Nëse teza e historianit të artit, italianit Karlo Pedreti do të vërtetohet, atëherë piktura e Maria Magdalenës do ta linte në hije “Xhokondën”, kryeveprën e Leonardo Da Vinçit.
Maria Magdalena shfaqet në pikturë me gjoksin jashtë. Në dorë mban një rrobë të kuqe ndërsa tërheq një pëlhurë transparente mbi pjesën e barkut.

Piktura “Maria Magdalena” e ekspozuar së fundmi në Ankona, një pikturë 58x45 është rikthyer sërish në vëmendjen e studiuesve. Sipas Karlo Pedretit, kjo Mari Magdalenë, që tërheq një vello të tejdukshme për të mbuluar kraharorin e saj të zhveshur është pikturuar nga Da Vinçi, katër vjet para vdekjes së tij.

Deri më tani është thënë se kjo vepër i përket nxënësit të Da Vinçit.Piktura ka mbajtur deri tani firmën e Xhanpietrinos dhe ka qenë e ekspozuar në muzetë më të mëdhenj të botës. “Jam fort i bindur se duke parë cilësinë e pikturës, dalloj më shumë dorën e mësuesit se sa të nxënësit”, shprehet Karlo Pedreti, drejtori i qendrës “Armand Hammer” që merret me studimin e veprës së Da Vinçit në universitetin e Los Anxhelosit. “Për autorësinë e veprës më duhen edhe studime të tjera, dhe këtë jam gati ta provoj. Kjo tablo paraqet një punim të Xhanpietrinos, por cilësia e kalon talentin e tij”, thotë më pas studiuesi. Karlo Pedreti dëshiron që kjo pikturë t'i nënshtrohet një studimi specifik në laborator për të parë edhe etapat e ndryshme të zhvillimit. “Nëse do të arrijmë të zbulojmë edhe fazat përgatitore të tablosë, kjo do të ishte shumë e rëndësishme, pasi Da Vinçi e ka shumë të veçantë këtë fazë”, këmbëngul studiuesi. Ai shton se ashtu si “Xhokonda” dhe “Maria Magdalena” është e pikturuar në gjethe plepi.

Piktura e “Maria Magdalenës” është zbuluar rreth një shekull më parë dhe deri tani ka qenë në duart e koleksionistëve privatë. Tabloja ka qenë për pak kohë e ekspozuar në Shtetet e Bashkuara në vitin 1949 dhe sot është pronë e një shoqërie koleksionesh zvicerane. Nëse zbulohet se “Maria Magdalena” është vepër e tij, atëherë të konfiromohej si nudoja e dytë e piktorit, pas veprës “Leda dhe mjelma”.

Mari Magdalena- shenjtore apo mëkatare e penduar
Edhe dy mijë vjet më pas, Mari Magdalena na tërheq, na mbush me pasion, na turbullon. Që nga fillimi i kristianizmit, figura e saj ka qenë në qendër të shumë studimeve. Në Mesjetë në shumë kisha ajo ishte shenjtëruar, shumë pelegrinë faleshin mbi reliket e saj. Evangjelistët thonë se është një mëkatare e penduar, një prostitutë, motra e Martës dhe Llazarit, ajo që i dha Jezusit një parfum të çmuar. Në trupin e saj kishin hyrë demonët, por Jezusi e shpëtoi.

“Leda dhe mjelma” – nudoja e parë e da Vincit
Në vitin 1503, Leonardo Da Vinçi do të pikturojë kryeveprën e tij, portretin më të njohur në të gjithë historinë e artit: Xhokondën. Dhjetë vjet më pas ai do të pikturojë, një nga pikturat më sensuale të Rilindjes “Leda dhe Mjelma”. Personazhi i Ledës i përket modelit të “tetë kokave”, e përshtatshme për artin klasik të marrë edhe nga Leonardi.

Trupi i saj është në një pozë të plogësht, sensuale, duke theksuar mbështetjen në një anë (pjesa anash e përkulur dhe trupi i mbështetur në një këmbë). Leda kërkon përkëdheljen e mjelmës që e mbështjell me krahët e saj; trungu i saj është gjysmë i përkulur mbi mjelmën, duke vënë në dukje gjoksin, si dhe lëvizjen e shkathët të krahut, me dorën që përkëdhel qafën e mjelmës. Në këtë pikturë kemi të shprehur një dëshirë posesiviteti, që zbulohet edhe gjatë legjendës. Dy të dashuruarit shtojnë me lëvizjet dhe shprehjet e tyre, duke i dhënë dhe nota seksuale krijimit. Duke parë fytyrën e mjelmës, duket si ajo e një të rrituri që po shijon një skenë erotike. Vetëm fytyra e Ledës, me një buzëqeshje enigmatike si ajo e Xhokondës, nuk të lënë asnjë mbresë. Buzëqeshja e saj tregon një ftohtësi përpara ngjarjeve që mund të ndodhin. Por megjithatë as këto efekte, as vlerësimet erotike nuk mund të zbulohen me një shikim të parë. Bukuria mbresëlënëse e kësaj tabloje, përjashton çdo lloj sensacioni, përveç dëshirës së thjeshtë për të kundruar një vepër estetikisht të përkryer.

Imazhe te Ngjitura

	maria-magdalena1.jpg (8.4 KB, 3 vezhgime)
	maria-magdalena2.jpg (8.6 KB, 2 vezhgime)
	maria-magdalena3.jpg (6.1 KB, 2 vezhgime)

__________________
The heaven's sound is composed inside your heart, listen to its beat to syncronize your life onto the angel's steps.