetë në funksion të këtyre këngëve. Do të përpiqemi që të jenë emra të njohur të cilët kanë dashurinë e publikut por edhe të një niveli shumë të lartë. Natyrisht që kjo varet edhe nga mundësitë ekonomike.

-Një pikë tjetër e fortë e festivalit është edhe juria...
Po. Juria është pika më thelbësore e festivalit sepse një vendim sado pak i gabuar i jurisë mund të prishë një festival të shkëlqyer. Kjo është arsyeja që ne kemi menduar që juria këtë vit të përzgjidhet nga njerëz shumë profesionist dhe njerëz me një ndërgjegje artistike. Në këtë edicion juria do të bëj një vlerësim të hapur. Çdo anëtar jurie do të japi vlerësimin e tij hapur.

Kjo më zhvesh mua nga çdo lloj përgjegjësie, për vlerësimin e bërë do të përgjigjet çdo anëtar i jurisë. Për të qenë sa më të hapur dhe sa më korrekt unë kam vendosur që në këtë edicion të mos marrë pjesë as me këngë e as me orkestrime. Kjo anashkalon keqinterpretimet dhe keqkuptimet mbi personin tim.

__________________
The heaven's sound is composed inside your heart, listen to its beat to syncronize your life onto the angel's steps.