Transmeton Ebu Davudi dhe Tirmidhiu nga Ebu Derda, radijallahu anhu, se Pejgamberi, sal-lallahu alejhi ve sel-lem, ka thënë: “Kush niset për në rrugë duke kërkuar dije, All-llahu do t'ia lehtësojë rrugën për në Xhennet. Vërtet edhe melekët ia shtijnë krahët kërkuesit të diturisë nga kënaqësia me veprën e tij. Për dijetarin falje kërkon çdo gjë në qiej dhe në tokë, e madje edhe peshqit në ujë. Vlera e dijetarit ndaj robit të devotshëm është sikur që është vlera e hënës ndaj të gjithë yjeve tjerë (ngase rrezja e hënës për tokën është më e fuqishme). Vërtet dijetarët janë trashëgimtarë të pejgamberëve; pejgamberët nuk kanë lënë trashëgimi dinarë as dirhemë, por ata kanë lënë për trashëgimi dijen, prandaj kush e merr, ka marrë hisen më të bollshme.”

Dobitë e diturisë janë të shumta dhe të mëdhaja, e ne do t’i cekim disa prej tyre:
1- Dituria të bën dëshmitarë të All-llahut, për të dëshmuar se Ai është një dhe nuk meriton të adhurohet askush pos tij.
All-llahu i Madhërishëm thotë: “All-llahu vërtetoi se nuk ka zot tjetër përveç Tij, e dëshmuan edhe engjëjt e dijetarët, dhe se Ai është Zbatues i drejtësisë. Nuk ka zot përveç Tij, Fuqiplotit e të Urtit.” [Ali Imran: 18]
2- Dituria të bën trashëgimtar të Pejgamberit Muhammed, sal-lallahu alejhi ve sel-lem, andaj sa më shumë që din nga feja islame, aq më shumë ke trashëguar nga trashëgimia e Pejgamberit, sal-lallahu alejhi ve sel-lem.
Pejgamberi, sal-lallahu alejhi ve sel-lem, ka thënë: “Vërtet dijetarët janë trashëgimtarë të pejgamberëve; pejgamberët nuk kanë lënë trashëgimi dinarë as dirhemë, por ata kanë lënë për trashëgimi dijen, prandaj kush e merr, ka marrë hisen më të bollshme.”
3- Dituria bën që të nderohesh nga melekët.
Pejgamberi, sal-lallahu alejhi ve sel-lem, ka thënë: “Vërtet edhe melekët ia shtijnë krahët kërkuesit të diturisë nga kënaqësia me veprën e tij.”
4- Për të diturin kërkon falje çdo krijesë madje edhe peshqit në ujë.
Pejgamberi, sal-lallahu alejhi ve sel-lem, ka thënë: “Për dijetarin falje kërkon çdo gjë në qiej dhe në tokë, e madje edhe peshqit në ujë.”
Parashtrohet pyetja: Pse të kërkojë falje peshku për dijetarin?
Përgjigja: Dobia e dijetarit përfshin çdo gjë, deri edhe peshkun. Dijetarët nëpërmjet dijes bën të njohur se çfar është hallall dhe çfar është haram, dhe këshilluan për sjellje të mirë me të gjitha gjallesat deri edhe me kafshën e therur (kurbanin) dhe me peshkun. All-llahu i Madhërishëm i inspiroi të gjithë gjallesat që të kërkojnë falje për to si shpërblim për punën e tyre të mirë.
All-llahu i Madhërishëm thotë: “Për shkak të veprave (të këqija) të njerëzve, janë shfaqur në tokë e në det të zeza, e për ta përjetuar ata një pjesë të asaj të keqeje që e bënë, ashtu që të tërhiqen (nga të këqijat).” [Rum: 41].
Në këtë ajet fisnik All-llahu na lajmëron se për shkak të mëkateve të njerëzve u përhapën trazirat në tokë dhe në det, e dijetarët janë ata që njerëzit i ndalojnë nga veprat e këqija, për këtë shkakë edhe peshqit në det kërkojnë falje për dijetarët, në mënyrën e tyre.
5- Dituria e bën besimtarin më me vlerë në këtë botë dhe e ngritë në grada më të larta në Xhennet.
Pejgamberi, sal-lallahu alejhi ve sel-lem, ka thënë: “Vlera e dijetarit ndaj robit të devotshëm është sikur që është vlera e hënës ndaj të gjithë yjeve tjerë.” Kjo kështu, sepse hëna ka ndriçim shumë më të madhë për tokën se sa yjet. Kështu pra, edhe dijetari ka ndriçim më të madhë për njerëzit se sa besimtari i thjeshtë.
All-llahu, subhanehu ve teala, thotë: “All-llahu i lartëson ata që besuan prej jush, i lartëson në shkallë të lartë ata të cilëve u është dhënë dituri. All-llahu është i njohur mirë me atë që punoni.” [Muxhadele: 11].
Ibën Abbasi, radijallahu anhu, duke e komentuar këtë ajet thotë: “Dijetarët janë më lartë se besimtarët (e thjeshtë) 700 gradë, dhe ndërmjet dy gradave distanca është 500 vite.”
Sufjan Ibën Ujejne ka thënë: “Postin më të lartë tek All-llahu e kanë ata që i njohin më së miri raportet mes All-llahut dhe robërve të Tij, e ata janë Pejgamberët dhe Dijetarët.”
6- Prej dobive të diturisë është shtimi i devotshmërisë dhe rritja e imanit.
All-llahu, subhanehu ve teala, thotë: “(A jobesimtari e ka gjendjen më të mirë) Apo ai që kohën e natës e kalon në adhurim, duke bërë sexhde, duke qëndruar në këmbë, i ruhet (dënimit të) botës tjetër dhe shpreson në mëshirën e Zotit të vet? Thuaj: “A janë të barabartë ata që dinë dhe ata që nuk dinë?” Po, vetëm të zotët e mendjes marrin mësim.” [Zumer: 9].
Poashtu All-llahu i Madhërishëm thotë: “Po All-llahut ia kanë frikën nga robërit e Tij vetëm dijetarët, All-llahu është mbi gjithçka, është mëkatfalës.” [Fatir: 28].
Abdullah Ibn Mesudi, radijallahu anhu, ka thënë: “Shenjë e mjaftueshme e devotshmërisë është dituria, ndërsa shenjë e mjaftueshme e mendjemadhësisë është padituria.”
Hasan el-Basriu ka thënë: “Sikur mos të ishin dijetarët njerëzit do të bëheshin si egërsirat.”
Muadh Ibn Xhebeli, radijallahu anhu, ka thënë: “Mësojeni dijen, pasi mësimi i saj për hir të All-llahut është devotshmëri, kërkimi i saj është adhurim, egzaminimi i saj është xhihad, të mësuarit atij që nuk e din është sadaka, të mësuarit e familjes afrimitet. Ajo është shoqëruesi në vetmi.”
Fet’h el-Musilij tha: “Nëse nuk i japim të sëmurit as ushqim, as pije dhe as ilaçe, a nuk është i destinuar të vdesë? I thanë: Po. Tha: Gjithashtu edhe zemrës nëse i ndalohet urtësia dhe dija për tre ditë, ajo do të vdesë.”
Llukmani i urtë e këshilloi djalin e tij duke i thënë: “O biri im: Ulu pranë dijetarëve me thjeshtësi dhe shoqëroi ato, sepse All-llahu i ringjall zemrat me dritën e urtësisë siç ringjall tokën e shkretë me ujin e shiut.”
7- Dituria është shenjë se All-llahu ia don të mirën atij personi.
Pejgamberi, sal-lallahu alejhi ve sel-lem, ka thënë: “Kujt i dëshiron All-llahu mirë, ia mundëson që ta kuptojë fenë” [Buhariu dhe Muslimi]. Pra, sa më shumë që e njeh islamin, kjo është shenjë se All-llahu ta don të mirën. Dituria është kriter për atë të cilin e do All-llahu, e jo pasuria, fama apo pozita. All-llahu të mirat e kësaj bote ia jep atij që e do dhe atij që nuk e do, mirëpo fenë ia jep vetëm atij që e do.
8- Dituria shkakton që shpërblimi i atij personi të vazhdoj edhe pas vdekjes së tij, nëse pas veti ka lënë dituri e cila u bën dobi njerëzve, qoftë ajo me shkrim apo nëpërmjet nxënësve të cilët ai i ka mësuar.
Pejgamberi, sal-lallahu alejhi ve sel-lem, ka thënë: “Kur njeriu vdes, veprat e tija ndërpriten, pos në tre raste: nëse pas vete ka lënë sadaka rrjedhëse, dituri të cilën e shfrytëzojnë të tjerët dhe fëmijë të ndershëm i cili do të lutet për të.” [Muslimi].Omer Islami

__________________
Nobody is perfect ...