Një varëse apo një veshje që mbaje kur ai të puthi apo kukulla prej pellushi me të cilën flije kur ishe e vogël, jemi të ndërgjegjshëm apo jo që këto objekte funksionojnë në jetën tonë jo vetëm për të na dhënë kënaqësi, por dhe si objekte fatsjellëse ose hajmali. Ashtu si breshkat, ne kemi nevojë për një zhguall mbrojtës edhe pse të padukshëm, për të mbrojtur brishtësinë tonë. E ardhmja na tremb, kemi frikë nga forcat e padukshme dhe kemi nevojë për shpresë, dashuri dhe lumturi.

Që nga kohët e lashta njeriu ka mësuar ta dallojë atë që është e përgjithshme nga ajo që është e veçantë, sepse ka patur një simbol të veçantë, një ngjyrë apo një formë të pazakontë dhe një vlerë të shenjtë. Praktikisht e veçanta ka një energji speciale që e bën magjike. Gjithçka që na rrethon mund të shndërrohet në një objekt fatsjellës: lule, kafshë, gurë, objekte, shenjë, forma gjeometrike, numra, letra alfabetike, qoftë dhe disa fjalë të shkruara. Një pjesë e madhe e tyre ka në të vërtetë një origjinë të lashtë dhe i shtrin rrënjët gjer tek mitet, tek simbolet e besimit tradicional të një populli apo të një epoke, por ka dhe hajmali mjaft personale, siç është një kukull pellushi dhuruar nga një person i veçantë apo diçka e gjetur në plazh në një ditë të veçantë.

Si funksionojnë?
Janë gjithmonë të njëjtat parime ato që rregullojnë të gjithë mendimin magjik: analogjia dhe kontakti. Sipas të parit mes gjërave apo situatave të njëjta apo të ngjashme, nga simboli krijohet një rrymë energjie që i afron aq shumë deri në identifikim. Për shembull, dashuria dhe simboli i saj zemra, bëhen e njëjta gjë. Mbahet një zemër me vete për të tërhequr dashurinë dhe teksa flitet për dashurinë i referohemi simbolit zemër. Parimi i kontaktit është mjaft intuitiv. Kur objekte, persona, situata apo simbole hyjnë në kontakt, energjia kalon natyrshëm nga njëri tek tjetri. Kështu duke u mbajtur pranë apo më mirë në kontakt me lëkurën një xhingël me formën e zemrës, krijon një urë lidhjeje midis personit dhe tipit të energjisë për të cilën ai aludon që në këtë rast është dashuria.

Cilat janë disa nga hajmalitë më të zakonshme në kultura të ndryshme?

Kryqi
Domethënia: ekuilibër
Funksioni: jep shëndet dhe mbrojtje
Origjina: Mesdheu
Egzistojnë 285 lloje kryqesh dhe të gjithë kanë një funksion mbrojtës, si një bekim. Krishti i martirizuar nuk është domethënia e vetme e tij. Kryqi është simbol i diellit, bashkimi i të kundërtave, pra është një centralizues i fuqishëm i energjisë. Të mbron nga aksidentet, sëmundjet dhe nga takimet e këqija.

Zemra
Domethënia: dashuri
Funksioni: të mbron nga syri i keq
Origjina: Orienti i Mesëm
Në të gjitha kulturat e lashta zemra është qendra e jetës, e vullnetit dhe e inteligjencës. Sot domethënia e jetës është zëvendësuar me atë të dashurisë dhe zemra është bërë një emblemë e besnikërisë dhe premtim i ndjenjave.

Patkoi
Domethënia: mbrojtja
Funksioni: mbron martesën dhe shtëpinë
Origjina: Evropa e Veriut
Falë magjisë së majave të tij që largojnë fushat manjetike negative, patkoi ka qenë i detyruar si dhuratë dasme në mbrojtje të shtëpisë dhe të nuses. Dhe materiali me të cilin është bërë patkoi, hekuri, është konsideruar shumë i fuqishëm. Përveç shtëpisë dhe martesës, patkoi i vendosur në makinë ose në anije mbron nga aksidentet dhe nga rreziqet e detit.

Hëna
Domethënia: grua, kohë
Funksioni: pjellori, shëndet tek fëmijët, kundër zhgënjimeve të dashurisë
Origjina: Mesdheu dhe India
Hëna në formë drapëri aq e dashur për egjiptianët dhe babilonasit e lashtë, sepse përmbledh në vetvete 2 simbole magjike thelbësore: ciklin e fazave lunore që përkon me ciklin e rigjenerimit të organizmit njerëzor dhe bollëkun. Në Islam është nëna e Allahut dhe mbron gratë dhe fëmijët duke luftuar kundër anktheve dhe zhgënjimeve të dashurisë.

Peshku
Domethënia: fekondimi
Funksioni: ndihmon në rimëkëmbjen e miqësive dhe përmirëson pjellorinë
Origjina:Greqia
Në botën mesdhetare është shenjë fatsjellëse e bollëkut dhe e pjellorisë, ndërsa në Indi ka kuptimin e dijes sepse zoti Visnu i mishëruar tek një peshk, i shpëtoi njerëzit nga përmbytjet ndërsa Shiva e veshur si një njeri-peshk, u mësoi atyre jogën.

Dhëmbi
Domethënia: pushtet, forcë
Funksioni:garanton fitimin në lojë
Origjina: Afrika
Vjen nga një sens respekti dhe frike ndaj kafshëve mishngrënëse. Është një hajmali e fuqishme që rregullon forcën fizike, kurajon dhe suksesin. Sjell fat për ata që merren me lojra të rrezikshme të cilat kërkojnë kurajo.

Tërfili katërgjethësh
Domethënia: fat
Funksioni: sjell fat në të gjitha fushat
Origjina: Shtetet e Bashkuara
Në qoftë se tërfili i thjeshtë sjell fat, është i paimagjinueshëm ndikimi i atij me katër fletë që Eva vodhi nga kopshti i Edenit para se të dëbohej për shkak të mollës së famshme. Katër gjethet e tij përfaqësojnë katër drejtimet por dhe katër gjërat më të dëshiruara nga njeriu: suksesin, dashurinë, shëndetin dhe fatin.

Bretkosa
Domethënia: pjellori
Funksioni: përmirëson seksualitetin, dashurinë dhe favorizon rigjallërimin.
Origjina: Egjipti
Prej ari apo qeramike blu, është një simbol antik i pjellorisë dhe i rilindjes. Dea Rana në Egjipt, ishte dea që favorizonte lindjet por edhe dashurinë. Që nga momenti që lindte nga uji si Afërdita garantonte mbrojtje për ata që braktiseshin nga një njeri i dashur, dhe mbronte shtëpinë me të gjithë banuesit e saj.

Rrota
Domethënia: rastësia, fati
Funksioni: ndihmon në trasformimin dhe në rigjallërim
Origjina: India
Është një simbol shumë i qartë i fatit që trasformon gjithçka pra asgjë nuk mbetet e njëjtë, gjithçka lind e vdes, duke u ringjallur gjithmonë sipas një cikli të vazhdueshëm. Është simboli i diellit me të gjitha rrezet e tij të jetës, shëndetit, dijes dhe fatit që sidoqë të shkojë rrjedha e jetës, është gjithmonë gati të na ndihmojë.

Gjarpri
Domethënia: përjetësi, rilindje
Funksioni: shton fuqinë, favorizon shërimin, shëndetin dhe vazhdimësinë
Origjina: Egjipti
Një kundërvënie e një simbolizmi të dyfishtë; syrit të keq dhe shërimit, është emblema e vdekjes pas së cilës vjen ringjallja. Jo rastësisht gjarpri e ndërron herë pas here lëkurën duke përkuar me ciklin e ndryshimit të gjërave. Në Egjipt Kobra ishte simbol i faraonit dhe ishte vënë si ornament në kurorën e tij, si shenjë e fuqisë së tij.

Megjithatë përsëri janë të shumta dyshimet për ndikimin e objekteve të ndryshme në jetën tonë. Diçka e parëndësishme deri para pak minutash mund të kthehet në diçka jetike; apo diçka shumë e rëndësishme për të tjerët mund të na duket fare e rëndomtë. Shumëkush besimin tek objekte të ndryshme e shikon në oponencë me besimin tek Zoti, por me sa duket nuk është e vërtetë, mund të besosh tek të dy dhe të ndjehesh i mbrojtur nga të dy ose mund të mos besosh tek asnjëri dhe të ndjehesh i mbrojtur nga fuqia e emrit tënd….Gjithçka mund të ndodhë, një kryq që ndoshta të bën të njohur, të tjerë që dhe pa atë kryq janë të njohur, një gur i veçantë që të jep siguri… Gjithçka mund të ndodhë…