Kaloi më shumë se një muaj nga 40-vjetori i vdekjes. Në 20 dhjetor nuk u tha asgjë për përvjetorin e poetit, edhe pse u premtua shumë. Siç duket, institucionet ishin duke u marrë me të tjera punë të fundvitit. Megjithatë nesër, Qendra Ndërkombëtare e Kulturës "Arbnori" organizon një mbrëmje përkujtimore për poetin Ali Asllani, në serinë e takimeve në Sallonin e Letërsisë Shqiptare. Sipas organizatorëve, qëllimi i kësaj mbrëmjeje është përkujtimi i një prej personaliteteve më të spikatura të jetës publike dhe kulturore të shek.XX, kontributi i të cilit u la në harresë për më shumë se gjysmë shekulli. Të pranishëm në këtë homazh do të jenë personalitete të jetës kulturore dhe publike të vendit, studiues të letërsisë, shkrimtarë e botues, që do të flasin për jetën dhe veprën e Asllanit. I pranishëm do të jetë dhe ministri i Turizmit, Kulturës Rinisë dhe Sporteve, Bujar Leskaj.

Ali Asllani u lind në fshatin Vajzë të Vlorës. Shkollën fillore e kreu në Vlorë, ndërsa atë të mesme në Janinë ku kreu studimet pjesa më e madhe e intelektualëve shqiptarë. Që i ri u angazhua në lëvizjen kombëtare, duke kontribuar pranë klubit "Bashkimi". Për aktivitetin patriotik, internohet nga qeveria osmane në Halep të Sirisë, prej nga arratiset për në Korfuz. Me rikthimin në Vlorë zgjeron aktivitetin patriotik dhe merr pjesë në Kuvendin e Dibrës, si përfaqësues i Klubit "Bashkimi" të Janinës. Është një nga personalitetet që kontribuoi në shpalljen e pavarësisë. Pushtimi italian e gjeti në detyrën e nënprefektit, prej nga largohet për shkak të bindjeve të tij atdhetare. Në fund të vitit 1922, fillon karrierën diplomatike. Fillimisht emërohet konsull në Trieste ku qëndron deri në fund të prillit 1925. Po atë vit u emërua "Zëvendës i ngarkuar me punë" në Sofje e më pas, po aty sekretar i parë dhe i ngarkuar me punë.

Në vitet 1930-1932 ishte ministër i akredituar në shtetin grek. Më 1934 zgjidhet sërish Kryetar i Bashkisë së Vlorës, detyrë të cilën e mban deri në prag të pushtimit fashist 1939. Është ndër themeluesit e Lidhjes së Shkrimtarëve dhe Artistëve, megjithatë, për shkak të angazhimeve të paraluftës, shihej me dyshim nga pushtetarët komunistë. Vetëm pak vite para se të vdiste iu lidh një pension minimal. Ka botuar vjersha që në moshë të re. Poema "Hanko Halla", të cilën e botoi në vitin 1942 e radhiti ndër poetët më të mirë të vendit. Vepra e tij filloi të botohej vetëm në vitin 1960. Brenda një kohe të shkurtër, arrin të botojë disa libra si "Vidi – vidi, pëllumbeshë", "Shqipëria kryesorja", "Vajzat dhe dallëndyshja" dhe "Kur merr zjarr rrufeja". Vdiq në Tiranë në 20 dhjetor 1966. Pas vdekjes iu botua në vitin 1973, "Poezia shqipe". Në vitet '90 iu botuan "Poezi të zgjedhura" dhe "Vidi - vidi pëllumbeshë".

__________________
The heaven's sound is composed inside your heart, listen to its beat to syncronize your life onto the angel's steps.