Astrit Seriani, këngëtari nga qyteti i Durrësit tregon për karrierën e tij në muzikë. Megjithëse këngëtari nga Durrësi këndon muzikën e lehtë, por edhe atë popullore, ai shprehet se, “Jam shumë i zhgënjyer nga kënga dhe ky zhgënjim më ka bërë shumë pesimist. Por kur të krijohen mundësi të tjera atëherë mendoj dhe besoj se do të dal nga kjo situatë. Megjithëse jam i zhgënjyer nga muzika do të vazhdoj të ndjek këtë rrugë deri sa të më jepet mundësia”.
-Astrit Seriani vjen me këngën “Kthehu ti”..
Kënga kthehu ti është një këngë e orkestruar nga Edmond Zhulali dhe në interpretimin e kësaj kënge jam i shoqëruar nga këngëtarja e njohur Eneda Tarifa. Kjo këngë është bërë posaçërisht për festivalin “Kënga Magjike” por ajo nuk u pranua në këtë festival.

-Sipas mendimit tuaj cila është arsyeja që kjo këngë nuk është pranuar në këtë festival?
Barrierat që janë në këtë këngë sipas organizatorëve të festivalit “Kënga Magjike” do të ishte pengesë. Përveç kësaj nuk mora përgjigje tjetër.
-Edhe pse kjo këngë nuk është kualifikuar në këtë festival është pjesë e albumit tuaj dhe është vlerësuar nga publiku si një këngë e bukur…
Po, kjo është një këngë e cila ka brenda cilësitë e veçanta të saj, si në orkestracion, në tekst, ashtu edhe në interpretim. Kështu që besoj se janë këto tre arsyet që e bëjnë të pëlqyeshme këtë këngë.

-Si ka nisur karriera juaj në muzikë?
Qysh në fëmijëri kam pasur dëshirë të këndoja por mungesa e iniciativës apo problemet e fillimit që ekzistojnë në Shqipëri ka bërë që unë të këndoja vetëm pas viteve ’90.
-Ky është albumi juaj i parë?
Po. Ky është albumi im i parë me titull “Kishe frikë nga vetja”.
-Përveç këngëve të muzikës së lehtë ju keni edhe këngë popullore në albumin tuaj…
Po. Kënga popullore është pjesë e albumit tim të cilat sot tregu muzikor i kërkon. Në albumin tim janë vetëm këngë shqiptare dhe jo të huazuara nga të huaj.

-Ju keni konkurruar në një festival me këngën “Kishe frikë nga vetja”, nga e cila ka marrë emrin dhe albumi juaj…
Me këtë këngë unë kam konkurruar në festivalin “Mikrofoni i artë” por edhe kjo këngë nuk është pranuar.
-Mendoni se këngët kanë vlera edhe pse nuk marrin pjesë në kompeticione?
Sigurisht që kanë. Çdo këngë ka cilësitë e veta të mira dhe nëse nuk i hapet një derë i hapet një tjetër.
-Astrit Seriani është nga qyteti i Durrësit. Sa jetë artistike dhe sa aktivitete zhvillohet në Durrës?
Durrësi është qyteti im i dashur. Ky qytet është vendi i artistëve sepse nga ky qytet kanë dalë artistë të njohur. Mund të përmendim pa fund emra të cilët kanë dalë nga ky qytet si, Zija Saraçi, Jolanda Llamo, Miga Hysi, Petrit Dobjani edhe shumë artistë të tjerë që i kanë falur një jetë të pasur artistike qytetit të Durrësit.

-Astrit Seriani është një këngëtar i njohur në qytetin e Durrësit sepse është gjithmonë aktiv në aktivitete artistike. Por nuk jeni po kaq i njohur në Tiranë…
Kjo ka të bëj me atë mentalitet që është krijuar në publik për këngëtarët e rretheve të cilët janë disi larg nga këngëtarët në Tiranë. Madje edhe në koncertet që bëhen në rrethe janë të ftuar këngëtarë kryeqytetas.
-Është aktive dhe në funksion Qendra Kulturore dhe Estrada në Durrës?
Qendra Kulturore dhe Estrada ekzistojnë si institucione por nuk kanë të njëjtin aktivitet si dikur. Aktivitetet zhvillohen më rrallë, por edhe artistët janë larguar nga qyteti i Durrësit. Jeta artistike në Durrës është më e varfër dhe e dobët, ky është realiteti.

-Ju keni realizuar një album nga ana profesionale me të gjithë komponentët e rinj. Çfarë mendimi keni për pseudokëngëtarët të cilët nxjerrin albume me këngë të përpunuara?
Tregu muzikor në Shqipëri është “bërë pis” në kuptimin e figurshëm sepse Shqipëria ka folklor të pasur në të gjitha trevat. Shumë këngëtarë marrin këngë të huaja të cilat kanë sukses në vendin e tyre dhe i përpunojnë. Ndërkohë që folklori shqiptar i të gjitha trevave është mjaft i pasur dhe këngëtarët fare mirë mund të përpunojnë këngët shqipe duke i sjellë më në kohë dhe njëkohësisht duke ruajtur traditën.
-Edmond Zhulali është një nga bashkëpunëtorët tuaj më të afërt në këtë album…
Edmond Zhulali është një arkitekt i vërtetë i muzikës. Unë kam pasur nderin që të punoj me një profesionist të tillë. Ai është një njeri shumë i mirë dhe një muzikant me reflekse të jashtëzakonshme.
-Astrit Seriani është edhe një këngëtar i mirë i këngës popullore…
Unë i kam për zemër të dyja gjinitë, si atë të muzikës së lehtë ashtu edhe atë popullore. Më pëlqen t’i këndoj të dyja.

-Ku ndiheni më mirë gjatë interpretimit të muzikës së lehtë apo asaj popullore?
Të them të vërtetën shpirti im është me muzikën e lehtë.
-Në koncerte si është prezantuar Astrit Seriani si këngëtar i muzikës së lehtë apo i muzikës popullore?
Në koncerte unë i kam alternuar të dyja gjinitë.
-Këngëtarët e rinj përveç muzikës komerciale përdorin edhe tekste me cilësi të dobët apo edhe banal. Cili është mendimi juaj lidhur me këtë problem?
Ky është një problem i shoqërisë e cila është infektuar nga kënga, nuk sheh se çfarë teksti ka kjo këngë por dëgjon vetëm ritmin. Nëse një këngë e tillë do të analizohet do të dalin shumë probleme. Më vjen keq që njerëzit ndjekin këtë muzikë.
-Sa jeni i zhgënjyer nga kënga dhe pse?
Normalisht që jam shumë i zhgënjyer dhe ky zhgënjim më ka bërë shumë pesimist. Por kur të krijohen mundësi të tjera atëherë mendoj dhe besoj se do të dal nga kjo situatë. Megjithëse jam i zhgënjyer nga muzika do të vazhdoj të ndjek këtë rrugë deri sa të më jepet mundësia.

__________________
The heaven's sound is composed inside your heart, listen to its beat to syncronize your life onto the angel's steps.