DURRES/ Bie në rrjetën e peshkimit në afërsi të Kepit të Rodonit

Një peshkaqen 3 kuintalë ka rënë në rrjetat e peshkatarëve, jo shumë larg brigjeve të Durrësit.

Anëtarët e ekuipazhit të anijes së peshkimit “Karmela II” janë habitur kur kanë parë specien e rrallë për ujërat tona.

Ata kanë mundur që me anë të forcës ta nxjerrin peshkaqenin nga uji, për në anije dhe më pas ta hedhin në breg. Shumë kureshtarë janë mbledhur përreth peshkaqenit, i cili ishte 3 metra i gjatë, ndërsa peshonte 300 kilogramë. Peshkatarët thonë se bëhet fjalë për një peshkaqen çekiç, kafshë deti grabitqare dhe shumë i rrezikshëm për njerëzit. Sipas ekuipazhit, anija e tyre, “Karmel II”, ndodhej në afërsi të Kepit të Rodonit, 12 milje larg bregut, kur ata kanë parë rrjetën që u tendos dhe u drodh nga një forcë që vinte nga thellësia. Në kohën kur peshkaqeni ka rënë në rrjetë mësohet se thellësia ka qenë rreth 150 metra, që për ekspertët është shumë e cekët për një kafshë të tillë. Peshkatarët e vjetër thonë se një peshkaqen çekiç mund të afrohet pranë bregut vetëm në kohën kur nuk gjen ushqim në thellësi të ujërave. Por, nëse nuk gjen ushqimin e përshtatshëm, atëherë shënjestra e tij mund të bëhen njerëzit. Megjithatë, rrjeta e peshkimit nuk ka bërë që peshkaqeni t´i afrohet më tepër bregdetit të Adriatikut, të mbipopulluar në këtë sezon pushuesish, ç’ka mund të shkaktonte panik të madh te ta. Tashmë, fati i tij është caktuar nga peshkatarët, të cilët janë shprehur se do ta konsumojnë mishin e grabitqarit të detit. “Nëse i hiqet amoniaku, atëherë mishi i këtij peshkaqeni është shumë i mirë për t´u konsumuar”, shprehet një nga peshkatarët që ka qenë i pranishëm në kapjen e peshkaqenit të rrallë.

Dy peshkaqenë u kapën vitin e shkuar përgjatë bregdetit të Durrësit. Njëri prej tyre ishte peshkaqen tigër, ndërsa tjetri për çudi ishte pa dhëmbë në gojë. I pari( me një gjatësi mbi 2 metër dhe peshë rreth 280 kg) ngordhi pas përplasjeve me barkën, gjatë kohës që po tërhiqej nga rrjeta. Ky rast u shënua në 19 korrik të vitit 2003, ndërsa një tjetër peshkaqen u gjet 2 muaj më parë. Në mes të muajit maj të vitit të shkuar, një peshkatar nga Golemi zbuloi në rrjetën e tij një peshkaqen, rreth 4 metër i gjatë. Por i çuditshëm ishte fakti që kafsha e madhe dhe mishngrënëse nuk kishte asnjë dhëmbë në gojë. I zoti i peshkaqenit e copëtoi atë në vend, duke e shitur me kile në treg.