Libra te rinj dhe rekomandime!

Administratori · #1 25-01-2006, 21:33

“Dënesje në dru”,
një libër për vetveten

Dhjetë tregime të prozatorit Lazër Stani, të përmbledhura në një libër të vogël, si fryt i talentit dhe pasurisë shpirtërore. Shkrimtarët e mëdhenj i bën stili, i bën bota poetike që e përftojnë dhe e shqiptojnë me anën e strukturës gjuhësore. Ata mund t’i kopjosh, por jo edhe t’i imitosh. Veprat e tyrë janë fryt i pasurisë shpirtërore, i dijes, i aftësisë dhe i shkathtësisë së veçantë krijuese. Duke e thënë bukur atë që duan t’ua thonë të tjerëve, ata krijojnë artin e tyre të madh, artin që i dallon ata nga të tjerët dhe i bën të pavdekshëm. Kush është marrë dhe do të merret mirëfilli me tregimet e Lazër Stanit nuk e ka të vështirë ta rradhisë atë ndër këta prozatorë.

Me vlerat që ka krijuar deri më tash, që përligjen thellësisht edhe në tregime që po e shohin dritën në këtë vëllim, ai hyn në rrethin më të ngushtë të tregimtarëve tanë më të mirë të të gjitha kohëve. Tregimet e tij cilësohen me rrëfim burimor e të mëvetësishëm, me çka ai dallohet nga prozatorët tanë paraprakë dhe bashkëkohorë. Lazër Stani është i lidhur ngushtë me tregimet e veta, me botën poetike që e përfiton si mesazh poetik. Pikërisht në procesin ekrijimit ai e ndien qenësinë e plotnisë së vet krijuese, e ndien dhe është në gjëndje ta shprehë atë nëpërmjet artit.

Në tregimet e veta autori ynë përmbush atë që e ka thënë edhe vetë: “Thjeshtë, në librat e mi dua të jem vetvetja”. Në përftimin e tregimeve Stani përdor një strategji të veçantë të rrëfimit, nëpërmjet së cilës bëhet gërmimi në rrafshin thellësor të botës konkrete dhe të botës së brendshme të personazheve. Thellësinë e vëzhgimit Stani e përligj sidomos në shqiptimin e marrëdhënieve midis dy gjinive: mashkullit dhe femrës, os emë drejt, nëpërmjet ndjenjës së dashurisë. Bota e rrëfimtarit në tregimet e Stanit është sa e pasur aq edhe komplekse.

E tillë është edhe bota e personazheve të tjerë, me të cilët ai ndeshet e ka të bëjë. I tillë, i pasur dhe kompleks, është edhe vetë rrëfimi për arsye se vetëm nëpërmjet një rrëfimi të tillë të shtresuar bëhet i mundur shpalimi i botës. Bota e tregimeve të Lazër Stanit është botë e përftuar nga ai, e përftuar nga imagjinata e tij e pasur. Këtë e thotë ai vetë: “Çdo shkrimtar që ecën këmbëzbathur në terrenin e konkretes, korr në fund arën e zhgënjimit”. Mirëpo, dhet thënë se rrëfimi i tij e ka bazën në botën konkrete dhe në përvojën e tij jetësore, të përjetuar ose të mësuar në libra.

Pra, tregimet e Stanit nuk janë fantastike, ato nuk I përkasin as të ashtuquajturit “realizëm magjik”, as botës së përrallës, a sprozës realiste tradicionale (natyrisht s’kanë të bëjnë aspak me veprat e realzimit socialist, me të cilën për pesëdhjetë vjet ishte “lodhur” letërsia jonë). Tregimet e tij janë realë për arsye se shqiptojnë të mundshmen. Tregimet e Stanit s’janë humoristike, as ironike, as sarkastike, por humori, ironia dhe sarkazma del nga mënyra se si autori qaset, i trajton dhe i shqipton dukuritë, i shpalon disa cilësi të personazheve në gjendje e në situata të veçanta.

Administratori · #2 19-02-2006, 14:22

"Udhëtari i natës"

Udhëtari i natës” është një roman mbi drejtësinë që njeriu duhet t’i kthejë njeriut. E gjithë vepra ngjan si “një fluturim dallëndyshesh mbi barbarinë e një shekulli që ende nuk ka mbaruar”.

Një specialist i kafshëve dhe shpendëve shtegtarë shkon në qendër të shkretëtirës sahariane për të pritur atje kalimin e dallëndysheve. Në këtë pritje në mes të shkretëtirës, ai njihet dhe mrekullohet nga urtësia e mençuria e popullit taxhil, duke e bërë të vetën diturinë e udhërrëfyesit të tij vendas, Xhibrilit. Aty, heroi i romanit, rrëfyesi, njihet me tipa të ndryshëm njerëzish, me të cilët këmben përshtypjet e tij mbi jetën dhe, më tej, mbi luftërat dhe vdekjen, për të cilat ai ka menduar gjatë gjithë jetës së tij prej udhëtari të pasionuar. Por këtyre njerëzve të izoluar të shkretëtirës ai do t’u tregojë edhe histori nga pjesa e tjetër e botës, nga ajo pjesë ku bie një sistem dhe ngrihet një tjetër, ku bëhet luftë dhe njerëzit kanë marrë arratinë si kafshët. Dhe kështu, histori pas historie, rrëfim brenda rrëfimit, romani ka tërheqjen dhe atmosferën e ngrohtë të një mbrëmjeje të freskët rreth një zjarri bubulak.

Administratori · #3 19-02-2006, 15:42

Lindja e Turqisë moderne

Autor: Bernard Lewis
ISBN: 99943-641-2-X
Botoi:SHLK
Perktheu: Krenar Hajdëri

Ky libër ka për subjekt historinë e dy shekujve të fundit të Turqisë, pra lindjen e Turqisë moderne mbi gërmadhat e Perandorisë Otomane. Një temë për të cilën janë shkruar një mori librash, por mes tyre, libri i Bernard Lewis pranohet tashmë si një “klasik”, si një ndër librat që duhet të bëjnë pjesë në bibliotekën e çdokujt që i intereson historia. Autori ka vënë në punë njohuri të pashoqe si të burimeve turke, ashtu dhe të atyre perëndimore për të analizuar rëndësinë e revolucionit që kreu Ataturku, si dhe për të na dhënë kontekstin esencial që të ndihmon për të kuptuar problemet me të cilat për ballet Turqia bashkohore, si dhe për të gjykuar të ardhmen e këtij vendi. Një libër që të ndihmon të kuptosh më mirë shumë nga dukuritë me të cilat u përballën shqiptarët (dhe vazhdojnë edhe sot e kësaj dite) në rrugën e tyre për t’u bërë pjesë e botës moderne.

Administratori · #4 19-02-2006, 15:45

Ku është gabuar?

Autor: Bernard Lewis
ISBN: 99943-641-0-3
Botoi:SHLK
Perktheu: Piro Misha

Një libër shumë i rëndësishëm për të kuptuar ç’po ndodh sot në botë. Një libër që i jep përgjigje shumë pyetjeve që shumëkush i bën. Një libër bestseller në mbarë botën, i përkthyer në mbi 20 gjuhë, mes të cilave në turqisht dhe arabisht, që kërkon të gjejë arsyet e asaj që po ndodh sot në Lindjen e Mesme dhe, më në përgjithësi, në botën islame. Një libër që përpiqet të na shpjegojë rrënjët historike të marrëdhënieve të vështira që ekzistojnë sot mes Perëndimit dhe botës islamike, kësaj bote që, pasi qe në pararojë të zhvillimeve njerëzore (fuqia më e madhe ushtarake dhe ekonomike që printe në arte dhe në shkencë) për disa shekuj me rradhë, befas mbeti pas e dominuar tërësisht nga Perëndimi.

Bernard Lewis, ky dekan i historianëve të Lindjes së Mesme e një ndër islamologët më të shquar, na jep një tablo të gjallë të historisë së përpjekjeve të botës islame për t’i bërë ballë ekspancionit evropian, fillimisht atij ushtarak, më pas edhe ekonomik e kulturor, të rrekjeve të saj të dështuara gjatë dy shekujve të fundit për të dalë nga kjo gjendje si dhe dilemave që brejnë sot Lindjen e Mesme, ku krahas atyre që vazhdojnë të besojnë se fajin për të gjitha au kanë të tjerët, janë gjithnjë e më të shumtë ata që kanë nisur t’i bëjnë vetes pyetjen: “Ku është gabuar?”

Administratori · #5 19-02-2006, 15:49

pas Erës së Re

Autor: Preç Zogaj
ISBN: 99927-977-0
Botoi: Ora

Me poezinë “Poeti qe”, poeti Preç Zogaj e kujton lexuesin shqiptar se është, se është kthyer, se mund të jetë për më gjatë. Kjo poezi hap vëllimin “pas Erës së Re”, titull ky i lidhur ngushtë me kumtin e librit e ndoshta mentonimi e periudhave të krijimtarisë së autorit. Gjithçka në vëllim i përgjigjet dëshirës: “dua të kthehem”, edhe kujtimet, edhe fëmijëria, edhe përmasa e përjetëshme, prindërit. Pasi ka kërkuar “midis pluhurit dhe mërzisë hartën e vjetër të shpirtit” poeti kthehet, e gjen “udhën nga erdhi”. Vëllimi i fundit me poezi i autorit i përket vitit 1999.

Administratori · #6 19-02-2006, 15:51

Gjuha e shpëtuar

Autor: Elias Caneti
ISBN: 99927-793-3-0
Botoi:Elena Gjika
Perktheu: Aristidh Ristani

“Frikacak, me të vërtetë frikacak, ai që trembet nga kujtimet e veta!” - kjo është motoja me të cilën vihet në lëvizje mekanizmi i ndërlikuar i kujtimeve në romanin e Elias Canieti-t “Gjuha e shpëtuar”. Kujtimet më të hershme të tij na shpërfaqin atë histori unike që për secilin prej nesh është më e fshehta e më enigmatikja: historia vetjake.

Fëmijëria është një nga zonat njëkohësisht më të frekuentuara dhe më unike të letërsisë dhe po aq janë të ndryshme këndvështrimet e autorëve klasikë e bashkëkohorë mbi të. Këndvështimi retrospektiv i Caneti-t është ndër më zhbiruesit.
Ky libër hap tetralogjinë autobiografike të shkrimtarit të shquar Elias Caneti i cili botohet për të parën herë në gjuhën shqipe. Qysh kur doli së pai në vitin 1977, kjo “histori e një rinie” u prit si një “vepër klasike bashkohore”, si një nga ato vepra letrare që e kanë të sigurt jetën e tyre të gjatë dhe që emocionojnë thellë çdo lloj lexuesi.

“Klasik të gjallë”, “një prej humanistëve më të mëdhenj të shekullit XX” e ka mbiquajtur kritika Elias Caneti-n, fitues i çmimit Nobel në Letërsi në vitin 1981.

Administratori · #7 19-02-2006, 15:56

Shoqëria periferike

Autor: Artan Fuga
ISBN: 99927-977-6-2
Botoi: Ora

Libri “Shoqëria periferike” i paraqitet lexuesit si një tërësi arsyetimesh, shqyrtimesh, analizash teorike dhe konkrete lidhur me shkaqet e gjendjes ekonomike dhe shoqërore të vendit dhe të prirjeve që do të përcaktojnë të ardhmen e tij në vitet që do të vijnë. Në vitin 2000 ai u botua fillimisht në frengjisht në Paris. Ribotimi i tanishëm pas një periudhe katër vjeçare ka dhënë autorit mundësinë të shtojë a përpunojë argumenta dhe shqyrtime të reja. Libri priret të vëzhgojë në radhë të parë marrëdhëniet pronësore në shoqëritë e tranzicionit, gjendjen e prodhimit bujqësor dhe industrial, ndryshimet e bëra në planin demografik të zhvendosjeve mekanike të popullsisë, ndërtimin e grupeve të reja shoqërore, bazat juridike të konflikteve të sotme shoqërore midis shtresave të ndryshme të popullsisë, gjendjen e sistemit politik, vështirësitë dhe pengesat në procesin e integrimit evropian, pra një sërë fushash përcaktuese për ritmet dhe drejtimet e ndryshimeve shoqërore në Shqipërinë e sotme dhe të ardhme.

Administratori · #8 19-02-2006, 15:58

Harry Potter dhe Urdhëri i Feniksit

Autor: Joanne K. Rowling
ISBN: 99971-59-518
Botoi: Dituria
Perktheu: Amik Kasehuro

Dy vjet pas daljes së vëllimit të katërt, edhe në Shqipëri shfaqet vazhdimi i shumëpritur i aventurave të Harry Potter-it, djaloshit magjistar të dashur për miliona lexues të vegjël e të mëdhenj në të gjithë botën. Në këtë vëllim të pestë të sagës, personazhi i krijuar nga fantazia e shkrimtares angleze J.K. Rowling është i vendosur t’i dhurojë publikut një histori të re, gjithnjë më të pasur e më të artikuluar.

Koha kalon edhe për Harry-n, heroi i ri rritet. Tashmë e rigjejmë pesëmbëdhjetëvjeçar edhe një herë duke u marrë më artet fantastike të magjisë dhe me forcat e fshehta e të errëta të së keqes, por edhe si viktimë e “sëmundjeve” të adoleshencës. Si çdo adoleshent tjetër, edhe Harry zbulon anët më të fshehta e më të mprehta të karakterit të tij rebel, është gjithnjë e më shpesh impulsiv, i paduruar, sidomos me të afërmit e tij Dursley-t të cilët, gjatë pushimeve të shkollës e detyrojnë të mbyllet në shtëpi duke i prerë çdo kontakt me botën e magjisë.

Edhe në këtë vëllim nuk do të mungojnë surprizat dhe argëtimi për ata që do të duan të futen në universin fantastik që kreativiteti i J.K. Rowling e bën gjithnjë e më të magjishëm, falë një subjekti të jashtëzakonshëm dhe falë shpikjes së krijesave nga më të çuditëshmet e personazheve nga më të paharrueshmit.

Administratori · #9 19-02-2006, 16:01

Kodi Da Vinçi

Autor: Dan Brown
ISBN: 99943-33-03-8
Botoi: Dudaj
Perktheu: Amik Kasehuro

Kush ishte në të vërtetë Leonardo Da Vinci? Ç’kanë fshehur për vite Templarët? Cili është çelësi që të çon tek segreti i Graal-it të shenjtë? Këto e më tepër rrëfehen tek Kodi Da Vinci! Ai nis në një natë të qetë pariziene. Asgjë nuk ndërduket nga fasada klasike dhe e padepërtueshme e Luvrit, por një dramë po konsumohet në brendësi të tij, në Galerinë e Madhe. Kuratori i vjetër Saunière, i plagosur për vdekje, mbërthehet në një gjest të fundit të dëshpëruar pas një pikture të Karavaxhios, çka bën të ndizet alarmi. Saunière-it i mbesin vetëm pak minuta jetë. Ai zhvishet dhe shtrihet në pozicionin e njeriut Virtuvio, skica e famshme e leonardos.

Pranë vetes shkruan ca numra dhe vetëm një emër: Robert Langdon, një studiues simbologjie. Do t’i takojë atij të zbulojë misterin që fshihet pas kryeveprave të Leonardos. Kush ishte piktori i rilindjes? Çfarë fshihte? E mbi të gjitha, ç’enigma tronditëse fshihnin pikturat e tij? Pse buzëqesh Mona Liza? Romani i Dan Brown, më në fund i ka dhënë një shpiegim për miliona lexues në botë buzeqeshjes së saj. Ky libër është konsideruar edhe si sfidë ndaj një prej dogmave kryesore të kishës, çka e ka kontribuar për ta bërë atë një libër mjaft të debatuar.

Administratori · #10 19-02-2006, 16:02

I kam shërbyer mbretit të Anglisë

Autor: Bohumil Hrabal
ISBN: 99927-453-2-7
Botoi: Korbi

Është e rrallë që një libër t’ia dalë si ky të shpërfaqë një gamë të tillë regjistrash, historish e frymëzimesh. Gjejmë në të një erotizëm festiv, pasionin absolut për jetën, për të papriturat e saj, gjejmë dëshirën për para e sukses si ankth promovimi, gjejmë trishtimin nga jeta si zhgënjim e vetmi, gjejmë festën e imaxheve e të poezisë. Ky libër është një zallahi tërheqëse që rrëfen historitë e një kamarieri fillestar që e ka obsesion shtatshkurtësinë e vet në një botë ku të gjithë janë të gjatë dhe të pasur.

Në roman, protagonisti të cilit i dihet vetëm mbiemri, Dite (fëmijë), rrëfen jetën e tij që kur ishte adoleshent. Rrëfen sesi fillon punë ndihmës-kamarjer në një hotel province të frekuentuar nga shitës shetitës ekstravagantë, sesi shijon mrekullitë e dashurisë në një bordell parajsor dhe sesi zbulon mjetin magjik për t’u ngjitur në shkallën sociale e për të ndrequr kështu shkurtësinë e shtatit, paratë. Rrëfimi në këtë roman, nga kapitulli në kapitull, bëhët më i dendur deri sa ngijet në tema, por pa pushuar për asnjë çast “hallakatjen” në qindra histori të vogla të kapura gati rastësisht nga protagonisti-narrator për të cilin “çdo gjë është e njëjtë, pra çdo gjë është e çmuar”.

Ky është dhe thelbi i shkrimit hrabalian, kjo uri gjithëpërfshirëse për të rregjistruar gjithçka me sigurinë se do të vijë një ditë kur kolazhi përherë i papërfunduar tek i cili çdo ditë vihet nga një copëz do të thotë diçka ose të paktën do të thotë që portreti më i besueshëm e më i denjë i jetës njerëzore është pikërisht kjo rrëmujë e pakryer.

Administratori · #11 19-02-2006, 16:04

Përplasja e qytetërimeve dhe ribërja e rendit botëror

Autor: S. Huntington
ISBN: 99927-645-3-6
Botoi: LogosA

Cilat janë qytetërimet që po hyjnë në konflikt në skenën globale? Nga njëra anë është natyrshëm modeli amerikan. Po cilët janë protagonistët e tjerë? Ç’peshë ka fuqia ushtarake, po ajo ekonomike në këtë ndeshje për të fituar supremacinë botërore? Ç’rol do të ketë Evropa? Cili do të jetë roli i Azisë dhe i ekonomive në rritje? Leximi i librit të Samuel P. Huntington, profesor në Universitetin e Harvard-it, rezulton të jetë një mjet i domosdoshëm për kë do të thellohet me një vetëdije kritike në të kuptuarit e fakteve që kanë karakterizuar fillimet e mijëvjeçarit të ri.

Ngjarjet tragjike të 11 shtatorit kanë risjellë në skenë me një dramaticitet aktual analizat e shprehura në libër, parashikime të bëra nga autori që në vitin 1996, vit kur vepra u botua për herë të parë. Ato përballen me realitetin pas sulmit në kullat binjake që po verifikohet sot në Lindjen e Mesme. Vepra, e shumëdiksutuar, që ka ngjallur polemika pa fund dhe mjaft e suksesshme, priret të ravijëzojë një model interpretimi për skenarin politik botëror të vlefshëm për studiuesit dhe të dobishëm për politikanët.

Administratori · #12 19-02-2006, 16:05

Morfologjia e përrallës

Autor: Vladimir Propp
ISBN: 99927-958-40
Botoi: Shlk & Aleph
Perktheu: Agron Tufa

Fjala morfologji do të thotë shkencë mbi format. Në botanikë, me morfologji nën kuptohet studimi mbi pjesët përbërëse të bimëve, marrëdhëniet midis njëra-tjetrës dhe tërësisë, me fjalë të tjera, studimi i strukturës së bimëve.

Për mundësinë e nocionit dhe termit morfologjia e përrallës nuk ka menduar kush. Ndërkaq, në sferën e përrallës folklorike popullore shqyrtimi i formave dhe përpunimi i ligjësive të ndërtimit ështëi mundur me po të tillë përpikmëri, sa ç’është e mundur morgologjia e formacioneve organike.

Nëse këtë gjë nuk mund ta dëshmojmë për përrallën në tërësi, me gjithë vëllimin e saj, atëehrë një gjë të tillë mund ta dëshmojmë për të ashtuquajturat përralla magjike, për përrallat “në kuptimin e vërtetë të fjalës”. Vetëm atyre pra u kushtohet ky punim.

Një nga punimet tashmë klasike të semiotikës së tekstit, Morfologjia e përrallës e formalistit të shquar rus Vladimir Propp, vjen më në fund edhe në shqip.