__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Siçilia,

Ishulli i qetësisë dhe i bukurisë së hapur

“…toka e natyrës bujare, e dritës së qartë, e ujërave dhe pyjeve, e kopshteve dhe luleve të portokallit erëmirë. Ishulli i ekzistencës së pastër dhe kontrastuese. Ishulli i miteve dhe legjendave. "Jam i lumtur që munda të kem në shpirtin tim panoramën e Siçilisë, këtij ishulli të bukur dhe unik, të pastër autentik dhe të plotë”
J.W. Goethe


Një trekëndësh magjik në mes të detit blu. Një tokë e vizituar nga fenikasit, grekët, romanët, bizantët, arabët, normanët. Të gjithë kanë lënë në ishull fragmente të vogla ose të mëdha të kulturës së tyre. Edhe sot mund të admirohen tempujt grekë, mozaikët romanë, ndërtesat e shkëlqyera arabo-normane.

Pak gjeografi
Siçilia është ishulli më i madh i Mesdheut dhe është rajoni më mesdhetar i Italisë. Ngushtica e Mesinës, e gjerë më pak se 3 kilometra, e ndan nga pjesa e gadishullit dhe kanali i Siçilisë e ndan nga Afrika në një distancë prej 140 km. Ishulli ka formë trekëndëshi me dy brinjët e gjata që lagen nga Mar Tirreno në veri dhe nga Kanali i Siçilisë në jug, dhe brinja më e shkurtër laget nga deti Jon në lindje.
Që nga dyndja muslimane, ishulli u nda në tre lugina të mëdha: Val Mazara në perëndim, Val Demone në verilindje, Val di Noto në juglindje. Siçilia përmban në territorin e saj një numër ishujsh të vegjël: Eolie o Lipari dhe Ustica në bregun verilindor në Mar Tirreno, Egadi në perëndim në distancë të vogël nga brigjet e Trapanit, Pelagie dhe Pantelleria në jug të kanalit të Siçilisë. Kurse në jug shtrihet ishulli i Lampeduzës që shënon edhe pikën më jugore të Italisë.
Ndërsa ndarja administrative konsiston në 9 provinca : Agrigento, Caltanissetta, Catania, Enna, Messina, Palermo, Ragusa, Siracusa, Trapani.
Siçilia dhe ishujt e saj u bënë një rajon me Autonomi vetëqeverisjeje në vitin 1946 me Palermon si kryeqytet; dhe parlamentin e vet e ka patur që nga viti 1947. Popullsia është më shumë se 5,1 milionë, me një dendësi 190 vetë për km2.
Europë, Afrikë dhe Azi, në një ishull
Të organizosh ose të zgjedhësh itinerare turistike në Siçili do të thotë, para së gjithash, të dish të vlerësosh morinë e opsioneve të mundshme të këtij ishulli, duke filluar që nga ato arkeologjike, historike dhe nga pushimet e paharrueshme falë karakteristikave gjeografike dhe traditës.
Gjithçka është e mundur, sepse Siçilia ka shekuj histori për të ofruar, duke filluar që nga gjurmët arkeologjike, dëshmi e gjallë e pranisë së jetës në këtë rajon edhe në periudhat parahistorike, për të vazhduar më pas me të gjitha format ekspresive, me të cilat njeriu i atëhershëm ka dashur të dëshmojë dhe transmetojë tek pasardhësit ekzistencën e tij.
Dyndjet e popujve të tjerë gjatë historisë
Nuk duhet në asnjë mënyrë të harrojmë dyndjet e shumta në ishull, që nga grekët që ishin të interesuar për pjesën lindore të Siçilisë në shekullin e VIII para Krishtit. Gjurmët janë shumë të dukshme në Sirakusa dhe Agrixhento, për të kaluar pastaj në periudhën bizantine, më pas arabe që i dha një zhvillim të madh bujqësisë, në atë normane që filloi në fund të vitit 1000. Kjo e fundit është pjesërisht e kritikueshme, sepse betejat e tyre për pushtimin e ishullit, sollën shkatërrim total të vlerave artistike dhe kulturore të mëparshme, por që i dhanë atij një aspekt politik të bazuar në aleanca të forta me kishën dhe modelet e reja konstruktive, të sjella nga besime të ndryshme që mbërritën aty.
Siçilia, disa thenie
Siçilia është më shumë se ishull.
Zbulo Siçilinë dhe ke zbuluar botën.
Shoqëria e parë multikulturore në planet.
Siçilia është rajoni më kozmopolitan i Italisë dhe Europës, e sunduar nga aziatikët, afrikanët dhe europianët.
Siçilia është bardh e zi dhe miliona hijëzime gri.
Nuk ka vend tjetër në tokë si Siçilia.
Ky ishull është vend unik plot art, arkeologji, histori, folklor dhe peizashe impresionuese.
Siçilia është pothuaj një komb më vete.
Siçilia është Europë, Afrikë dhe Azi në një ishull. 30 shekuj histori në stilet klasike, romane, gotike dhe baroke.
Zoti e krijoi Siçilinë, ishullin e diellit, vendin e plazheve të parajsës dhe maleve të magjishëm, mrekullinë më të madhe natyrore. Brigjet e Sicilisë janë të arta me orkide portokalli dhe limoni.
Plazhet dhe lokalitetet
Siçilia mund të ofrojë me të vërtetë shumë për turistët, nisur nga bagazhi i saj historik, kulturor dhe social, pasuritë kulturore si muzetë dhe kishat. Prej kohësh Siçilia ka qenë shumë e vizituar, falë statusit të saj si ishulli më i madh i Detit Mesdhe edhe për praninë e arqipelagëve të vegjël që e rrethojnë dhe gjallërojnë, si mbretëri të pushimeve detare.
Në të vërtetë, bukuria e detit, shembull tipik i jetës dhe pasioneve, i legjendave dhe metaforave me ngjyrat e tyre, bukuria e brigjeve dhe plazheve, ka shtuar edhe më shumë hijeshinë e këtij ishulli. Bukuria e tre deteve që lagin brigjet e ishullit, diversiteti i tyre, vulosin rëndësinë e ishullit si vend turistik. Në jug, Afrika me brigjet tuniziane, pasuron ishullin me elementë folklorikë tipikë të një kulture tërësisht tërheqëse.
Bukuria e peizazheve natyrore, butësia e klimës, pasuria me bimësi dhe një sistem hotelesh të mrekullueshëm e bëjnë vizitën siçiliane të paharrueshme.
Plazhet më të njohura publike janë Porto Empedocle, Carini në perëndim të Palermos, afër Ishullit të Femrave, Castellamare del Golfo, Palermo dhe sidomos Trapani e Cefalù të njohur edhe si të frekuentuar nga personazhe të famshëm botërorë.
Ishulli i Siçilisë perëndimore afër Trapanit. Lipari, ka disa plazhe në këta ishuj. Të mëdha por shumë të populluara janë plazhet jashtë Palermos, në pjesën perëndimore të Malit Pellegrino.
Kështjellat e epokave të ndryshme, muzetë e panumërta, historia e ishullit, janë motive po aq të rëndësishme për ta vizituar. Ndërsa për argëtimin, muzikën, netët pasionante, nuk mund të them gjë tjetër veçse: Ku mund t’i gjeni më mirë se në Itali?!
Etna, asnjë s’e di me saktësi se kur mund të shpërthejë përsëri..
Një nga bukuritë më të mëdha natyrore të Siçilisë është mali i saj më i lartë, Etna. Nga grekët e lashtë, mali Etna, ishte zona e perëndisë së zjarrit dhe shtëpia e monstrës me një sy, e njohur si Ciklopi. Me një lartësi prej 3350 metra, ky mal është vullkani më i lartë aktiv në të gjithë Europën. Pamja e tij ndryshon pas çdo shpërthimi dhe llava, me kalimin e viteve, ka shtruar rrugën e saj deri në breg.
Mbi 1200 m2 të sipërfaqes së Etnas janë mbuluar me llavë të dendur. Etna ofron ski në muajt e dimrit dhe çlodhje nën pemët e shumta gjatë verës. Ka edhe maja të tjera më të ulëta në kodrat e Etnës dhe shpella shumë interesante. Meqënëse Enta është vullkan aktiv me llavë relativisht të freskët dhe një sërë vatrash, askush nuk e di me saktësi se kur do të jetë shpërthimi tjetër i tij.
Një varietet shumë i madh speciesh druri, pisha dhe lisa të lartë mbulojnë sipërfaqen e tij, por nuk mungojnë edhe shkurret dhe bimët më të ulëta. Pemët e përhershme rreth Etnas ndryshojnë ngjyrë në vjeshtë, duke krijuar një paradë spektakolare hijezimesh me ngjyra të ndryshme.
Akullorja është shpikur pikërisht këtu
Nuk ka asnjë mëdyshje që kuzhina është një nga tërheqjet më kryesore në Siçili. Ndodh që e kemi shijuar ushqimin siçilian edhe pa ardhur këtu. Kur përmend kuzhinën italiane, menjëherë mendja të shkon tek pasta dhe picat. Por kuzhina siçiljane, me dietën e saj mesdhetare, i transformon këto në një nga kënaqësitë më kulmore. Caponata, një sallate shumë e shijshme me ullinj, e cila shërben për të hapur oreksin.
Ishulli njihet për kuzhinën me prodhime deti, por edhe prodhimet e mishit janë shumë të pëlqyera, sidomos mishi i qengjit edhe i pulës. Ndërsa ëmbëlsirat janë të mrekullueshme. Kasata është specialiteti më i njohur si dhe akullorja siçiliane është e shkëlqyer. Në fakt, ka mundësi që akullorja të jetë shpikur pikërisht këtu gjatë periudhës romane. Merrej borë nga mali Etna dhe me aromatikë të ndryshëm servirej për elitën e atëhershme.
Siçilia, roja detare e Mesdheut
Duke u përballur në vazhdimësi me masa të mëdha klandestinësh shqiptarë, kurdë apo singalezë, në plazhet e tyre, siçilianët janë mësuar tashmë me flukse të huajsh. Kështu ata vazhdojnë të jetojnë, duke mënjanuar paragjykimet dhe komentet mbi situatën aktuale, një eksperiencë antike dhe e rrënjosur thellë në historinë e tyre.
Kilometra të tërë brigjesh të hapura në det për shekuj me radhë e kanë prezantuar ishullin italian si portën e lindjes. Një rrugë për bizneset fitimprurëse, por edhe si ana e kundërt e medaljes, për pushtuesit, të arratisurit, piratët dhe çdo loj mysafirësh të tjerë, të mirëpritur ose jo.
Kur kanë mbërritur shqiptarët e parë në brigjet italiane?
Të parët nga “vendi i shqiponjave”, siç e quajnë italianët shpesh Shqipërinë, ata që e adoptuan edhe Siçilinë si atdheun e tyre nuk ishin bijtë konfuzë të regjimit të Tiranës, në fillim të viteve 90, por arbëreshët, që arritën në shekujt XV dhe XVI, në fillim për t’u shpëtuar turqve, pastaj pas vdekjes së Skënderbeut.
Mozaiku i gjuhëve më pak të folura në Siçili, vlen më shumë sesa çdo libër historik, sepse bën evident kompleksin, përzierjen tërheqëse të qytetërimeve të ndryshme që, në të mirë e në të keqe, përbën stofën e këtyre rajoneve si Pulja, Siçilia dhe Kalabria. Veçojmë këtu që në ishull ka vende ku prej shekujsh flitet shqip.

Imazhe te Ngjitura

sicilia3.jpg (64.1 KB, 141 vezhgime)

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Budapesti

BUDAPESTI, një eksperiencë për gjithë jetën

Doni të dini si është Budapesti?
Me pak fjalë është i pakrahasueshëm, i magjishëm, emocionues e plot surpriza. Qytet historik, por asnjëherë i palëvizshëm. Kultura, tradita, jeta plot energji, pulsojnë në çdo kënd të tij. Një tërësi e ekuilibruar me dimensione të vogla e të mëdha, të së shkuarës dhe të së ardhmes, falë elegancës, qetësisë dhe dinamizit.
Budapesti, perla e Lindjes
Përgjigje më të qartë për pyetjen nëse duhet të vizitoni apo jo Budapestin, e ofron vetë ky qytet kur demostron dy pjesët e tij Pesti dhe Buda, të ndara nga lumi Danub dhe të lidhura nga shumë ura elegante, 7 automobilistike dhe 2 hekurudhore. Nga të dyja anët e lumit mund të admirohen perlat e trashëgimnisë botërore. Në majë të kodrës ngrihet Pallati Mbretëror i Budës, një lagje mesjetare, me ndërtesa të ulëta tradicionale që të japin përshtypjen e qyteteve të vogla mikëpritëse. Kodra e kështjellës është krenaria e hungarezëve, simbol i historisë dhe identitetit të tyre. Ndërsa nga ana tjetër e lumit shtrihet Pesti, një metropol lirie dhe dinamizmi, me institucionet zyrtare, pallate të dekoruara dhe vende të magjishme çlodhjeje dhe argëtimi.
Në anë të lumit në hyrje të Pestit ndodhet një nga simbolet e qytetit, Pallati i Parlamentit, një nga më të mëdhenjtë në botë, me më shumë se 700 dhoma, me një arkitekturë fanatasike të viti 1907, gjithçka e gdhendur në detaj si në një kështjellë rëre. Në oborrin përpara tij dy luanët e mëdhenj, janë rojet besnike që nga koha e perandorisë së madhe Austro-Hungareze. Pallati madhështor me ngjyrë vishnje, duket sikur po i gëzohet historisë që e vështron nga ana tjetër e lumit.
Pasuria natyrale dhe arkitekturore organizohen në një tërësi monumentale me emrin Budapest, kryeqytet i Danubit. Atmosfera dhe panorama e rrugëve përgjatë Danubit u krijua nga kalërimi me kuaj në shekullin e XIX-të dhe XX-të, epokë kur Budapesti u bë një nga metropolet më të zhvilluara, më dinamikë dhe më tërheqës.
Por edhe tani, në mileniumin e ri është bërë edhe njëherë teatri i mundësive, i dinamizmit dhe ndryshimeve të shpjeta e të pabesueshme. Bashkëjetesa e të shkuarës me të ardhmen, forcës dhe faljes, shenjat e kudoshfaqura të ndryshimit, ndërtojnë karakterin e sotëm të Budapestit, tërheqës dhe i papërsëritshëm, përshtypje që çdo vizitor e mbyll në zemrën e tij dhe e ruan në kujtesë.

Budapesti është zemra e Hungarisë, shtëpia e 20 përqind të popullsisë hungareze. Asnjë qytet tjetër hungarez nuk i afrohet Budapesit për nga madhësia, bukura dhe rëndësia. Qyteti është një miks i ndërtesave të vjetra dhe të reja, shumë nga ndërtesat historike, kishat muze dhe shtëpitë e personaliteteve të shquara, janë ngritur në fund të viteve ‘800 kur udhëhiqnin austriakët.
Ndërtesat e zbukuruara u kujtojnë vizitorëve kryeqytetin austriak, Vienën. Ndërtesat më të reja të ndërtuara gjatë regjimit komunist kanë të njëjtën pamje, uniforme dhe të mërzitshme.
Budapesti është një qytet shumë i madh dhe kuriozitetet nuk mund të shuhen duke e përshkuar në këmbë. Transporti në Hungari është i shumëllojshëm dhe nga më modernët. Ka disa linja metrosh, tramvaje, autobuzë, minubuzë, trena dhe taksi. Kudo gjen tabela dhe harta të Budapestit ku shënohen me ngjyra të ndryshme, linjat që duhet të marrësh për të vizituar vendet që do.
Çfarë nuk duhet të humbisni nga Budapesti
Nuk mund të kuptohet një vizitë në Budapest, nëse nuk viziton Kështjellën e Budës dhe lagjen e saj. Një pjesë të madhe të kodrës së Kështjellës e zë Pallati Mbretëror, i cili u shkatërrua plotësisht gjatë pushtimit turk. Otomanët vendosën aty disa topa të mëdhenj që me dy të shtëna mund të shkatërronin gjithë qytetin. Gjatë Luftës së Dytë Botërore pjesa e brendshme e pallatit u dogj, por më pas u rindërtua në vitin 1970 dhe në të gjenden Galeria Kombëtare, Muzeu Historik i Budapestit, Biblioteka Kombëtare dhe Muzeu i Arteve Bashkëkohore.
Lagjia e Kështjellës është një nga pikat më të bukura për shëtitje romantike. Pallatet elegante të silit barok dhe zopf janë kujtime nga pushtimi turk. Kisha Mattia është një dëshmi tjetër e këtij pushtimi, ndërsa muret janë zbukurar me afreske dhe portete të shenjtëve, Krishtit dhe Shën Mërisë, xhamat janë të zbukuruara me pashallarë të rrethuara nga gra që u shërbejnë. Në krah të saj dhe në qendër të sheshit është monumenti i stilit barok i Holy Trinity (simboli i atit, birit dhe shpirtit të shenjtë), në krahun tjetër ngrihet Bastioni i Peshkatarëve, një kështjellë e vogël prej guri të bardhë me shumë rrugica, shkallë të gurta dhe pika vrojtimi.
Sheshi i Heronjve dhe Muzeu i Arteve të Bukura
Përgjatë rrugës Andrassy, rruga e parë metropolitane me të vërtetë elegante, përveç vilave të bukura të përfaqësive të huaja gjendet edhe Teatri i Operas, ndërtim i hershëm zbukuruar me afreske të piktorëve më të famshëm të asaj epoke. Teatri i Operas dhe Akademia e Muzikës janë sinonimi i elegancës, por nuk mungojnë edhe pubet, teatrot, klubet e natës që ofrojnë argëtim pa fund për të gjithë.
Rruga Andrassy mbyllet me Sheshin e Heronjve ku ndodhen dy muzeume: i Arteve të Bukura dhe i Artit Modern, dy ndërtesa të mëdha të silit klasik të vendosura përballë njëra tjetrës. Është për të përmendur Muzeu i Arteve të Bukura, një nga më të mirët në Evropë, pasi mban koleksione të manitshme të skulpturave greko-romake, por edhe piktura nga emra të mëdhenj si Rafaelo, Tiziano, Veronese, Rembrandt.
Në qendër në hapësirën midis dy muzeve lartësohet monumenti Milenium, ku paraqiten me mjeshtëri të gjithë heronjtë kombëtarë hungarezë. Portetet e tyre të punuara në bronx, paraqesin heronjtë legjendarë në pozicione luftimi, hipur mbi kuaj dhe karoca me shpata në dorë.
…Shëtitja përgjatë lumit, urat dhe Ishulli i Margaritës
I parë nga lart çdo qytet, të jep një pamje tjetër të tijën. Në rastin e Budapestit, pamja është krejt speciale, sepse bukuria e tij qëndron në harmoninë e bukurisë natyrore dhe asaj arkitektonike. Panorama ndryshon nga këndvështrime të ndryshme, nga kodrat, urat kishat dhe kullat dhe të gjitha janë njësoj tërheqëse.
Në majë të një kodre është vendosur Statuja e Lirisë, monument tipik komunist me lartësi 14 m. Urat mbrojtëse rreth e qark monumentit si dhe ujvara poshtë tij, falë sistemit modern të ndriçimit ofrojnë një spektakël të mahnitshëm. Ura e Elisabetës, një nga më të dëgjuarat, u ngrit për nder të mbretëreshës së vrarë më 1898 dhe e rindërtua në 1964 me harqe moderne dhe statuja në të dyja anët.
Ishulli i Margaritës, quajtur këshu për nder të vajzës së flijuar në të nga i ati,shtrihet midis dy urave Margarita dhe Arpad dhe është parku më i bukur i Budapestit. Në të mund gjeni përveç shtëpisë muze, shumë bare, restorante dhe motele me pishina. Nëse doni të përshkoni ishullin, do të gjeni biçikleta me qera dhe udhëtimi përgjatë tij do të jetë i paharrueshëm.
….Qyteti i burimeve termale dhe jetës së natës
Dy gjërat që do të hasni më shpesh në Budapest janë burimet termale dhe klubet e natës. Kryeqyteti i Hungarisë ka një pasuri burimesh termale unike në shkallë botërore. Në 14 vende shpërthejnë rreth 123 burime termale. Banjoja termale Lukacs është pishina më e preferuar e artistëve hungarezë, ndërsa banjoja Gellert është një nga më elegantet.
Klubet e natës janë po kështu shumë të përhapura, ato gjenden edhe në mes të qytetit anës rrugëve kryesore, por edhe në kodrën e kështjellës dhe në periferi. Përveç tyre ka edhe shumë restorante me muzikë, klube xhazi etj.
Kuzhina hungareze është shumë e mirë dhe e pasur. E veçanta e saj është përdorimi i tepërt i esencave djegëse. Përsa i përket pijeve, askush nuk mund të largohet nga ky vend pa blerë një shishe Unicum, pija e famshme kurative hungareze. Restorantet ku mund t’i shijoni të gjitha këto janë të shumtë, por për ata që të ngrënit e quajnë sfidë, eskperienca në restorantin Fatal, me porcione të jashtëzakonshme ushqimi, do të jetë e paharrueshme.

Imazhe te Ngjitura

budapest1.jpg (70.8 KB, 115 vezhgime)

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Kroacia

Kroacia, vend i vogël për pushime të paharrueshme

Pak vende në botë mbartin kaq shumë diversitete natyrore dhe gjeografike në një sipërfaqe të vogël si Kroacia. Për këtë arsye, shumë njerëz e konsiderojnë Kroacinë si një nga vendet më të bukura. Kroacia nëpërmjet ndryshimeve ekzistuese midis veriut, jugut bregdetit dhe zonës kontinentale ofron aventura, varietete dhe bukuri të rralla. Por mbi të gjitha ajo që e bën Kroacinë një vend që të gjithë ëndërrojnë ta vizitojnë është mikpritja.
Sipas pozicionit gjeografik, Kroacia është vend i Evropës Juglindore, vend mesdhetar.
Si një vend turistik, është i njohur për bukuritë natyrore, dhe për bregdetin tepër të thyer me rreth 1 185 ishuj të madhësive të ndryshme.
Kroacia ka 2 600 orë me diell në vit, gjë që e bën atë vendin më me diell në të gjithë Evropën. Falë pozitës gjeografike, ku në njërën anë të saj gjenden alpet dhe nga ana tjetër deti Adriatik, si dhe për shkak të lumenjve të shumtë që e përshkojnë këtë vend si; Una, Kupa, Sava, Drava dhe Danubi, Kroacia është një vend me klimë shumë të ndryshueshme dhe me florë dhe faunë të pasur. Zona bregdetare që laget nga deti Adriatik si dhe kodrat me pyje të pasura e bëjnë këtë vend të ketë dy lloj klimash: mesdhetare dhe kontinentale. Moti karakterizohet nga vera e nxehtë, shumë ditë me diell dhe nga dimri i butë dhe me shi. Kështu ishulli Hvar (ka një temperaturë mesatare prej 8.7 oC në janar) dhe ka 2718 orë me diell në vit ndërsa Dubrovnik-u ka 2584 orë. Gjëja më karakteristike dhe më e çmuar e natyrës është deti blu.
Turizmi veror- Pjesa më e madhe e ndërtesave dhe komplekseve turistike është vendosur në bregdet, i cili fillon nga Savudria në veri dhe vazhdon në Prevlaka në jug. Gjatë sezonit të verës turistët mund të qëndrojnë në hotele të këndshme, apartamente si dhe kampe turistike. Natyra e paprekur dhe deti i pastër janë diçka që rrallë mund të gjendet gjetkë. Sezoni i plazhit në këtë vend zgjat katër deri në pesë muaj, me një temperaturë mesatare prej 24 gradë celcius. Plazhet e pastër në ishujt më të mëdhenj të Kroacisë janë të përsosur për ata që pëlqejnë rrezet e diellit. Ishujt si: Kërk, Cres, Brac, Hvar, Pag, Korcula, Vis dhe Kornati janë ndër më të mëdhenjtë. Ka gjithashtu një numër gjiresh shumë piktoreskë, ku ndër më të njohurit përmendim; Gjirin e Kvarner-it dhe atë të Sibenik-ut.
Një udhëtim përgjatë bregut është një aventurë e paharrueshme. Mund të fillohet që nga Istria, gadishulli më i madh i Kroacisë, për të vazhduar me pikat e tjera shumë të bukura turistike si: Rovinj, Pula dhe Motovun. Lista e vendeve që ia vlen të vizitosh është e pafund dhe të shkruhen të gjithë është pothuaj e pamundur, por këtu po japim disa nga më kryesoret. Më në jug janë; Opatija, Primosten, Solin, Split, Makarska dhe Dubrovnik. Secili nga këto ka stilin dhe karakteristikat e tij dhe mund ta bëjë qëndrimin tuaj në këtë vend diçka të paharrueshme. Po ashtu deti Adriatik të ofron një pamje interesante dhe shumë tërheqëse, Bukuritë e tij mund të shijohen me tragetet e shumta dhe motoskafet që përshkojnë bregun.

Burimet termale – Një numër i madh burimesh termale dhe qendrash mjekësore janë gjithashtu një mundësi e mirë për turistët. Në pjesën kontinentale ka një sërë burimesh termale dhe qendra shëndeti p.sh në; Daruvar, Lipik, Krapina dhe Tuhelj në afërsi të Zagrebit. Qendra famoze shtrihen edhe përgjatë bregdetit.
Alpinizmi – Në Kroaci nuk mungojnë as zonat malore. Alpinistët kurajozë mund të tërhiqen nga kodrat e zhveshura pa bimësi, ndërsa për turistë të tjerë një udhëtim midis kodrave me pyje mund të jetë me të vërtetë çlodhës. Pikat dhe kampet e ngritura për këtë qëllim tregojnë për një traditë të vjetër aplinizmi.
Turizmi dimëror - Edhe pse Krocia ka kushte të përshtatshme për zhvillimin e sporteve të dimrit ky lloj turizmi nuk ka mundur ende të bëhet fitimprurës. Zonat e skive janë lokalizuar në Platak, liqenet Plitvice, Medvednica dhe afër Zagrebit.
Turizmi fetar - Katolicizmi ka ushqyer gjithmonë traditën e pelegrinëve nëpër vendet e shenjta të Koracisë. Kishat më të bukura ndodhen në Marija Bistrica, Tërsat afër Rjekas , Aljma e të tjerë.
Gjahu- Të apasionuarit pas gjahut do të kenë një arsye më shumë për të kaluar pushimet e tyre në Kroaci, ku ky aktivitet përbën një lojë të madhe (me 70 000 derra, drera, arinj etj). Në të gjithë Kroacinë ka rreth 768 zona gjahu.
Të dashuruarit pas natyrës, kur të vizitojnë rajonin më pyjor të Gorski Kotar-it do ta ndiejnë veten si në shtëpi. Pyjet mbulojnë rreth 63 përqind të zonës dhe flora është e pasur me varietete të shumta. Ndërsa i ngjitesh këtyre pyjeve mund të vëzhgosh një peizazh për ta pasur përgjithmonë në kamerat tuaja.
Fshatrat e Kroacisë
Ka kaq shumë gjëra të bukura për të parë dhe vizituar në Kroaci, vende që rrallë i gjen në ndonjë vend tjetër. Kroacia ka rreth 300 zona natyrore që mbrohen me ligj. Kujdesja dhe pasurimi i tyre ka filluar që një shekull më parë, gjë që dëshmon dëshirën e madhe të popullit kroat për të ruajtur bukuritë natyrore. Këtu po përmendim vetëm disa prej tyre, por ama të gjitha vlejnë të vizitohen. Kroacia ka shtatë parqe natyrale: ishujt Brijoni, ishujt Kornati, ishulli i Mlijetit, Ujëvarat e Kërkas, Kanioni i Paklenicas, Liqenet Plitvice dhe mali Risnjak. Këto parqe zënë rreth 76310 hektarë tokë.
Peshkimi - Ujërat e pastra të Koracisë janë të pasura me rreth 200 lloje peshqish. Shoqatave të peshkatarëve iu lejohet të peshkojnë sipas rregullave dhe në territoret e përcaktuara. Gjithçka është rregulluar me ligj; sasia maksimale e peshqve të kapur në ditë, ndalimi i peshkimit me eksploziv apo lëndë kimike, ndalohet gjithashtu edhe peshkimi në rezervate. Pra, nëse do t’ju pëlqente të peshkonit, duhet të kërkoni më parë informacion; ku dhe si.
Monumentet kulturore dhe historike
Kroacia ka një trashëgimi të pasur kulturore. Përveç kësaj, gjatë rrugës së saj historike ajo ka huazuar edhe nga kulturat e tjera. Kjo e bën atë një vend shumë tërheqës për turistët që janë të interesuar për historinë, arkitekturën dhe teatrin. Shumë objekte kulturore kanë mbetur aty të paprekura që nga koha e grekëve romakëve dhe mesjetës: si nëpër muzeume, kisha dhe ndërtesa të tjera të vjetra me vlerë arkitekturore.
Në shumicën e fshatrave ndeshim rrënojat e kështjellave, kishave apo xhamive të një kohe shumë të hershme. Shumë kisha katolike romake simbolizojnë trashëgimninë kulturore të popullit kroat dhe shfaqin bukurinë e vlerës historike të këtij vendi dhe rolin e tij në rajon. Kisha e Kryqit të Shenjtë në Nin, u ngrit në fillim të shekullit të XI-të dhe në vitin 1887 ajo u shpall si katedralja më e vogël në botën e krishterë. Kisha “The Holy Trinity” në Split u ngrit gjithashtu midis shekullit të IX dhe XI, Kisha e Shën Peter-it në Omis në shekullin e X.
Ka disa qytete në Kroaci që mund të konsiderohen muze më vete. Këto qytete janë të pasur me monumente kulturore dhe urbanizmi në qendër të tyre është i vjetër dhe i konservuar me kujdes. Qytete që i përkasin kësaj kategorie janë; Pula, Motovuni, Zadari, Sibeniku, Spliti dhe Dubrovnik.
Restorantet dhe baret
Kroacia ofron një pafundësi restorantesh dhe baresh me ushqime dhe pije tradicionale. Bar-kafetë dhe diskoklubet ju ofrojnë mundësi argëtimi deri në orët e para të mëngjesit me muzikën e larmishme dhe moderne.

Imazhe te Ngjitura

croatia.gif (140.7 KB, 108 vezhgime)

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Kopenhagen

Kopenhageni , kryeqyteti i ftohtë i njerëzve të mirë

“Pak dekada mirëqënieje materiale dhe kujdesi të një qeverie më tepër se atërore, duket se e kanë rraskapitur shpirtin e racës vikinge, e cila ka mbi supe 1500 vite të një historie të pavarur dhe energjike. Danezët nga vikingë të lindur në liri dhe tipa të vështirë u transformuan në një racë të butë dhe të ëmbël”- 1939 Kopenhagen, diplomat Britanik


Me një histori të pasur, evidente në ndërtesat historike dhe rrugët antike, me dyzinën e një bote me muzeume klasike dhe galeri, koshtet e mrekullueshme të Tivolit dhe një monarki të qëndrueshme, një nga më të vjetrat në botë, kryeqyteti danez ofron një pafundësi tërheqjesh për të gjitha shijet.
Kopenhageni nuk është muze pa jetë, por një qytet i gjallë, modern ku e kaluara mahnitëse bashkëjeton me fjalën e fundit të arkitekturës. Nga ana arkitekturore, Kopenhageni ka shumë pjesë interesante, që nga pallatet administrative të Christianborg Slot në ishullin Slotsholmen tek kullat skenike të Vor Frelsers Kirk. Por mbi të gjitha, Kopenhageni është një nga kryeqytetet me urbanisitikën më të bukur në botë, që reflektohet në ndërtesat e reja dhe dyqanet mbresëlënës. Ai prezanton bukuritë e tij në një kornizë ujore, që e bën atë një nga qytetet më të bukur të Evropës veriore.
Kryeqyteti i Danimarkës për pothuaj 600 vite mbetet qyteti më i madh në Skandinavi. Qyteti duket si një shëtitore pa fund këmbësorësh, me dyqane të shumta dhe mundësi të ndryshme argëtimi, rrugë teatrore dhe teatro të hapura. Parku i Tivolit ofron kënaqësi pa fund në një formë më tradicionale, ndërsa lagja kosmopolitane latine, të shtyn drejt kafeve aromatike. Dhe nëse ndihesh më shumë energjik, një hap për nga parku Kristiana, të mbush me adrenalinë për të çuar më pas në një shëtitje romantike deri tek Sirena e Vogël, që qëndron e vetmuar hipur mbi një gurë të madh pranë detit, në pritje të princit të saj të dashur. Një pamje shumë e këndshme që të mbush me romantizëm dhe një nga simbolet e Danimarkës. Kryeqyteti simpatik danez mbulon pothuaj të gjitha nevojat e një vizitori të huaj dhe këtë e bën, me aromën dhe traditën skandinavase.

Tivoli, një park gjigand lojërash dhe argëtimi
Ka shumë gjelbërim edhe në qendër të qyteteve, një mori parqesh të mëdha dhe kopshtesh, ku mund të shëtisësh, të luash apo të pushosh. Adhuruesit e lojrave dhe argëtimeve, padyshim që do të drejtohen për në Tivoli, parku i lojërave dhe luleve në qendër të kryeqytetit danez. Parku i famshëm ka funksionuar për më shumë se 150 vite, kohë e gjatë për të zgjedhur dhe kultivuar atë që është më e mira në argëtimin e të gjithëve.
Qilimi fluturues, karruseli, shfaqje të hapura për publikun, lojëra karnavale, restorante e fast-foode. Për ata që adhurojnë muzikën ka shfaqje me valle tradicionale popullore, ndërsa në një holl, orkestra dhe trupat e baletit ekzekutojnë pjesë të muzikës klasike ndërkombëtare. Dhe pasi të jeni kolovitur në lojërat e shumta, të keni admiruar lulet shumëngjyrëshe, të keni zbrazur kuletën nëpër kioskat me shumë e shumë gjëra të shijshme në këndin verior të parkut Tivoli, në mënyrën më të qetë argëtimi vazhdon me një shëtitje në pazarin Stroget, një zinxhir i gjatë përbërë prej pesë rrugëve, të mbushura me dyqane dhe restorante, si dhe me një pafundësi teatrosh të hapur.
Kështjella e Hamletit, misteret e saj
Danimarka mund të quhet ndryshe shteti i kopshteve dhe kështjellave. Kronborg është një nga kështjellat më të rëndësishme të Rilindjes në të gjithë Evropën veriore, në të cilën është ambientuar një nga tragjeditë më të famshme, Hamleti. Çdo vit qindra mijëra turistë vizitojnë kështjellën e mrekullueshme. Shumë të ftuar të huaj e lidhin kështjellën e Kronborg-ut me dramën e Shekspirit dhe Hamletin, princin e Danimarkës. Ndërsa për vizitorët danezë, kështjella është një monument historik dhe kombëtar. Më 30 nëntor të vitit 2000, Kronborg iu shtua dhe listës së trashëgimisë botërore të UNESCO-s.
Një histori tjetër interesante lidhet me arrestimin e mbretëreshës së Danimarkës. Princesha Caroline Mathilde ishte vetëm 15 vjeç kur u martua me mbretin Christian VII në 1766, mendërisht i sëmurë. Martesa ishte e palumtur dhe ajo krijoi një lidhje intime me doktorin e mbretit, njëkohësisht pretendent për fronin, Friedrich Struensee. Kur u zbulua në vitin 1772, Caroline Mathilde u arrestua si bashkëpunëtore e tij dhe u burgos në Kronborg. Për pesë muaj me radhë ajo ka qëndruar në dhomën kullë, afër dhomës së mbretëreshës dhe vetëm pas katër muajsh u lirua dhe u detyrua të largohej nga vendi.
Legjenda , Si e zgjodhi Shekspiri kështjellën për të vendosur tragjedinë tij
Princi Hamlet u përmend për herë të parë para 800 vitesh në historinë e Danimarkës, nga Saksonët. Legjenda u ritregua nga Christian Pedersen, versioni i të cilit u shtyp në vitin 1514. Ky botim e përhapi legjendën përtej kufijve të Danimarkës. Në Angli u shkruajt nga Thomas Kyd, ku version i ri i kësaj pjese e transformoi Hamletin rreth viteve 1590 në një dramë hakmarrjeje.
Ndoshta i frymëzuar nga versioni i Kyd-it Uiliam Shekspir shkroi "Historia tragjike e Hamletit dhe princit të Danimarkës dhe Kështjella e Elsinorit” rreth viteve 1600, duke ringjallur princin legjendar sakson. Shekspiri ishte i pari që e lidhi legjendën me Elsinorin dhe kështjellën, kjo ndoshta sepse qyteti ishte një nga më të rëndësishmit në botë në shekullin e 17-të. Elsinor ishte pika kyçe e trafikut të anijeve dhe më pas, ai u bë një qendër kulturore falë kështjellës mbretërore Kronborg. Nuk dihet nëse Shekspiri e kishte vizituar Elsinorin. Por është fakt që shumë aktorë anglezë e skocezë, kanë luajtur pjesë të ndryshme në Kronborg dhe në qytetin e Elsinorit. Ata mund t’i kenë folur Shekspirit për kështjellën vezulluese Kronborg dhe qytetin Elsinor, të cilat e kanë frymëzuar atë për tragjedinë e Hamletit.
Tragjedia “Hamlet” u shfaq në kështjellë për të kujtuar 200 vjetorin e vdekjes së Uilliam Shekspirit. Shumë nga rojet e kështjellës u përdorën për figurantë. Skena u vendos në kullën e telegrafit, në këndin jugperëndimor të kështjellës. Tragjedia është luajtur dhe më pas në kopshtin e këshjellës dhe në zona të ndryshme brenda fortesës. Të gjitha kompanitë teatrore finlandeze, suedeze, norvegjeze, amerikane, irlandeze dhe gjermane, kanë përdorur këtë këshjellë për versionin e Shekspirit, në gjuhën e tyre.
Në kështjellën e Hamletit mund të shkohet me disa linja urbanesh, ose me tren nga stacioni qendror i Kopenhagenit deri në qytetin Elsinor. Nga stacioni i trenit të Elsinorit, për tek kështjella janë rreth 15 minuta në këmbë, mjaft të ndjekësh rrjedhën e ujit, derisa të shohësh kështjellën. Portreti i Shekspirit është në gur në hyrje të kështjellës. Kronborg që atëherë njihet me emrin kështjella e Hamletit dhe Elsinori si qyteti i tij.
Muzeu kombëtar - udhëtim në historinë daneze
Kopenhageni ka një numër të konsiderueshëm muzeumesh. Një nga më të vizituarit për të gjithë ata që dëshirojnë të kuptojnë thellë historinë e dhe kulturën daneze është Muzeu Kombëtar, Nationalmuseet, vendosur midis Tivol-it dhe Slotsholmen. Aty ndodhet koleksioni më i madh i historisë daneze që nga periudha Paleolitike, një nga pjesët më të preferuara të muzeumit, deri në mesin e shkekullit të XIX-të. Ny Carlsberg Glyptotek, një muze tjetër afër Tivolit, u ndërtua në shekullin e XIX-të nga baroni i birrës Carl Jacobsen. Në të gjenden të ekspozuara vepra të artit grek, egjiptian, etrusk dhe roman. Para disa vitesh, me zgjerimin e muzeut janë vendosur aty vepra të piktorëve si Gauguin, Renoir, Monet and Degas. Përveç ndërtimeve historike, qyteti ka gjithashtu edhe struktura të reja dinamike, që vlejnë të adhurohen si monumente, psh zgjatimi i Librarisë Mbretërore, që njihet ndryshe si Diamanti i Zi. Një muze tjetër i rëndësishëm dhe i bukur është Muzeu i Artit Modern.
Slotsholmen, ishulli i vogël qeveritar
Nuk është Manhatan, por një ishull i vogël në qendër të qytetit që lidhet me Kopenhagenin nga një numër urash të vogla. Quhet ndryshe shtëpia e qeverisë. Banorët e këtij ishulli janë kryesisht politikanë dhe qeveritarë. Por Slotsholmen tërheq edhe vizitorë, të cilë janë kuriozë të shohin zyrat qeveritare të kompleksit Christiansborg Slot. Pallati origjinal u ndërtua në vitin 1730, për të zëvendësuar kështjellën e vjetër të Kopenhagenit me një kompleks ndërtesash, kur përfshihen dhoma e parlamentit. Sallonet mbretërore të pritjes, që ilustrojnë madhështinë e periudhës së rilindjes, përdoren për banketet mbretërore me përfaqësuesit e lartë të shtetit. Pallati është ngritur mbi rrënojat e dy kështjellave të vjetra.
Një vizitë në komunitetin e lirë Kristiania
U themelua shekullin e XVII-të si një qendër tregtie dhe si një tokë lidhëse e kryeqytetit danez me vizitorët jo miqësorë nga kontinenti europian. Ky vend i rrethuar nga kanale të shumta, është streha e një sërë artistësh dhe hipish. Një nga objektet më me vlerë të kësaj lagjeje është Kisha e Shenjtë e gjatë 95 m, nga spiralja me shkallë e së cilës admirohen panorama të mrekullueshme të qytetit. Në veri të kësaj lagjeje ndodhet dhe muzeu naval i mbretërisë daneze, ku ekspozohen 300 modele anijesh që nga anijet e vikingëve, deri tek ato modernet e shekujve të fundit. Në pjesën lindore jeton një komunitet i vetëquajtur progresiv që mban të njëjtin emër Kristiania. Në fillim zona ka qenë një kamp ushtarak i braktisur që u pushtua në vitin 1971 nga pionierë ambiciozë, që pretendonin për një shtet të lirë. Edhe pse nuk e ka arritur anjëherë pavarësinë dhe ka luftuar për një kohë të gjatë me pasojat e pashmangshme të përdorimit të pakufizuar të drogës së rëndë, Kristiania gëzon statusin e një enklave pa taksa dhe të një ambjenti ku arti lulëzon.
Kopenhagen, model civilizimi
Jeta e natës në Kopenhagen është shumë e pasur me variacione. Për të mundur të ftohtin e madh, (në gusht temperatura arrin vetëm 20 gradë dhe kjo është koha e plazhit), danezët bëjnë një jetë nate shumë aktive. Klubet e natës, diksot, klubet e xhazit apo rrymave të tjera muzikore janë të panumërta. Danezët investojnë për një gjallëri të jetës seksuale, duke mirëpritur dhe lidhur martesa me race të tjera, të zezë apo të verdhë. Njëkohësisht aty është legalizuar edhe martesa midis personave të të njëjtit seks.
Në çdo dy hapa rrugë mund të shohësh vajza ose djem danezë, që kryesisht janë shumë të bardhë, bjond me sy bojëqielli të shoqëruar me afrikane dhe japonezë, apo lindorë të tjerë. Nëpër rrugët kryesore ka një mori klubesh nate, klubesh gay apo lezbikesh, ku njerëzit janë të lirë të argëtohen.
Përsa i përket rymave muzikore, Kopenhageni ka famë ndërkombëtare për klubet e xhazit, ka gjithmonë rradhë të madhe jashtë klubit dhe këngëtarë në moshë shumë të re, i këndojnë mrekullisht bukur perlat e muzikës xhaz. Mund të përmendim këtu Copenhagen Jazz House me shfaqje tepër cilësore, në një atmosferë intime. Por nuk mungojnë edhe klubet e rokut apo bluzit.
Ushqimi danez, një shije e çuditshme
Shumë vizitorë ankohen për ushqimin danez, kjo sepse danezët parapëlqejnë t’i përziejnë kripën dhe sheqerin. Nuk mund të jesh kurrë i sigurt, se ajo që ke përpara është e kripur apo e sheqerosur, e ëmbël apo e hidhur. Por kjo ndodh më shpesh në restorante luksoze, psh në D’Agnlehterre, i cili bën pjesë në vargun e hoteleve më të mirë në botë. Në pjata shumë të mëdha të hapura të seviren katër salcëra të ndryshme në formë cilindrash të vegjël të vendosur në mes, zbukuruar me ca fije dhe me ndonjë gjethe apo ndonjë kokërr, që nuk mund ta cilësosh se kujt frut i përket, dhe kjo është dreka më e shtrenjtë.
Ata që janë mësuar të hanë shumë, mund të vazhdojë të mbushin stomakun e tyre me bukë dhe pakot e vogla të gjalpit. Në restorante më të thjeshtë, hahet më mirë dhe porcionet janë normale. Edhe prodhimet e detit janë shumë të përdorura, por danezët e preferojnë peshkun me sheqer. Ushqimi më i mirë në Danimarkë është padyshim djathi; nuk numërohen llojet e tij dhe shijet janë nga më fantastiket. Danezët kanë një traditë të pasur edhe në gatimin e bukës, e cila mbushet herë më hudhra, herë me karrota, herë është e zezë herë e bardhë, por të gjitha me një shije dhe erë shumë të mirë.

Imazhe te Ngjitura

copenhagen-channel.jpg (106.6 KB, 96 vezhgime)

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Strasbourgu

Magji dhe aromë Krishtlindjesh nga Strasbourgu

Strasbourg, qytet magji, kryeqëndra e Evropës, qyteti i Katedrales më të bukur në botë, kryeqendra e guzhinës evropiane.

Strasbourg, kryeqyteti intelektual, artistik dhe ekonomik i Alzasës. Strasbourg ka fuqinë, atmosferën dhe tërheqjen e një kryeqendre pa patur përmasa të tilla gjeografike dhe demografike. Eshtë një qytet që nuk të lodh kurrë sepse sa herë kthehesh në të gjen diçka të re për të parë dhe diçka thelbësore për të thënë.
Qendër ku kanë selinë Këshilli i Evropës dhe Parlamenti Evropian, Strasbourg është një qytet ideal për të organizuar një kongres apo seminar me rëndësi dhe famë ndërkombëtare. Në planin kulturor, pasuria e koleksioneve të Muzeve te Strasbourgut, shkëlqimi lirik i Operas së Rhinit, programet ambicioze të teatrove janë të njohura dhe të vlerësuara në të gjithë botën.

Një qytet i lashtë, i kompozuar me një dekor harmonik, ku elementet më të vyer janë Katedralja dhe Petite France. I njohur në mbarë botën për gastronominë e tij, Strasbourg është gjithashtu kryeqendra e atyre që dëshirojnë të hanë mirë si e famshmja foie gras- kremi prej melçie pule apo viçi, verërat e Alzasës, çokollatat, rakia prej rushi, të cilat kënaqin oreksin e atyre që dinë të hanë mirë, të ardhur nga e gjithë bota.
Urdhëroni në Strasbourg në çdo stinë të vitit dhe zbuloni hotelet më të mira, baret dhe kafenetë e këndëshme, shëtisni me anije mbi kanalin që formon lumi Rhin dhe zbuloni një qytet magjik gjatë natës.

***
Si të shkoni në Strasbourg? Asgje më të lehtë se kjo nuk ka. Me avion, tren apo autoveturë, qyteti është vendosur në mënyrë ideale në kryqëzimin e rrugëve komunikuese më të rëndësishme të Evropës.
Ka nga ata që harrojnë se Strasbourg është gjithashtu kryeqyteti i Evropës, i Evropës politike sigurisht dhe kjo nuk është pak për një qytet me 400.000 banorë që parizienët ende e quajnë provincë…
Me mbarimin e Luftës së Dytë Botërore, më 1949 u hodh ideja e pajtimit evropian që çoi në krijimin e Këshillit të Evropes. U zgjodh Strasbourg si qendër e tij nisur nga pozicioni i tij strategjik por edhe nga historia e lavdishme e pajtimit të Francës me Prusinë, ku ai i kaloi francezeve pas luftës së parë botërore. Sot Këshilli i Evropës, organizatë ndërqeveritare politike, grupon 40 demokraci: Shqipërine,Gjermaninë, Andorën,Austrinë, Belgjikën, Bullgarinë, Qipron, Danimarkën, Spanjën, Estoninë, Ish Republikën Jugosllave të Maqedonisë, Finlandën, Francën, Greqinë, Hungarinë, Irlandën, Islandën, Italinë, Letoninë, Liechtensteinin, Lituaninë, Luksemburgun, Maltën, Moldavinë, Norvegjinë, Hollandën, Poloninë, Portugalinë, Rumaninë, Britaninë e Madhe, Rusinë, San Marinon, Sllovakinë, Slloveninë, Kroacinë, Suedinë, Zvicrën, Republikën Çeke, Turqinë dhe Ukrainën.
Të gjitha këto vende formojnë asamblenë parlamentare për të debatuar mbi përdorimin e drejtë të demokracisë. Strasbourg pret gjithashtu Parlamentin Evropian, i vendosur në vitin 1997 në një ndërtesë të re, madhështore gjysëm ciklike ultramoderne të ndërtuar posacërisht për Parlementin Evropian. Ai prêt gjithashtu Gjykatën dhe Komisionin Evropian të të Drejtave të Njeriut, organ gjyqesor i Këshillit të Evropës krijuar me 1959. Kështu Strasbourg ndan së bashku me New Yorkun dhe Gjenevën privilegjin e të qënit qendër e organizatave ndërkombëtare pa qenë kryeqyteti i vendit.
Qyteti i dytë diplomatik në Francë, pret sot 71 perfaqësi diplomatike dhe konsullore.

Jeta…
Të jetosh në Strasbourg është si të zhytesh perhere në një banjë artistike dhe kulturore të nxehtë. Çdo ditë qyteti buzë Rhinit propozon një spektakël, një ekspozitë, një koncert, një festival… Të krijosh , të interpretosh, të tregosh, të kalosh… Për të prekur, argëtuar, për të ngjallur mendime dhe për të cuar drejt të pakapshmes kufijtë e imagjinatës.
Ja roli përparësor i Artit dhe Kulturës në Strasbourg.



Katedralja e Strasbourg.

Kanë thënë për të:

Stendhal: Katedralja e Strasbourgut është një nga monumentet më mbresëlënës që kam parë ndonjeherë.

Goethe: Sa më shumë admiroj fasadën e katedrales, aq më shumë më përforcohet përshtypja e parë që krijon falë një harmonizimi të përkryer të lartësisë me bukurinë.

Viktor Hugo: Portat e kishës janë të bukura sidomos porta e stilit roman. Ka mbi fasadë figura të mrekullueshme personash të hipur mbi kuaj, trëndafili i madhërishëm i prerë në mes, e gjithë pamja e kishës, një poemë e thurur me hir. Por triumfi i vërtetë i kësaj katedraleje është këmbana dhe shtiza .është një ndërthurje gurësh me kurorën dhe kryqin e saj. Eshtë magjia që vjen nga kombinimi i gjigandjes me delikaten. Kam vizituar Chartres, Anvers, poë më mbetej pa parë Strasbourgu… Nga këmbana pamja është e admirueshme. Ke Strasbourgun në këmbët e tua, qytet i lashtë me catitë e qëndisura, me shumë kisha me një pamje kaq piktoreske sa asnjë qytet tjetër nuk të ofron.

Katedralja e Strasbourg ngrihet mbi një shesh të madh të kalldrëmtë si në Mesjetë. Ajo mbështetet në themelet e një kishe të lashtë rheniane e ndërtuar me 1015 nga abati Ëernher, i familjes se Hasbourgeve. Shkatëruar nga një zjarr, ajo u zëvëndësua me katedralen e re. Kaluan pothuajse tri shekuj që themelet e hedhura në 1176 të mbaronin me shtizën në majë më 1439. E lartë 142 metra bëri që Notre Dame e Strasbourg të konsiderohej si ndërtea më e lartë kristiane deri në shekullin e 19-të.


Tregu i Krishtlindjeve

Në palcë të dimrit, hajdeni të ngroheni në Strasbourg. Atmosfera që mbretëron që nga 30 Nëntori në Strasbourg është e vecantë, e jashtëzakonëshme.
Sidomos në mbrëmje, ku qyteti zhytet në atmosferën blu të natës që magjia mbretëron: vitrinat shkëlqejnë, dekorimet zbukurojnë fasadat, erërat orientale të sjellin ndërmend femijërinë, këngët e Krishtlindjeve jehojnë nga zemra e kishave, pantomimat ngrejne moralin tek gjithkush që kalon nëpër këtë treg.

Kjo ndodh në Strasbourg dhe është e paharrueshme.

I mrekullueshmi Christkinddelmarik

Ky treg i Krishtlindjeve është kaq i vecante, dhe shtrihet në shumë sheshe të qendrës së qytetit dhe kjo ndodh sivjet për 426-tën herë. Dhe banorët e Strasbourg i mbeten besnikë si kurrë ndonjëherë. Qindra artizanë i propozojnë vizitorëve dhurata origjinale dhe objekte tradicionale për të dekoruar bredhin e tyre. Gjen gjithshka: xhingla-mingla, ëmbëlsira,verë të nxehtë, erëza, petulla

Një bredh i madh sa dhe ngjarja.

Përfytyroni një bredh të lartë me shumë se 30 metra që është vendosur në qendër të qytetit në të famshmen Place Kleber. Ata që e kanë parë nje vit më parë e kujtojnë ende sot. I dekoruar si traditë nga artistja Antionette Pflimlin, ai simbolizon madhështinë dhe paqen e qytetit.

Vatha e madhe e Provincës

Një udhëtim i paharruar në zemër të Provincës të shekullit 19-të, falë efekteve vizuale, zanore . 300 shenjtorë tregojnë jetën e qyteteve dhe fshatrave dhe ju ftojnë të dëgjoni tregimet tradicionale.

Tregu i Bredeleve – kolendrave

Prodhimi i kolendrave, ëmbëlsirë e vogël është bërë tashmë pjesë e traditës së festimit të Krishtlindjeve të Alzasës. Në forme ylli, zilke, njeriu apo bredhi, ato shpërndajnë aromat e kanellës dhe lajthisë së bluar në rrugët e qytetit. Shijojini dhe nuk keni për t’i harruar kurrë.

Koncertet e Krishtlindjeve

Nuk ka Krishtlindje të gëzuara pa muzikë të bukur: për ju Strasbourgu pasqyron të gjithë shpirtin e tij. Orkestra dhe kore, klasike dhe jazz, … më shumë se 50 koncerte ofrohen në atë periudhë.

Krishtlindjet e fëmijëve

Më llupësit nuk do të harronin kurrë të merrnin pjesë dhe të shijonin Shëtitjen e Cokollatave, një shëtitje e gëzuar me anije rreth Strasbourg.

Dhe në stacionin e trenit të Strasbourg fëmijët kanë takim me Plakun e Krishtlindjeve, në galerinë e bukur të En-verre, ku ftohen të dëgjojnë përrallat e mrekullueshme dhe të marrin tramvajin për një udhëtim argëtues dhe në trenin e Babagjyshit të Krishtlindjeve animimet teatrale ju presin.



Monumentet e Strasbourgut

Pallati Rohan

Pallat i lashtë i peshkopëve të Strasbourgut që ka marrë emrin nga familja që përmbushte funksione të larta fetare nga 1704 deri në 1789. Ndërtimi i tij është bërë nga 1731 deri më 1742. Nga viti 1898 ky pallat është shëndruar në seli të muzeve bashkiake. Më 11 gusht 1944 ndertesa u dëmtua rëndë nga një bombardim i aviacionit amerikan.

Dogana e vjetër

Që nga shekulli i 12-të Strasbourg specializohet në tregëtinë transit dhe ky trafik është rritur deri në shekullin e 16-të. Këtu ndërtohen shumë anije dhe ajo shërben gjithashtu për prodhime që duhet të tatimohen dhe të rihidhen në shitje. Në gusht 1944 edhe kjo ndërtesë u dëmtua rëndë nga bombardimet. U restaurua më 1956 dhe që atëhere përdoret si restorant dhe seli e ekspozitave të ndryshme të qytetit.

Kisha Shën Tomas

Kisha më e madhe e qytetit pas katedrales paraqet një aspekt me të vërtetë kishtar. Eshtë një nga ndërtesat e stilit gotik më të bukurat e qytetit. Ka statuja të bukura dhe në shekullin e 18-të, absida u modifikua dhe u shëndrua në një varr të bukur me skultpura për Marshallin Saxe, heroin e luftrave koloniale.

Petite France (Franca e vogel)

Pranë qendrës së qytetit, pas taracës panoramike të Vaubanit ajo ndahet në pesë krahë drejt veriut duke formuar një gji në kanalin e Rhinit. Njihet si lagja e lëkurpunuesve, tani qoshe e restoranteve në modë dhe e romantikëve që vizitojnë qytetin.

Arti i të gatuarit

Arti i të jetuarit shpesh identifikohet me artin e të ushqyerit, ata kanë së bashku një bashkëjetesë të përkryer. Pjata dhe ushqimet e përgatitura me produktet e tokës së Alzasës janë unike në llojin e tyre. Strasbourg është shumë I njohur për verërat e tij,birrën dhe choucroute (ushqim I përgatitur me lakër turshi, salcice vici dhe proshuta të ndryshme, të përgatitura në enë balte)Por edhe specilitete të tjera të kujtojnë gatimet e kohës së shkuar. Këto gjellra shijohen në të ashtuquajturat ëinstub, restorante tipikë të Strasbourgut të vendosura në një atmosferë intime dhe ambjent tepër te ngrohtë . Fama gastronomike e Strasbourgut ka themele tepër të fuqishme , ku pëmendet e famshmja mëlci pule apo derri e përgatitur në tym dhe që shërben si garnityrë e shumë pjatave. Në këto restorante hahet mirë, si nga pikpamja e cilësisë ashtu edhe e sasisë. Cdo pjatë shoqërohet me verërat dhe birrën e famshme Krohnenburg, butet e të cilës happen më 1 mars.
Verërat që këshillojmë janë :
Sylvaner, më e lehtë, serviret me proshuta, sallatra ose peshk
Rieslingu,ose Pinoti që degustohen me choucroutën, shpendët ose mishrat e pjekur
Së fundi, aroma e kadifenjtë dhe shija me aromë frutash e Geëurztraminer ose Muskatin që shoqërojnë mrekullisht pasticerinë e Strasbourgut, e njohur për tortat me fruta dhe cokollatë. Brioshët me rrush të thatë, kolendrat e Krishtlindjeve, e famshmja buka Stolle dhe galeta e mbretërve me paranë Brenda që konsumohet ditën e ujit të bekuar.

Strasbourg ka një numër impresionues restorantesh si Hani i Illit, restoranti i Krokodilëve, të famshmët ëinstub-qoshet ku pihet verë që reflektojnë më së miri artin e të jëtuarit në Strasbourg, vera shërbehet në poce balte gjithë ditën dhe shoqërohet me meze të lehta.
Shtëpia tipike që daton në shekujt 15 dhe 16-të ka një morfologji të vecantë: një cati e mbuluar me tjegulla të sheshta, fasadë me kulm dhe fole pëllumbash, korniza të theksuara druri nëpër dritare dhe ballkone të zbukuruara në brendësi me dru të gdhendur. Ballkone të lulëzuar në tëgjitha stinët edhe pse klima në dimër është tepër e ashpër.
Kostumi tradicional është shprehje e foklorit tepër të gjallë me fustanin plot fjongo dhe kapucët me dantella. Në oborrin e Kështjellës së Rohanit, në korrik dhe në gusht një shfaqje vallëzimesh foklorike lejon të zbulohen valet dhe shumëllojshmëria e kostumit te Alzasës. Strasbourg ofron vizionin e një bote tëmrekullueshme, mbushur me magji, bukuri, mistere dhe bashkëjëtesë përzihen në intimitet.


Informacione të dobishme:

- email :
- telefon : 03 88 52 28 28
- Zyra e turizmit : Office de Tourisme de Strasbourg et sa Région - 17, Place de la Cathédrale - 67082 Strasbourg cedex
- në rast urgjence :
- téléphone : 03 88 60 90 90
- probleme administrative : Centre Adminsitratif - 1, Place de l'Etoile BP1049/1050F - 67070 Strasbourg

MiniPrezantues te Ngjitur