Për të parë se cilat do të jenë tendencat e modës për këtë sezon, shqiptarët mund t’u referohen edhe stilistëve shqiptarë. Deri më tani shijet e të veshurit në Shqipëri janë ushqyer më së shumti në prezantimet e koleksioneve të stilistëve të huaj. Por moda po gjen gjithnjë e më shumë terren edhe në krijimet shqiptare. Pikërisht për të shprehur këtë kreativitet, një javë do t’i kushtohet prezantimit të stilistëve shqiptarë. Nesër ´, nga ora 10.00 deri në 13.00, tek salla e Kinemasë në Qendrën Ndërkombëtare të Kulturës organizohet prezantimi i aktivitetit “Java e Modës Shqiptare 2007”.

Ky aktivitet zhvillohet për herë të parë në Tiranë nga presidentja e Dhomës Kombëtare të Modës, Diana Cekodhima, me pjesëmarrjen e stilistëve më të njohur shqiptarë. Janë emra që më së shumti kanë veshur pjesëmarrës nëpër aktivitete të rëndësishme. Ardi Asllani, Anila Zajmi, Enada At’Nikolla, Rezarta Skifteri dhe Joni Peçi do të prezantojnë koleksionet e tyre për sezonin e verës.

Secili prej këtyre stilistëve do të ngjisë në pasarelë fantazinë e të veshurit që ata ofrojnë për stinën që po vjen. Por ky nuk do të jetë një aktivitet që do të mbesë vetëm për publikun shqiptar. Stilistët shqiptarë do të prezantojnë tendencat e tyre për herë të parë në televizionin më të madh të modës “Fashion TV”. Për Joni Peçin kjo do të jetë e dyta herë. Pak kohë më parë ai u shfaq në ekranin e “Fashion TV”, pasi prezantoi koleksionin e tij në Prishtinë.

__________________
The heaven's sound is composed inside your heart, listen to its beat to syncronize your life onto the angel's steps.