Në libraritë e Vlorës:

"POST - SCRIPTUM PER DIKTATUREN"


(dokument - ese)

Ditët e fundit, shtëpia botuese “Toena“ në Tiranë, hodhi në qarkullim librin dokument-ese “Post-scriptum për diktaturën“ shkruar nga Vasil Qesari. Ky libër, për të cilin autori në fjalë, ka punuar për disa vjet, përben një afresk shumëplanesh të jetës totalitare gjatë peridhës 1970-1990. Përmbysja e kësaj "ngrehine" të madhe në Shqipëri do të linte pas, jo vetëm ndryshimin e sistemit shoqëruar me plot shpresa, mirazhe e klithma lumturie por, fatkeqësisht edhe mjaft plagë, drama, viktima, pluhur, mllefe e çgënjime nga më të ndryshmet. Dhjetë vjet e më tepër pas kësaj ngjarje e cila tronditi thellë shoqërinë duke përmbysur tërësisht shumë kode, rregulla e koncepte të mëparëshme, njerëzit vazhdojnë endé t'i bëjnë vehtes pyetje të tilla, si:
Ç'kish ndodhur në të vërtetë në shoqërinë shqiptare gjatë 50 vjetëve të fundit të diktaturës ? Si qe e mundur që sistemi arriti të deformonte gjithëçka? Përse njerëzit e kishin pranur atë ? Cila qe"logjika" totalitare e transformimit të shoqërisë dhe individit? Si qenë konceptuar e funksiononin strukturat e mekanizmave totalitare: propaganda, policia sekrete dhe ushtrimi i ideologjisë së terrorit ?...Si ndodhi që në mbarë vendet komuniste të Lindjes, Shqipëria te cilësohej shpesh si "përjashtim" apo "rast i veçantë "? Pse Enver Hoxha i qendroi verbërisht, fanatikisht e gjer në fund besnik Stalinit duke e kthyer vendin në një burg te madh ku dhuna, frika e spastrimet vazhduan gjer në fundin e viteve '80? Pse vendi u izolua çmendurisht, duke i mbyllur njerëzit mes bunkerësh e telash me gjemba? Përse, pra, ndodhën gjithë fenomenet e mësipërme? ...

Libri "Post-scriptum për diktaturën", nuk pretendon t'u japë përgjigjje defintive e te padiskutueshme pyetjeve të mësipërme apo kompleksitetit të arsyeve që sollën e mbajtën në fuqi pushtetin totalitar në Shqipëri. As që të jetë një "afresk“ i plotë, i thellë dhe i gjithanshëm i jetës e vuajtjeve që përjetuan njerëzit gjatë atij sistemi. Por, autori i tij Vasil Qesari, ndofta ka meritën që bashkë me vështrimin analitik retrospektiv të periudhës totalitare, shoqëruar me zellin e një analisti të pasionuar, mbeshtetur mbi përvojën e njohësve e analistëve më të shquar të shoqërive totalitare, është përpjekur të kthejë edhe një herë kokën "mbrapa", për të dhenë jo vetëm mendimet, opinionet e kujtimet e tij personale, por dhe për t'i u rikthyer dhe një herë vizionit të asaj epoke, me filosofinë e thjeshtë të ruajtjes së Memories Kolektive si edhe mbështetjes së Apelit për të mos harruar kurrë maksimëm e njohur, se “...kadavrës vazhdojnë t'i rriten thonjët e flokët dhe mbas vdekjes“ .

Dhjetë vjet e më shumë pas "përmbysjes së madhe", libri në fjalë ka vlera aktuale e shpresojmë të vlerësohet nga lexuesi sepse, siç shprehet edhe një studjues shqiptar "...e keqja më e madhe që mund t'i ndodhë një populli, vjen atëhere kur ai nuk arrin të bëjë analizën e së kaluarës së vet. Një popull amnezik është i detyruar të jetë vazhdimisht neuropatik e të përsërisë përvojat e tij të dhembëshme... ".

Shkruar nga Vitore Stefa - Leka (Itali)
Shënim: Vasil QESARI ka lindur në Vlorë dhe ka kryer studimet e larta në fakultetin Histori - Filologji ( dega gjuhë - letërsi ). Për shumë vite ka punuar si korrespondent i Radio - Televizionit Shqiptar në Vlorë. Në janar të vitit 1997, krijoi kanalin e parë televiziv lokal te pavarur në Shqipëri, të quajtur Teleblu. Aktualisht jeton në Francë dhe punon si gazetar - reporter në kanalin televiziv francez FRANCE 3. Prej vitesh është anëtar i Shoqatës së Gazetarëve Profesionistë Francezë si dhe veprimtar i Aorganizatave të njohura "Reporters sans frontière" e "Amnistie International ". Mbas botimit, në mars 2000 nga Toena, të librit "44 ditët e Teleblusë", autori paraqitet para lexuesit me librin e tij të dytë "Post - scriptum për diktaturën ", te cilin mund t’a gjeni në libraritë e Vlorës dhe qyteteve të tjerë.

__________________
The heaven's sound is composed inside your heart, listen to its beat to syncronize your life onto the angel's steps.